ÄJUÄ bi umbäbi rä Tꞌu̱ xi ndunthi rä tsꞌe̱di pa bi za bi ja ndunthi yä milagro, ndunthi yä testigo bi hyandi. Njabu̱, rä Hesu bi ꞌñudi ge pe̱ꞌtsi rä tsꞌe̱di pa dä däpäbi nuꞌu̱ yä xuñha hinxä za xä hñäki rä mexiꞌmhai. Ma gä handihu̱ ngu te mä xuñha.

Rä thuhu. Rä Hesu bi japi bi mpu̱ngä binu rä dehe, gehnä rä mu̱di rä milagro bi ja. Rä Hesu yo mꞌiki bi ꞌuini yä mꞌotho nuꞌu̱ yä jäꞌi, bi bongitho rä ñhuni mäske se̱he̱ mi nꞌa hängutho yä thuhme ꞌne nꞌa hängutho yä peskado.

Rä ñheni. Rä Kristo bi yꞌo̱the ndunthi yä jäꞌi «mi häkuäbi gatꞌho nuꞌäräza rä ñheni mi pe̱ꞌtsiꞌu̱» (Mateo 4:23). Bi yꞌo̱the nuꞌu̱ mi goda, nuꞌu̱ mi gogu, nuꞌu̱ mi nduse̱ ꞌne nuꞌu̱ mi tsu̱di rä lepra. Näꞌäräza rä ñheni bi za bi yꞌo̱the.

Yä xuñha nuꞌu̱ bi ehe ko yä däyꞌe, yä bu̱nthi ꞌne yä mbiꞌmhai. Nꞌa rä mꞌiki mi nxui ha rä Hesu ꞌne yä de̱ni mi paꞌu̱ ha nꞌa rä barko ha rä ndehe mrä thuhu Galilea, ꞌnepu̱ bi dagi nꞌa rä däyꞌe. Yä de̱ni xa bi ntsu, pe rä Hesu bi zu̱i näꞌä rä däyꞌe ꞌne bi ꞌñembäbi: «¡ꞌMu̱tꞌho!». Nuꞌmu̱ näꞌä rä däyꞌe bi dämä tsaya (Marcos 4:37-39). Mä nꞌa rä mꞌiki rä Hesu bi za bi ñꞌo ha rä ndehe mäske mi ja nꞌa rä däyꞌe ko rä bu̱nthi, rä Hesu himbi yu̱i (Mateo 14:24-33).

Yä tsꞌo ndähi. Nuya yä tsꞌo ndähi tꞌembi ꞌnehe yä u̱xjua, nuyu̱ mänꞌa pe̱ꞌtsi ndunthi rä tsꞌe̱di ke nuju̱. Nuyu̱ yä u̱xjua xa dähä ndunthi yä jäꞌi, ha nuyu̱ hinte xä za xä yꞌo̱tꞌe pa dä ꞌueke nuꞌu̱ yä tsꞌondähi. Pe rä Hesu himi tsu nuꞌu̱ yä u̱xjua. Nuꞌu̱ hää go mi tsu ꞌne mi huätꞌi ngeꞌä mi pädi ge rä Hesu mänꞌa mi ja rä tsꞌe̱di ke geꞌu̱. Hänge nuꞌu̱ yä u̱xjua mi o̱te rä Hesu nuꞌmu̱ mi ꞌme̱päbi dä bo̱ni de nuꞌu̱ yä jäꞌi habu̱ xki yu̱tꞌi.

Rä du. Gehnä rä nkontra rä mexiꞌmhai, rä Mäkä Tꞌofo embäbi «rä [gäxä] nkontra». Rä du geꞌä rä nkontra rä mexiꞌmhai näꞌä hinxä za xä däpäbi (1 Corintios 15:26). Pe rä Hesu näꞌä hää bi za bi gu̱tsꞌi rꞌa yä jäꞌi nuꞌu̱ xki du. Bi za bi gu̱tsꞌi de ha rä du nꞌa rä zi nxutsi ꞌne rä tꞌu̱ nꞌa rä zi rꞌanxu o biuda. Pe ndunthi yä jäꞌi bi hyandi hanja rä Hesu bi gu̱tsꞌi de ha rä du näꞌä rä ntsitsꞌi mrä thuhu rä Lasaro, mi pe̱ꞌtsi goho yä pa näꞌä xki du. Gehnä mänꞌa rä dängä milagro bi ja rä Hesu, asta nuꞌu̱ yä nkontra rä Hesu bi bädi hängu rä tsꞌe̱di mi pe̱ꞌtsi rä Hesu (Juan 11:38-48; 12:9-11).

Rä Hesu bi yꞌo̱the ꞌne bi gu̱tsꞌi de ha rä du ndunthi yä jäꞌi. Pe di pädihu̱ ge bi thogi yä je̱ya ꞌne nuya yä jäꞌi bi du, nuꞌmu̱ ¿pate bi ja nuꞌu̱ yä milagro rä Hesu? Bi mfaste ndunthi näꞌä bi me̱fi rä Hesu, ngeꞌä nuya yä milagro bi ꞌñudi ge nuꞌu̱ ya noya xki mängä yä mꞌe̱hni Äjuä de näꞌä rä Tsꞌu̱tꞌhui rä Mesia hää mäjuäni. ꞌNehe bi ꞌñudi ge näꞌä rä Ndä xa hñutsꞌi Äjuä, ma dä hñäki rä thuhu, yä ñheni, nuꞌu̱ yä xuñha bi hä yä däyꞌe, yä bu̱nthi ꞌne yä mbiꞌmhai. ꞌNehe ma dä hñäki nuꞌu̱ yä u̱xjua ꞌne rä du. Di nheki ge xa mäjuäni Jeoba xa umbi rä tsꞌe̱di rä Hesu pa dä za dä me̱fi njabu̱.

(Ehe ha rä mfistꞌofo Mateo, rä Marcos, rä Lucas ꞌne ha rä Juan.)