Imäjinä: Karen bi ma ha nꞌa rä ngo. Pe nixi mi o̱tꞌe rꞌe̱tꞌa minuto de xki zo̱ni, nuꞌmu̱ bi yꞌo̱de ge ja toꞌo mi nzofo:

Karen handi ge go geꞌä rä amiga rä thuhu Jessica, ꞌne di hñä yoho yä serbesa. Jessica di umbäbi nꞌa rä serbesa Karen ꞌne embäbi: «Nuꞌi ya hingrä tꞌu̱kä nxutsi pa gi johya nꞌa tu̱i, ¿o hää?».

Karen hingi ne dä zi näꞌä serbesa ngeꞌä pädi ge tobe hingi jatho rä je̱ya. Pe ꞌnehe, hingi ne ge Jessica dä mbeni ge näꞌä hindi ho dä diberti. ꞌNehe, Karen di mbeni: «Jessica nuni nꞌa rä hogä nxutsi, hänge mu̱ nuni tsi yä serbesa, nuꞌmu̱ zäi ge hingä nꞌa rä tsꞌo tꞌo̱tꞌe». Karen sigi di mbeni: «Ho̱nse̱ nꞌa tu̱i rä serbesa, hingä xa xä ntsꞌo ngu gä tsi yä droga».

Mu̱ go di geꞌi Karen, ¿te ma gi pe̱fi?

Pa gi huahni gi pe̱fi näꞌä xä ñho, mähyoni gi pädi toꞌoꞌi. Nunä di signifika ge mähyoni gi pädi xä ñho te gi kamfri ꞌne por hanja. Njabu̱, ma dä za gi huahnise̱ te gi pe̱fi ꞌne hinto ma gi hyopi dä xiꞌi hanja ri ꞌñehe gi ꞌmu̱i (1 Corintios 9:26, 27).

¿Te dä za dä maxꞌäꞌi pa gi pe̱fi njabu̱? Dä hogi gi thädi nuya goho yä ntꞌani.

Mu̱ gi pädi te mä tꞌo̱tꞌe gi pe̱fi xä ñho ꞌne te mä hogä mꞌu̱i gi pe̱ꞌtsi, mänꞌa ma gi pe̱ꞌtsäse̱ rä komfiansa.

NꞌA RÄ KꞌOI DE RÄ MÄKÄ TꞌOFO. Rä apostol Pablo bi yꞌofo: «Mäske hindi pädi gä mängä yä noya mähotho ngu mäñꞌu̱, pe di pädi ge nuꞌä di mää geꞌä mäjuäni» (2 Corintios 11:6). Ko gatꞌho näꞌä rä mfädi mi pe̱ꞌtsi Pablo de rä Mäkä Tꞌofo, bi matsꞌi pa bi bädi te dä dätuäbi nuꞌu̱ yä nkontra, ꞌne himbi hyopi ge näꞌä mi sipäbi xä japi dä paati näꞌä mi kamfri (2 Corintios 10:10; 11:5).

ÑꞌANISE̱: ¿Te mä tꞌo̱tꞌe di pe̱fi xä ñho?

Nubye̱, mbeni te mä hogä mꞌu̱i gi pe̱ꞌtsi. (Por ejemplo, ¿gi su märꞌaa? ¿Gi uni näꞌä gi pe̱ꞌtsi? ¿Pe̱tsꞌäꞌi rä komfiansa märꞌaa? ¿Gi nzäi gi tso̱tꞌe nꞌitꞌho?)

Nꞌa rä arbol dä za dä nheki ge xa tse̱di, pe mu̱ de mbo ya xä yꞌa, xti zo̱ho̱ nꞌa rä bu̱nthi nguntꞌä ma dä ꞌuagi. Njabu̱ ꞌnehe, mu̱ nuꞌi gi hyopi ge nuꞌu̱ yä debilida gi pe̱ꞌtsi dä gu̱hnä ri te, nsinke gi da ngue̱nda dä za gi pumfri toꞌoꞌi.

NꞌA RÄ KꞌOI DE RÄ MÄKÄ TꞌOFO. Rä apostol Pablo mi pädi te mä debilida mi pe̱ꞌtsi, hänge bi yꞌofo: «Ngeꞌä nugi de ha mä mfeni di ho rä ley Äjuä, pe ja nꞌa rä tsꞌe̱di mä nꞌañꞌo nuꞌä di ndä ha mä ndoyꞌo. Nu rä tsꞌe̱diꞌä di ntunkui mä paha, ꞌne nzäntho jaki gä o̱tꞌä yä tsꞌoki» (Romanos 7:22, 23).

ÑꞌANISE̱: ¿Ndañꞌä nuꞌu̱ yä debilida pe̱ꞌtsi te gä jamäsu?

Xi nuꞌi, ¿ma gi ju̱ nꞌa rä taxi ꞌne gi yꞌapäbi rä chofer dä zixäꞌi pe hingä ma gi xipäbi habu̱ gi ma? ¿Hänge hinä? Ho̱nse̱ nꞌa rä dondo dä me̱fi njabu̱ ꞌne zäi ge ma dä gutꞌi ndunthi rä bojä.

Njabu̱ ꞌnehe, mu̱ hingi pe̱ꞌtsi yä meta, ꞌñenä go gi ju̱u̱ nꞌa rä taxi ꞌne hingi xipäbi rä chofer habu̱ gi ma. Pe mu̱ gi pe̱ꞌtsi yä meta, nuꞌmu̱ gi pädi te gi ne gi pe̱fi ꞌne habu̱ gi ne gi tso̱ni.

NꞌA RÄ KꞌOI DE RÄ MÄKÄ TꞌOFO. Rä apostol Pablo bi yꞌofo: «Drä ma mänjuäntho pa nuni habu̱ ma gä tso̱ni» (1 Corintios 9:26). Rä apostol Pablo mi pädi xä ñho habu̱ mi ne dä zo̱ni ꞌne näꞌä mi ne dä me̱fi, hänge bi yꞌo̱tꞌe ntsꞌe̱di po dä zu̱di ꞌne dä kumpli nuꞌu̱ yä meta mi pe̱ꞌtsi (Filipenses 3:12-14).

ÑꞌANISE̱: ¿Te mä meta di ne gä tsu̱di nunä je̱ya? Yꞌofo hñuu de geꞌu̱.

Mu̱ hingi pädi xä ñho toꞌoꞌi ꞌne te gi kamfri, hingä ma gi pädi gi huahnise̱ te gi pe̱fi. ꞌNe ja ngu rä tsija o camaleón di paati rä kolo, nuꞌi njatꞌä ma gi paati ri mꞌu̱i ho̱nse̱ pa gi kohi xä ñho ko nuꞌu̱ ri amigo. Toꞌo pe̱fi njabu̱, hinxä zo̱ho̱ xä bädi toꞌoꞌä ꞌne te kamfri.

Pe mu̱ gi defende näꞌä gi kamfri, hindä mportaꞌi te dä me̱fi märꞌaa, nuꞌi nzäntho ma gi pädi toꞌoꞌi.

NꞌA RÄ KꞌOI DE RÄ MÄKÄ TꞌOFO. Zäi ge Daniel tobe mi nꞌa rä bäsjäꞌi nuꞌmu̱ bi tsꞌitsꞌi yabu̱ de rä familia. Pe mäske njabu̱, näꞌä «dende ha rä koraso bi huahni» dä yꞌo̱te nuꞌu̱ yä mhända Äjuä (Daniel 1:8). Hää, Daniel mi pädi xä ñho mi toꞌoꞌä, ꞌne nunka bi hyopäbi ge märꞌaa xä japi xä paati näꞌä mi kamfri.

ÑꞌANISE̱: ¿Te di kamfri? Por ejemplo: ¿Di kamfri ge xa mäjuäni ꞌmu̱i Äjuä? ¿Por hanja? ¿Te mä prueba xä jakägi xtä kamfri ge hää ꞌmu̱i?

¿Di kamfri ge nuꞌu̱ yä mhända ꞌne yä tsꞌofo xä uni Äjuä nzäntho pa mä ñhose̱? ¿Por hanja?

Pa ri uadi, ¿te ngu gi ne gi nja: ngu rä xii nꞌa rä arbol näꞌä tuxtho rä ndähi, o ngu nꞌa rä arbol näꞌä xa tse̱di ꞌne mäske dä zo̱ho̱ yä bu̱nthi hindä za dä kꞌu̱tsꞌi? Mu̱ gi ne gi nja ngu nꞌa rä arbol näꞌä xa tse̱di, yꞌo̱tꞌe ntsꞌe̱di po gi defende näꞌä gi kamfri. Geꞌä ma dä maxꞌäꞌi gi thädi nunä ntꞌani: ¿Toꞌogi?