HA RÄ kꞌoi dä za gi hyandi habu̱ ꞌmai Pedro ꞌne rꞌa yä ntsitsꞌi. Pe, ¿por hanja nuni ñꞌo̱ho̱ xä ndandiñähmu ꞌne di ndäne Pedro? ¿Xä ñho dä me̱fi njabu̱? ¿Gi pädi toꞌoni?

Nuni ñꞌo̱ho̱ gehni Kornelio. Mi nꞌa ndä de nuꞌu̱ yä soldado mñä me Romä. Kornelio himi pädi toꞌo Pedro, pe bi tꞌembi ge dä nzohni ha rä nguu. Ma gä handihu̱ hanja bi thogi.

Nuꞌu̱ yä mu̱di de̱ni rä Hesu gatꞌho mi yä judio, pe Kornelio hingä mi rä judio. Pe mi mädi Äjuä, mi xatuäbi ꞌne bi fatsꞌi märꞌa yä jäꞌi. Nꞌa ndee, nꞌa rä e̱nxe̱ Äjuä bi ñꞌudi ko Kornelio ꞌne bi ꞌñembi: “Äjuä xä nuꞌäꞌi xä ñho ꞌne xä yꞌo̱de ri sadi. Pe̱hni rꞌa yä ñꞌo̱ho̱ dä honi Pedro ha rä hnini Jope, ha rä ngu Simon näꞌä ꞌmu̱i ha rä hyo rä ndehe”.

Nubye̱, Kornelio nguntꞌä bi me̱fi näꞌä bi sipi. Rä hyaxꞌä, Pedro xki bo̱xä mäñä ha rä nguu Simon. Ja gehni Äjuä bi japi Pedro bi hyandi nꞌa däta tela bä käi de mähetsꞌi. Ha näꞌä tela mi ku̱ de gatꞌho yä zuꞌue. Ha nuꞌu̱ yä mhända xki tꞌumbi Moises, mi enä ge nuyu̱ yä zuꞌue himi tꞌaxi pa dä tsꞌi, pe Pedro bi yꞌo̱de toꞌo bi ꞌñembi: “Pedro, ju̱ nuyu̱ yä zuꞌue ꞌne hyo pa gi tsi”.

Pedro bi dädi: “¡Hinä! Nunka xtä tsi nuyu̱ yä zuꞌue hingi tꞌaxi”. Pe näꞌä toꞌo mi ñä bi ꞌñenä: “Ogi embi xä ntsꞌo näꞌä xä xu̱ki Äjuä”. Bi thogi njabu̱ po hñu mꞌiki. Mientra Pedro mi ne dä bädi te ri bo̱ni näꞌä xki hyandi, bi zo̱ho̱ nuꞌu̱ yä ñꞌo̱ho̱ xki me̱hni Kornelio.

Pedro bi gäi ꞌne bi ꞌñembi nuꞌu̱ yä ñꞌo̱ho̱: “Nuga gogeki näꞌä ñꞌo̱ho̱ gi honihu̱. ¿Pate xkuä ehu̱?”. Nuꞌu̱ yä ñꞌo̱ho̱ bi xipäbi ge nꞌa e̱nxe̱ xki xipi Kornelio ge dä nzohni Pedro ha rä nguu. Pedro bi mää ge hää dä ma kongeꞌu̱. Rä hyaxꞌä, Pedro ko rꞌa yä ntsitsꞌi bi bo̱ni pa dä nuu Kornelio ha rä hnini Sesarea.

Kornelio xki nzohni yä pariente ꞌne yä ntsitsꞌi. Mi zo̱ni Pedro, Kornelio bi ndandiñähmu ꞌne bi ndäne Pedro ja ngu di handihu̱. Pe Pedro bi ꞌñembi: “ꞌMai, nuga ꞌnehe nꞌa drä ñꞌo̱ho̱ nguꞌi”. Hää, rä Mäkä Tꞌofo udi ge hingi ho gä ndandiñähmuhu̱ ꞌne gä ndänehu̱ nꞌa jäꞌi, ngeꞌä se̱he̱ Jeoba ri ꞌñepi gä xo̱kämbenihu̱.

Nubye̱, Pedro bi ꞌñuti de rä Noya Äjuä nuꞌu̱ yä jäꞌi xki ntini. Pedro bi ꞌñenä: “Di handi ge Äjuä di ho gatꞌho nuꞌu̱ yä jäꞌi ne dä me̱päbi”. ꞌNe mientra Pedro mi ñä, Äjuä bä pe̱hni rä mäkä tsꞌe̱di, ꞌne nuꞌu̱ yä jäꞌi bi mu̱di bi ñä märꞌa yä ñhäki. Nuꞌu̱ yä ntsitsꞌi Pedro mñä judio, himi kamfri näꞌä mi handi, ngeꞌä mi huyämu̱i ge Äjuä mi numäñho se̱he̱ yä judio. Pe nubye̱ bi bädi ge Äjuä di numäñho gatꞌho yä jäꞌi de gatꞌho yä rasa. ¿Hänge xä ñho gä beñhu̱ ge Äjuä di mädi gatꞌho yä jäꞌi?