RÄ Zithu bi ñꞌani, ¿dä za dä ñꞌo mänjuäntho nuꞌu̱ yä jäꞌi pe̱päbi Äjuä mäske dä thogi yä xuñha ꞌne mäske ꞌñenä nuyu̱ hinte ma dä dähä? Ko näꞌä bi thogi rä Job bi za bi dädi nunä rä ntꞌani. Ma gä handihu̱ te bi thogi.

Yä israelita mi ꞌmu̱i hä Ejipto, nꞌa rä pariente rä Abran mrä thuhu rä Job mi ꞌmu̱i ha näꞌä rä hnini tꞌembi Arabia. Nꞌa rä pa, yä e̱nxe̱ ha mähetsꞌi bi muntsꞌi ha rä hmi Äjuä, ꞌnehe bi ntini näꞌä rä Zithu. Ha näꞌä rä mhuntsꞌi, rä Zi Dada Jeoba bi mää ge mi pe̱ꞌtsuäbi ndunthi rä jamfri rä Job ngeꞌä mi joꞌo mänꞌa rä jäꞌi nguꞌä ꞌne ngeꞌä mi yꞌo mänjuäntho ha rä ꞌñuu Äjuä. Pe rä Zithu bi mää ge hingä mäjuäni, bi mää ge rä Job mi pe̱fi näꞌä xä ñho ngeꞌä Jeoba mi su ꞌne mi umbi ndunthi yä ñho. Bi mää ge mu̱ rä Job xä ꞌme̱di gatꞌho näꞌä mi pe̱ꞌtsi, nuni ma xä zani rä Zi Dada Jeoba.

Äjuä bi hyopäbi rä Zithu bi ma bä häkuäbi gatꞌho näꞌä mi pe̱ꞌtsi rä Job. Rä Zithu bi umbi rä du nuꞌu̱ yä bätsi rä Job ꞌnepu̱ bi japi dä zu̱di nꞌa rä tsꞌo ñheni. Mäske rä Job himi pädi ge nuya yä xuñha mi ehe de rä Zithu ꞌne himi pädi hanja Jeoba mi hopi dä thogi nuꞌu̱ yä xuñha, pe rä Job himbi zani Äjuä.

Hñuu yä jäꞌi bi ma bä tso̱ni rä Job, pe nuyu̱ hingä mäjuäni mñä hogä ntsitsꞌi. Nuꞌu̱ yä noya bi xipäbi rä Job hutsꞌi ha rä Mäkä Tꞌofo ha rä mfistꞌofo Job. Nuꞌu̱ yä jäꞌi bi xipi rä Job ge mi thogi nuꞌu̱ yä xuñha ngeꞌä xki yꞌo̱tꞌe yä tsꞌoki hänge njabu̱ Äjuä mi tsu̱i. ꞌNehe bi mää ge Äjuä hingi mädi ha nixi pe̱ꞌtsuäbi rä jamfri nuꞌu̱ yä jäꞌi pe̱päbi. Pe rä Job himbi gamfribi nuꞌu̱ yä tsꞌofo, nuni bi mää ge nzäntho ma dä ñꞌo mänjuäntho ha rä ꞌñuu Äjuä asta xa dä du.

Rä Job bi hyoni hanja dä däti nuꞌu̱ yä jäꞌi. Pe nꞌa rä bäsjäꞌi mrä thuhu rä Eliu xki yꞌo̱de gatꞌho näꞌä xki mängä nuyu̱, hänge bi umbi rä tsꞌofo rä Job ngeꞌä nuni mi turämu̱i se̱he̱ ko näꞌä mi thogi pe himi turämu̱i po rä thuhu ꞌne rä tsꞌu̱tꞌhui Jeoba. ꞌNehe bi zu̱i ntsꞌe̱di nuꞌu̱ hñuu yä tsꞌo ntsitsꞌi rä Job.

Jeoba ꞌnehe bi japäbi rä Job dä hyandi ge hingä geꞌä xki me̱fi. Bi ꞌñuti gatꞌho nuꞌu̱ yä tꞌo̱tꞌe xi tsꞌamähotho xä hyoki ꞌne bi ꞌñuti te ngu rä notsi yä jäꞌi ha te ngu rä ndängi Äjuä. Rä Job bi yꞌo̱de ꞌne bi hñäni näꞌä rä tsꞌofo bi tꞌumbi. Jeoba «xi ja ndunthi rä huekäte ꞌne [...] rä mhäte» hänge bi yꞌo̱the ꞌne bi koꞌtsuäbi rä nzaki rä Job, bi umbi yo mꞌiki de gatꞌho näꞌä xki ꞌme̱di ꞌne bi jäpi ko mä rꞌe̱tꞌa yä bätsi (Santiago 5:11). Rä Job bi ze̱ti gatꞌho yä xuñha, njabu̱ bi ꞌñudi ge hingä mäjuäni näꞌä xki mängä rä Zithu ꞌne bi ꞌñudi ge mäske dä me̱ꞌtsä yä dängä xuñha, yä jäꞌi dä za dä yꞌo̱te Äjuä.

(Ehe ha rä mfistꞌofo Job.)