MI MꞌU̱ nuꞌu̱ yä ndä ha Israel ꞌne ha Juda, ꞌnehe bi mꞌu̱ rꞌa yä jäꞌi nuꞌu̱ mñä mꞌe̱hni Äjuä. Nuyu̱ himi tsu ꞌne mi pe̱ꞌtsuäbi ndunthi rä jamfri Äjuä. Nuꞌu̱ yä jäꞌi bi mänduä yä noya Äjuä. Ma gä handihu̱ te mä noya bi mää:

1. Yä mꞌe̱hni Äjuä bi mää ge rä hnini Jerusalen ma dä uadi. Dende mi o̱tꞌe ndunthi yä je̱ya, rä Isaias ꞌne rä Jeremias ya xki mää ge rä hnini Jerusalen ma drä huati ꞌne hinto ma dä ñäni. Nuꞌu̱ yä mꞌe̱hni Äjuä himbi ntsu ꞌne bi mää hanja näꞌä rä hnini xki japi dä nkue̱ Äjuä. Nuꞌu̱ yä jäꞌi mi ñꞌetsꞌi ge mi xo̱kämbeni Jeoba pe ko nuꞌu̱ yä tsꞌo ꞌme̱fi bi ꞌñudi ge hingä mäjuäni. Nuꞌu̱ mi xo̱kämbeni yä zidada hingä mäjuäni ꞌne xi mñä tsꞌomꞌu̱i (2 Reyes 21:10-15; Isaías 3:1-8, 16-26; Jeremías 2:1–3:13).

2. Yä mꞌe̱hni Äjuä bi mää ge yä israelita ma dä mengi ha rä ꞌñuu Jeoba. Nuꞌu̱ bi mää ge yä israelita ma dä mꞌe̱go 70 yä je̱ya ha Babilonia, ꞌnepu̱ ja dä mengi ha yä hai Jerusalen, pa dä yo gu̱tsꞌi näꞌä rä templo mi ja ha Jerusalen ꞌne pa dä yo mengi ha rä ꞌñuu Jeoba (Jeremías 46:27; Amós 9:13-15). Mi ꞌme̱di 200 yä je̱ya änte dä nheki gatꞌho nuya yä thogi, rä Isaias ya xki mää ge rä Siro geꞌä drä thuhu näꞌä rä jäꞌi toꞌo ma dä huati näꞌä rä hnini Babilonia pa njabu̱ dä za dä bo̱ni nuꞌu̱ yä israelita. Rä Isaias ꞌnehe xki mää hanja ma dä yu̱tꞌi rä Siro ha näꞌä rä dängä hnini (Isaías 44:24–45:3).

3. Yä mꞌe̱hni Äjuä bi mää hanja ma dä zo̱ho̱ rä Mesia ꞌne te ma dä thogi. Bi mää ge rä Mesia ma dä mꞌu̱i ha nꞌa rä hnini rä thuhu Belen (Miqueas 5:2). Ge hindrä ꞌñexmänsu ꞌne ge ma dä tso̱ni ha Jerusalen dri to̱ge nꞌa rä zi burru (Zacarías 9:9). Nuꞌu̱ bi mää ge yä jäꞌi ma dä u̱tsa rä Mesia mäske nuni dri uni rä mhäte (Isaías 42:1-3; 53:1, 3). ꞌNehe bi mää ge ma dä tꞌumbi nꞌa rä du xi rä ntsꞌo. ¿Ma dä du pa nzäntho? Hinä, nuꞌu̱ bi mää ge Äjuä ma dä gu̱tsꞌi rä Mesia de ha rä du ꞌne ko näꞌä rä te ma dä uni, Äjuä ma dä za dä punduäbi yä tsꞌoki gatꞌho rä mexiꞌmhai (Isaías 53:4, 5, 9-12).

4. Rä tsꞌu̱tꞌhui rä Mesia. Rä mexiꞌmhai hindä za dä hñä rä tsꞌu̱tꞌhui xä ñho ko näꞌä rä tsꞌoki pe̱ꞌtsi. Yä mꞌe̱hni Äjuä bi mää ge se̱he̱ näꞌä rä Tsꞌu̱tꞌhui rä Mesia ma dä za dä mända ngu ri ꞌñehe, hänge ma dä tꞌembäbi rä Ndä de nꞌa rä Hogä Mꞌu̱i (Isaías 9:6, 7; Jeremías 10:23). Ha rä tsꞌu̱tꞌhui rä Mesia gatꞌho rä mexiꞌmhai ma dä me̱ꞌtsi nꞌa rä hogä mꞌu̱i ko märꞌaa ꞌne ko yä mboꞌni (Isaías 11:3-7). Ma dä mꞌe̱di gatꞌho yä ñheni (Isaías 33:24). Rä du ma dä mꞌe̱di pa nzäntho (Isaías 25:8). ꞌNehe, yä mꞌo de gä mꞌotho nuꞌu̱ yä jäꞌi ma dä nuhu de ha rä du (Daniel 12:13).

(Ehe ha yä mfistꞌofo de rä Isaías, rä Jeremías, rä Daniel, rä Amós, rä Miqueas ꞌne ha rä Zacarías.)