NGU dä pädihu̱, mꞌe̱fa de bi ma Pedro ꞌne Juan de habu̱ xki ntꞌagi rä Hesu, Märia Magdalena bi gose̱ni ꞌne bi mu̱di bi nzoni. Mi hyandi pa mboo, ¡bi hyandi yoho yä e̱nxe̱! Nuꞌu̱ yä e̱nxe̱ bi yꞌambäbi: “¿Por hanja gi zoni?”.

Märia bi dädi: “Bi thätsꞌi rä ndoyꞌo mä zi Hmuu ꞌne hindi pädi habu̱ bä tsꞌogi”. Nubye̱ Märia bi ñegi ꞌne bi hyandi nꞌa ñꞌo̱ho̱. Näꞌä ñꞌo̱ho̱ bi ñꞌani: “¿Toꞌo gi honi?”.

Märia mi hurämu̱i ge näꞌä ñꞌo̱ho̱ geꞌä mi su näꞌä lugaꞌä ꞌne go geꞌä xki hñätsꞌi rä ndoyꞌo rä Hesu. Hänge bi ꞌñembäbi: “Mu̱ go gä hñätsꞌi, xikägi habu̱ guä tsogi”. Näꞌä ñꞌo̱ho̱ mi geꞌä rä Hesu. Märia himbi bädi toꞌoꞌä. Pe nuꞌmu̱ näꞌä ñꞌo̱ho̱ bi nzofo po rä thuhu, Märia bi bädi ge mi geꞌä rä Hesu. Märia bi nextꞌi bi ma bä embäbi nuꞌu̱ yä apostol: “¡Dä handi rä zi Hmuu!”.

Mꞌe̱fa, mientra yoho yä de̱ni rä Hesu bi ma pa ha rä hnini Emäus, ha ꞌñuu nꞌa ñꞌo̱ho̱ bi zu̱di ꞌne bi ma kongeꞌu̱. Nuꞌu̱ yä de̱ni xa mi tuyämu̱i ngeꞌä xki du rä Hesu. Mientra mi yꞌo, näꞌä ñꞌo̱ho̱ bi mu̱di bi xipi te ri bo̱ni ndunthi de nuꞌu̱ yä noya hutsꞌi ha rä Mäkä Tꞌofo. ꞌNe nuyu̱ yoho yä de̱ni rä Hesu bi zamäñho. Nuꞌmu̱ bi ntsaya pa xä ñuni, nuꞌu̱ bi da ngue̱nda ge näꞌä ñꞌo̱ho̱ mi geꞌä rä Hesu. Pe rä Hesu nse̱kitho bi mꞌe̱di, ꞌne nuꞌu̱ yoho yä de̱ni rä Hesu bi mengi pa Jerusalen pa bä xipäbi yä apostol näꞌä xki thogi.

Mientra mi thogi njabu̱, rä Hesu bi ñꞌudi ꞌnehe ko Pedro, ꞌne mi yꞌo̱de njabu̱ nuꞌu̱ märꞌa yä apostol xa bi johya. Mi zo̱ni ha Jerusalen, nuꞌu̱ yoho yä de̱ni xki hyandi rä Hesu, bi dini nuꞌu̱ yä apostol ꞌne bi xipäbi ge ha ꞌñuu xki hyandi rä Hesu. Pe mientra mi pede njabu̱, ¿gi pädi te mä däta tꞌo̱tꞌe bi thogi?

Hyandi rä kꞌoi. Nse̱kitho, rä Hesu bi nheki mäske rä goxthi mi jotꞌi. ¡Nuꞌu̱ yä de̱ni xa bi johya! Ndunthi yä hogä tꞌo̱tꞌe bi thogi näꞌä paꞌä. ¡Rä Hesu bi ñꞌudi ku̱tꞌa mꞌiki ko nuꞌu̱ yä de̱ni näꞌä paꞌä!

Tomas hingä mi yꞌoni nuꞌmu̱ rä Hesu bi ñꞌudi. Hänge nuꞌu̱ yä de̱ni rä Hesu bi ꞌñembäbi: “¡Dä hanthe rä zi Hmuu!”. Pe Tomas bi ꞌñenä ge ma xä gamfri asta nuꞌmu̱ xä hyandäse̱. Nde, rä hñätoꞌä, yä apostol bi ntini mänꞌaki ha nꞌa kuarto mi jotꞌi. Nubye̱, Tomas mi yꞌoni ꞌnehe. Nse̱kitho, rä Hesu bi ñꞌudi. Nubye̱ hää, Tomas bi gamfri ge rä Hesu mi te.