Ha nꞌa rä hogä ntsitsꞌi mähyoni dri ja rä mhäte. Mu̱ nzäntho gi häni rä mfädi de rä Zi Dada Jeoba, ri mhäte po rängeꞌä mänꞌa ma dä ndängi ꞌne ma gi ne gi pe̱päbi. Nunä mhäte ma dä jaꞌi gi de̱ni Ñhesukristo (Mateo 28:19). Mu̱ gi ne gi pe̱ꞌtsi pa nzäntho rä ntsitsꞌi rä Zi Dada, joni ko nuꞌu̱ yä testigo rä Jeoba, ja gehni di nheki nꞌa rä mꞌu̱i ko rä johya. ¿Te mähyoni gi pe̱fi?

Udi ge mäjuäni gi mädi Äjuä ꞌne o̱te yä mhända. «Mu̱ di o̱tuäbihu̱ yä mhända Äjuä, nuꞌmu̱ xi mäjuäni di mädihu̱ꞌä, ꞌne nu yä mhända Äjuä hingi hei gä o̱tꞌehu̱.» (1 Juan 5:3.)

Pe̱fi näꞌä mängä rä Mäkä Tꞌofo. Ñhesukristo bi mängä nꞌa rä kꞌoi habu̱ bi ꞌñudi ge mähyoni gä pe̱fihu̱ näꞌä di pädihu̱ de rä Noya Äjuä. Nꞌa rä pa bi mꞌu̱pu̱ nꞌa rä jäꞌi näꞌä bi nja rä mfeni ꞌne bi hyoki rä ngu habu̱ mrä medo, pe bi mꞌu̱pu̱ mä nꞌa rä jäꞌi bi ñꞌotho rä mfeni, näꞌä bi hyoki rä ngu ha rä ꞌmomu. Mꞌe̱fa bi da nꞌa rä däyꞌe ꞌne bi nja nꞌa rä dängä bu̱nthi, näꞌä rä ngu xki thoki ha rä medo hinte bi ja, pe näꞌä rä ngu xki thoki ha rä ꞌmomu bi yo̱tꞌe. Ñhesukristo bi mää ge nuꞌu̱ toꞌo o̱de ꞌne pe̱fi näꞌä bi ꞌñudi, nuyu̱ ꞌñenä go näꞌä rä jäꞌi bi nja rä mfeni ꞌne bi hyoki rä ngu ha rä medo. ꞌNehe bi mää ge nuꞌu̱ yä jäꞌi o̱de yä ntꞌudi pe hingi pe̱fi, nuyu̱ ꞌñenä go näꞌä rä jäꞌi bi ñꞌotho rä mfeni ꞌne bi hyoki rä ngu ha rä ꞌmomu. ¿Ndaꞌä de nuyu̱ yoho yä jäꞌi gi hohmä gi nja? (Mateo 7:24-27.)

 Xipäbi Äjuä ge gi ne gi mꞌu̱i pa geꞌä. Mꞌe̱tꞌo xatuäbi rä Zi Dada Jeoba ꞌne xipäbi ge pa nzäntho gi ne gi pe̱päbi Rä paha. Mu̱ gä pe̱päbihu̱ rä paha rä Zi Dada, di udihu̱ njabu̱ ge xa mäjuäni di de̱nihu̱ Ñhesukristo (Mateo 11:29).

Nku̱ꞌmdehe. «Nku̱ꞌmdehe ꞌne xu̱ki ri tsꞌoki ꞌne pe̱ꞌtsuäbi rä jamfri rä thuhu [rä Hesu].» (Hechos 22:16, Nuevo Mundo.)

Pe̱päbi Äjuä ko ngatꞌho ri paha. «ꞌNe gatꞌho nuꞌä gi pe̱fihu̱, pe̱fihu̱ ko gatꞌho ri pahahu̱, jahu̱ rä ue̱nda go gi pe̱päbihu̱ rä Zi Dada, hinge nu yä jäꞌi.» (Colosenses 3:23.)