MI O̱TꞌE ndunthi yä nthebe de gä je̱ya änte dä yu̱tꞌi yä israelita ha rä hnini Kanään, rä Zi Dada Jeoba ya xki mää ge näꞌä rä hai ma xä umbäbi nuꞌu̱ yä bätsi rä Abran. Nubye̱, ko rä mhända rä Josue, mi ꞌme̱di nꞌatu̱kitho pa dä yu̱tꞌi ha näꞌä rä Hogä Hai.

Äjuä bi ꞌñenä ge dä tꞌumbi rä du nuꞌu̱ yä jäꞌi mñä mengu ha Kanään, ngeꞌä mñä hyote ꞌne mi pe̱fi rꞌa yä tsꞌoki xi xmä ntsꞌo. Hänge njabu̱, Jeoba bi xipi yä israelita ge dä huati gatꞌho nuꞌu̱ yä tꞌu̱kä hnini mi ja ha Kanään.

Änte dä mu̱di dä yu̱tꞌi ha Kanään, rä Josue bi me̱hni yoho yä jäꞌi pa duä handi näꞌä rä hai. Nuyu̱ yä jäꞌi bä ku̱tꞌi ha rä hnini Jeriko ꞌne bi tso̱ni ha rä ngu nꞌa rä ꞌme̱hñä mrä thuhu Raab. Mi pädi ge nuꞌu̱ yä jäꞌi mñä israelita hänge bi hyopi dä ñꞌägi ha rä nguu. Rä Raab mi pe̱ꞌtsuäbi rä jamfri Jeoba ngeꞌä xki yꞌo̱de hanja xki su ꞌne xki ñäni rä hnini. Bi ꞌñembi dä hura nuꞌu̱ yä jäꞌi ge hinte dä tꞌo̱ꞌtue nunä rä ꞌme̱hñä ha nixi nuꞌu̱ mi ꞌmu̱i ha rä nguu.

Mꞌe̱fa, yä israelita bi yu̱tꞌi ha Kanään ꞌne bi mu̱di bi hyo nuꞌu̱ yä jäꞌi mi ꞌmu̱i ha Jeriko. Jeoba bi japäbi dä dagi nuꞌu̱ yä jädo, nuꞌu̱ yä ndaro mñä israelita bi huati näꞌä rä hnini, pe rä Raab ꞌne nuꞌu̱ mi ꞌmu̱i ha rä nguu bi bongi. Njabu̱ bi mu̱di nunä tuhni ꞌne bi thogi rꞌato nje̱ya pa ja bi uadi. Rä Josue ꞌne nuꞌu̱ yä ndaro bi hñäni ndunthi yä hnini de näꞌä rä Hogä Hai. Mꞌe̱fa, nuya yä hai bi ñhege nuꞌu̱ yä tꞌu̱kä hnini mi ja ha Israel.

Nꞌa rä pa, änte dä du, rä Josue bi japi dä muntsꞌi gatꞌho yä jäꞌi de näꞌä rä dängä hnini pa bi benduäbi gatꞌho näꞌä xki me̱fi Jeoba po geꞌu̱ ꞌne bi benduäbi ge mähyoni dä sigi dä yꞌo̱te Jeoba. Pe mi du rä Josue ꞌne nuꞌu̱ yä mfatsꞌi, yä israelita bi zopu̱ Jeoba ꞌne bi mu̱di bi xo̱kämbeni märꞌa yä zidada hingä mäjuäni. Bi thogi 300 yä je̱ya, ha nunä rä hnini Israel njatꞌä himi o̱te yä mhända Jeoba. Hänge Jeoba himbi ñäni de yä filisteo ꞌne de märꞌa yä nkontra. Yä israelita nzäntho mi apäbi rä mfatsꞌi Äjuä hänge mi pe̱ntuäbi toꞌo dä ñäni. Jeoba bi me̱hni 12 yä nzaya pa bi ñäni näꞌä rä hnini.

Ha rä Mäkä Tꞌofo ha rä mfistꞌofo Jueces ja hutsꞌini näꞌä bi me̱fi nuꞌu̱ yä nzaya. Bi mu̱di ko näꞌä rä nzaya mrä thuhu Otniel ꞌne bi uadi ko näꞌä rä nzaya xa mi tse̱di mrä thuhu Sanson, himbi mꞌu̱i mänꞌa rä jäꞌi nguni. Nuꞌu̱ yä dängä thogi hutsꞌi ha rä mfistꞌofo Jueces udi nꞌa rä hogä tsꞌofo: ge mu̱ gä o̱tehu̱ rä Zi Dada Jeoba, ma gä hänihu̱ yä jäpi; ha nuꞌmu̱ hingä o̱tehu̱, ma gä pe̱ꞌtsihu̱ yä xuñha.

(Ehe ha rä Josue, rä jueces ꞌne ha rä Levítico 18:24, 25.)