¿HANJA bi fädi toꞌo rä Mesia? Äjuä bi matsꞌi yä jäꞌi pa bi bädi toꞌoꞌä. Ma gä handihu̱ te bi me̱fi. Mi o̱tꞌe 400 yä je̱ya näꞌä xki uadi bi tꞌofo rä Ndäxjua Testamento, nubye̱ nꞌa rä e̱nxe̱ mrä thuhu rä Gabriel bi ma bä tso̱ni rä Märia, nꞌa rä nxutsi mi ꞌmu̱i ha Näsaret ha rä norte de Galilea. Rä e̱nxe̱ Gabriel bi xipi rä Märia ge ma xä me̱ꞌtsi nꞌa rä zi ꞌue̱ne. Rä Märia hixki nthäti, pe näꞌä rä e̱nxe̱ bi ꞌñenä ge ko näꞌä rä mäkä tsꞌe̱di Äjuä, rä Märia ma dä ndatꞌhi. Nunä rä zi bätsi gehnä rä Ndä xki mängä Jeoba ge ma dä zo̱ho̱ dä mända pa nzäntho, gehnä rä mu̱di Tꞌu̱ rä Zi Dada mi ꞌmu̱hui ha mähetsꞌi pe nubye̱ bä pe̱hni dä mꞌu̱i ngu nꞌa rä zi ꞌue̱ne ha rä mu̱i rä Märia.

Rä Märia bi dädi ꞌne bi ꞌñenä ge ma dä me̱fi gatꞌho näꞌä dä xipäbi Äjuä. Äjuä bi me̱hni nꞌa rä e̱nxe̱ pa duä zofo rä Jose nꞌa rä ñꞌo̱ho̱ mrä yaxi näꞌä ya xki yꞌadi rä Märia pa dä nthätui. Näꞌä rä e̱nxe̱ bi ꞌñembi rä Jose ge dä nthätui rä Märia. Ma gä benihu̱ ge rꞌa yä mꞌe̱hni Äjuä xki mää ge rä Mesia ma dä mꞌu̱i ha rä hnini Belen, nunä rä hnini mi kohi 140 yä kilometro de ha rä hnini Näsaret (Miqueas 5:2). Nuꞌmu̱ ¿hanja ja ma di mꞌu̱ini rä Hesu?

Mꞌe̱fa, nꞌa rä ndä de ha rä hnini Romä bi mändabi gatꞌho yä jäꞌi dä ma duä yꞌofo yä thuhu ha yä hai habu̱ xki mꞌu̱i. Po̱de nuꞌu̱ yä jäꞌi rä Jose ꞌne rä Märia mñä mengu ha rä hnini Belen, hänge nuyu̱ bi ma bä ofo yä thuhu ha näꞌä rä hnini, hänge ja bä mꞌu̱ini rä zi ꞌue̱ne rä Märia (Lucas 2:3). Ha yä ngu yä ndämfri ja bi mꞌu̱ini rä Hesu, bi ꞌmantꞌi ꞌne bi tꞌe̱ntꞌi ha nꞌa rä motsa. Getbu̱ habu̱ mi ja nꞌa rä bonthi, ndunthi yä e̱nxe̱ bi ma bä tsu̱di rꞌa yä mayꞌo ꞌne bi xipi ge ja xki uadi xki mꞌu̱i rä Mesia, o rä Kristo.

Bi mꞌu̱pu̱ märꞌa yä jäꞌi nuꞌu̱ bi mää ge rä Hesu go geꞌä rä Mesia xki mängä Jeoba ge ma dä zo̱ho̱. Näꞌä rä mꞌe̱hni Äjuä mrä thuhu rä Isaias xki mää ge ma dä mꞌu̱pu̱ nꞌa rä jäꞌi näꞌä ma dä ungä ntꞌo̱de de näꞌä rä ꞌme̱fi ma dä ja rä Kristo (Isaías 40:3). Näꞌä rä jäꞌi go geꞌä rä Juan Bautista. Nꞌa rä pa, mi hyandi rä Hesu bi ꞌñenä: «Hyandi, rä Tꞌu̱kä De̱ti Äjuä näꞌä häki rä tsꞌoki ha rä xiꞌmhai!». Nubye̱, ndunthi de nuꞌu̱ yä de̱ni rä Juan bi dämä gamfri rä Hesu. Nꞌa de geꞌu̱ bi mää: «Stä tinihu̱ rä Mesia» (Juan 1:29, 36, 41, NM).

Bi mꞌu̱pu̱ mänꞌa toꞌo bi mää ge rä Hesu go geꞌä mrä Mesia. Nuꞌmu̱ rä Juan bi matsꞌi bi nku̱ꞌmdehe rä Hesu, Jeoba ko rä mäkä tsꞌe̱di bä ñä dende mähetsꞌi ꞌne bi mää ge xki huahni rä Hesu pa go geꞌä drä Mesia, bi ꞌñenä: «Nuni go gehni mä hmäkä Tꞌu̱, ꞌne xi di hopä rä mꞌu̱i» (Mateo 3:16, 17). ¡Nubye̱ hää go geꞌä rä Mesia xki zo̱ho̱!

¿Hämꞌu̱ bi zo̱ho̱ rä Mesia? Bi zo̱ho̱ ha näꞌä rä je̱ya 29, näꞌä rä pa bi uadi nuꞌu̱ 483 yä je̱ya xki mängä rä Daniel. Nuya gehya nꞌa hängutho yä thogi habu̱ udi ge rä Hesu hää go geꞌä rä Mesia. Xi nubye̱, ¿te mä hogä noya ma dä uni ntꞌo̱de rä Hesu nuua ha rä Xiꞌmhai?

(Ehe ha rä Mateo ha yä ntheke 1 asta 3, rä Marcos rä ntheke 1, rä Lucas rä ntheke 2 ꞌne ha rä Juan rä ntheke 1.)