¿Di jaꞌi xä ñhei gi yꞌo̱te ri dada ꞌne ri nänä?... Rꞌabu̱ xa xä ñhei, ¿hänge hää? ¿Gi pädi ge rä Hesu nzäntho bi yꞌo̱te Jeoba ꞌne nuꞌu̱ yä dada bi me̱ꞌtsi nuua ha rä Xiꞌmhai?... Rä kꞌoi dä za dä maxꞌäꞌi gi yꞌo̱te ri dada mäske rꞌabu̱ dä jaꞌi xä ñhei. Ma gä pädihu̱ mä nꞌa tu̱i de rä Hesu.

Änte de dä ehe rä Hesu ha rä Xiꞌmhai, näꞌä mi ꞌmu̱hui rä Dada ha mähetsꞌi, ¿gi pädi te rä thuhu näꞌä rä Dada? Jeoba. Pe mi mꞌu̱kua ha rä Xiꞌmhai ꞌnehe bi me̱ꞌtsi yä dada. Nuꞌu̱ mi yä thuhu Jose ꞌne Märia. ¿Gi pädi hanja bi zo̱ho̱ bi mꞌu̱i rä Hesu nuua ha rä Xiꞌmhai?...

Jeoba bi ja nꞌa milagro ꞌne bä pombäbi rä te rä Hesu de ha mähetsꞌi pa ha rä mu̱i Märia, ꞌne njabu̱ rä Hesu bi za bi mꞌu̱i ꞌne bi te nuua ha rä Xiꞌmhai. Ja ngu gatꞌho yä zi ꞌue̱ne di te mbo ha rä mu̱i yä nänä, rä Hesu ꞌnehe bi te mbo ha rä mu̱i Märia po gu̱to nzänä, ꞌnepu̱ bi mꞌu̱i. Njabu̱, Märia ꞌne Jose bi tede rä Hesu nuua ha rä Xiꞌmhai.

Nuꞌmu̱ rä Hesu mi pe̱ꞌtsi 12 nje̱ya, bi ꞌñudi hängu mi mädi näꞌä rä Dada bi ꞌmu̱i mähetsꞌi. Nꞌa rä pa, rä Hesu ꞌne rä familia bi ma pa Jerusalen ha näꞌä ngo de rä Paskua. Pe nuꞌmu̱ mi mengi pa ha yä nguu, Jose ꞌne Märia bi hyoni rä Hesu pe himbi dini. ¿Gi pädi habu̱ mi yꞌo rä Hesu?...

Jose ꞌne Märia nguntꞌä bi mengi pa Jerusalen, nuꞌu̱ xa mi tuyämu̱i. Po hñupa xa bi hyoni rä Hesu. ¿Gi pädi habu̱ bä tini? Ha rä templo. ¿Gi pädi por hanja rä Hesu xki gohi ha rä templo?... Ngeꞌä mi pädi ge ha rä templo ja mi tꞌudini de Jeoba. Rä Hesu xa mi mädi rä Zi Dada Jeoba, ꞌne mi ne dä johyabi rä koraso. Dende nuꞌmu̱ mi bätsi asta nuꞌmu̱ ya mi nꞌa rä däta ñꞌo̱ho̱, rä Hesu nzäntho bi yꞌo̱te rä Zi Dada Jeoba. Rä Hesu bi yꞌo̱te Jeoba, mäske rꞌabu̱ bi japi xä ñhei ꞌne bi thogi yä sufrimiento. ¿Gi kamfri ge rä Hesu ꞌnehe bi yꞌo̱te Jose ꞌne Märia?... Rä Mäkä Tꞌofo xikägihu̱ ge hää.

¿Te dä za gi pädi de rä kꞌoi rä Hesu?... Mäske rꞌabu̱ ma dä jaꞌi xä ñhei, mähyoni ge nzäntho gi yꞌo̱te ri dada ꞌne ri nänä ja ngu bi ja rä Hesu. ¿Ma gi pe̱fi njabu̱?...