Jamädi ndunthi ngeꞌä gä ꞌueke ri tiempo pa gä nxadi nunä foyeto, ꞌne njabu̱ ya gä pädi xä ñho toꞌo nuꞌu̱ yä testigo rä Jeoba, ꞌne gä pädi hanja di mpe̱fi mähye̱gi nuꞌu̱ yä Testigo de gatꞌho rä Xiꞌmhai. Di to̱ꞌmihe ge nunä foyeto bi maxꞌäꞌi pa gä da ngue̱nda ge yä Testigo, geꞌu̱ pe̱päbi rä bolunta Jeoba mäpaya. Di mbitaꞌihe gi sigi gi pädi de Äjuä. Xipäbi ri familia ꞌne nuꞌu̱ ri ntsitsꞌi näꞌä xkä pädi, ꞌne ntini kongekhe ha nuꞌu̱ mä mhuntsꞌihe (Hebreos 10:23-25).

Mu̱ gi sigi gi pädi de rä Zi Dada Jeoba, ma gi da ngue̱nda hängu di mäꞌäꞌi. Geꞌä ma dä jaꞌi gi ꞌñuti Jeoba hängu gi mädi ꞌnehe (1 Juan 4:8-10, 19). Pe, ¿hanja dä za gi ꞌñudi hyaxtho ha ri mꞌu̱i ge gi mädi Äjuä? ¿Hanja ma dä maxꞌäꞌi mu̱ gi yꞌo̱te nuꞌu̱ yä mhända Äjuä? ¿Te ma dä maxꞌäꞌi pa gi ne gi pe̱päbi rä bolunta Äjuä ko nuje? Näꞌä toꞌo rꞌaꞌi ri estudio ma dä maxꞌäꞌi gi tini yä mpengi nuya yä ntꞌani, pa njabu̱ nuꞌi ꞌne ri familia gi sigi “gi ꞌmu̱hu̱ ha rä mhäte Äjuä [...] ꞌne gi to̱ꞌmhu̱ nuꞌä rä te ma dä tꞌaꞌähu̱ pa nzäntho” (Judas 21).

Di mbitaꞌihe ko ngatꞌho mä korasohe pa gi sigi gi yꞌo ha näꞌä ꞌñuu xa mäjuäni. Nunä mfistꞌofo: “Manténganse en el amor de Dios” ma dä maxꞌäꞌi pa dä za gi yꞌo ha näꞌä ꞌñuuꞌä.