RÄ LECCIÓN 01
¿Hanja dä za dä maxꞌäꞌi rä Biblia?
Ndunthi de gekhu̱ di tumämu̱ihu̱ po mä tehu̱, por hanja ja yä sufrimiento, por hanja di tuhu̱ ꞌne te ma dä thogi kongekhu̱ xudi ndämäni. Pe hingä ho̱nse̱ꞌä, ꞌnehe di tumämu̱ihu̱ po nuꞌu̱ yä xuñha ꞌne yä dumu̱i thogi hyaxtho. Di tumämu̱ihu̱ po gä tinihu̱ te gä hehu̱ ꞌne te gä tsihu̱. ꞌNehe di tumämu̱ihu̱ po gä pe̱ꞌtsihu̱ nꞌa rä familia habu̱ dä nja rä mhäte ꞌne rä johya. Ndunthi yä jäꞌi, xä da ngue̱nda ge rä Biblia thädi ndunthi de nuꞌu̱ yä ntꞌani tupäbi yä mu̱i. ꞌNehe, xä hyandi ge rä Biblia uni yä hogä konseho nuꞌu̱ xä matsꞌi dä me̱ꞌtsi nꞌa rä hogä mꞌu̱i. Xi nuꞌi, ¿gi kamfri ge rä Biblia dä za dä maxꞌäꞌi ꞌnehe?
1. ¿Ngu te mä ntꞌani thädi rä Biblia?
Rä Biblia thädi nuya yä ntꞌani: ¿Hanja bi mu̱di bi nja rä te? ¿Pa te xtä ehu̱ua ha rä Xiꞌmhai? ¿Por hanja di sufrihu̱? ¿Habu̱ pa nuꞌu̱ yä jäꞌi xä du? ¿Por hanja ja yä gerra mu̱ gatꞌho yä jäꞌi honi dä me̱ꞌtsi nꞌa rä hogä mꞌu̱i? ¿Te ma dä thogi ko rä Xiꞌmhai? Zäi ge nuꞌi ꞌnehe xkä o̱tꞌe nuya yä ntꞌani. ¿Pe gi pädi? Äjuä di mbitaꞌi gi pädi te udi rä Biblia. Yä miyontho yä jäꞌi xä jabu̱ ꞌne nubye̱ di johya ndunthi po näꞌä xä bädi.
2. ¿Hanja dä za dä maxꞌäꞌi rä Biblia gi mꞌu̱i ko rä johya hyaxtho?
Rä Biblia rꞌakägihu̱ yä hogä tsꞌofo. Por ejemplo, xikägihu̱ hanja gä pe̱ꞌtsihu̱ näꞌä xa mäjuäni rä johya ha mä familiahu̱. ꞌNehe, rꞌakägihu̱ yä konseho pa gä täpäbihu̱ yä dumu̱i ꞌne xikägihu̱ hanja gä johyahu̱ ora di mpe̱fihu̱, en lugar de gä handihu̱ rä ꞌme̱fi ngu nꞌa rä sufrimiento. Ko rä mfatsꞌi nunä he̱ꞌmi, nuꞌi ma gi pädi te udi rä Biblia de nuya yä asunto ꞌne de märꞌaa. Ma gi hyandäse̱ ge mäjuäni näꞌä mängä rä Noya Äjuä ora enä: “Gatꞌho rä Mäkä Tꞌofo xä ñho pa dä ꞌñutkägihu̱” (2 Timoteo 3:16, TNM).
Nunä he̱ꞌmi hingä rä Biblia, nunä ho̱nse̱ nꞌa rä erramienta näꞌä ma dä maxꞌäꞌi gi ntiende te udi rä Noya Äjuä. Po rängeꞌä, di mbitaꞌihe gi hñeti kada nꞌa de nuꞌu̱ yä testo ehe ha nunä he̱ꞌmi, pa njabu̱ gi hyandi hanja di nthe̱ näꞌä udi rä Biblia ko näꞌä tꞌutꞌäꞌi.
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ hanja rä Biblia xä matsꞌi märꞌa yä jäꞌi dä me̱ꞌtsi nꞌa rä hogä mꞌu̱i. ꞌNehe ma gä pädihu̱ hanja dä za gi tini ꞌnehe rä johya de gi nxadi rä Biblia, ꞌne por hanja mänꞌa xä ñho gi hyoni toꞌo dä maxꞌäꞌi gi ntiende näꞌä udi rä Noya Äjuä.
3. Rä Noya Äjuä utkägihu̱ te mä ꞌñuu gä yꞌohu̱
Rä Biblia ꞌñenä ngu nꞌa rä lampara näꞌä yotꞌi mä ꞌñuuhu̱. Dä za gä usahu̱ pa gä huahnihu̱ nꞌa rä ꞌñuu xä ñho. ꞌNehe, rä Biblia utkägihu̱ näꞌä ma dä thogi xudi ndämäni.
Hñetihu̱ Salmo 119:105, ꞌnepu̱ thädihu̱ nuya yä ntꞌani:
-
¿Hanja mi handi rä Noya Äjuä näꞌä toꞌo bi yꞌofo nunä rä Salmo?
-
Xi pa geꞌi, ¿te me̱ꞌä rä Biblia?
4. Rä Biblia dä za dä dädi nuꞌu̱ yä ntꞌani di pe̱ꞌtsihu̱
Nꞌa rä zi ꞌme̱hñä bi da ngue̱nda ge rä Noya Äjuä mi thädi ndunthi de nuꞌu̱ yä ntꞌani xki dupäbi rä mu̱i po ndunthi yä je̱ya. Yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:
-
Ja ngu gä handi ha rä bideo, ¿te mä ntꞌani mi tupäbi rä mu̱i näꞌä zi ꞌme̱hñä?
-
¿Hanja bi matsꞌi näꞌä zi ꞌme̱hñä nuꞌmu̱ bi nxadi rä Biblia?
Rä Biblia xikägihu̱ ge xä ñho gä o̱tꞌehu̱ yä ntꞌani. Hñetihu̱ Mateo 7:7, ꞌnepu̱ thädihu̱ nuya yä ntꞌani:
-
¿Gi kamfri ge rä Biblia dä za dädi rꞌa de nuꞌu̱ yä ntꞌani gi pe̱ꞌtsi? ¿Ngu te mä ntꞌaniꞌu̱?
5. Tini rä johya de gi nxadi rä Biblia
Ndunthi yä jäꞌi xa di ho dä hñeti rä Noya Äjuä, ꞌne xä hyandi ge xä matsꞌi ndunthi ha yä mꞌu̱i. Yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:
-
Ja ngu gä handi ha rä bideo, ¿te bi dädi rꞌa yä bäsjäꞌi ora bi tꞌambäbi mu̱ di ho dä hñeti yä he̱ꞌmi?
-
Pe, ¿por hanja di ho dä hñeti rä Biblia nuꞌu̱ yä bäsjäꞌi?
Rä Noya Äjuä xikägihu̱ hanja gä ꞌmu̱ihu̱, hotkägihu̱ ꞌne xikägihu̱ ge ma dä ꞌñepu̱ ndunthi yä hogä tꞌo̱tꞌe pa xudi ndämäni. Hñetihu̱ Romanos 15:4, TNM, ꞌnepu̱ thädihu̱ nunä rä ntꞌani:
-
¿Gi hohmä gi pädi hanja rä Noya Äjuä hubgä mä mu̱ihu̱ ꞌne ndaꞌu̱ nuꞌu̱ yä hogä tꞌo̱tꞌe ma dä ꞌñepu̱ xudi ndämäni?
6. Yꞌapäbi toꞌo dä maxꞌäꞌi pa gi ntiende mänꞌa xä ñho näꞌä udi rä Biblia
Ndunthi yä jäꞌi di nxadise̱ yä Biblia. Pe ora xä mꞌu̱pu̱ toꞌo xä matsꞌi, xä da ngue̱nda ge mänꞌa di ntiende xä ñho näꞌä udi rä Noya Äjuä. Hñetihu̱ Hechos 8:26-31, TNM, ꞌnepu̱ thädihu̱ nunä rä ntꞌani:
-
¿Hanja dä za gä ntiendehu̱ mänꞌa xä ñho näꞌä udi rä Noya Äjuä? (Hyandihu̱ mänꞌaki yä versículo 30 ꞌne 31).
Näꞌä rä ñꞌo̱ho̱ mrä me Etiopía bi japäbi mꞌe̱di rä mfatsꞌi pa mänꞌa bi ntiende xä ñho näꞌä udi rä Mäkä Tꞌofo. Mäpaya, ndunthi yä jäꞌi xä hyandi ge mänꞌa xä ntiende xä ñho näꞌä udi rä Biblia ora xä mꞌu̱pu̱ toꞌo xä matsꞌi.
RꞌA YÄ JÄꞌI ENÄ: «Ho̱nse̱ häkꞌäꞌi ri tiempo nuꞌu̱ yꞌobu̱ udi de rä Biblia».
-
Xi nuꞌi, ¿te ma gi thädi ora toꞌo dä xiꞌäꞌi njabu̱? ¿Por hanja?
NÄꞌÄ DÄ PÄDIHU̱
Rä Biblia rꞌakägihu̱ yä hogä konseho nuꞌu̱ faxkägihu̱ gä pe̱ꞌtsihu̱ nꞌa rä hogä mꞌu̱i, thädi ndunthi de nuꞌu̱ yä ntꞌani di pe̱ꞌtsihu̱, hubgä mä mu̱ihu̱ ꞌne xikägihu̱ nuꞌu̱ yä hogä tꞌo̱tꞌe ma dä hä Äjuä pa xudi ndämäni.
Pa gä benihu̱
-
¿Te mä konseho di tinihu̱ ha rä Biblia?
-
¿Ndaꞌu̱ rꞌa de nuꞌu̱ yä ntꞌani thädi rä Biblia?
-
¿Te gi hohmä gi pädi de rä Biblia?
HABU̱ DÄ ZA GI PÄDI MÄ NꞌA TU̱I
Hyandi hanja mäpaya dä za dä maxkägihu̱ nuꞌu̱ yä konseho uni rä Biblia.
«Näꞌä rä mfädi hutsꞌi ha rä Biblia, ma dä dura pa nzäntho» (La Atalaya, núm. 1 2018)
Hyandi hanja rä Biblia bi matsꞌi nꞌa rä zi jäꞌi, näꞌä dende mi bätsi mi senti ge rä te hinte mi bale.
Hyandi te mä konseho uni rä Biblia pa njabu̱ yä familia dä mꞌu̱i ko rä johya.
«Näꞌä debe dä me̱fi yä familia pa njabu̱ dä mꞌu̱i ko rä johya» (¡Despertad!, núm. 2 2018)
Ndunthi yä jäꞌi kamfri ge Äjuä go geꞌä di mända nuua ha rä Xiꞌmhai. ¿Pe gi ne gi pädi te udi rä Biblia?
¿Por hanja mähyoni gä nxadihu̱ rä Mäkä Tꞌofo? (xo̱ge rä bideo) (3:14)
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
