NUNI tsꞌu̱ntꞌu̱ gi handi ñäui Pablo rä thuhu Timoteo. Timoteo mi ꞌmu̱i ko rä familia ha Listra. Rä nänä mi rä thuhu Eunise ꞌne rä xuxu mi rä thuhu Loida.

Kongehnä ya hñu mꞌiki xki zo̱ho̱ Pablo nuua ha Listra, pe nubye̱ mi ñꞌoui Silas. Xki thogi ngu nꞌa nje̱ya nuꞌmu̱ po rä mu̱di rä mꞌiki Pablo xki zo̱ho̱ ha nunä hnini ko Bernäbe pa bi ꞌñudi rä Noya Äjuä.

¿Gi pädi te xipi Pablo nuni Timoteo? Pablo mi ambäbi: “¿Gi ne gi ma kongeki ꞌne Silas pa gi faxkägihe gä utihe rä Noya Äjuä nuꞌu̱ yä jäꞌi bi ꞌmu̱i yabu̱?”.

Timoteo bi dädi: “Hää di ne gä ma”. Hänge himbi thogi ndunthi yä pa, nubye̱ Timoteo bi zoogi rä familia ꞌne bi ma ko Pablo ꞌne Silas. Pe änte gä pädihu̱ de näꞌä biahe bi yꞌo̱tꞌeyu̱, ma gä handihu̱ te xki thogi Pablo.

Ya xki thogi 17 yä je̱ya dende nuꞌmu̱ rä Hesu bi nzofo Pablo. Beni, Pablo mi yꞌo pa Damäsko pa mi honi nuꞌu̱ yä de̱ni rä Hesu pa te xä yꞌo̱tpäbi. Pe nubye̱, ¡Pablo ꞌnehe ya mi rä de̱ni rä Hesu! Mꞌe̱fa, rꞌa yä jäꞌi mi honi Pablo pa xä hyo. Pe rꞌa de nuꞌu̱ yä de̱ni rä Hesu bi matsꞌi Pablo ꞌne bi yꞌe̱ntꞌi ha nꞌa däta ꞌmo̱tsꞌe pa bi käꞌmi po ha yä jädo rä hnini ꞌne njabu̱ bi za bi bo̱ni.

Mꞌe̱fa, Pablo bi thogi ha Antiokia pa bi ꞌñudi rä Noya Äjuä. Ja gekua bi mu̱di bi tꞌembi yä cristiano nuꞌu̱ yä de̱ni rä Hesu. ꞌNepu̱ Pablo ꞌne Bernäbe bi tꞌembi dä ja nꞌa biahe dende Antiokia asta nuꞌu̱ yä hnini mi kohi xa yabu̱ pa xä ꞌñudi rä Noya Äjuä. ꞌNe njabu̱ bi zo̱ni ha Listra habu̱ mi ꞌmu̱i Timoteo.

Nubye̱, ngu nꞌa nje̱ya mꞌe̱fa, ha rä yoho rä biahe, Pablo bi mengi pa Listra. Geꞌmu̱ Timoteo bi me̱ui Pablo ꞌne Silas, ¿gi pädi pa habu̱ bi ma? Hyandi rä mäpa pa gä pädihu̱.

Mꞌe̱tꞌo bi ma pa Ikonio getbu̱ de Listra, ꞌnepu̱ bi ma pa ha mänꞌa hnini mi tꞌembi ꞌnehe Antiokia. Mꞌe̱fa bi ma pa Troas, de gehni bi thogi pa Filipos, Tesalonika, ꞌne Berea. ¿Gi handi ha mäpa habu̱ kohi Atenäs? Gehni ꞌnehe Pablo bi ꞌñudi rä Noya Äjuä. ꞌNepu̱ po nꞌa nje̱ya mäde bi ꞌñudi ꞌnehe ha Korinto. ꞌNehe bi gohi rꞌa yä pa ha Efeso. Nubye̱ Pablo bi bo̱tsꞌe ha nꞌa barko pa bi mengi pa Sesarea, ꞌne bi ma pa Antiokia habu̱ bi gohi rꞌa yä pa.

Timoteo bi ñꞌo yä nthebetho yä kilometro pa bi matsꞌi Pablo bi ꞌñudi nuꞌu̱ yä “rꞌayꞌo hogä noya”, ꞌne bi matsꞌi bi hyoki yä mhuntsꞌi. Xi nuꞌi, ¿ma gi pe̱pi xä ñho Äjuä nuꞌmu̱ xki te ngu bi ja Timoteo?