Mu̱ gi pe̱ꞌtsi nꞌa ri ntsitsꞌi näꞌä gi pe̱ꞌtsuäbi rä tꞌekꞌei, nuꞌäge ma gi ne gi de̱nduäbi rä mꞌu̱i. Rä Mäkä Tꞌofo mää: «Rä Zi Dada Jeoba, rä hojäꞌi ꞌne o̱tꞌe rä tsꞌu̱tꞌhui» (Salmo 25:8). Mu̱ di ne gä ntsitsꞌihu̱ ko rä Zi Dada, pe̱ꞌtsi gä ñhojäꞌihu̱ ꞌne gä yꞌohu̱ mänjuäntho. Rä Mäkä Tꞌofo mää: «Te̱mbäbihu̱ rä mꞌu̱i Äjuä, ngeꞌä [nuꞌähu̱] yä hmäkä bätsiꞌihu̱. ꞌMu̱hu̱ ko nꞌa rä mhäte» (Efesios 5:1, 2). ¿Hanja dä za gä jahu̱? Nuua ja ma dä mängua rꞌa yä kꞌoi:

Gä fatsꞌihu̱ märꞌaa. «Gatꞌho yä jäꞌi gä o̱ꞌtuäbihu̱ rä ñho.» (Gálatas 6:10.)

Gä hogä me̱fihu̱. «Nuꞌä toꞌo rä be, ya odri mpe. Mänꞌa xä ñho dä gu̱ nꞌa rä ꞌme̱fi ꞌne dä mpe̱fi xä ñho.» (Efesios 4:28.)

Gä pe̱ꞌtsihu̱ xä ntꞌaxi gatꞌho mä mꞌu̱ihu̱. «Mähyoni gä ꞌuegehu̱ de gatꞌho yä tsꞌoki de mä mfenihu̱ ꞌne de mä ndoyꞌohu̱ [...] pa gä tꞌaxkä mä mfenihu̱ ꞌne gä yꞌohu̱ ko rä ntsu Äjuä.» (2 Corintios 7:1.)

 Gä umbihu̱ rä mhäte ꞌne rä tꞌekꞌei nuꞌu̱ ꞌmu̱i ha mä nguhu̱. «Hänge nuꞌähu̱ suhu̱ ri ꞌme̱hñähu̱ ngu gri suse̱ ri ndoyꞌohu̱. ꞌNe nuꞌähu̱ ꞌme̱hñähu̱ umbihu̱ rä tꞌekꞌei ri dämehu̱. Nuꞌähu̱ bätsihu̱, yꞌo̱te ri dadahu̱ ꞌne ri nänähu̱.» (Efesios 5:33–6:1.)

Gä mädihu̱ märꞌaa. Ma «gä mädihu̱ nꞌa ngu mä nꞌaa, ngeꞌä Äjuä di mäkägihu̱» (1 Juan 4:7).

Gä o̱tehu̱ yä tsꞌu̱tꞌhui nuꞌu̱ ꞌmu̱i ha mä hninihu̱. «Gatꞌho yä jäꞌi ri ꞌñepi dä yꞌo̱te nuꞌu̱ [...] [yä] tsꞌu̱tꞌhui [...]. Juꞌtuäbihu̱ gatꞌho nuꞌu̱ [yä ndä] toꞌo gi tupäbihu̱.» (Romanos 13:1, 7.)