RÄ NTHEKE 6
Dabid hingä mi tsu
Xi nuꞌi, ¿te gi pe̱fi nuꞌmu̱ gi tsu?... Zäi ge gi apäbi rä mfatsꞌi ri dada ꞌne ri nänä. Pe ꞌmu̱i mä nꞌa toꞌo dä za dä maxꞌäꞌi. Näꞌä, mänꞌa xa ja rä tsꞌe̱di ke gatꞌho yä jäꞌi. ¿Gi pädi toꞌoꞌä?... ¡Go geꞌä rä Zi Dada Jeoba! Rä Mäkä Tꞌofo mää de nꞌa rä tsꞌu̱ntꞌu̱ mi rä thuhu Dabid. Nuni tsꞌu̱ntꞌu̱ hingä mi tsu ngeꞌä mi pädi ge rä Zi Dada Jeoba nzäntho ma xä matsꞌi.
Dende mi bätsi Dabid, yä dada bi ꞌñuti dä mädi rä Zi Dada Jeoba. Geꞌä bi matsꞌi Dabid pa himbi ntsu nixi nuꞌmu̱ bi me̱ꞌtsi yä nthogi nuꞌu̱ di uni rä mbidi. Dabid mi pädi xä ñho ge Jeoba mi rä amigo ꞌne ge ma xä matsꞌi. Nꞌa rä pa, nuꞌmu̱ Dabid mi fadi yä de̱ti, ¡bä ehe nꞌa däta zate ꞌne bi ziꞌspäbi nꞌa rä de̱ti! ¿Gi pädi te bi me̱fi Dabid? Bi nte̱hui näꞌä zate ꞌne bi hyo ko yä yꞌe̱se̱. Mä nꞌa rä pa, nꞌa rä oso bä ehe pa xä zipäbi yä de̱ti, ¡mänꞌaki Dabid bi ñäni yä de̱ti ꞌne bi hyo näꞌä oso! ¿Toꞌo gi handi ge bi matsꞌi Dabid?... ¡Rä Zi Dada Jeoba!
Dabid bi me̱ꞌtsi mä nꞌa däta nthogi, pe näꞌä himbi ntsu. Nꞌa rä pa, yä israelita mi ntunkui yä filisteo. Yä filisteo mi zi nꞌa soldado xa mi xä ñhetsꞌi mi rä thuhu Goliat. Nuni nda däta jäꞌi xa mi theni nuꞌu̱ yä soldado yä israelita ꞌne Jeoba. Goliat bi ꞌñembäbi nuꞌu̱ yä israelita: “¡Huahnihu̱ nꞌa toꞌo dä ehe dä ntuhni kongeki!”. Pe gatꞌho yä israelita xa mi tsu ꞌne hinto mi ne dä ntunkui. Pe mi yꞌo̱de Dabid näꞌä xki thogi, bi ꞌñembäbi Goliat: “¡Nuga hää ma gä ntunkui! ¡Jeoba ma dä maxkägi ꞌne ma gä hoꞌi!”. ¿Te bi ꞌñudi Dabid ko näꞌä bi me̱fi?... ¡Dabid bi ꞌñudi ge xa hingä mi tsu! ¿Gi ne gi pädi te bi thogi mꞌe̱fa?
Dabid bi gu̱ rä ntꞌe̱ndo ꞌne ku̱tꞌa yä kongädo ꞌne bi bo̱tsꞌe pa dä ntunkui Goliat. Mi hyandi Goliat ge Dabid mi nꞌa rä tsꞌu̱ntꞌu̱, xa bi deni. Pe Dabid bi ꞌñembäbi: “Nuꞌi xki ꞌñepu̱ ko ri majuai, ¡pe nuga xti mabu̱ ko rä mfatsꞌi rä Zi Dada Jeoba!”. Nubye̱, Dabid bi ma bä tsu̱di Goliat, ꞌne bi yꞌe̱mbäbi nꞌa rä do ko rä ntꞌe̱ndo. ¡Näꞌä do bi umbi xa mero ha rä de, ꞌne Goliat bi huangi bi du! Mi hyandi yä filisteo näꞌä bi thogi, xi bi ntsu ꞌne bi nextꞌi bi ma. ¿Por hanja gi handi ge nꞌa rä tsꞌu̱ntꞌu̱ ngu Dabid bi za bi däpäbi Goliat?... Ngetꞌho rä Zi Dada Jeoba bi matsꞌi. Hää, ¡Jeoba bi ꞌñudi ge mänꞌa xa ja rä tsꞌe̱di ke näꞌä nda däta jäꞌi!
Dabid himbi zu Goliat ngetꞌho mi pädi ge Jeoba ma xä matsꞌi
¿Te dä za gi pädi de näꞌä bi thogi Dabid?... ¡Ge rä Zi Dada Jeoba, mänꞌa xa ja rä tsꞌe̱di ke gatꞌho yä jäꞌi! Hänge mu̱ nꞌa rä pa te dä piꞌi, beni ge rä Zi Dada Jeoba geꞌä ri amigo, ꞌne dä za dä maxꞌäꞌi pa hingi ntsu.
