NÄꞌÄ rä mhuntsꞌi ja xki nheki de yä de̱ni rä Hesu, bi mfaste ndunthi pa näꞌä rä ꞌme̱fi Jeoba. Nuꞌu̱ yä gamfri bi ze̱ti gatꞌho nuꞌu̱ yä ntsꞌomꞌu̱i bi tꞌo̱ꞌtuäbi. ꞌNehe bi ze̱ti rꞌa yä xuñha nuꞌu̱ bä ehe mbo de ha rä mhuntsꞌi. ¿Hanja bi za bi ñꞌo mänjuäntho ha rä ꞌñuu Äjuä? Nuꞌu̱ 21 yä karta o yä mfistꞌofo hutsꞌi mäpaya ha rä Rꞌayꞌo Testamento, geꞌu̱ bi nupä yä mfeni ꞌne bi umbä yä hogä tsꞌofo mi ꞌme̱päbi nuꞌu̱ yä gamfri.

Rä Pablo bi yꞌofo 14 de nuꞌu̱ yä karta, dende rä mfistꞌofo Romanos asta rä Hebreos. Rä Pablo bi yꞌofo pa toꞌo nuꞌu̱ yä karta, mu̱ pa nꞌa rä jäꞌi o pa nꞌa rä mhuntsꞌi. Ma gä handihu̱ te bi yꞌofo rä Pablo.

Rä Pablo bi yꞌofo rꞌa yä tsꞌofo pa nꞌa rä mꞌu̱i xä ntꞌaxi. Nuꞌu̱ di ñhuxhui yä ꞌme̱hñä ha hinxä nthätui, yä zingä medinthäti o toꞌo di ja märꞌa yä dängä tsꞌoki ꞌne hindi yobri o hindi mpe̱tsꞌi «hindä ma dä yu̱tꞌä ha rä tsꞌu̱tꞌhui Äjuä» (Gálatas 5:19-21; 1 Corintios 6:9-11, RN). Nuꞌu̱ xa mäjuäni yä gamfri di mädi nꞌa ngu mä nꞌaa mäske hingä mähye̱gi rä hnini habu̱ yä mengu (Romanos 2:11; Efesios 4:1-6). Ko rä johya, nuyu̱ uni näꞌä pe̱ꞌtsi ꞌne fatsꞌi märꞌa yä gamfri habu̱ te di ꞌme̱päbi (2 Corintios 9:7). Rä Pablo uni nunä rä tsꞌofo: ko ngatꞌho ri korasohu̱ «[o]gi tsayahu̱ gi yꞌaphu̱ Äjuä» (1 Tesalonicenses 5:17; 2 Tesalonicenses 3:1; Filipenses 4:6, 7). Pa dä yꞌo̱de Äjuä nuꞌu̱ yä sadi, mähyoni drä xatuäbi ko ndunthi rä jamfri (Hebreos 11:6).

¿Te mä tsꞌofo bi uni rä Pablo pa gatꞌho yä mꞌu̱i? Yä däme bi tꞌembi dä mädi yä ꞌme̱hñä ja ngu di mädise̱he̱. Yä ꞌme̱hñä mähyoni ko ngatꞌho yä koraso dä umbä rä tꞌekꞌei yä däme. Äjuä to̱ꞌmi ge yä bätsi dä yꞌo̱te yä dada ꞌne yä nänä. ꞌNehe Äjuä di mändabi yä dada dä su yä bätsi ko rä mhäte ja ngu mängä ha rä Mäkä Tꞌofo (Efesios 5:22–6:4; Colosenses 3:18-21).

Rä Pablo bi yꞌofo näꞌä ma dä me̱fi Äjuä. Nuꞌu̱ yä Mhända bi tꞌumbi rä Moises bi su ꞌne bi gu̱hni yä israelita asta nuꞌmu̱ bi zo̱ho̱ rä Mesia, pe nuꞌu̱ yä de̱ni rä Hesu himbi tꞌembi ge mähyoni dä ja nuꞌu̱ yä mhända pa dä xo̱kämbeni Äjuä (Gálatas 3:24). Rä Pablo bi yꞌopäbi nuꞌu̱ yä Hebreo —nuꞌu̱ yä gamfri mñä judio—, ꞌne bi xipäbi hanja xki mfaste nuꞌu̱ yä Mhända bi tꞌumbä rä Moises, ꞌnehe bi mää hanja faste rä Kristo ha rä ꞌme̱fi Äjuä. Bi mää hanja ndunthi de nuꞌu̱ yä Mhända bi tꞌumbä rä Moises bi ꞌñudi nꞌa rä kꞌoi de näꞌä ma dä thogi mꞌe̱fa. Ngu nuꞌu̱ yä mboꞌni mi tho pa yä ofrenda bi ꞌñudi ge mꞌe̱fa rä Hesu  ma dä tho, ꞌne ko näꞌä rä te bi uni dä za drä punꞌgägihu̱ pa nzäntho nuꞌu̱ mä tsꞌokihu̱ (Hebreos 10:1-4). Ko näꞌä rä du rä Kristo Äjuä bi hñäki näꞌä rä kohi mi ja ko nuꞌu̱ yä Mhända bi tꞌumbä rä Moises (Colosenses 2:13-17; Hebreos 8:13).

Rä Pablo bi uni yä tsꞌofo pa drä su ngu ri ꞌñehe yä mhuntsꞌi. Nuꞌu̱ yä ñꞌo̱ho̱ tꞌumbi näꞌä rä mäkä ꞌme̱fi pa dä su yä mhuntsꞌi, mähyoni dri pe̱ꞌtsi nꞌa rä mꞌu̱i xä ntꞌaxi ja ngu mängä rä Mäkä Tꞌofo (1 Timoteo 3:1-10, 12, 13; Tito 1:5-9). ꞌNehe mähyoni ge gatꞌho nuꞌu̱ yä gamfri dä ntini njatꞌä ha yä mhuntsꞌi pa njabu̱ dä hñäni yä mäkä tsꞌofo Äjuä ꞌne njabu̱ dä nupä mfeni nꞌa ngu mä nꞌaa (1 Corintios 14:26, 31; Hebreos 10:24, 25).

Rä Pablo mi to̱ꞌmi dä mu̱di rä nthanthiä ha rä fadi de ha rä hnini Romä nuꞌmu̱ bi yꞌofo näꞌä rä yoho rä karta pa rä Timoteo. Se̱he̱ nꞌa hängutho nuꞌu̱ yä gamfri himbi ntsu ꞌne bi ma bä tso̱ni rä Pablo. Rä Pablo mi pädi ge himi ꞌme̱di ndunthi pa dä tꞌumbäbi rä du, hänge bi yꞌofo: «Ya stä o̱tꞌä rä tsꞌe̱di pa stä ntäte ha [nunä] rä hogä tuhni. Ya stä huätä nuꞌä rä ꞌme̱fi bi tꞌaki, ꞌne stä su nuꞌä rä jamfri bi tꞌutkägi» (2 Timoteo 4:7). Himbi thogi ndunthi yä pa näꞌä xki mängä nuya yä noya, rä Pablo bi tꞌumbäbi rä du. Pe gatꞌho nuꞌu̱ yä tsꞌofo bi yꞌofo ha yä karta bi matsꞌi nuꞌu̱ mäjuäni yä gamfri pa bi sigi bi ñꞌo mänjuäntho ha rä ꞌñuu Äjuä, ꞌnehe mäpaya sigi faxkägihu̱.

(Ehe ha rä Romänos, rä 1 Corintios, rä 2 Corintios, rä Gálatas, rä Efesios, rä Filipenses, rä Colosenses, rä 1 Tesalonicenses, rä 2 Tesalonicenses, rä 1 Timoteo, rä 2 Timoteo, rä Tito, rä Filemón ꞌne ha rä Hebreos.)