HA Israel bi mꞌu̱ nꞌa rä nzaya mrä thuhu rä Sanson. Mꞌe̱fa bi mꞌu̱ mänꞌa rä nzaya mrä thuhu Samuel, nuni mrä mꞌe̱hni Äjuä. Yä israelita bi yꞌapäbi Äjuä dä umbäbi nꞌa rä ndä ngeꞌä nuꞌu̱ mi ne dä mꞌu̱i ngu nuꞌu̱ märꞌa yä hnini. Jeoba bi u̱ rä mfeni pe hää bi umbäbi näꞌä bi yꞌadi nuꞌu̱ yä jäꞌi, bi xipi rä Samuel dä hñutsꞌi rä Saul de gä ndä. Rä Saul mrä hogä yꞌo̱de, pe mꞌe̱fa bi mu̱di bi ꞌñexä rä nsu ꞌne bi uadi bi ꞌuengi de rä ꞌñuu Äjuä hänge Jeoba bi u̱tsa ꞌne bi xipäbi rä Samuel ge dä hyoni mänꞌa rä ndä, bi ꞌñembi ge dä huahni näꞌä nꞌa rä bäsjäꞌi mrä thuhu rä Dabid. Ndaꞌä hää, bi thogi ndunthi yä je̱ya pa ja bi za bi mända ngu nꞌa rä ndä.

Nꞌa rä pa, rä Dabid bi ma bä tso̱ni yä ku, nuyu̱ mñä ndaro ꞌne xki ma ha nꞌa rä tuhni ko rä Saul. Rä Dabid bi tso̱ni ꞌne bi hyandi hanja nuꞌu̱ yä ndaro mi huätꞌi ko rä ntsu. ¿Por Hanja? Ngeꞌä nꞌa rä ndaro näꞌä hinto xki däpi mi tꞌembi Goliat, mi theni Äjuä ꞌne nuꞌu̱ yä ndaro yä israelita. Mäske rä Dabid mrä bäsjäꞌitho, bi zu̱ ndunthi rä kue̱ hänge bi yꞌadi dä ma dä ntunkui de gä du näꞌä rä Goliat. Rä Dabid bi hñätsꞌi nꞌa rä ntꞌe̱ndo ꞌne nꞌa hängutho yä do, ꞌne bi ma bä tsu̱di näꞌä rä dängä ndaro mi pe̱ꞌtsi ngu hñu metro rä ñꞌetsꞌi. Nuni bi dentho näꞌä rä bäsjäꞌi, pe rä Dabid bi benduäbi ge nuni mänꞌa mi pe̱ꞌtsi konte dä ntuhni, ngeꞌä mi pe̱ꞌtsi rä mfatsꞌi Jeoba. Se̱he̱ ko nꞌatho rä do, rä Dabid bi umbi rä du näꞌä rä Goliat, ꞌnepu̱ bi hñänduäbi rä däjuai ꞌne bi hye̱kuäbi rä ñäxu. Mi hyandi nuꞌu̱ märꞌa yä ndaro mñä filisteo näꞌä te xki me̱fi rä Dabid, bi ma rä nhestꞌihi ko rä ntsu.

Rä Saul bi johya ndunthi ngeꞌä bi hyandi ge rä Dabid himi tsu, hänge bi umbäbi rä Dabid nꞌa rä dängä nsu de gä ndaro. Rä Dabid xa mi täte ha yä tuhni, pe rä Saul bi mu̱di bi me̱ꞌtsuäbi rä embidia ꞌne mi ne dä umbi rä du. Pa dä ñäni rä te, rä Dabid bi ꞌmatꞌi. Mäske bi ñꞌägi ndunthi yä je̱ya, nzäntho bi me̱ꞌtsuäbi rä tꞌekꞌei rä Saul. ¿Por hanja? Ngeꞌä mi pädi xä ñho ge Jeoba go geꞌä xki umbäbi rä tsꞌu̱tꞌhui rä Saul. Mꞌe̱fa rä Saul bi du ha nꞌa rä tuhni. Nubye̱ hää, rä Dabid bi zo̱ho̱ bi mända ha rä hnini Israel ja ngu xki mängä Jeoba.

Rä Dabid mi ne dä hyoki nꞌa rä templo pa rä Zi Dada Jeoba. Pe Äjuä bi ꞌñembäbi ge näꞌä rä ꞌme̱fi go ma dä ja nꞌa rä tꞌu̱. Näꞌä rä tꞌu̱ rä Dabid mrä thuhu rä Salomon go geꞌä bi hyoki näꞌä rä templo. Pe Jeoba bi umbäbi rä Dabid nꞌa rä nsu mänꞌa mrä dängi: bi ja nꞌa rä kohi kongeꞌä, bi ꞌñembi ge de nuꞌu̱ yä bätsi rä Dabid ja ma dä eheni rꞌa yä ndä nuꞌu̱ hixki nheki. Bi ꞌñembi ge ja ma dä eheni näꞌä rä Ñänte xki mängä Jeoba ha rä uädri Eden. Näꞌä rä Ñänte go geꞌä rä Mesia, geꞌä rä jäꞌi bi huahni rä Zi Dada Jeoba pa go geꞌä drä Ndä ha näꞌä rä Tsꞌu̱tꞌhui, geꞌä rä tsꞌu̱tꞌhui ma dä mꞌu̱i pa nzäntho.

Rä Dabid bi umbäbi ndunthi rä jamädi Jeoba, bi muntsꞌi gatꞌho näꞌä mi nthoni, ngu yä hogä do, rä oro ꞌne rä plata pa dä thoki näꞌä rä templo Äjuä. Ko rä mäkä tsꞌe̱di Äjuä, rä Dabid bi za bi yꞌofo ndunthi yä jähñä pa dä tꞌeꞌtsuä rä nsu rä Jeoba. Änte dä du rä Dabid bi mängä nuya yä noya: «Rä mäkä tsꞌe̱di Jeoba go geꞌä bi ñä por geke, ha mä jäne mi ja nuꞌä rä noya» (2 Samuel 23:2).

(Ehe ha rä Samuel ha yä ntheke 1 ꞌne 2, rä 1 Crónicas, rä Isaías 9:7, rä Mateo 21:9, rä Lucas 1:32 ꞌne ha rä Juan 7:42.)