Rä Zi Dada ne gä ntsitsꞌihu̱ kongeꞌä. ¿Gi pädi ge nuꞌäge dä za gi ntsitsꞌiui Näꞌä toꞌo xa rä dängi de hängutho rä xiꞌmhai? Mäyaꞌmu̱ nꞌa rä ñꞌo̱ho̱ mrä thuhu rä Abran, bi tꞌembi mrä ntsitsꞌi rä Zi Dada (Santiago 2:23). Rä Mäkä Tꞌofo mää hanja märꞌa yä ñꞌo̱ho̱ ꞌne yä ꞌme̱hñä ꞌnehe bi me̱ꞌtsi nꞌa rä hogä ntsitsꞌi ko rä Zi Dada ꞌne bi hñäni yä dängä jäpi. Mäpaya, ha hängutho rä xiꞌmhai, ndunthi yä jäꞌi xä zo̱ho̱ xä ntsitsꞌiui rä Zi Dada. Nuꞌäge ꞌnehe dä za gi ntsitsꞌiui.

Rä ntsitsꞌi rä Zi Dada mänꞌa xä ñho ke rä ntsitsꞌi rä mexiꞌmhai. Rä Zi Dada nzäntho fatsꞌi nuꞌu̱ yä ntsitsꞌi yä yꞌo̱de (Hebreos 13:5, 6). Toꞌo dä me̱ꞌtsi nꞌa rä hogä ntsitsꞌi ko rä Zi Dada mänꞌa xä ñho ke to dä me̱ꞌtsi ndunthi yä bojä. Sti du nuꞌu̱ toꞌo jabi ndunthi, nꞌañꞌo nuꞌu̱ toꞌo ma dä gohui rä bojä. Pe nuꞌu̱ toꞌo pe̱ꞌtsi nꞌa rä hogä ntsitsꞌi ko rä Zi Dada mänꞌa ja ndunthi rä muui. Ngeꞌä nunä hinto ma dä za dä hñänduäbi (Mateo 6:19).

Dä za dä mꞌu̱pu̱ nuꞌu̱ toꞌo hindä ne gi sigi gi pädi de rä Zi Dada. Rꞌabu̱ nuꞌu̱ ri ntsitsꞌi ꞌne nuꞌu̱ toꞌo gi ꞌmu̱hui geꞌu̱ hingi ne (Mateo 10:36, 37). Mu̱ toꞌo thenꞌäꞌi o e̱kꞌäꞌi, yꞌo̱tꞌe nunä rä ntꞌani: “¿Kontoꞌo di ne gä kohi xä ñho, ko yä jäꞌi o ko rä Zi Dada?”. Mbeni: mu̱ toꞌo dä xiꞌi ge hingi ñuni, ¿ma hingi ñuni? Fädi ge hinä. Pa gä tehu̱ pe̱ꞌtsi gä ñunihu̱. Njabu̱ ꞌnehe, rä Zi Dada dä za dä jaꞌi gi ꞌmu̱i pa nzäntho. Hänge nuꞌäge, sigi gi pädi hanja dä za gi ntsitsꞌiui rä Zi Dada ꞌne ogi hopi toꞌo dä hñäkꞌäꞌi (Juan 17:3).