RÄ Salomon bi mända 40 yä je̱ya. Nunä rä thogi ma dä dädi nunä rä ntꞌani: ¿te mä mꞌu̱i dä nheki mu̱ nꞌa rä ndä ꞌne gatꞌho yä jäꞌi de ha nꞌa rä hnini dri o̱te yä mhända Jeoba ꞌne dri pe̱ꞌtsuäbi rä tꞌekꞌei näꞌä rä tsꞌu̱tꞌhui Äjuä?

Änte dä du, rä Dabid bi zokuäbi rä tsꞌu̱tꞌhui rä tꞌu̱ mrä thuhu rä Salomon. Nꞌa rä pa, ha nꞌa rä tꞌi Äjuä bi ꞌñembi rä Salomon ge dä yꞌäpi näꞌä go dä ne. Rä Salomon bi yꞌapi nꞌa rä mfeni xä ñho ꞌne rä mfädi pa njabu̱ dä ja rä tsꞌu̱tꞌhui xä ñho. Jeoba bi hyandi ge nunä xmä ñho hänge bi umbi näꞌä bi yꞌadi ꞌne bi ꞌñembi ge mu̱ xä yꞌo̱de, nuꞌmu̱ ꞌnehe ma xä mꞌu̱i ndunthi yä je̱ya, xä me̱ꞌtsi ndunthi yä ñho ꞌne nꞌa rä dängä nsu.

Ndunthi yä jäꞌi bi yꞌo̱de näꞌä rä mfädi mi pe̱ꞌtsi rä Salomon. Nꞌa rä pa yoho yä ꞌme̱hñä bi ntuhni ngeꞌä nꞌa ngu mänꞌaa mi mää ge go mñä bätsi nꞌa rä ꞌue̱ne. ¿Te bi yꞌo̱tꞌe rä Salomon? ¡Bi mända dä theke mädee näꞌä rä bätsi! Näꞌä rä mu̱di rä ꞌme̱hñä bi ꞌñenä ge xmä ñho drä jabu̱, pe näꞌä mänꞌaa bi yꞌadi ge näꞌä rä ꞌue̱ne dä tꞌumbi näꞌä mänꞌa rä ꞌme̱hñä. Njabu̱ rä Salomon bi bädi toꞌo mrä nänä näꞌä rä ꞌue̱ne. Gatꞌho yä jäꞌi de näꞌä rä hnini bi yꞌo̱de näꞌä xki me̱fi rä Salomon ꞌne bi bädi ge Äjuä go geꞌä xki umbäbi rä mfädi.

Rä Salomon bi hyoki nꞌa rä dängä templo pa rä Zi Dada Jeoba ha Jerusalen. Gehnä rä hnini ha Israel bri huahni pa ja drä xo̱kämbenini Jeoba. Nuꞌmu̱ bri rꞌayꞌo näꞌä rä templo, rä Salomon bi ja nꞌa rä sadi ꞌne bi ꞌñembäbi Äjuä: «¡Hyandi! Mähetsꞌi, hää, ha gatꞌho näꞌä mähetsꞌi, hingi tsa gi ñꞌe̱ni; ¡xihmä nunä, nunä rä ngu dä hokꞌäꞌi!» (1 Reyes 8:27).

Xi yabu̱ habu̱ bi ntꞌo̱de rä thuhu rä Salomon, bi ntꞌo̱de ha Seba (Saba) näꞌä rä hai mi ja ha rä hnini Arabia. Rä reinä de näꞌä rä hnini bi ma ha Israel pa dä hyandise̱ hanja mi ꞌmu̱i rä Salomon, ꞌne pa dä hyandi mu̱ xa mäjuäni mi pe̱ꞌtsi ndunthi rä mfädi. Mi hyandi ge hää mäjuäni, näꞌä rä reinä bi bädi ge Äjuä xki hñutsꞌi nꞌa rä ndä xi mrä bämhñä, hänge bi ꞌñeꞌtsuä rä nsu rä Zi Dada Jeoba. Ko rä mfatsꞌi Jeoba, rä tsꞌu̱tꞌhui rä Salomon bä hä ndunthi yä ñho ꞌne nꞌa rä hogä mꞌu̱i ha rä hnini Israel. Himbi mꞌu̱ mänꞌa rä tsꞌu̱tꞌhui nguꞌä.

Pe hingä nzäntho bi njabu̱, ngeꞌä rä Salomon bi ꞌuengi de ha rä ꞌñuu Jeoba. Äjuä xki ꞌñembi nuꞌu̱ yä ndä ha Israel ge hindä me̱ꞌtsi ndunthi yä ꞌme̱hñä, pe rä Salomon yä nthebetho nuꞌu̱ yä ꞌme̱hñä bi nthätui. Ndunthi nuyu̱ yä ꞌme̱hñä mi xo̱kämbeni nuꞌu̱ yä zidada hingä mäjuäni hänge rꞌamätsꞌu̱u̱ geꞌä ꞌnehe bi me̱fi rä Salomon, njabu̱ bi ꞌuengi de ha rä ꞌñuu Äjuä. Hänge Jeoba, bi ꞌñembi rä Salomon ge ndunthi de näꞌä rä tsꞌu̱tꞌhui mi pe̱ꞌtsi, ma xä ꞌme̱di. Himbi ꞌme̱di gatꞌho ngeꞌä Jeoba bi beni näꞌä rä kohi xki ja ko rä Dabid. Jeoba himbi pumfri näꞌä rä kohi mäske rä Salomon go bi zopu̱ Jeoba.

(Ehe ha rä 1 Reyes ha yä ntheke 1 asta 11, rä 2 Crónicas ha yä ntheke 1 asta 9, ꞌne ha rä Deuteronomio 17:17.)