RÄ Hesu xki zabi hänge bi ntsaya ha rä hyo nꞌa poso ha Samäria, mientra nuꞌu̱ yä de̱ni bi ma bä tai te xä zi. Nuni ꞌme̱hñä ñäui rä Hesu xpi ehe pa dä yꞌatꞌi rä dehe. Rä Hesu bi ꞌñembi: “Rꞌaki nꞌa tu̱i ri dehe gä tsi”.

Nuni ꞌme̱hñä himi kamfri ge rä Hesu xki nzofo. ¿Gi pädi por hanja? Ngeꞌä rä Hesu mrä judio, ha nuni ꞌme̱hñä mrä samäritanä. Ndunthi yä judio mi u̱tsa yä samäritano. ¡Nixi mi nzofo! Pe rä Hesu mi mädi gatꞌho yä jäꞌi. Rä Hesu bi ꞌñembi näꞌä ꞌme̱hñä: “Mu̱ gi pähmä näꞌä toꞌo aꞌi rä dehe, nuꞌmu̱ go xkä yꞌapäbi, ꞌne näꞌä xä rꞌaꞌi näꞌä dehe uni rä te”.

Näꞌä ꞌme̱hñä bi dädi: “Zi hmuu, nunä poso xä ñhee, ꞌne hingi hñä ko te gi yꞌai. ¿Habu̱ ma gi tini näꞌä dehe uni rä te?”.

Rä Hesu bi ꞌñenä: “Mu̱ nuꞌi gi tsi rä dehe de nunä poso, ma dä zu̱ꞌi rä nduthe mänꞌaki. Pe näꞌä dehe di uni, dä za dä uni rä te pa nzäntho”.

Näꞌä ꞌme̱hñä bi ꞌñenä: “Zi hmuu, ¡rꞌaki de näꞌä deheꞌä! Pa njabu̱ nunka dä zu̱kä rä nduthe, ꞌne ya nunka gä ehe gä hätsꞌi rä dehe ha nunä poso”.

Näꞌä ꞌme̱hñä mi hurämu̱i ge rä Hesu mi ñä de näꞌä xa mäjuäni rä dehe uni rä te. Pe rä Hesu mi ñä de näꞌä xa mäjuäni de Äjuä ꞌne de rä tsꞌu̱tꞌhui. Ngeꞌä nunä, dä za dä uni rä te pa nzäntho.

Nubye̱, rä Hesu bi ꞌñembäbi näꞌä ꞌme̱hñä: “Ri ma guä nzofo ri däme”.

Näꞌä ꞌme̱hñä bi dädi: “Nuga hinte ma däme di pe̱ꞌtsi”.

Rä Hesu bi ꞌñenä: “Mäjuäni näꞌä gä mää. Pe xkä pe̱ꞌtsi ku̱tꞌa ri däme, ha näꞌä ñꞌo̱ho̱ gi ꞌmu̱huibye̱ hixkä nthäti kongeꞌä”.

Näꞌä ꞌme̱hñä himi tsa dä kamfri ngeꞌä rä Hesu xki mää näꞌä mäjuäni. ¿Hanja bi bädi rä Hesu? Äjuä go geꞌä xki xipi. Hää, rä Hesu geꞌä rä Tꞌu̱ Äjuä, ꞌne bi huahni pa bä pe̱hni ha rä Xiꞌmhai. Mi mengi nuꞌu̱ yä de̱ni rä Hesu, himi kamfri ge rä Hesu mi ñäui nꞌa samäritanä.

¿Te utkägihu̱ nunä thogi? Ge rä Hesu di mädi gatꞌho yä jäꞌi. Nuju̱ ꞌnehe pe̱ꞌtsi te gä te̱mbäbihu̱ rä kꞌoi rä Hesu, ꞌne hingä handihu̱ xä ntsꞌo nuꞌu̱ yä jäꞌi de märꞌa yä rasa. Rä Hesu ne ge gatꞌho yä jäꞌi dä bädi näꞌä xa mäjuäni pa dä za dä me̱ꞌtsi nꞌa rä te pa nzäntho. ¿Hänge di nehu̱ gä fatsꞌihu̱ yä jäꞌi pa dä bädi näꞌä mäjuäni de Äjuä?