RÄ NTHEKE 13
Timoteo xa mi ho dä matsꞌi yä jäꞌi
Timoteo mi nꞌa rä tsꞌu̱ntꞌu̱ näꞌä xa mi umbäbi rä johya dä matsꞌi märꞌa yä jäꞌi. Näꞌä bi zo̱ni ha ndunthi yä hnini pa mi fatsꞌi märꞌa yä jäꞌi. Hänge po rängeꞌä, Timoteo bi me̱ꞌtsi nꞌa rä mꞌu̱i xa temäꞌentho. ¿Gi ne gi pädi mä nꞌa tu̱i de Timoteo?...
Rä xuxu ꞌne rä nänä Timoteo uti de rä Zi Dada Jeoba
Timoteo bi te ha nꞌa rä hnini rä thuhu Listra. Dende nuꞌmu̱ mi nꞌa rä zi le̱le̱, näꞌä rä xuxu mi rä thuhu Loida, ꞌne näꞌä rä nänä mi rä thuhu Eunise bi mu̱di bi ꞌñuti Timoteo de rä Zi Dada Jeoba. Hänge mi te Timoteo, mi ne dä matsꞌi yä jäꞌi dä bädi ꞌnehe de rä Zi Dada Jeoba.
Nꞌa rä pa, nuꞌmu̱ Timoteo ya mi nꞌa rä tsꞌu̱ntꞌu̱ ñꞌo̱ho̱, Pablo bi ꞌñembäbi: “Nuga ma gä ma ha märꞌa yä luga pa gä ungä ntꞌo̱de rä Noya Äjuä, ¿gi ne gi ma kongeki?”. Timoteo bi dädi ko ndunthi rä johya: “Hää di ne gä ma kongeꞌi”. Näꞌä ya xki ñhoki pa dä matsꞌi märꞌa yä jäꞌi.
Timoteo bi me̱ui Pablo pa ha Tesalonika, nꞌa rä luga mi kohi ha rä hnini Gresia. Pa geꞌä, nuꞌu̱ mꞌe̱tꞌo bi ñꞌo xa ndunthi ꞌnepu̱ bi gu̱ nꞌa rä barko pa bi zo̱ni ha näꞌä hniniꞌä. ꞌNe mi zo̱ni, Pablo ꞌne Timoteo bi matsꞌi xa ndunthi yä jäꞌi dä bädi de rä Zi Dada Jeoba. Pe rꞌa yä jäꞌi xa bi bo̱ yä nkue̱ kongeꞌu̱ ꞌne asta mi ne te dä yꞌo̱tpäbi. Hänge Pablo ꞌne Timoteo pe̱ꞌtsi te bi bo̱ni de gehni ꞌne bi ma bä ungä ntꞌo̱de ha märꞌa yä luga.
Timoteo bi me̱ꞌtsi nꞌa rä johya ꞌne nꞌa rä mꞌu̱i temäꞌentho
Mi thogi rꞌa yä zänä, Pablo bi yꞌapäbi Timoteo ge dä mengi pa ha rä hnini Tesalonika pa dä nuu te mi pe̱tꞌho nuꞌu̱ yä ku de gehni. ¿Gi beni ge ha näꞌä hniniꞌä mi ꞌmu̱i rꞌa yä jäꞌi nuꞌu̱ xa mi yä tsꞌomꞌu̱i ꞌne xa mi u̱tsa yä kristianu? Pe Timoteo mi turämu̱i po nuꞌu̱ yä ku de gehni, hänge himbi ntsu ꞌne bi ma bä nuu. ꞌNepu̱, Timoteo bi mengi ko Pablo pa bi hñäꞌspäbi yä hogä raso. ¿Te mä rasoꞌu̱? Ge nuꞌu̱ yä ku mengu Tesalonika, ¡xa mi sigi mi pe̱päbi xä ñho rä Zi Dada Jeoba!
Po ndunthi yä je̱ya, Timoteo ꞌne Pablo bi me̱päbi mähye̱gi rä Zi Dada Jeoba. Hänge Pablo, ha nꞌa de nuꞌu̱ yä karta bi yꞌofo, bi mää ge mi joꞌo mä nꞌa ngu Timoteo pa dä me̱hni dä fatsꞌi yä ku de märꞌa yä mhuntsꞌi. Timoteo mi mädi ndunthi rä Zi Dada Jeoba, ꞌne yä jäꞌi.
Xi nuꞌi, ¿gi mädi yä jäꞌi? ¿Gi hohmä gi fatsꞌi dä bädi de rä Zi Dada Jeoba?... Mu̱ gi pe̱fi njabu̱, ¡ma gi pe̱ꞌtsi rä johya ꞌne nꞌa rä mꞌu̱i xa temäꞌentho ja ngu Timoteo!
