Pa gatꞌho nuꞌu̱ di mädi rä Zi Dada Jeoba:

Rä Hesu bi ꞌñenä: «ꞌNe ma gi pähu̱ nuꞌä mäjuäni, ha nuꞌmu̱ gi pähu̱ nuꞌä mäjuäni, ya hingä ma gi mꞌe̱gohu̱» (Juan 8:32). ¡Hängu nupkägihu̱ mä mfenihu̱ nuya yä noya! Mäpaya dä za gä tinihu̱ näꞌä mäjuäni mäske di ꞌmu̱ihu̱ ha yä gäxä pa habu̱ di nheki ndunthi yä nkꞌuamba o yä nhemhñä (2 Timoteo 3:1). ¿Dä za gi beni nuꞌmu̱ gä fu̱di gä nxadi rä Mäkä Tꞌofo ꞌne gä pädi näꞌä mäjuäni de Äjuä? Zäi ge nunka ma gi pumfri näꞌä hogä esperiensiaꞌä.

Pe gä pädihu̱ näꞌä mäjuäni de Äjuä, de nuꞌu̱ yä mhända ꞌne gä utihu̱ märꞌaa, hingä kombastaꞌä. Xa mähyoni gä pe̱fihu̱ ha mä mꞌu̱ihu̱ näꞌä xtä pädihu̱. Hää, pe̱ꞌtsi te gä o̱tꞌehu̱ ntsꞌe̱di po hingä he̱gihu̱ näꞌä rä mhäte xä rꞌakhu̱ rä Zi Dada Jeoba. Pa geꞌä, ¿te mähyoni gä pe̱fihu̱? Näꞌä xui änte de xä du, rä Hesu bi ꞌñembäbi nuꞌu̱ yä apostol: «Nuꞌmu̱ gi yꞌo̱thu̱ nuꞌu̱ yä mhända di ꞌme̱pꞌähu̱, nuꞌmu̱ gi ꞌmu̱hu̱ ha mä mhäte, ngu nuga xtä o̱ꞌtuä yä mhända mä Dada ꞌne di ꞌmu̱ ha rä mhäteꞌä» (Juan 15:10).

¿Gä da ngue̱nda te bi me̱fi rä Hesu pa himbi hye̱gi näꞌä rä mhäte xki hñäni de Äjuä? Hää, bi yꞌo̱te nuꞌu̱ yä mhända rä Dada. Geꞌä di debe gä pe̱fihu̱ ꞌnehe. Pa hingä he̱gihu̱ näꞌä rä mhäte xä rꞌakägihu̱ Äjuä, pe̱ꞌtsi te gä hopäbihu̱ ge näꞌä mäjuäni bi ehe de rä Mäkä Tꞌofo, dä gu̱nkägihu̱ ha gatꞌho mä mꞌu̱ihu̱. Rä Hesu ꞌnehe bi ꞌñenä näꞌä xuiꞌä: «Mu̱ nuꞌähu̱ gi pädihu̱ nuya yä tꞌo̱tꞌe, johyahu̱ mu̱ gi pe̱fihu̱» (Juan 13:17, TNM).

Hängu di nehe ge nunä rä mfistꞌofo dä maxꞌäꞌihu̱ pa gi sigihu̱ gi pe̱fihu̱ ha ri mꞌu̱ihu̱ näꞌä mäjuäni xkä pädihu̱ de rä Mäkä Tꞌofo, pa njabu̱ hingi hye̱gihu̱ «näꞌä rä mhäte xä rꞌakhu̱ Äjuä, mientra gi to̱ꞌmhu̱ [...] gi hñänihu̱ rä te pa nzäntho» (Judas 21, TNM).