¿Nzäntho thädi xä ñho yä jäꞌi nuꞌmu̱ di xipäbihu̱ de rä Zi Dada Jeoba? Hinä, rꞌabu̱ thengägihu̱ o di nkue̱ kongekhu̱, ꞌne geꞌä dä za dä jakägihu̱ ya hingä ne gä ñähu̱ de rä Zi Dada Jeoba. ¿Xkä mbeni njabu̱ nꞌa rä pa?... Rä Mäkä Tꞌofo xikägihu̱ de Jeremias, nꞌa tsꞌu̱ntꞌu̱ näꞌä xa mi mädi rä Zi Dada Jeoba, pe ya ma xä hye̱gi de xä ñä de geꞌä. ¿Gi ne gi pädi por hanja? Ma gä pädihu̱ mä nꞌa tu̱i de geꞌä.

Nuꞌmu̱ Jeremias mi nꞌa rä bäsjäꞌi, Jeoba bi ꞌñembäbi ge dä xipäbi yä jäꞌi ge xä hye̱hni nuꞌu̱ yä tsꞌo tꞌo̱tꞌe mi pe̱fi. Nunä ꞌme̱fi, xa mi xä ñhei pa Jeremias, ꞌne xa bi ntsu. Hänge Jeremias bi ꞌñembäbi Jeoba: “Nuga dä tsꞌu̱ntꞌu̱tho ꞌne hindi pädi te  gä mää”. Pe Jeoba bi ꞌñembäbi: “Ogi tsu, nuga ma gä faxꞌäꞌi”.

Nubye̱, Jeremias bi mu̱di bi xipäbi njaua yä jäꞌi: “Mu̱ hingi paati näꞌä ri mꞌu̱ihu̱, Jeoba ma dä kastigaꞌihu̱”. ¿Bi yꞌo̱de nuꞌu̱ yä jäꞌi?... Nuꞌu̱ yä jäꞌi ho̱nse̱ bi dentho ꞌne bi nkue̱ ko Jeremias. Rꞌa yä jäꞌi, ¡asta mi ne dä hyo Jeremias! ¿Te bi za Jeremias?... Näꞌä xa bi ntsu, ꞌne bi ꞌñenä: “Ya hingä ma gä ñä de rä Zi Dada Jeoba”. ¿Xa mäjuäni ya himbi ñä de rä Zi Dada Jeoba?... Hinä, Jeremias xa mi mädi ndunthi rä Zi Dada Jeoba, ꞌne himbi hye̱gi de dä ñä de geꞌä, hänge rä Zi Dada Jeoba bi ñäni de nuꞌu̱ yä nkontra.

Nꞌa rä pa, rꞌa yä tsꞌomꞌu̱i ñꞌo̱ho̱, bi yꞌe̱ntꞌi Jeremias ha nꞌa rä poso habu̱ mi ja yä kꞌahai. Himbi tꞌumbi te dä zi ha nixi rä dehe. Nuꞌu̱ yä tsꞌomꞌu̱i jäꞌi mi ne ge Jeremias ja xpä tuni. Pe ko rä mfatsꞌi rä Zi Dada Jeoba, Jeremias bi bo̱ni de näꞌä poso.

¿Te dä za gi pädi de rä kꞌoi Jeremias?... Ge mäske rꞌabu̱ Jeremias bi ntsu, näꞌä bi sigi bi ñä de rä Zi Dada Jeoba. Rꞌabu̱, yä jäꞌi ꞌnehe ma dä deñꞌäꞌi o ma dä nkue̱ kongeꞌi nuꞌmu̱ gi xipäbi de rä Zi Dada Jeoba, ꞌne geꞌä ma dä jaꞌi gi pe̱ꞌtsi ri tsa o gi ntsu. Pe beni, mu̱ nunka gi hye̱gi de gi ñä de rä Zi Dada Jeoba, ¡näꞌä nzäntho ma dä maxꞌäꞌi ja ngu bi matsꞌi Jeremias!