¿Di jaꞌi xä ñhei gi pe̱fi näꞌä di ho Jeoba?... Ndunthi yä jäꞌi mää ge xa xä ñhei. Pe rä Mäkä Tꞌofo xikägihu̱ ge hinä. Xikägihu̱ ge nꞌa rä tsꞌu̱ntꞌu̱ mi rä thuhu Josias xa bi yꞌo̱tꞌe ntsꞌe̱di pa bi za bi me̱päbi xä ñho rä Zi Dada Jeoba. ¿Gi pädi te bi matsꞌi? Josias bi huahni xä ñho nuꞌu̱ yä amigo. ¿Gi ne gi pädi mä nꞌa tu̱i toꞌo Josias ꞌne nuꞌu̱ yä amigo mi pe̱ꞌtsi?

Näꞌä rey de rä hnini Juda mi rä thuhu Amon, geꞌä mi rä dada Josias. Amon xa mä tsꞌomꞌu̱i ꞌne mi xo̱kämbeni yä idolo. Mi du Amon, Josias go bi zo̱ho̱ bi nrey ha Juda. ¿Gi pädi hängu nje̱ya mi pe̱ꞌtsi Josias nuꞌmu̱ bi zo̱ho̱ bi nrey? ¡Ja mi pe̱ꞌtsi hñäto nje̱ya! ¿Bi zo̱ho̱ bi ntsꞌomꞌu̱i ꞌnehe ja ngu rä dada?... Hinä, Josias himbi njabu̱.

Dende nuꞌmu̱ Josias mi nꞌa rä zi tꞌu̱kä metsi, näꞌä xa mi ne dä yꞌo̱te rä Zi Dada Jeoba. Hänge bi huahni dä ntsixhui ho̱nse̱ nuꞌu̱ mi mädi rä Zi Dada Jeoba, ꞌne geꞌu̱ bi matsꞌi Josias dä me̱fi näꞌä xä ñho. ¿Gi pädi mi toꞌo nuꞌu̱ yä amigo Josias?

 Nꞌa de nuꞌu̱ yä amigo mi rä thuhu Sofonias. Sofonias mi nꞌa rä profeta Jeoba, näꞌä bi xipäbi rä hnini Juda te ma xä thogi kongeꞌu̱ mu̱ xä xo̱kämbeni yä idolo. Josias bi yꞌo̱de näꞌä xki mää Sofonias, ꞌne bi xo̱kämbeni ho̱nse̱ Jeoba.

Mä nꞌa rä amigo Josias, mi geꞌä rä Jeremias. Näꞌä kasi mi mähye̱giui rä je̱ya Josias, ꞌne bi te mähye̱gi ngeꞌä mi ꞌmu̱i getbu̱ nꞌa de mänꞌaa. Nuyu̱ xa mi ntsitsꞌi xä ñho. Hänge mi du Josias, Jeremias bi yꞌofo nꞌa rä thuhu xa mähotho habu̱ mi mää hängu mi beni näꞌä rä amigo. Josias ꞌne Jeremias bi mfatsꞌi nꞌa ngu mänꞌaa pa bi za bi me̱päbi ꞌne bi yꞌo̱te rä Zi Dada Jeoba.

¿Te dä za gi pädi de näꞌä bi me̱fi Josias?... Mäske Josias mi nꞌa rä tꞌu̱kä bätsi, näꞌä xa mi ne dä me̱fi näꞌä xä ñho. Hänge bi ñꞌamigoui ho̱nse̱ nuꞌu̱ mi mädi ꞌnehe rä Zi Dada Jeoba. Xi nuꞌi, ¿gi ne gi pe̱päbi Jeoba ja ngu bi ja Josias? Nuꞌmu̱, mähyoni gi huahni gi ntsixhui ho̱nse̱ nuꞌu̱ di mädi rä Zi Dada Jeoba, pa njabu̱ dä maxꞌäꞌi gi pe̱fi näꞌä xä ñho.