RÄ NTHEKE 3
Raab bi me̱ꞌspäbi rä jamfri Jeoba
Ma gä jahu̱ ngue̱nda ge di ꞌmu̱hu̱ ha Jeriko. Nunä luga mi kohi ha rä hnini Kanään. Nuꞌu̱ yä jäꞌi de nunä luga hingä mi xo̱kämbeni rä Zi Dada Jeoba. Ja mi ꞌmu̱ini nꞌa rä ꞌme̱hñä mi rä thuhu Raab.
Dende nuꞌmu̱ Raab mi nꞌa rä tꞌu̱kä nxutsi, xki yꞌo̱de ndunthi de rä Zi Dada Jeoba. Xki yꞌo̱de hanja Jeoba xki matsꞌi Moises pa bi heke rä mar Rojo ꞌne bi gu̱ki yä israelita de Ejipto. ꞌNehe Raab, xki yꞌo̱de hanja Jeoba xki matsꞌi yä israelita pa xki däpäbi nuꞌu̱ yä nkontra. Pe nubye̱, ¿gi pädi te bi yꞌo̱de Raab? Bi yꞌo̱de ge yä israelita ya mi yꞌo getbu̱ de Jeriko.
Raab mi pe̱ꞌspäbi rä jamfri Jeoba hänge bi matsꞌi nuꞌu̱ yoho yä israelita
Nꞌa rä xui, yoho yä israelita bi yu̱tꞌi ha Jeriko pa dä hyandi te mi thogi ha näꞌä hniniꞌä. Nuꞌu̱ yoho yä ñꞌo̱ho̱ bi zo̱ni ha rä ngu Raab, ꞌne näꞌä ꞌme̱hñä bi mbitabi dä thogi dä ntsaya. Näꞌä xuiꞌä, rä rey de Jeriko, bi bädi ge xki zo̱ho̱ nuꞌu̱ yä ñꞌo̱ho̱ ha rä hnini ꞌne ge xki zo̱tꞌe ha rä ngu Raab. Hänge näꞌä rey bi mända dä thoni nuꞌu̱ yä ñꞌo̱ho̱ꞌu̱. Xibye̱, ¿te bi me̱fi Raab? Bi ꞌñägi nuꞌu̱ yä ñꞌo̱ho̱| mäñä de rä nguu, ꞌne mi zo̱ho̱ nuꞌu̱ yä ꞌme̱go rä rey, Raab bi ꞌñembäbi: «Nuꞌu̱ yä ñꞌo̱ho̱ gi honihu̱, ya bi bo̱ni de rä hnini. Pe tobe dä za gi tsu̱dihu̱ mu̱ nguntꞌä gi ꞌme̱fahu̱ de geꞌu̱». ¿Gi pädi por hanja Raab bi matsꞌi nuꞌu̱ yoho yä israelita?... Ngeꞌä mi pädi ge Jeoba geꞌä rä Zi Dada xa mäjuäni, ꞌne mi pädi ge ko rä mfatsꞌiꞌä, yä israelita ma xä za xä hñäni rä hnini Kanään.
Änte de xä ma nuꞌu̱ yoho yä israelita de ha rä ngu Raab, nuꞌu̱ bi prometebi: “Xkä hänihe nunä rä hnini, nuꞌi ꞌne ri familia hinte ma gi jahu̱”. ¿Gi pädi te bi tꞌembi dä me̱fi Raab?... Nuꞌu̱ yoho yä israelita bi ꞌñembäbi: “Pe̱ꞌtsi te gi thätꞌi ha ri bentanä nunä rä the̱ngä nthähi, ꞌne gi muntsꞌi gatꞌho nuꞌu̱ ri familia, ꞌne ja gi kohu̱bu̱ mbo ha ri nguu. Mu̱ gi ja njabu̱, gatꞌho ma gi pongihu̱ ꞌne hingi tuhu̱”. Raab bi me̱fi gatꞌho näꞌä bi sipäbi. ¿Gi pädi te bi thogi mꞌe̱fa?...
Jeoba bi ñäni Raab ꞌne rä familia
Mi thogi rꞌa yä pa, yä israelita bi zo̱ni ha Jeriko ꞌne bi mu̱di bi thetꞌi ha näꞌä hniniꞌä po rꞌato yä pa. Kada nꞌa rä pa mi uni nꞌa nthetꞌi, pe nuyu̱ nixi mi ñä ha nixi mi mafi. Pe ha näꞌä rä yoto mä pa, bi uni yoto yä nthetꞌi ha rä hnini, ꞌne bi hye̱ nꞌa rä däta mhafi. Nubye̱ rä Zi Dada Jeoba bi japi bi yo̱tꞌe nuꞌu̱ yä jädo de rä hnini Jeriko. Pe, ¿gi handi nuni ngu habu̱ zu̱di nꞌa the̱ngä nthähi?... Hää, gehni rä ngu Raab. ¡Raab, yä dada, ꞌne yä ku, bi bongi!
¿Te dä za gi pädi de rä kꞌoi Raab?... Raab bi me̱ꞌspäbi rä jamfri rä Zi Dada Jeoba po gatꞌho nuꞌu̱ yä däta tꞌo̱tꞌe xki yꞌo̱de de geꞌä. Nuꞌi ꞌnehe gi yꞌo gi pädi ndunthi yä tꞌo̱tꞌe xa mähotho de rä Zi Dada Jeoba. ¿Ma gi pe̱ꞌspäbi rä jamfri rä Zi Dada Jeoba ja ngu bi ja Raab?... ¡Nuꞌi hää dä za gi ja njabu̱ ꞌnehe!
