BI THOGI yä pa, ꞌne rä Hesu bi sigi bi ñꞌudi ndunthi yä mꞌiki ko yä de̱ni. Nꞌa rä pa, 500 nuꞌu̱ yä de̱ni bi hyandi. Nuꞌmu̱ bi ñꞌudi rä Hesu, ¿gi pädi te bi xipi nuꞌu̱ yä de̱ni? Bi xipi de rä tsꞌu̱tꞌhui Äjuä. Jeoba bä pe̱hni rä Hesu ha rä Xiꞌmhai pa bi ꞌñudi de näꞌä rä Tsꞌu̱tꞌhui. ꞌNe geꞌä bi sigi bi me̱fi rä Hesu nuꞌmu̱ bi nangi de rä du.

¿Gi beni te rä me̱ꞌä rä tsꞌu̱tꞌhui Äjuä? Geꞌä xa mäjuäni rä tsꞌu̱tꞌhui Äjuä bi ja ha mähetsꞌi. Äjuä bi huahni rä Hesu pa dä mända ha näꞌä tsꞌu̱tꞌhuiꞌä. Ja ngu dä pädihu̱, rä Hesu bi ꞌuini nuꞌu̱ yä jäꞌi mi tsu̱di rä thuhu, bi yꞌo̱the nuꞌu̱ mi hñeni, ꞌne asta bi gu̱tsꞌi nuꞌu̱ xki du. ¡Njabu̱ bi ꞌñudi ge näꞌä xa nꞌa hogä ndä!

¿Gi pädi te ma dä thogi ha rä Xiꞌmhai nuꞌmu̱ xti mända rä Hesu ha mähetsꞌi po nꞌa mꞌo yä je̱ya? Hää, gatꞌho rä Xiꞌmhai ma dä zo̱ho̱ dä uädri. Ma dä mꞌe̱di yä tuhni, yä thote, yä hñeni, ꞌne rä du. Di pädihu̱ ge ma dä njabu̱ ngeꞌä Äjuä bi hyoki rä Xiꞌmhai pa xä zo̱ho̱ xä uädri ꞌne pa ja xä mꞌu̱hni yä jäꞌi ko rä johya. Porängeꞌä bi hyoki näꞌä rä uädri Eden. Hänge xti mända rä Hesu ma dä me̱fi ja ngu ne Äjuä.

Po 40 yä pa, rä Hesu bi ñꞌudi ko yä de̱ni. Nuyu̱ bi bädi ge rä Hesu xki nangi de rä du. Pe nubye̱ bi zo̱ho̱ rä ora pa rä Hesu xä mengi mähetsꞌi. Pe änte dä ma bi ꞌñembi yä de̱ni: “Kohihu̱ ha Jerusalen asta nuꞌmu̱ gi hñänihu̱ rä espiritu santo”. Rä espiritu santo geꞌä rä mäkä tsꞌe̱di pe̱ꞌtsi Äjuä, ja ngu nuꞌmu̱ di huitꞌi rä ndähi. Gehnä ma xä matsꞌi yä de̱ni rä Hesu pa xä me̱päbi rä bolunta Äjuä. Pa ri uadi rä Hesu bi ꞌñembi nuꞌu̱ yä de̱ni: “Ma gi dahu̱ mäjuäni de geki ha gatꞌho rä ngu̱ni rä Xiꞌmhai”.

Mi uadi bi mängä njabu̱, bi thogi nꞌa däta tꞌo̱tꞌe. Ja ngu gi handi, rä Hesu bi mu̱di bi bo̱tsꞌe pa mähetsꞌi, bi juti nꞌa gui, ꞌne nuꞌu̱ yä de̱ni ya himbi za bi hyandi. Rä Hesu bi mengi mähetsꞌi ꞌne dende gehni bi mu̱di bi mända nuꞌu̱ yä de̱ni nuua ha rä Xiꞌmhai.