Ha rä Mäkä Tꞌofo di tinihu̱ ge rä apostol Pablo bi mää de nuꞌu̱ yä tuhni mi ja entre yä ku (1 Corintios 6:1-8, TNM). Mꞌe̱tꞌo, bi ꞌñudi ge mi umbäbi rä kue̱ ora mi handi ge rꞌa yä kristianu mi ntuhni ha yä nzaya, hänge näꞌä bi ꞌñenä: «¿Ja nꞌa de geꞌähu̱ toꞌo pe̱ꞌtsi nꞌa rä tuhni ko mä nꞌaa, ꞌne di atrebe dä ma ha yä tsꞌu̱tꞌhui ko nuꞌu̱ yä jäꞌi hingi o̱tꞌe rä justisia?» (1 Corintios 6:1, TNM). ꞌNepu̱ bi ꞌñembäbi nuꞌu̱ yä kristianu ge nuꞌu̱ yä  tuhni mi pe̱ꞌtsi entre geꞌu̱, dä atiende ha rä mhuntsꞌi hingä ha yä nzaya o ha yä tsꞌu̱tꞌhui. Ma gä handihu̱ te mä raso bi uni rä apostol Pablo ha näꞌä rä karta bi yꞌofo, ꞌnepu̱ ma gä handihu̱ hämꞌu̱ mähyoni toꞌo dä ma ha ya nzaya o ha yä tsꞌu̱tꞌhui.

Ora di pe̱ꞌtsihu̱ yä xuñha ko märꞌa yä kristianu, rä Zi Dada Jeoba to̱ꞌmi ge gä jamäsuhu̱ nuꞌu̱ yä tsꞌofo rꞌakägihu̱ pa gä hokihu̱ nuꞌu̱ yä xuñhaꞌu̱, hingä go gä pe̱fihu̱ näꞌä go di mbenise̱hu̱ (Proverbios 14:12). Ja ngu bi ꞌñudi rä Hesu, mähyoni ge nguntꞌä gä hokihu̱ nuꞌu̱ yä xuñhaꞌu̱ (Mateo 5:23-26, TNM). Pe uni rä mꞌe̱tsa ora rꞌa yä kristianu hinte mä acuerdo xä ne xä gohi ꞌne xä uadi xä ma ha yä nzaya o ha yä tsꞌu̱tꞌhui. Rä apostol Pablo bi ꞌñenä de geꞌu̱: «Gi ꞌme̱dihu̱ ndunthi ora gi jahu̱ yä demanda nꞌa kontra mä nꞌaa» (1 Corintios 6:7, TNM). ¿Por hanja? Ngeꞌä nuꞌu̱ toꞌo pe̱fi njabu̱, dä za dä tsꞌombäbi rä thuhu rä Zi Dada Jeoba ꞌne rä mhuntsꞌi. Hänge pa hindä thogi njabu̱, rä apostol Pablo bi sigi bi ꞌñenä: «¿Por hanja hingi he̱gihu̱ dä tꞌo̱tꞌähu̱ yä injustisia?».

Rä apostol Pablo ꞌnehe bi ꞌñudi ge ha yä mhuntsꞌi, rä Zi Dada Jeoba xä uni nꞌa rä mfatsꞌi pa ora ja yä xuñha. Ha yä mhuntsꞌi xä hñuxä rꞌa yä ñꞌo̱ho̱ nuꞌu̱ xä dini rä mfädi ko rä mfatsꞌi rä Mäkä Tꞌofo. Hää, nuꞌu̱ yä ku xä thutsꞌi de gä ansiano ja yä «mfädi pa dä juzga entre yä ku» ꞌne dä atiende «nuꞌu̱ yä asunto» pe̱ꞌtsi yä ku ha rä muntsꞌi (1 Corintios 6:3-5, TNM). ꞌNehe, rä Hesu bi ꞌñenä ge ora nꞌa rä ku pe̱ꞌtsi nꞌa rä däta xuñha ko mä nꞌa rä ku, ngu yä calumnia o yä mfe, yä ku pe̱ꞌtsi te dä sigi nuya hñuu yä paso: nꞌaa, dä yꞌo̱tꞌe ntsꞌe̱di po dä hyoki näꞌä xuñha entre geꞌä ꞌne näꞌä ku toꞌo di ntunkui pe nsinke dä yꞌo̱de o dä bädi märꞌaa. Yoho, mu̱ hinte mä acuerdo bi gohi, nubye̱ näꞌä ku dä za dä hyoni nꞌaa o yoho yä testigo pa dä ñäui mänꞌaki näꞌä ku kontoꞌo pe̱ꞌtsi näꞌä xuñhaꞌä. Hñuu, mu̱ mänꞌaki hinte mä acuerdo bi gohi, nubye̱ hää dä za dä ma ko nuꞌu̱ yä ansiano de rä mhuntsꞌi (Mateo 18:15-17, TNM).

Di pädihu̱ ge yä ansiano de rä mhuntsꞌi hingä yä abogado pa go dä hyoki nuꞌu̱ yä xuñha ja entre yä ku ora di ntuhni po nꞌa rä trato o negosio näꞌä himbi bo̱ni xä ñho. Hänge nuꞌu̱ yä ansiano hingä ma dä porta ngu yä abogado nixi go ma dä  mända hanja ma dä tꞌofo nꞌa rä acuerdo o kohi ora di atiende nꞌa rä xuñha näꞌä ja entre yoho yä ku. Yä ansiano ho̱nse̱ ma dä matsꞌi nuꞌu̱ yoho yä ku pa tanto nꞌa ngu mänꞌaa, dä jamäsu nuꞌu̱ yä tsꞌofo uni rä Mäkä Tꞌofo, ꞌne ko rä tꞌekꞌei dä zo̱ho̱ dä ja nꞌa rä hogä acuerdo o kohi. Pe mu̱ xa rä däta näꞌä xuñha ja entre yoho yä ku, tal vez yä ansiano dä za dä desidi dä xipäbi rä superintendente de gä circuito o näꞌä rä däta ngu de gä ꞌme̱fi de yä testigo rä Jeoba tꞌembi Betel. ¿Pe gi pädi? Dä ma yä ku ante yä nzaya o yä tsꞌu̱tꞌhui, hingä nzäntho xä ntsꞌo. ¿Por hanja hinä? Ma gä handihu̱.

Hingä nzäntho toꞌo di presenta nꞌa rä demanda udi ge rä egoista. Rꞌabu̱ di ja mꞌe̱di nꞌa rä demanda ngu nꞌa rä rekisito pa dä thoki nꞌa rä acuerdo o kohi nsinke dä nja yä tuhni o yä xuñha. Por ejemplo, rꞌabu̱ mähyoni nꞌa rä demanda pa dä tꞌadi nꞌa rä diborsio, pa dä tꞌadi rä custodia de yä bätsi, pa dä tꞌadi nꞌa rä pensión, pa drä kobra nꞌa rä seguro o pa dä tꞌadi drä rekonose nꞌa rä testamento. ꞌNehe, nꞌa rä kristianu dä za dä hyandi ge mähyoni dä presenta nꞌa rä contrademanda, o reconvención pa dä za dä defende de nꞌa rä demanda näꞌä xä tꞌo̱tꞌpäbi. *

Nꞌa rä kristianu pe̱ꞌtsi rä derecho dä demanda nꞌa rä jäꞌi po nuya yä delito ya dä mäñhu̱, ꞌne hindä za gä eñhu̱ ge hingi jamäsu nuꞌu̱ yä tsꞌofo bi uni rä apostol Pablo ha rä 1 Corintios 6:1-8. Pe hää mähyoni ge näꞌä kristianu toꞌo dä ja näꞌä demandaꞌä, dä jamäsu de dä atiende näꞌä asunto ko rä tꞌekꞌei ꞌne ge hindä hyongä yä tuhni. * Mähyoni gä benihu̱ ge nuju̱ di nehu̱ gä eꞌspäbihu̱ rä nsu rä Zi Dada Jeoba ꞌne gä o̱tꞌehu̱ ntsꞌe̱di po dä nja nꞌa rä hogä ntsitsꞌi ha rä mhuntsꞌi. Ante yä da gatꞌho yä jäꞌi xä fädi ge di de̱mbäbihu̱ rä ejemplo rä Kristo, ge di udihu̱ näꞌä rä mhäte xa mäjuäni ꞌne ge hindi honi mä ñhose̱hu̱ (1 Corintios 13:4, 5; Juan 13:34, 35).