¿GI PÄDI te mä tsꞌo tꞌo̱tꞌe bi thogi? Bi tho Juan Bautista. Erodias näꞌä rä ꞌme̱hñä Erodes, xa mi u̱tsa Juan. ꞌNe bi hyoni hanja bi japi, pa njabu̱ Erodes bi mända bi the̱kuäbi rä yꞌu̱ga Juan.

Mi bädi Hesu näꞌä xki thogi, xa bi durämu̱i ꞌne bi ma nꞌambu̱se̱, pe yä jäꞌi bi de̱ni. Mi hyandi rä Hesu nuꞌu̱ yä jäꞌi mi de̱ni, bi hueki. Hänge bi mu̱di bi xipi de rä tsꞌu̱tꞌhui Äjuä ꞌne bi yꞌo̱the nuꞌu̱ mi hñeni.

Näꞌä xuiꞌä, nuꞌu̱ yä de̱ni bä ehe ꞌne bi ꞌñembi: “Ya bi ndee ꞌne di yꞌohu̱ ha nꞌa luga yabu̱, pe̱hni nuyu̱ yä jäꞌi pa dä tai te dä zi”.

Pe rä Hesu bi ꞌñenä: “Hingä mähyoni dä ma dä ntai, go dä umbäbihu̱ te dä zi”. ꞌNepu̱ rä Hesu bi yꞌambäbi Felipe: “¿Habu̱ dä za gä taihu̱ yä thuhme pa gatꞌho nuyu̱ yä jäꞌi?”.

Felipe bi dädi: “Pa gä taihu̱ ndunthi yä thuhme ma dä ja mꞌe̱di ndunthi rä bojä, ha ho̱nse̱ nꞌa zi xe̱ni ma gä umbäbihu̱ kada nꞌaa”. Andres bi ꞌñenä: “ꞌMakua nꞌa tsꞌu̱ntꞌu̱ di hñä ku̱tꞌa yä thuhme ꞌne yoho yä peskado. Pe sänguꞌä ma dä uadi pa gatꞌho nuyu̱ yä jäꞌi”.

Rä Hesu bi ꞌñenä: “ꞌÑembäbihu̱ yä jäꞌi ge dä hñudi ha yä tꞌe̱i”. ꞌNepu̱ rä Hesu bi umbi njamädi Äjuä po näꞌä ñhuni ꞌne bi heke nuꞌu̱ yä thuhme. Nuꞌu̱ yä de̱ni bi mu̱di bi umbi te dä zi gatꞌho nuꞌu̱ yä jäꞌi. Mi 5,000 yä ñꞌo̱ho̱, ꞌne märꞌa yä mꞌo nuꞌu̱ yä ꞌme̱hñä ꞌne yä bätsi. Gatꞌho bi ñuni asta bi niñä. Nuꞌmu̱ nuꞌu̱ yä de̱ni rä Hesu bi muntsꞌi näꞌä bi bongi, ¡bi ñutsꞌi 12 yä ꞌmo̱tsꞌe!

Rä Hesu bi ꞌñembi nuꞌu̱ yä de̱ni ge xä yu̱tꞌi ha nꞌa barko pa xä rꞌani näꞌä ndehe de Galilea. Ha näꞌä xuiꞌä bi nja nꞌa däta bu̱nthi ꞌne yä dehe bi mu̱di bi huäꞌtsi näꞌä barko. Nuꞌu̱ yä de̱ni rä Hesu xa bi ntsu. Ha mäde rä ꞌme̱xui nuꞌu̱ bi hyandi nꞌa toꞌo mi xä mani mi yꞌo mäñä ha yä dehe. Nuꞌu̱ bi mafi ko rä ntsu ngeꞌä hingä mi pädi te mi rä me̱ꞌä.

Rä Hesu bi ꞌñenä: “¡Go geki, ogi tsuhu̱!”. Nuyu̱ tobe himi kamfri, hänge Pedro bi ꞌñembi: “Zi hmuu, mu̱ go geꞌi, ꞌme̱pkägi gä yꞌo ha yä dehe pa gä mabu̱ habu̱ gi yꞌo”. Rä Hesu bi dädi: “¡Guä ehe!”. Nubye̱, Pedro bi bo̱ni de näꞌä barko, ¡ꞌne bi mu̱di bi ñꞌo mäñä de yä dehe! Pedro bi ntsu ꞌne bi mu̱di bi yu̱i ha yä dehe, pe rä Hesu bi matsꞌi bi bo̱ni.

Mꞌe̱fa, rä Hesu bi ꞌuini mänꞌaki ndunthi yä mꞌo yä jäꞌi ko ho̱nse̱ yoto yä thuhme ꞌne nꞌa hängutho yä peskado. Gatꞌho yä jäꞌi bi ñuni xä ñho. ¿Hänge xa di johyahu̱ nuꞌmu̱ di handihu̱ hanja rä Hesu bi matsꞌi yä jäꞌi? ¡Xti mända rä Hesu, hinte mä dumu̱i ma gä pe̱ꞌtsihu̱!