¿GI HANDI nuni ñꞌo̱ho̱ udi nuni däta tso̱o̱ xa di hue̱xki? Nuyu̱ yä ñꞌo̱ho̱ mi nehe yä tso̱o̱, ꞌne xpi ꞌñehe de ha Mbo̱xhyadi. Mi hyandi nuni tso̱o̱ bi hñuyämu̱i ge ma xä zitsꞌi ko nꞌa jäꞌi näꞌä xa mi ja rä nsu.

Mi zo̱ni nuꞌu̱ yä ñꞌo̱ho̱ ha Jerusalen bi ñꞌani: “¿Habu̱ de gekua ꞌmu̱i näꞌä bätsi ma dä zo̱ho̱ dä ndä de nuꞌu̱ yä judio? Dä hanthe rä tso̱o̱ ha Mbo̱xhyadi hänge dä ehe pa gä ndänehe”. Beni, yä israelita ꞌnehe mi tꞌembi «yä judio».

Mi bädi Erodes näꞌä ndä de Jerusalen, xa bi nkue̱. Ngeꞌä himi ne ge mänꞌa jäꞌi xä zo̱ho̱ xä mända. Hänge bi yꞌambäbi nuꞌu̱ yä däta majhä: “¿Habu̱ ma dä mꞌu̱i näꞌä ndä tꞌenä ge ma dä zo̱ho̱?”. Nuꞌu̱ yä majhä bi dädi: “Rä Mäkä Tꞌofo mää ge ha Belen”.

Hänge Erodes bi mändabi nuꞌu̱ yä ñꞌo̱ho̱ xpi ꞌñehe de Mbo̱xhyadi: “Ri maha guä honihu̱ näꞌä bätsi. Xki tinihu̱, guä penju̱ pa gi xikägihu̱. Nuga ꞌnehe di ne gä ndänegaꞌä”. Pe Erodes, ¡mi ne dä dini näꞌä zi bätsi pa xä hyo!

Nuni tso̱o̱ bi neki mänꞌaki nuꞌmu̱ nuyu̱ yä ñꞌo̱ho̱ bi bo̱ni de Jerusalen. Näꞌä tso̱o̱ bi mꞌe̱tꞌo de nuꞌu̱ yä ñꞌo̱ho̱ asta bi zo̱ni ha Belen, ꞌne bi gohi ha mi ꞌmu̱i näꞌä zi bätsi. Mi yu̱tꞌi nuꞌu̱ yä ñꞌo̱ho̱ ha näꞌä nguu, bi dini Märia ko rä zi Hesu. Nuꞌu̱ yä ñꞌo̱ho̱ bi gu̱ki yä regalo pa bi umbi rä Hesu. Pe mꞌe̱fa Jeoba bi ꞌñembi nuꞌu̱ yä ñꞌo̱ho̱ ha nꞌa tꞌi ge hinxä mengi ko Erodes. Hänge nuꞌu̱ bi gu̱ mänꞌa ꞌñuu ꞌne bi mengi pa ha yä hnini.

Mi yꞌo̱de Erodes ge nuꞌu̱ yä ñꞌo̱ho̱ ya xki mengi pa ha yä nguu, xi bi nkue̱. Hänge bi mända ge dä tho gatꞌho nuꞌu̱ yä zi bätsi mi pe̱ꞌtsi yo nje̱ya pa ri gäi. Pe Jeoba bi xipi Jose ha nꞌa rä tꞌi ge xä zitsꞌi Märia ꞌne rä zi bätsi pa Ejipto. Mꞌe̱fa, nuꞌmu̱ Jose bi yꞌo̱de ge Erodes ya xki du, bi zitsꞌi Märia ꞌne rä zi bätsi pa Näsaret. Ja gehni bi te rä Hesu.

¿Gi pädi toꞌo bi japi bi nheki näꞌä tso̱o̱? Beni, näꞌä tso̱o̱ bi zitsꞌi nuꞌu̱ yä ñꞌo̱ho̱ pa bi ma mꞌe̱tꞌo ha Jerusalen. Rä Zithu, näꞌä tꞌembi Diablo mi ne dä hyopäbi rä Tꞌu̱ Äjuä, ꞌne mi pädi ge Erodes, näꞌä ndä de Jerusalen ma xä hyoni hanja xa hyo rä Hesu. Hänge rä Zithu, pe̱ꞌtsi te go bi japi bi nheki näꞌä tso̱o̱.