¿Gi pädi ndañꞌä näꞌä tsꞌu̱tꞌhui ma dä mända ha gatꞌho rä Xiꞌmhai?... ¡Geꞌä rä Tsꞌu̱tꞌhui Äjuä! Näꞌä Tsꞌu̱tꞌhuiꞌä ma dä japi dä uädri gatꞌho rä Xiꞌmhai. ¿Gi ne gi pädi mä nꞌa tu̱i de nunä Tsꞌu̱tꞌhui?...

Gatꞌho yä tsꞌu̱tꞌhui pe̱ꞌtsi nꞌa rä rey. ¿Gi pädi te pe̱fi nꞌa rä rey? Nꞌa rä rey, geꞌä nꞌa rä jäꞌi di mända yä jäꞌi de ha nꞌa däta hnini. ¿Gi pädi toꞌo näꞌä Rey di mända ha rä Tsꞌu̱tꞌhui Äjuä?... ¡Geꞌä rä Hesu! Rä Hesu bi ꞌmu̱i ha mähetsꞌi, ꞌne mänꞌitꞌho go ma dä mända yä jäꞌi de gatꞌho rä Xiꞌmhai. ¿Gi handi ge ma gä pe̱ꞌtsihu̱ ndunthi rä johya nuꞌmu̱ xtä mända rä Hesu nuua ha rä Xiꞌmhai?...

¡Nuju̱ ma gä ꞌmu̱ihu̱ ko ndunthi rä johya! Gatꞌho rä Xiꞌmhai ma dä uädri, yä jäꞌi ya hingä ma dä ñꞌu̱tsa, ꞌne ya hingä ma gä o̱dehu̱ dä nja yä däta tuhni. Gatꞌho yä jäꞌi ma dä mädi nꞌa ngu mänꞌaa. Yä jäꞌi ya hingä ma dä ñheni, ha nixi hinto ma dä du. Nuꞌu̱ yä jäꞌi goda ma dä za dä hyandi, ꞌne nuꞌu̱ gogu ma dä za dä yꞌo̱de. Nuꞌu̱ yä jäꞌi mäpaya hingi tsa dä ñꞌo, ma dä za dä nextꞌi ꞌne dä nsagi. Gatꞌho ma dä me̱ꞌtsi ndunthi te dä zi. Yä zuꞌue ma dä mänxo, ꞌne yä jäꞌi ma dä za dä ñꞌeni kongeꞌu̱. ¡Pe hingä se̱he̱ꞌä! Nuꞌu̱ yä jäꞌi xä du, ma dä mengi dä mꞌu̱i. ¿Gi beni te yä thuhu nuꞌu̱ yä jäꞌi ya gä pädi ha nunä foyeto?  Ndunthi de geꞌu̱, ngu Rebeka, Raab, Dabid, ꞌne Elias, ꞌnehe ma dä mengi dä mꞌu̱i mänꞌaki. ¿Toꞌo de geꞌu̱ gi hohmä gi pädi xtä nuhu de rä du?...

Rä Zi Dada Jeoba xa di mäꞌäꞌi, hänge ne ge nuꞌi gi ꞌmu̱i ko ndunthi rä johya. Mu̱ nuꞌi gi sigi gi pädi de geꞌä ꞌne gi yꞌo̱te, ¡nuꞌi ma dä za gi ꞌmu̱i pa nzäntho ha rä Xiꞌmhai xtä uädri! ¿Gi hohmä gi ꞌmu̱i ha rä Uädri?...