Yä tsꞌo tꞌo̱tꞌe di nheki ha rä Xiꞌmhai udi ge xä dämä ꞌñepu̱ nꞌa rä Xiꞌmhai de gä uädri. O̱tꞌe ndunthi, rä Mäkä Tꞌofo bi mää ge änte dä ꞌñepu̱ nꞌa rä Xiꞌmhai de gä uädri mꞌe̱tꞌo ma gä handihu̱ yä pa xä ntsꞌo. Geꞌä di handihu̱ mäpaya. Rä Mäkä Tꞌofo bi mää ge nuya gehya rꞌa yä tsꞌo tꞌo̱tꞌe ma dä thogi:

Yä dängä tuhni. «Ma dä ntuhni yä hnini ko märꞌa yä hnini» ꞌne yä tsꞌu̱tꞌhui ko märꞌa yä tsꞌu̱tꞌhui (Mateo 24:7). Mäjuäni xä thogi näꞌä bi mängä rä Mäkä Tꞌofo. Dende rä je̱ya 1914 bi nheki hanja ndunthi yä hnini de gatꞌho rä xiꞌmhai bi ja yoho yä tuhni xi yä dängi, ꞌne ndunthi märꞌa yä tuhni xä nheki. Yä mꞌo de gä mꞌo nuꞌu̱ yä jäꞌi xa du ha nuya yä tuhni.

Yä ñheni xä ntsini ha rä xiꞌmhai. «Ma dä nja yä tsꞌo ñheni habu̱räza.» (Lucas 21:11.) ¿Xä nheki nunä señä? Hää. Yä mꞌo de gä mꞌo nuꞌu̱ yä jäꞌi xä du ko yä kanse, yä kꞌu̱the, rä tuberkulosi, rä sida ꞌne märꞌa yä ñheni.

Di nheki yä thuhu. Ha rä xiꞌmhai ndunthi yä jäꞌi otho te dä zi. Tatꞌä je̱ya yä mꞌo de gä mꞌo nuꞌu̱ yä jäꞌi tu de gä thuhu. Gehnä mänꞌa rä señä udi ge rä Xiꞌmhai de gä uädri xä dämä ꞌñepu̱. Rä Mäkä Tꞌofo mää: «Ma dä nja rä dängä thuhu» (Marcos 13:8).

 Yä mbiꞌmhai. «Ma dä nja yä mbiꞌmhai habu̱räza.» (Mateo 24:7.) ꞌNehe geꞌä xä thogi mäpaya. Thogi nꞌa mꞌo de gä mꞌo nuꞌu̱ yä jäꞌi xä du ha yä mbiꞌmhai dende rä je̱ya 1914.

Yä tsꞌomꞌu̱i jäꞌi. «Yä jäꞌi [...] xi dä ne dä me̱ꞌtsä ndunthi yä bojä» ꞌne “yä jäꞌi dri nsuse̱he̱”. “Nuꞌu̱ mänꞌa di mädi yä tꞌo̱tꞌe xä ntsꞌo ke Äjuä.” Yä bätsi dyä «tsꞌo yꞌo̱de ko yä dada» (2 Timoteo 3:1-5). ¿Hixkä handi ge mäpaya ꞌmu̱i ndunthi yä jäꞌi njabu̱? Hingi pe̱ꞌtsuä rä tꞌekꞌei Äjuä ꞌne o̱ꞌtue rä ntsꞌomꞌu̱i nuꞌu̱ toꞌo ne dä bädi de rä Zi Dada.

Yä ntsꞌomꞌu̱i. ꞌNehe «xi mänꞌa ma dä ndängi rä tsꞌoki» (Mateo 24:12). Zäge nuꞌäge xkä handi ꞌnehe ge mäpaya di nheki ndunthi rä ntsꞌomꞌu̱i. Habu̱räza, rä jäꞌi tsu dä fepi, dä thatꞌi o tsu te dä tꞌo̱tuäbi.

Gatꞌho gehya udi ge xä dämä ꞌñepu̱ rä tsꞌu̱tꞌhui Äjuä. Rä Mäkä Tꞌofo mää: “Nuꞌmu̱ xkri hyandihu̱ dä nja nuya yä tsꞌo thogi, pädihu̱ ge rä Ndä de mähetsꞌi [rä tsꞌu̱tꞌhui Äjuä] xä ꞌñepu̱” (Lucas 21:31). Pe ¿te be̱ꞌä rä Tsꞌu̱tꞌhui Äjuä? Näꞌä nꞌa rä tsꞌu̱tꞌhui xä hñutsꞌi Äjuä ha mähetsꞌi, näꞌä go geꞌä ma dä hyoki gatꞌho rä Xiꞌmhai nꞌa rä uädri. Ma dä hñänduäbi yä hudi gatꞌho nuꞌu̱ yä tsꞌu̱tꞌhui ꞌmu̱kua ha rä xiꞌmhai (Mateo 6:10).