Imäjinä: Julia di ñotꞌi ha rä ñhee ꞌne ngu handi ge xa xä noho. Näꞌä ense̱: «Pe̱ꞌtsi te gä käi nꞌa hängu kilo», mäske yä dada ꞌne yä amigo xipäbi ge rä delgada.

Nubye̱, Julia di mbeni hindä ñuni xä ñho po rꞌa yä pa, pa dä gäi “nꞌa hängu” kilo.

Mu̱ go di geꞌi Julia, ¿te ma gi pe̱fi?

Xä ñho gi su ri ndoyꞌo ꞌne gi jamäsu ri ꞌmai. Asta rä Mäkä Tꞌofo pede de rꞌa yä ñꞌo̱ho̱ ꞌne yä ꞌme̱hñä nuꞌu̱ mi pe̱ꞌtsi nꞌa rä hogä ꞌmai, ngu Sara, Rakel, Abigail, Jose ꞌne Dabid. ꞌNehe pede ge nꞌa rä ꞌme̱hñä mi rä thuhu Abisag «xa mi tsꞌu̱ngänza» (1 Reyes 1:4).

Pe mäpaya, ndunthi yä bäsjäꞌi xa tuyämu̱i po yä ꞌmai ꞌne ho̱nse̱ꞌä odä ha yä mfeni. Pe dä za dä hämpäbi yä däta xuñha. Hyandäse̱:

• Bi tꞌo̱tpäbi nꞌa rä encuesta rꞌa yä nxutsi, ꞌne rä 58% de geꞌu̱ mi mbeni ge mi xä noho. Pe ho̱nse̱ rä 17% de gehyu̱ xki thogi de yä peso.

• Mä nꞌa rä encuesta bi tꞌo̱tꞌe ko nuꞌu̱ yä ꞌme̱hñä himi tsu̱di yä peso normal. Bi thandi ge rä 45% de geꞌu̱ mi mbeni ge mi xä noho pe hinä.

• Ndunthi de nuꞌu̱ yä bäsjäꞌi xa tuyämu̱i po dä gäi yä peso, xä zo̱ho̱ xä zu̱di nꞌa rä ñheni fädi ngu rä anorexia. Nuꞌu̱ yä bäsjäꞌi tsu̱di nunä ñheni, hingi ne dä ñuni ngeꞌä tsu dä noki. Nunä ñheni asta dä za dä hñäkuäbi yä te yä bäsjäꞌi.

 Mu̱ nuꞌi xkä da ngue̱nda ge ne dä zu̱ꞌi rä anorexia o ngu ya hingi ne gi ñuni, hyoni rä mfatsꞌi. Xipäbi ri dada ꞌne ri nänä näꞌä gi thogi o mä nꞌa rä jäꞌi näꞌä gi pe̱ꞌspäbi rä komfiansa. Rä Mäkä Tꞌofo enä: «Nꞌa rä hogä amigo nzäntho ma dä mäꞌi, ꞌne ꞌñenä geꞌä nꞌa ri ku xä mꞌu̱i pa nuꞌmu̱ ja yä xuñha» (Proverbios 17:17).

Mu̱ nꞌa rä jäꞌi pe̱ꞌtsi nꞌa rä hogä ꞌmai o hinä, näꞌä japi dä nheki xa mähotho geꞌu̱ nuꞌu̱ yä hogä mꞌu̱i pe̱ꞌtsi. Hyandi te udi rä Mäkä Tꞌofo de Absalon, nꞌa de nuꞌu̱ yä tꞌu̱ rä rey Dabid. Rä Mäkä Tꞌofo enä:

«Mi joꞌo mä nꞌa rä ñꞌo̱ho̱ xa mähotho ngu rä ꞌmai Absalon [...]. Dende rä du̱ngua asta rä ndehe xa xmä ñho rä ꞌmai» (2 Samuel 14:25).

Pe rä Mäkä Tꞌofo hingi ñä xä ñho de geꞌä. Ngeꞌä Absalon xa mi rä ꞌñexmänsu, xa mi rä ambisioso ꞌne xa mi rä traisionero. Mäske mi ñꞌetꞌä hojäꞌi pe näꞌä xa mi rä tsꞌomꞌu̱i.

Hänge rä Mäkä Tꞌofo rꞌakägihu̱ nuya yä hogä tsꞌofo:

«ꞌNe nuꞌähu̱ ñhehu̱ ko nꞌa rä rꞌayꞌo hogä mꞌu̱i» (Colosenses 3:10, TNM).

«Ogi he̱gihu̱ ge nuꞌu̱ yä tꞌo̱tꞌe di nheki geꞌu̱ dä nja ngu ri adornohu̱ [...] mänꞌa dä hogi gi hyophu̱ dä nheki näꞌä ja mbo ha ri korasohu̱» (1 Pedro 3:3, 4, TNM).

Mäske xä ñho gi su ri ꞌmai, pe mänꞌa xa mähyoni gi pe̱ꞌtsi yä hogä mꞌu̱i ke nꞌa rä hogä ꞌmai. Nuꞌi ma gi da ngue̱nda ge yä jäꞌi mänꞌa di ho nuꞌu̱ yä hogä mꞌu̱i gi pe̱ꞌtsi, ke ri ꞌmai. Nꞌa rä nxutsi rä thuhu Phylicia bi ꞌñenä: «Mu̱ gi pe̱ꞌtsi nꞌa rä hogä ꞌmai, yä jäꞌi nguntꞌä ma dä hyandi, pe nuꞌu̱ mänꞌa ma dä beni nuꞌu̱ yä hogä mꞌu̱i gi pe̱ꞌtsi».

¿Gi ho te ngu gi nheki?

¿Xkä mbeni gi ꞌmu̱i a dieta ꞌne gi thogi rä thuhu pa gi käi de gä peso?, o ¿xkä mbeni gi ja nꞌa rä operasio ha ri ndoyꞌo pa dä nheki mänꞌa xä ñho ri ꞌmai?

¿Te gi hohmä gi paati de ri ndoyꞌo o ri ꞌmai?

• RI ÑHETSꞌI

• RI PESO

• RI XTÄÄ

• RI NDOYꞌO

• RI HMI

• RI KOLO

Mu̱ nuꞌi gä thädi «hää» ha nuꞌu̱ yoho yä mu̱di ntꞌani, ꞌne gä huahni hñuu o thogi de hñuu yä tꞌo̱tꞌe ha rä ntꞌani hñuu, mähyoni gi beni ge märꞌa yä jäꞌi hingi hantꞌäꞌi ja ngu gi ñhandäse̱ (1 Samuel 16:7).