¿PATE bä ehe rä Hesu nuua ha rä Xiꞌmhai? Rä Hesu bi mää: «Mähyoni [...] gä mängä [...] rä tsꞌu̱tꞌhui Äjuä [pa geꞌä] xpä ꞌme̱nꞌkägi» (Lucas 4:43, Ár ꞌRaꞌyo Nkohi Jö, [RN]). Ma gä handihu̱ nuꞌu̱ goho yä ntꞌudi bi mängä Ñhesukristo de rä Tsꞌu̱tꞌhui Äjuä. Gehnä mänꞌa bi ꞌñuti yä jäꞌi.

1. Rä Hesu bi mää ge ma dä Ndä. Näꞌä bi mänse̱ ge go geꞌä mrä Mesia (Juan 4:25, 26). ꞌNehe bi mää ge go mi geꞌä näꞌä rä Ndä xki hyandi rä Daniel ha nꞌa rä tꞌi. Rä Hesu bi ꞌñembi nuꞌu̱ yä apostol (nuꞌu̱ yä de̱ni mi ñꞌoui nzäntho) ge nꞌa rä pa, «ma dä hñudi [kongeꞌu̱] ha rä mäkä hudi ko ngatꞌho rä nsunda», go geꞌu̱ yä mu̱di jäꞌi bi xu̱ki rä Hesu pa dä mända kongeꞌä ha mähetsꞌi (Mateo 19:28, NM). Nuyu̱ yä jäꞌi hingä ndunthi, hänge rä Hesu bi ꞌñembi mrä «zi tꞌu̱kä taxo». ꞌNehe bi mää ge mi pe̱ꞌtsi «märꞌa yä [zi] de̱ti» nuꞌu̱ hindä ma ha mähetsꞌi dä mända kongeꞌä (Lucas 12:32; Juan 10:16).

2. Rä Tsꞌu̱tꞌhui Äjuä ma dä mända ngu ri ꞌñehe. Rä Hesu bi mää ge rä Tsꞌu̱tꞌhui Äjuä ma dä hñäki näꞌä rä tsꞌomꞌu̱i xi rä dängi bi ja rä Zithu kontra rä thuhu Äjuä. ¿Hanja ma dä ja? Rä Tsꞌu̱tꞌhui Äjuä ma dä numänsu ꞌne ma dä xu̱kuäbi rä thuhu Jeoba de gatꞌho nuꞌu̱ yä nkꞌuamba ꞌne yä ntsꞌante xä sipi dende nuꞌmu̱ bä fu̱di ha rä uädri Eden (Mateo 6:9, 10). ꞌNehe rä Kristo bi ꞌñudi ge ha rä Tsꞌu̱tꞌhui Äjuä, Jeoba ma dä mädi gatꞌho yä jäꞌi. Rä Hesu geꞌä bi me̱fi, bi ꞌñuti rä Noya Äjuä dende yä ñꞌo̱ho̱, yä ꞌme̱hñä, nuꞌu̱ mi jabi ndunthi yä bojä ꞌne nuꞌu̱ mñä zi hyoya, pe himbi huahnitho yä jäꞌi. Mäske bä ꞌme̱hni pa dä ꞌñuti yä israelita, bi ja gatꞌho näꞌä bi za pa bi matsꞌi ꞌnehe yä samäritano ꞌne yä jäꞌi de märꞌa yä hnini. Rä Hesu himi njabu̱ ja ngu nuꞌu̱ yä makhä mi huahnitho toꞌo dä ꞌñuti ha toꞌo hinä.

3. Rä Tsꞌu̱tꞌhui Äjuä hingä rä menguua ha rä xiꞌmhai habu̱ di mända rä Zithu. Rä Hesu bi mꞌu̱ ha nuꞌu̱ yä pa mi ja ndunthi yä tuhni, ngeꞌä nꞌa rä ndä mrä nzo̱ho̱ go mi mända näꞌä rä hnini Israel. Rä Hesu himi ku̱tꞌi ha nuꞌu̱ yä tuhni (Juan 6:14, 15). Nꞌa rä pa bi ꞌñembäbi nꞌa rä ndä: «Nu mä tsꞌu̱tꞌhuiga hingä rä menguua [ha rä xiꞌmhai]» (Juan 18:36). Ha nuꞌu̱ yä de̱ni bi ꞌñembäbi: «Pe nuꞌähu̱ hingyä me̱tiꞌihu̱ rä xiꞌmhai» (Juan 15:19). ꞌNehe nꞌa rä pa, nuꞌu̱ yä de̱ni ma xä ñäni rä Hesu, pe rä Hesu himbi hyopi dä gu̱ yä däjuai, bi ꞌñembi ge hinxä ñho dä ntuhni (Mateo 26:51, 52).

4. Ha rä Tsꞌu̱tꞌhui Äjuä, rä Kristo ma dä mända ko rä mhäte. Rä Hesu bi mää ge ma dä matsꞌi gatꞌho nuꞌu̱ yä de̱ni ꞌne ma dä hñäkuäbi gatꞌho nuꞌu̱ yä dumu̱i (Mateo 11:28-30). Rä Hesu geꞌä bi me̱fi. Bi umbä yä hogä tsꞌofo nuꞌu̱ yä de̱ni pa dä matsꞌi nuꞌmu̱ pe̱ꞌtsi yä dumu̱i, pa dä bädi dä ntsiꞌtsꞌiui märꞌaa, pa dä zu̱di rä johya ꞌne pa dä bädi te dä me̱fi pa hindä mädi ndunthi rä bojä (Mateo, yä ntheke 5 asta 7). Rä Hesu bi ꞌñudi rä mhäte. Gatꞌho yä jäꞌi, asta nuꞌu̱ mñä zi hyoya mi ho dä ma dä tsu̱di, ngeꞌä nuyu̱ mi pädi ge rä Hesu nzäntho mi uni rä mhäte ꞌne rä tꞌekꞌei. ¿Toꞌo hingi ne dä me̱ꞌtsi nꞌa rä ndä njabu̱?

Rä Hesu bi ꞌñudi näꞌä te ma dä me̱fi ha rä Tsꞌu̱tꞌhui Äjuä, hänge bi ja ndunthi yä milagro. ¿Te bi ꞌñudi kongeꞌu̱? Ma gä handihu̱.

(Ehe ha rä mfistꞌofo Mateo, rä Marcos, rä Lucas ꞌne ha rä Juan.)