NUꞌMU̱ di hetihu̱ rä periodiko, di handihu̱ rä telebision o di o̱xu̱ rä radio, ¡ho̱nse̱ di handihu̱ ꞌne di o̱dehu̱ ndunthi yä du, yä däta tuhni ꞌne yä terrorismo! Pe hingä ho̱nse̱ꞌä, rꞌabu̱ nuꞌi ꞌnehe gi thogi yä xuñha ngu yä ñheni o yä dumu̱i nuꞌmu̱ xä du nꞌa ri amigo o nꞌa rä jäꞌi näꞌä ngi mädi. Rꞌabu̱ dä za gi mbeni ngu Job, nꞌa rä ꞌme̱go Äjuä nuꞌmu̱ bi ꞌñenä: “xtä ñudi ko yä dumu̱i ꞌne yä sufrimiento” (Job 10:15).

Zäi ge rꞌabu̱ gi ñꞌanise̱:

• ¿Gehnä mi ne Äjuä pa geki ꞌne pa gatꞌho yä jäꞌi?

• ¿Habu̱ dä za gä tini rä mfatsꞌi pa gä ze̱ti nuya yä xuñha di thogi?

• ¿Ma dä zo̱ho̱ rä pa dä nheki nꞌa rä hogä mꞌu̱i ha gatꞌho rä Xiꞌmhai?

Rä Mäkä Tꞌofo thädi nuya yä ntꞌani.

«ꞌNe Äjuä ma dä dukuäbi gatꞌho yä gidaꞌu̱. Ya hindä nja rä du, ni yä tsꞌoni, ni yä dumu̱i, nixi yä u̱gi, ngeꞌä nu yä tꞌo̱tꞌe mi ja mä mꞌe̱tꞌo, nubye̱ ya otho.» (Apocalipsis [Revelación] 21:4)

«Nuꞌu̱ yä doua ma dä nsagi ngu rä fantho̱.» (Isaías 35:6)

«Yä da yä goda ma dä xogi.» (Isaías 35:5)

 «Ma dä zo̱ rä pa nu to gatꞌho xä du [...] ma dä nangi.» (Juan 5:28, 29)

«Ninꞌa rä jäꞌi ma dä ꞌñenä: “Nuga di hñeni”.» (Isaías 33:24)

«Ma dä nja xa ndunthi yä ꞌmotꞌi [näꞌä te dä tsꞌi] ha gatꞌho rä Xiꞌmhai.» (Salmo 72:16)

Ogi mbeni ge hingä mäjuäni o ge nꞌa rä tꞌitho näꞌä gä hyandi ha nuꞌu̱ yä nxii bi thogi. Äjuä xä promete ge ma dä hä nuꞌu̱ yä hogä tꞌo̱tꞌeꞌu̱, ꞌne rä Mäkä Tꞌofo mää hanja ma dä kumpli.

Pe hingä ho̱nse̱ꞌä. Rä Mäkä Tꞌofo ꞌnehe utkägihu̱ hanja mäpaya dä za gä pe̱ꞌtsihu̱ nꞌa rä hogä mꞌu̱i ko rä johya. Ntso̱ꞌmi nꞌa tu̱i de nuꞌu̱ yä xuñha ꞌne yä dumu̱i gi pe̱ꞌtsi. Rꞌabu̱ gi thogi yä ñꞌäbojä, yä xuñha ha ri familia, yä ñheni, o yä dumu̱i ngeꞌä xä du nꞌa ri amigo o nꞌa ri jäꞌi näꞌä ngi mädi. Pe rä Mäkä Tꞌofo dä za dä maxꞌäꞌi gi ze̱ti nuya yä xuñha, ꞌne ma dä nupꞌäꞌi ri mfeni nuꞌmu̱ xki timbäbi yä mpengi nuya yä ntꞌani:

• ¿Por hanja di sufrihu̱?

• ¿Hanja dä za gä ze̱tihu̱ nuꞌu̱ yä dumu̱i tso̱kägihu̱?

• ¿Te dä za gä pe̱fihu̱ pa mänꞌa dä nja rä johya ha mä familiahu̱?

• ¿Te thogi kongekhu̱ nuꞌmu̱ di tuhu̱?

• ¿Dä zo̱ho̱ nꞌa rä pa gä handihu̱ mänꞌaki nuꞌu̱ mä jäꞌihu̱ xä du?

• ¿Hanja dä za gä pädihu̱ ge Äjuä ma dä kumpli näꞌä xä promete?

 Nubye̱ gi heti nunä mfistꞌofo, udi ge gi ne gi pädi te udi rä Mäkä Tꞌofo. Pa geꞌä, nunä mfistꞌofo ma dä maxꞌäꞌi. Hai de kada nꞌa rä nxii, hutsꞌi yä ntꞌani pa nuꞌu̱ yä parrafo. Yä miyontho yä jäꞌi di ho hanja häni nꞌa rä ntꞌudi de rä Mäkä Tꞌofo ko rä mfatsꞌi nunä mfistꞌofo. Näꞌä testigo rä Jeoba toꞌo ma dä rꞌaꞌi näꞌä ntꞌudi, ma dä yꞌo̱tꞌe yä ntꞌani ha kada nꞌa rä parrafo, ꞌne nuꞌi ma gi thädi näꞌä gi ntiende. ¡Äjuä dä jäpäꞌi ha nunä ntꞌudi ma gi hñäni pa gi pädi te xa mäjuäni udi rä Mäkä Tꞌofo!