Rebeka xa mi mädi rä Zi Dada Jeoba. Rä däme mi rä thuhu Isak. Nuni ꞌnehe xa mi mädi Jeoba. ¿Hanja bi mpädi Rebeka ko Isak? ¿Por hanja Jeoba bi numäñho Rebeka? Ma gä pädihu̱ mä nꞌa tu̱i de Isak, näꞌä rä däme Rebeka.

Rä dada Isak mi rä thuhu Abraan, ꞌne rä nänä mi rä thuhu Sara. Nuyu̱ mi ꞌmu̱i ha rä hnini Kanään habu̱ yä jäꞌi hingä mi xo̱kämbeni Jeoba. Pe Abraan mi ne ge Isak xä nthäti ko nꞌa ꞌme̱hñä näꞌä mi mädi Jeoba. Hänge Abraan bi me̱hni nꞌa rä ꞌme̱go (zäi ge mi geꞌä Elieser) pa ha nꞌa luga mi rä thuhu Aran. ¿Por hanja bi me̱hni ha näꞌä lugaꞌä? Ngeꞌä ja mi ꞌmu̱hni rꞌa yä pariente Abraan.

Elieser ꞌne märꞌa yä ꞌme̱go Abraan, bi gu̱ yä ꞌñuu ꞌne bi ma pa ha näꞌä lugaꞌä xa mi yabu̱. Nuyu̱ bi zitsꞌi rꞌe̱tꞌa yä kameyo nuꞌu̱ xki tuti yä ñhuni ꞌne yä regalo. ¿Hanja ma xä za xä huahni Elieser nꞌa rä ꞌme̱hñä pa Isak? Mi zo̱ni Elieser ꞌne nuꞌu̱ märꞌa yä ꞌme̱go Abraan ha rä hai Aran, ja bi ntsayani ha nꞌa poso. ¿Por hanja? Ngeꞌä Elieser mi pädi ge yä ꞌme̱hñä de näꞌä lugaꞌä mi ehe pa mi ai yä dehe. Nubye̱, Elieser bi xatuäbi rä Zi Dada Jeoba ꞌne bi ꞌñembi: “Näꞌä nxutsi dä ne dä rꞌakägi rä dehe pa nuga ꞌne pa mä kameyo, go geꞌä ꞌme̱hñä xkä huahni pa rä Isak”.

Nuꞌmu̱, nꞌa rä nxutsi mi rä thuhu Rebeka bi zo̱ho̱ ha rä poso pa dä yꞌatꞌi rä dehe.  Rä Mäkä Tꞌofo mää ge näꞌä nxutsi xa mi tsꞌu̱ngänza. Elieser bi yꞌapäbi rä dehe näꞌä nxutsi, ꞌne näꞌä bi ꞌñenä: “Hää, ma gä rꞌaꞌi rä dehe, ꞌne ma gä ai rä dehe pa dä ntsithe ꞌnehe nuyu̱ ri kameyo”. ¿Gi pädi hängu rä dehe tsi yä kameyo? Nuꞌu̱ xa tsi ndunthi. Hänge Rebeka bi deni xa ndunthi yä dehe pa nuꞌu̱ yä kameyo xa mi tuthe. ¿Gi handi te pe̱fi Rebeka?... Mi hyandi Elieser ge Rebeka xa mi rä me̱fi, näꞌä bi ꞌñenä: “¡Rä Zi Dada Jeoba bi dädi mä sadi!”.

ꞌNepu̱, Elieser bi gu̱ki yä regalo xa mähotho pa bi umbäbi Rebeka. Nubye̱, Rebeka bi zitsꞌi Elieser ꞌne nuꞌu̱ märꞌa yä ꞌme̱go pa ha rä ngu rä dada. Mi zo̱ni, Elieser bi xipäbi nuꞌu̱ yä familia Rebeka pa te xki me̱hni Abraan ha näꞌä lugaꞌä, ꞌne hanja Jeoba xki dädi näꞌä rä sadi. Mi yꞌo̱de njabu̱, nuꞌu̱ xa bi johya, ꞌne bi ꞌñenä ge hää mi uni Rebeka pa dä nthätui Isak.

¿Gi kamfri ge Rebeka ma xä ne xä nthätui Isak?... Nuꞌmu̱ bi tꞌambäbi Rebeka mu̱ mi ne dä ma pa Kanään pa dä nthätui Isak, näꞌä bi ꞌñenä: “Hää, nuga di ne gä ma”. ¿Por hanja bi dädi njabu̱? Ngeꞌä Rebeka mi pädi xä ñho ge rä Zi Dada Jeoba geꞌä xki me̱hni Elieser. ꞌNepu̱ Rebeka bi me̱ui Elieser pa Kanään, ꞌne bi nthätui Isak.

¿Te bi hñäni Rebeka ngeꞌä bi yꞌo̱te Jeoba? Hää, rä Zi Dada Jeoba bi su ꞌne bi umbäbi ndunthi yä jäpi. Ndunthi yä je̱ya mꞌe̱fa, rä Hesu bi mꞌu̱i de nꞌa rä familia näꞌä xpi ꞌñehe de Rebeka. Mu̱ nuꞌi gi de̱mbäbi rä kꞌoi Rebeka, ma gi johyabi rä koraso rä Zi Dada Jeoba, ꞌne näꞌä ma dä suꞌi ꞌne ma dä rꞌaꞌi ndunthi yä jäpi.