RÄ Hesu mi hudi ha nꞌa rä mbonthi de gä ꞌmo Olibo habu̱ mi nheki xä ñho rä hnini Jerusalen ꞌne rä templo, nuꞌu̱ goho yä apostol bi ma bä tsu̱di ꞌne bi ꞌñembäbi ge dä xipi te ri bo̱ni nuꞌu̱ rꞌa yä noya xki mää. Rä Hesu ja xki uadi xki mää ge näꞌä rä templo ma drä yo̱ꞌte, ꞌne ge «ma dä uadi nuꞌu̱ yä tsꞌo tꞌo̱tꞌe ja ha rä xiꞌmhai» (Mateo 13:40, 49, NM). Hänge nuꞌu̱ yä apostol bi ñꞌani: «¿Hämꞌu̱ ma dä thogi gatꞌho näꞌä xkä mää, ꞌne te mä señä ma gä hanthe, pa njabu̱ gä pähe hämꞌu̱ gi mꞌu̱kua ꞌne hämꞌu̱ ma dä uadi nuꞌu̱ yä tsꞌo tꞌo̱tꞌe ja ha rä xiꞌmhai?» (Mateo 24:3, NM).

Rä Hesu bi dädi ꞌne bi mää te ma dä nheki änte drä huati Jerusalen ꞌne rä templo. Nuꞌu̱ yä tꞌo̱tꞌe bi mängä rä Hesu ge ma dä thogi himbi nheki se̱he̱ ha nuꞌu̱ yä pa, mꞌe̱fa bi nheki ꞌnehe ha gatꞌho rä xiꞌmhai. Rä Hesu bi mää ge ma dä nheki ndunthi yä thogi ha gatꞌho rä xiꞌmhai. Gehnä nꞌa rä señä näꞌä ma dä ꞌñudi ge rä Kristo bi mu̱di bi Ndä ha mähetsꞌi. Nunä rä señä ꞌnehe ma dä ꞌñudi ge Jeoba ya bi umbi rä Hesu rä koronä de gä Ndä de näꞌä rä Tsꞌu̱tꞌhui Äjuä, näꞌä ma dä hñäki gatꞌho yä ntsꞌomꞌu̱i ꞌne ma dä hä nꞌa rä hogä mꞌu̱i pa gatꞌho rä mexiꞌmhai. Sti nheki näꞌä rä señä bi mängä rä Hesu, ma gä pädihu̱ ge mänꞌitꞌho ma dä uadi nuꞌu̱ yä gäxä pa, yä tsꞌu̱tꞌhui, yä jamfri hingä mäjuäni ꞌne gatꞌho nuꞌu̱ yä mꞌu̱i xä ntsꞌo. Nunä rä señä udi ꞌnehe ge fu̱di di nheki nꞌa rä rꞌayꞌo xiꞌmhai.

Rä Hesu bi mää ge sti mu̱di dä mända ha mähetsꞌi, ma dä nheki ha gatꞌho rä Xiꞌmhai yä dängä tuhni, yä thuhu, yä mbiꞌmhai ꞌne yä ñheni. Ma dä mꞌe̱di rä tꞌekꞌei pa ko nuꞌu̱ yä tsꞌu̱tꞌhui. Pe nuꞌu̱ mäjuäni yä gamfri, ma dä ungä ntꞌo̱de de rä Tsꞌu̱tꞌhui Äjuä ha gatꞌho rä xiꞌmhai. Nunä rä señä bi mängä rä Hesu ma dä gätsꞌi ko nꞌa rä «tsꞌo thogi» xi rä dängi näꞌä hinxä nheki (Mateo 24:21).

¿Hanja di bädi nuꞌu̱ yä gamfri ge ma dä ꞌñepu̱ näꞌä rä tsꞌo thogi? Rä Hesu bi ꞌñembäbi nuꞌu̱ yä de̱ni: «Hyandihu̱ nꞌa rä ꞌmai rä igo» (Mateo 24:32, NM). Sti mu̱di dä rꞌoho yä xii, di pädihu̱ ge xä ꞌñepu̱ yä pahyadi. Njabu̱ ꞌnehe, nuꞌmu̱ sti nheki yä pa habu̱ ma dä thogi gatꞌho näꞌä bi mängä rä Hesu, ma dä fädi ge xä dämä ꞌñepu̱ näꞌä rä pa habu̱ ma dä uadi yä gäxä pa. Pe ꞌnehe bi mää ge se̱he̱ Jeoba pädi te mä pa ꞌne te mä ora ma dä mu̱di näꞌä rä tsꞌo thogi. Hänge bi ungä nunä rä tsꞌofo: «Hänge ndo̱ꞌmhu̱ nzäntho [...] ngeꞌä hingi pähu̱ hämꞌu̱ dä zo̱[ho̱ näꞌä] rä ora» (Marcos 13:33).

(Ehe ha rä Mateo ha yä ntheke 24 ꞌne 25, rä Marcos ha rä ntheke 13 ꞌne ha rä Lucas ha rä ntheke 21.)