BI THOGI 350 yä je̱ya dende nuꞌmu̱ bi nja näꞌä rä Dängä däyꞌe. Ha rä hnini mrä thuhu Ur, mi ja ndunthi yä bojä ꞌne yä ñho. Mäpaya nunä hnini bi ja ha Irak, ja mi ꞌmu̱ini rä Abran. Nuni mi pe̱ꞌtsuäbi ndunthi rä jamfri Äjuä, geꞌä bi nheki ko näꞌä rä thogi bi me̱ꞌtsi mꞌe̱fa. Ma gä handihu̱ te bi thogi.

Jeoba bi yꞌapi dä zopu̱ rä hai habu̱ xki mꞌu̱i ꞌne bi ꞌñembi dä ma dä mꞌu̱i ha mänꞌa rä hnini mrä thuhu Kanään. Himbi sipi yo mꞌiki, rä Abran ꞌmestho bi yꞌo̱de. Bi gu̱ rä ꞌñuu ko rä ꞌme̱hñä mrä thuhu rä Sara, nꞌa rä ꞌme̱dätsi mrä thuhu rä Lot ꞌne gatꞌho nuꞌu̱ mi ꞌmu̱i ha rä nguu. Mi tso̱ni ha Kanään, habu̱räza bi mꞌu̱i ꞌne yä nguu xki hyoki ko yä dutu. Rä Zi Dada Jeoba bi ja nꞌa rä kohi ko rä Abran: bi ꞌñembi ge po rängehni ma drä jäpi gatꞌho yä mꞌu̱i ja ha rä xiꞌmhai ꞌne nuꞌu̱ yä bätsi ma dä zo̱ho̱ dä hyokise̱ nꞌa rä hnini xi rä dängi ꞌne gatꞌho näꞌä rä hai Kanään ma dä nja pa geꞌu̱se̱he̱.

Rä Abran ꞌne rä Lot bi me̱ꞌtsi yä däta taxo de gä de̱ti ꞌne de gä ndämfri. Rä Abran himrä yꞌu̱ya, hänge bi hyopäbi rä Lot dä xu̱ki näꞌä go bi ne yä hai pa nuꞌu̱ yä mboꞌni mi pe̱ꞌtsi. Rä Lot bi huahni rꞌa yä hai habu̱ mi ja näꞌä rä däthe Jordan, habu̱ xa mi uni yä ꞌmotꞌi ꞌne bä mꞌu̱i getbu̱ de rä hnini Sodomä. Pe nuꞌu̱ yä jäꞌi mi ꞌmu̱hni mi pe̱fi yä tsꞌoki xi xmä ntsꞌo, mi japi dä u̱ rä mfeni Jeoba ko nuꞌu̱ yä tsꞌoki mi pe̱fi.

Mꞌe̱fa Jeoba bi ja nꞌa rä kohi ko rä Abran, bi ñäꞌti ge nuni ma dä me̱ꞌtsi ndunthi yä bätsi ngu yä ndunthi nuꞌu̱ yä tso̱o̱ ja ha mähetsꞌi. Rä Abran hää mi pe̱ꞌtsuäbi rä jamfri Jeoba, pe rä zi ꞌme̱hñä, näꞌä rä Sara himi tsa dä me̱ꞌtsi yä bätsi. Mi me̱ꞌtsi rä Abran 99 yä je̱ya ha rä Sara mi tso̱ꞌte näꞌä 90, Äjuä bi xipi ge ma dä me̱ꞌtsi nꞌa rä bätsi. Njabu̱ bi thogi: bi me̱ꞌtsi nꞌa rä ꞌue̱ne näꞌä bi tꞌembi rä Isaak. Mäske rä Abran bi me̱ꞌtsi märꞌa yä bätsi, Jeoba bi mää ge näꞌä rä Ñänte xki mängä ha rä uädri Eden ge ma dä me̱hni, bi mää ge ma dä ehe de ha nuꞌu̱ yä bätsi rä Isaak.

Rä Lot ꞌne rä mꞌu̱i bi sigi bi mꞌu̱ ha rä hnini Sodomä. Näꞌä mrä hojäꞌi hänge himbi de̱nduäbi yä mꞌu̱i xä tsꞌo nuꞌu̱ yä jäꞌi de gehni. Hänge nuꞌmu̱ bi mängä Jeoba ge ma dä huati rä hnini Sodomä, mꞌe̱tꞌo bi me̱hni yä e̱nxe̱ pa dä xipäbi rä Lot. Bi sipi ge dä dämä bo̱ni de gehni ko rä mꞌu̱i ꞌne bi tꞌembi ge hindä ñegi ninꞌa de gehyu̱. Äjuä bi japäbi dä dagi de ha mähetsꞌi yä tsibi ko rä asufre pa bi huati nuꞌu̱ yä tsꞌomꞌu̱i jäꞌi mi ꞌmu̱i ha rä hnini Sodomä ꞌne ha rä hnini Gomorra. Rä Lot ꞌne yä tꞌixu bi kꞌotꞌi de rä du. Pe näꞌä rä ꞌme̱hñä rä Lot bi ñegi, zäge mi hyo̱ke dä zoogi gatꞌho näꞌä mi pe̱ꞌtsi. Nuni bi du ngeꞌä himbi yꞌo̱de näꞌä xki sipi.

(Ehe ha rä Génesis 11:10–19:38.)