NUYU̱ yä jäꞌi gi handi, gehyu̱ yä de̱ni rä Hesu. Bi yꞌo̱te rä Hesu ꞌne bi gohi ha Jerusalen. Mientra gatꞌho xki muntsꞌi ꞌne mi to̱ꞌmi, bi ntꞌo̱de nꞌa däta ñu̱ni mbo gatꞌho näꞌä nguu. Mi ngu nꞌa däta bu̱nthi näꞌä bi thogi nguntꞌä. Nubye̱, bi mu̱di bi nheki rꞌa ngu yä tꞌu̱kä faspi ha yä ñäxu gatꞌho nuꞌu̱ yä jäꞌi xki ntini. ¿Gi handi nuyu̱ ngu yä tsibi? ¿Te ri bo̱ni gatꞌho näꞌä bi thogi?

¡Nꞌa milagro! Rä Hesu ya mi ꞌmu̱hui mänꞌaki rä Dada ha mähetsꞌi. Nubye̱ bä pe̱mpäbi rä mäkä tsꞌe̱di Äjuä nuꞌu̱ yä de̱ni. ¿Gi pädi te bi ꞌme̱fi nuyu̱ yä jäꞌi ko rä mfatsꞌi rä mäkä tsꞌe̱di Äjuä? Gatꞌho bi mu̱di bi ñä rꞌa nꞌañꞌo yä ñhäki.

Ndunthi yä jäꞌi de Jerusalen, bi yꞌo̱de näꞌä ñu̱ni mi ngu nꞌa däta bu̱nthi ꞌne bi ma bä handi te mi thogi. Yä israelita mi pe̱ꞌtsi nꞌa ngo mi tꞌembi Pentekostes, ꞌne rꞌa yä jäꞌi xpi ꞌñehe de märꞌa yä hnini pa bi ntini ha näꞌä ngo. ¡Nuꞌu̱ yä zo̱nte himi kamfri näꞌä mi o̱de! Ngeꞌä nuꞌu̱ yä de̱ni rä Hesu mi ñä ngu nuꞌu̱ ꞌne mi mää de gatꞌho nuꞌu̱ yä hogä tꞌo̱tꞌe xki me̱fi Äjuä.

Nuꞌu̱ yä zo̱nte mi enä: “¿Hage hingo gehyu̱ yä me Galilea nuyu̱ di o̱dehu̱ ñä? Nuꞌmu̱, ¿hanja ñä ngu nuju̱?”.

Nubye̱ Pedro bi mꞌai ꞌne bi xipi nuꞌu̱ yä jäꞌi näꞌä mi thogi. Bi ñä ntsꞌe̱di ꞌne bi mää ge rä Hesu xki tho, ꞌne ge Jeoba xki gu̱tsꞌi de rä du. Pedro bi ꞌñenä: “Nubye̱ rä Hesu bi ꞌmu̱i ha mähetsꞌi ꞌne bi hudi ha rä ñꞌe̱i Äjuä. ꞌNe nubye̱ xpä pe̱hni näꞌä rä mäkä tsꞌe̱di Äjuä ja ngu xki mää. Hänge gi handihu̱ thogi nuya yä milagro”.

Mi yꞌo̱de näꞌä bi mängä Pedro, ndunthi de nuꞌu̱ yä jäꞌi xa bi japi bi ntso̱ꞌmi po näꞌä xki tꞌo̱tꞌpäbi rä Hesu, hänge bi ñꞌani: “Xibye̱, ¿te mähyoni gä pe̱fihe?”. Pedro bi dädi: “Pe̱ꞌtsi te gi paatihu̱ ri mꞌu̱ihu̱ ꞌne gi nku̱ꞌmdehehu̱”. Näꞌä paꞌä bi nku̱ꞌmdehe ngu 3,000 yä jäꞌi ꞌne bi mu̱di bi de̱ni rä Hesu.