MI O̱TꞌE hñu pa de näꞌä xki du rä Kristo, rꞌa yä ꞌme̱hñä xki gamfri rä Hesu bi ma bä handi habu̱ xki tꞌagi. Pe bi zu̱di xki xogi näꞌä rä ntꞌagi ꞌne ya hinte mi ja.

Nthämfri bi zo̱ho̱ yoho yä e̱nxe̱. Nꞌa de geꞌu̱ bi ꞌñembäbi nuꞌu̱ yä ꞌme̱hñä: «Di pädi ge gi hoñhu̱ rä Hesu [näꞌä] rä me Näsaret [...] pe ya joꞌoua ngeꞌä ya xä yopä nte mänꞌaki» (Marcos 16:6). ꞌMestho nuya yä ꞌme̱hñä bi dämä nestꞌihi pa bä xipäbi nuꞌu̱ yä apostol. Pe ha rä ꞌñuu bi nthe̱ui rä Hesu ꞌne bi ꞌñembäbi nuꞌu̱ yä ꞌme̱hñä: «¡Ogi tsuhu̱. Gri maha gi xiphu̱ nuꞌu̱ mä ku dä ma pa Galilea ꞌne ja gä nthe̱ꞌmeniꞌu̱!» (Mateo 28:10).

Mi ndee, yoho yä de̱ni rä Hesu bi bo̱ni ha Jerusalen pa bi ma ha nꞌa rä tꞌu̱kä hnini mrä thuhu Emäus. Mä ꞌñuu bi nthe̱ui nꞌa rä jäꞌi, nuni bi ñꞌani: ¿te gi mäñhu̱? Nuꞌu̱ himbi bädi toꞌo näꞌä rä jäꞌi pe mi geꞌä rä Hesu xki mpadi. Nuꞌu̱ yä de̱ni rä Hesu ko nꞌa rä dumu̱i bi dädi ge mi pede de näꞌä rä Xahnäte xki du. Näꞌä rä jäꞌi bi mu̱di bi mää gatꞌho nuꞌu̱ yä noya mi mängä ha rä Mäkä Tꞌofo de rä Mesia. Näꞌä xki mängä nuꞌu̱ yä mꞌe̱hni Äjuä de rä Mesia, gatꞌho geꞌä bi ja rä Hesu. * Rä Kristo bi dämä mꞌe̱di nuꞌmu̱ nuꞌu̱ yä de̱ni bi da ngue̱nda ge näꞌä rä jäꞌi mi ñäui mi geꞌä rä Kristo xki nuhu de ha rä du, pe nubye̱ xki te ngu nꞌa rä e̱nxe̱.

Nuꞌu̱ yoho yä jäꞌi xki hyandi rä Hesu bi dämä mengi ha Jerusalen ha näꞌä rä ngu habu̱ xki njotꞌi yä apostol pa bi xipäbi gatꞌho näꞌä xki hyandi. Himi tsa dä gamfri nuꞌu̱ yä apostol nuꞌmu̱ bi hyandi ge nthämfri rä Hesu bi nheki ha mbo rä nguu. «[¿]Por hanja hingi kamfrihu̱?», bi ñꞌani rä Hesu ꞌne bi mää: «Geꞌä ntꞌofo ge rä Kristo ma dä sufri ꞌne rä hñupa dä yopä nuꞌu̱ de rä du» (Lucas 24:38, 46).

Bi thogi 40 yä pa nuꞌä bi thandi ndunthi yä mꞌiki rä Kristo. Nꞌa rä pa, 500 nuꞌu̱ yä jäꞌi bi hyandi. Tꞌenä ge geꞌä rä pa nuꞌmu̱ rä Hesu bi mändabi nuꞌu̱ yä de̱ni nꞌa rä ꞌme̱fi xi rä dängi: «Hänge gri maha [...] zofohu̱ gatꞌho yä jäꞌi nuꞌu̱ ꞌmu̱i ha rä ngu̱ni rä xiꞌmhai pa duä nxadi neheꞌu̱ [...], ꞌnehe ꞌñutuäbihu̱ꞌu̱ gatꞌho ngu nuꞌä stä ꞌme̱pꞌäꞌihu̱. [«ꞌNe ¡hyandihu̱!», NM], nuga nzäntho ma gä ꞌmu̱i kongeꞌähu̱ asta rä uadi» nuya yä gäxä pa (Mateo 28:19, 20).

Näꞌä rä gäxä pa bi muntsꞌi rä Hesu ko yä apostol bi ja nꞌa rä kohi kongeꞌu̱: «Ma gi hñänihu̱ rä [mäkä tsꞌe̱di Äjuä], ꞌne ma gi dahu̱ mäjuäni de geke [...] ha gatꞌho mäxo̱ge rä ngu̱ni rä xiꞌmhai» (Hechos 1:8). ꞌNepu̱, bi mu̱di bi bo̱tsꞌe ha mähetsꞌi ꞌne rꞌamätsꞌu̱ bi njuti ha yä gui.

(Ehe ha rä Mateo ha rä ntheke 28, rä Marcos ha rä ntheke 16, rä Lucas ha rä ntheke 24, rä Juan ha rä ntheke 20 ꞌne 21 ꞌne ha rä 1 Corintios 15:5, 6.)