Rä apostol Pablo bi mää ge rꞌabu̱ mähyoni dä goꞌmi yä ñäxu yä nju ora pe̱fi rꞌa yä asignación pa di xo̱kämbeni rä Zi Dada Jeoba. ꞌNehe bi uni yä tsꞌofo nuꞌu̱ fatsꞌi yä nju pa dä hyandi hämꞌu̱ di debe dä goꞌmi yä ñäxu ꞌne njabu̱ dä ꞌñudi rä tꞌekꞌei po rä Zi Dada Jeoba (1 Corintios 11:3-16, TNM). Rä apostol Pablo bi no̱ni hñuu yä tꞌo̱tꞌe nuꞌu̱ mähyoni dä jamäsu yä nju: 1) te mä asignación pe̱fi, 2) habu̱ ꞌne toꞌo ꞌmu̱pu̱, ꞌne 3) te mä raso ja.

Te mä asignación pe̱fi. Rä apostol Pablo bi mää ge nuꞌmu̱ nꞌa rä nju «xatuäbi Äjuä o mämbäbi rä Noya», mähyoni dä goꞌmi rä ñäxu (1 Corintios 11:4, 5, TNM). Di pädihu̱ ge ora di jahu̱ yä sadi o di mämbäbihu̱ rä Noya Äjuä, di xo̱kämbenihu̱ rä Zi Dada Jeoba. Pe, ¿di signifika ge nꞌa rä nju nzäntho ma dä goꞌmi rä ñäxu ora xatuäbi Jeoba o nuꞌmu̱ uti märꞌaa de rä Noya? Hinä, depende de habu̱ o toꞌo ꞌmu̱pu̱.

Habu̱ ꞌne toꞌo ꞌmu̱pu̱. Rä apostol Pablo bi no̱ni yoho yä luga: ha rä familia ꞌne ha rä mhuntsꞌi. Pablo bi ꞌñenä: «Rä ñꞌo̱ho̱ geꞌä rä ñäxu de nꞌa rä ꞌme̱hñä [...]. Pe gatꞌho nuꞌu̱ yä ꞌme̱hñä xatuäbi Äjuä o mämbäbi rä Noya, pe hinxä goꞌmi rä ñäxu, di ꞌme̱tuäbi  rä tsa rä ñäxu» (1 Corintios 11:3, 5, TNM). Rä Zi Dada Jeoba xä hñutsꞌi ngu rä ñäxu de rä familia rä däme. Hänge, ¿te ri ꞌñehe dä me̱fi nꞌa rä ꞌme̱hñä ora pe̱fi nꞌa rä asignación näꞌä go ri ꞌñepäbi dä me̱fi rä däme? Pe̱ꞌtsi te dä ꞌñudi rä tꞌekꞌei po näꞌä autorida xä tꞌumbäbi rä däme pa njabu̱ hindä ꞌme̱tuäbi rä tsa. Por ejemplo, mu̱ nꞌa rä nju ma dä uni nꞌa rä estudio de rä Mäkä Tꞌofo pe ꞌmu̱pu̱ rä däme, pe̱ꞌtsi te dä goꞌmi rä ñäxu, ngeꞌä mu̱ xä nxixtehe o hinä näꞌä rä däme, go geꞌä rä ñäxu de rä familia. * ꞌNehe, mu̱ nꞌa rä nju ma dä xatuäbi rä Zi Dada Jeoba o ma dä ꞌñudi de rä Noya Äjuä, ꞌne ꞌmu̱pu̱ nꞌa rä tꞌu̱kä tsꞌu̱ntꞌu̱ näꞌä ya xä nxixtehe, pe̱ꞌtsi te dä goꞌmi rä ñäxu. ¿Por hanja? Ngeꞌä mäske nuni tsꞌu̱ntꞌu̱ hingo rä ñäxu de rä familia, pe hää pe̱ꞌtsi näꞌä rä autorida xä tꞌumbäbi gatꞌho nuꞌu̱ yä ku ya xä nxixtehe.

Rä apostol Pablo ꞌnehe bi ꞌñenä: «Pe, mu̱ nꞌa rä ñꞌo̱ho̱ ne dä diskuti pa dä defende mä nꞌa rä nzäi, nuju̱ hindi pe̱ꞌtsihu̱ mä nꞌaa, nixi yä mhuntsꞌi Äjuä» (1 Corintios 11:16, TNM). Ha rä mhuntsꞌi, rä Zi Dada Jeoba xä hñutsꞌi nuꞌu̱ yä ñꞌo̱ho̱ xä nxixtehe pa dä gu̱tꞌi rä ꞌñuu (1 Timoteo 2:11-14, TNM; Hebreos 13:17, TNM). Ho̱nse̱ yä ñꞌo̱ho̱ di thutsꞌi ngu yä ansiano ꞌne de gä sierbo ministerial, ꞌne gehyu̱ tꞌumbäbi rä responsabilida de dä supäbi yä mhuntsꞌi Äjuä (Hechos 20:28, TNM). Pe rꞌabu̱ nꞌa rä nju dä za dä tꞌumbäbi nꞌa rä asignación näꞌä go ri ꞌñepäbi dä me̱fi nꞌa rä ñꞌo̱ho̱ näꞌä xä nxixtehe. Por ejemplo, ora di tꞌapäbi nꞌa rä nju go dä gu̱ki rä grupo mähyoni dä goꞌmi rä ñäxu. O nuꞌmu̱ nꞌa rä nju ma dä uni nꞌa rä estudio ꞌne di ñꞌoui nꞌa rä ku näꞌä xä nxixtehe, ꞌnehe ri ꞌñehe dä goꞌmi rä ñäxu. * ¿Por hanja? Ngeꞌä pädi ge nuya yä asignación go ri ꞌñepi dä me̱fi nꞌa rä ñꞌo̱ho̱ näꞌä xä nxixtehe.

Pe hingä nzäntho di debe dä goꞌmi rä ñäxu nꞌa rä nju ora di xo̱kämbeni Äjuä. ¿Ngu hämꞌu̱ hingi ja mꞌe̱di? Ngu nuꞌmu̱ di uni yä komentario ha rä mhuntsꞌi, ngu nuꞌmu̱ di predika  mäske di ñꞌoui rä däme o mä nꞌa rä ku näꞌä xä nxixtehe, o nuꞌmu̱ umbäbi nꞌa rä estudio nuꞌu̱ yä bätsi hinxä nxixtehe ꞌne hingi ꞌmu̱pu̱ rä däme. Pe mu̱ nꞌa rä nju pe̱ꞌtsi yä duda ꞌne hingi pädi te dä me̱fi ante nꞌa rä situación, nuꞌmu̱ dä za dä hyoni mä nꞌa tu̱i rä imformasion. * Pe mu̱ tobe sigi pe̱ꞌtsi yä duda, ꞌne rä konsiensia xipäbi ge dä goꞌmi rä ñäxu, dä za dä jabu̱ ja ngu näꞌä rä nju hutsꞌi ha rä foto.

Te mä raso ja. Ha rä Mäkä Tꞌofo di tinihu̱ yoho yä raso de por hanja mähyoni ge nꞌa rä nju dä goꞌmi rä ñäxu, nuꞌmu̱ enä: «Pe rä ꞌme̱hñä pe̱ꞌtsi te dä goꞌmi rä ñäxu ngu nꞌa rä señä de ke pe̱ꞌspäbi rä tꞌekꞌei rä autorida, po ränge yä e̱nxe̱» (1 Corintios 11:10, TNM). Di tinihu̱ rä mu̱di raso nuꞌmu̱ enä: «Nꞌa rä señä de ke pe̱ꞌspäbi rä tꞌekꞌei rä autorida». Hää, ora nꞌa rä nju koꞌmi rä ñäxu, udi ge di rekonose näꞌä rä autorida xä umbäbi Jeoba nuꞌu̱ yä ñꞌo̱ho̱ xä nxixtehe de rä mhuntsꞌi. ꞌNe njabu̱ udi hängu di mädi ꞌne pe̱ꞌspäbi rä tꞌekꞌei rä Zi Dada Jeoba. Rä yoho rä raso di tinihu̱ nuꞌmu̱ enä: «Po ränge yä e̱nxe̱». ¿Hanja handi yä e̱nxe̱ nuꞌmu̱ nꞌa rä nju koꞌmi rä ñäxu?

Mäyaꞌmu̱ bi mꞌu̱i rꞌa yä e̱nxe̱ nuꞌu̱ himbi yꞌo̱te näꞌä rä autorida pe̱ꞌtsi Jeoba (Judas 6). Hänge nuꞌu̱ yä hogä e̱nxe̱ xa di ho ora handi hanja gatꞌho nuꞌu̱ ꞌmu̱i ha rä organización rä Zi Dada Jeoba —tanto ha mähetsꞌi ngu ha rä Xiꞌmhai—, umbäbi rä tꞌekꞌei näꞌä rä autorida pe̱ꞌtsi Jeoba. Yä e̱nxe̱ di benefisia de näꞌä rä hogä ejemplo udi yä mexiꞌmhai mäske yä imperfecto. Mäpaya, yä e̱nxe̱ handi ngu nꞌa rä hogä ejemplo nuꞌu̱ yä nju o̱te ꞌne  umbäbi rä tꞌekꞌei nuꞌu̱ yä ku xä nxixtehe, mäske rꞌabu̱ nuꞌu̱ yä nju mänꞌa pe̱ꞌtsi rä esperiensia ꞌne rä mfädi. Entre gehyu̱, ꞌmu̱i nuꞌu̱ yä nju to̱ꞌmi dä ma ha mähetsꞌi pa dä mända mähye̱gi ko rä Kristo. Hää, nuyu̱ yä nju yä umilde ꞌne yä yꞌo̱de mäske ma dä me̱ꞌtsi nꞌa rä nsu mänꞌa rä däta ke näꞌä pe̱ꞌtsi yä e̱nxe̱. Ja ngu di handihu̱, gatꞌho yä nju pe̱ꞌtsi nꞌa rä däta privilegio: ante yä thandi yä miyontho yä e̱nxe̱, udi ge yä umilde nuꞌmu̱ o̱te ꞌne umbäbi rä tꞌekꞌei näꞌä rä autorida xä hñutsꞌi Jeoba ha rä mhuntsꞌi.