NUNI ñꞌo̱ho̱ di ndandiñähmu gehni Esteban, nꞌa rä de̱ni rä Hesu mi ꞌmu̱i ngu mi ne Äjuä. ¡Pe hyandi te thogi! Nuyu̱ yä ñꞌo̱ho̱ bi gu̱ yä däta do pa bi kꞌahni. ¿Por hanja nuyu̱ yä ñꞌo̱ho̱ xa mi u̱tsa Esteban? Ma gä handihu̱.

Äjuä mi fatsꞌi Esteban pa mi ja yä milagro. Nuyu̱ yä ñꞌo̱ho̱ himbi ho ꞌne bi zu̱i Esteban ngeꞌä mi uti yä jäꞌi näꞌä mäjuäni. Pe Äjuä bi umbi ndunthi rä mfädi Esteban pa njabu̱ nuni bi za bi ꞌñudi ge nuyu̱ yä ñꞌo̱ho̱ hingä xki ꞌñudi näꞌä mäjuäni. Hänge nuyu̱ mänꞌa xa bi nkue̱ ꞌne bi gu̱ Esteban, ꞌnepu̱ bä tsꞌii rꞌa yä jäꞌi pa bi mää yä nkꞌuamba o yä nhemhñä de Esteban.

Nubye̱, näꞌä däta majhä bi yꞌambäbi: “¿Xa mäjuäni näꞌä mhää de geꞌi?”. Esteban bi bädi bi dädi ko rꞌa yä noya de rä Mäkä Tꞌofo. ꞌNe mi uadi bi ꞌñenä ge xki mꞌu̱i rꞌa yä tsꞌo ñꞌo̱ho̱ nuꞌu̱ xki u̱tsabi yä mꞌe̱hni Äjuä. ꞌNepu̱ bi ꞌñenä: “Gi njahu̱bu̱ ꞌnehe. Gä hyohu̱ rä Hesu, näꞌä rä mꞌe̱hni Äjuä, ꞌne hixkä yꞌo̱tehu̱ yä mhända Äjuä”.

Mi yꞌo̱de njabu̱ nuꞌu̱ yä majhä, ¡asta bi guxti yä tsꞌii ko yä kue̱! Esteban bi hyandi pa mähetsꞌi ꞌne bi ꞌñenä: “¡Hyandihu̱! Di handi rä Hesu ꞌmai ha rä ñꞌe̱i Äjuä”. Mi yꞌo̱de njabu̱ nuꞌu̱ yä ñꞌo̱ho̱, bi goti yä gu, ꞌne bi pe̱ntꞌi Esteban pa bi gu̱ki de rä hnini yä nju̱tꞌitho.

Nuyu̱ yä ñꞌo̱ho̱ bi hñäki yä hee ꞌne bi umbi nuni ñꞌo̱ho̱ mi rä thuhu Saulo pa bi su. ¿Gi handi habu̱ ꞌmai Saulo? ꞌNepu̱ nuyu̱ yä ñꞌo̱ho̱ bi mu̱di bi kꞌahni Esteban. Ja ngu gi handi, Esteban bi ndandiñähmu ꞌne bi xatuäbi Äjuä: “Zi Dada Jeoba, ogi kastiga nuyu̱ yä jäꞌi po näꞌä o̱tkägi”. Esteban mi pädi ge nuꞌu̱ yä majhä xki hyatꞌi nuyu̱ yä jäꞌi. Mi uadi bi mää njabu̱, Esteban bi du.

Xiꞌmu̱ nꞌa jäꞌi o̱tꞌäꞌi rä ntsꞌomꞌu̱i, ¿gi o̱tpäbi rä ntsꞌomꞌu̱i ꞌnehe, o gi apäbi Äjuä dä kastiga näꞌä jäꞌi? Nixi Esteban nixi rä Hesu bi me̱fi njabu̱. Nuyu̱ bi ñhojäꞌi asta ko nuꞌu̱ yä jäꞌi bi ntsꞌomꞌu̱i kongehyu̱. ¿Hänge di ne gä njahu̱bu̱ ꞌnehe?