1. ¿Te mä ñho ma gä hänihu̱ mu̱ gä xo̱kämbenihu̱ Äjuä ja ngu neꞌä?

RÄ ZI Dada Jeoba xa di mäkägihu̱ ndunthi, hänge di gu̱nkägihu̱ ngeꞌä honi mä ñhohu̱. Mu̱ gä xo̱kämbenihu̱ ja ngu neꞌä, ma gä ꞌmu̱hu̱ ko rä johya ꞌne ma gä ꞌuegehu̱ de ndunthi yä xuñha. ꞌNehe, ma dä rꞌakägihu̱ rä jäpi ꞌne rä mfatsꞌi (Isaías 48:17). Pe mäpaya yä nthebetho nuꞌu̱ yä relijion ja, ꞌne mäske gatꞌho enä ge udi näꞌä mäjuäni de Äjuä, hingä mähye̱gi näꞌä mää de geꞌä nixi näꞌä to̱ꞌmi de gekhu̱.

2. ¿Te ma dä maxꞌäꞌi gi pädi hanja ri ꞌñehe gi xo̱kämbeni rä Zi Dada Jeoba? Hñutsꞌi nꞌa rä kꞌoi.

² ¿Te ma dä maxꞌäꞌi gi pädi hanja ri ꞌñehe gi xo̱kämbeni rä Zi Dada Jeoba? Hindi ja mꞌe̱di gi nxadi ꞌne gi hyandi gatꞌho nuꞌu̱ yä ntꞌudi pe̱ꞌtsi gatꞌho yä relijion. Ho̱nse̱ mähyoni gi pädi te udi rä Mäkä Tꞌofo de näꞌä relijion xa mäjuäni. Ma gä hutsꞌihu̱ nꞌa rä kꞌoi. Mäpaya, ha ndunthi yä dähni thoki yä billete nuꞌu̱ yä falso. ¿Te ma gi pe̱fi mu̱ dä tꞌeñꞌäꞌi gi huahni ꞌne gi ꞌueke ho̱nse̱ nuꞌu̱ yä bojä mäjuäni? ¿Ma gi hyoni gatꞌho nuꞌu̱ yä billete yä falso pa gi pädi te ngu  kada nꞌa de geꞌu̱? Hinä, mu̱ gi pädi xä ñho te ngu nuꞌu̱ yä bojä xa mäjuäni, nguntꞌä ma gi da ngue̱nda ndaꞌu̱ nuꞌu̱ yä billete yä falso. Njabu̱ ꞌnehe, mu̱ gi pädi te ngu näꞌä relijion xa mäjuäni, hingä ma dä jaꞌi xä ñhei gi da ngue̱nda ndaꞌu̱ nuꞌu̱ yä hyate relijion.

3. Ja ngu bi mää rä Hesu, ¿te mähyoni gä pe̱fihu̱ pa dä numäñhogihu̱ Äjuä?

³ Ndunthi yä jäꞌi kamfri ge Äjuä di ho gatꞌho yä relijion, pe hingä geꞌä udi rä Mäkä Tꞌofo. Hindä za gä mäñhu̱ ge di xo̱kämbenihu̱ Jeoba ngu ri ꞌñehe ho̱nse̱ ko gä mäñhu̱ ge dyä kristianuhu̱. Mähyoni gä xo̱kämbenihu̱ rä Zi Dada Jeoba ja ngu neꞌä. Rä Hesu bi ꞌñenä: «Hingä gatꞌho nuꞌu̱ engägi: “Mä zi Hmuuꞌi, mä zi Hmuuꞌi”, ma dä yu̱tꞌä ha rä Tsꞌu̱tꞌhui Äjuä bi ꞌmu̱ mähetsꞌi, ho̱nse̱ nuꞌu̱ o̱tꞌä näꞌä mängä mä Dada bi ꞌmu̱hni mähetsꞌi». Hänge mu̱ di nehu̱ ge Jeoba dä numäñhogihu̱, pe̱ꞌtsi te gä pädihu̱ ꞌne gä pe̱fihu̱ näꞌä adi de gekhu̱. ꞌNehe, rä Hesu bi ꞌñembäbi yä “yꞌo̱tꞌä tsꞌoki” nuꞌu̱ toꞌo hingi pe̱päbi rä bolunta Äjuä (Mateo 7:21-23, RN). Nuꞌu̱ yä hyate relijion, ꞌñenä ngu nuꞌu̱ yä billete yä falso: hinte ja yä muui ꞌne bi hä ndunthi yä xuñha ꞌne yä u̱gi.

4. ¿Te di signifika nuꞌu̱ yoho yä ꞌñuu bi no̱ni rä Hesu, ꞌne habu̱ tsitsꞌi kada nꞌa de geꞌu̱?

⁴ Rä Zi Dada Jeoba umbäbi gatꞌho yä jäꞌi rä oportunida de dä zo̱ho̱ dä mꞌu̱i pa nzäntho. Pa gä ꞌmu̱hu̱ pa nzäntho ha rä Uädri, pe̱ꞌtsi te gä xo̱kämbenihu̱ Äjuä ꞌne gä ꞌmu̱hu̱ ja ngu neꞌä. Pe ndunthi yä jäꞌi hingi ne dä me̱fi njabu̱, hänge rä Hesu bi ꞌñenä: «Ku̱thu̱ ha rä goxthi näꞌä xä ntsꞌiꞌmi; ngeꞌä xä ngu̱ni näꞌä rä ꞌñuu tsitsꞌi ha rä du, ꞌne ndunthi ja pani; pe xä ntsꞌiꞌmi näꞌä goxthi ꞌne xä ntsꞌiꞌmi näꞌä ꞌñuu tsitsꞌi ha rä te, ꞌne tsꞌu̱tho  nuꞌu̱ tini» (Mateo 7:13, 14, TNM). Ja ngu di handihu̱, näꞌä relijion udi näꞌä mäjuäni, tsitsꞌi ha rä te. Pe nuꞌu̱ yä hyate relijion, tsitsꞌi ha rä du. Rä Zi Dada Jeoba hingi ne dä hyandi dä du yä jäꞌi, hänge rꞌakägihu̱ rä oportunida gä pädihu̱ de geꞌä (2 Pedro 3:9). ¿Gi da ngue̱nda por hanja xa mähyoni gä xo̱kämbenihu̱ Äjuä ja ngu adiꞌä?

5. ¿Hanja dä za gä pädihu̱ toꞌo nuꞌu̱ pe̱ꞌtsi näꞌä relijion xa mäjuäni?

⁵ ¿Hanja dä za gä tiñhu̱ näꞌä rä ꞌñuu tsitsꞌi ha rä te? Rä Hesu bi mää ge pa gä pädihu̱ toꞌo pe̱ꞌtsi näꞌä relijion xa mäjuäni, mähyoni gä handihu̱ te mä mꞌu̱i pe̱ꞌtsi nuꞌu̱ yä jäꞌi. Näꞌä bi ꞌñenä: «Nuꞌähu̱ ma gi pähu̱ toꞌoꞌu̱», ngeꞌä «gatꞌho yä hogä ꞌmai gä zaa ungä yä hogä fruta» (Mateo 7:16, 17). Ko nuya yä noya, rä Hesu bi mää ge nuꞌu̱ yä jäꞌi pe̱ꞌtsi näꞌä relijion xa mäjuäni, di nheki tanto po nuꞌu̱ yä nzäi ꞌne po näꞌä pe̱fi. Mäske pe̱ꞌtsi rä tsꞌoki, gatꞌho o̱tꞌe ntsꞌe̱di po dä me̱päbi rä bolunta Äjuä. Ma gä hanthu̱ rꞌato yä tꞌo̱tꞌe nuꞌu̱ ma dä maxkägihu̱ gä pädihu̱ toꞌo nuꞌu̱ pe̱ꞌtsi näꞌä relijion xa mäjuäni.

6, 7. a) ¿Te di mbeni yä ꞌme̱go Äjuä de rä Mäkä Tꞌofo? b) ¿Te mä kꞌoi bi zoogi rä Hesu?

⁶ Yä ꞌme̱go Äjuä udi ho̱nse̱ näꞌä hutsꞌi ha rä Mäkä Tꞌofo. Rä Mäkä Tꞌofo ense̱: «Gatꞌho rä Mäkä Tꞌofo, Äjuä go bi ungä rä mfeni pa bi tꞌofo. Hänge xä ñho rä Mäkä Tꞌofo pa dä ñꞌutäte, pa dä ntsu̱te, pa dä ungä rä tsꞌofo, ꞌne pa dä ꞌñudi rä ñhojäꞌi, pa njabu̱ nuꞌu̱ toꞌo xä gamfri Äjuä, dä nxo̱ge yä mfädi ꞌne dä bädi dä me̱fi yä hogä ꞌme̱fi» (2 Timoteo 3:16, 17). Rä apostol  Pablo bi ꞌñembäbi nuꞌu̱ yä kristianu: «Ngeꞌä gä yꞌo̱hu̱ rä mäkä noya näꞌä dä xiꞌähe, ꞌne gä pähu̱ ge go geꞌä rä Noya Äjuä ꞌne hingo rä noya nꞌa rä jäꞌi» (1 Tesalonicenses 2:13). Hänge nuꞌu̱ yä ntꞌudi pe̱ꞌtsi näꞌä relijion xa mäjuäni, hixpi ꞌñehe de yä mfeni o yä nzäi yä jäꞌi. Nuꞌu̱ yä ntꞌudi bi ehe de ha rä Mäkä Tꞌofo, rä Noya Äjuä.

⁷ Rä Hesu ꞌnehe mi häi de rä Noya Äjuä näꞌä mi udi. Nꞌa rä pa, nuꞌmu̱ bi xatuäbi rä Dada bi ꞌñembi: «Ri noya geꞌä mäjuäni» (Juan 17:17). Rä Hesu mi kamfribi rä Noya Äjuä ꞌne gatꞌho näꞌä mi udi mi ehe de ha rä Mäkä Tꞌofo. Rä Hesu mi enä: «Xä ntꞌofo ha rä Mäkä Tꞌofo», ꞌnepu̱ mi no̱ni nꞌa rä testo de rä Noya Äjuä (Mateo 4:4, 7, 10). Njabu̱ ꞌnehe, yä ꞌme̱go Äjuä de mäpaya hingi udi yä mfenise̱. Gatꞌho näꞌä udi häi de rä Mäkä Tꞌofo ngeꞌä pädi xä ñho ge xa mäjuäni gehnä rä Noya Äjuä.

8. Pa gä xo̱kämbenihu̱ rä Zi Dada Jeoba ngu neꞌä, ¿te mähyoni gä pe̱fihu̱?

⁸ Nuꞌu̱ yä jäꞌi pe̱ꞌtsi näꞌä relijion xa mäjuäni, di xo̱kämbeni ho̱nse̱ rä Zi Dada Jeoba ꞌne mämbäbi rä thuhu. Rä Hesu bi ꞌñenä: «Äjuä [Jeoba] [...] go geꞌä gi nsunda ꞌne ho̱nse̱ꞌä gi pe̱päbi» (Mateo 4:10). Hänge yä ꞌme̱go Äjuä di xo̱kämbeni ho̱nse̱ Jeoba ꞌne hinto mä nꞌaa. Pa gä xo̱kämbenihu̱ Äjuä ja ngu neꞌä, mähyoni gä utihu̱ yä jäꞌi te rä thuhu näꞌä rä Zi Dada xa mäjuäni ꞌne te nguꞌä rä mꞌu̱i. Rä Salmo 83:18 enä: «Nuꞌi, ri thuhu Jeoba, nuꞌi se̱he̱ꞌi go geꞌi xä Ñhetsꞌiꞌi de gatꞌho rä xiꞌmhai». Rä Hesu bi zoogi nꞌa rä hogä kꞌoi nuꞌmu̱ bi matsꞌi yä jäꞌi pa bi bädi de Äjuä. Näꞌä bi xatuäbi rä Dada ꞌne bi ꞌñembi: «Nuga xtä umbäbi ntꞌo̱de ri thuhu nuꞌu̱ yä jäꞌi xkä rꞌakägi de nunä xiꞌmhai» (Juan  17:6, TNM). Mäpaya, nuꞌu̱ xa mäjuäni yä kristianu, ꞌnehe uti märꞌa yä jäꞌi de rä Zi Dada Jeoba, ngu rä thuhu, rä mꞌu̱i ꞌne näꞌä ma dä me̱fi.

9, 10. ¿Hanja udi rä mhäte nꞌa ngu mänꞌa nuꞌu̱ xa mäjuäni yä kristianu?

⁹ Yä ꞌme̱go Äjuä xa mäjuäni di mädi nꞌa ngu mänꞌaa, ꞌne hingi honi yä ñhose̱. Rä Hesu bi ꞌñenä: «Mu̱ gi mädihu̱ nꞌa ngu mänꞌaa, nuꞌmu̱ njabu̱ dä bädi gatꞌho yä jäꞌi ge mäjuäni mä nxadiꞌihu̱» (Juan 13:35). Nuꞌu̱ yä mu̱di kristianu, xa mäjuäni mi mädi nꞌa ngu mänꞌaa. Njabu̱ ꞌnehe, näꞌä rä mhäte pe̱ꞌtsi yä ꞌme̱go Äjuä de mäpaya, geꞌä japi dä mädi nꞌa ngu mänꞌaa, mäske nuꞌu̱ xpi ꞌñehe de rꞌa nꞌañꞌo yä hnini, yä rasa, ꞌne yä idioma (hñeti Colosenses 3:14). Ha yä hyate relijion, hingi nheki näꞌä rä mhäteꞌä. Ngeꞌä mäske yä jäꞌi pe̱ꞌtsi nꞌatꞌä rä relijion, nuꞌu̱ di ñhose̱ nꞌa ngu mänꞌaa, ꞌne handi ngu yä nkontra nuꞌu̱ yä jäꞌi de märꞌa yä hnini o yä rasa. Pe nuꞌu̱ xa mäjuäni yä kristianu, hingi ju̱ yä nzafi o märꞌa yä arma pa dä yu̱tꞌi ha yä tuhni, ꞌne nunka häkuäbi yä te nuꞌu̱ yä ku, nixi märꞌa yä jäꞌi. Rä Mäkä Tꞌofo enä: «Hänge njaua dä za gä pädihu̱ ndañꞌu̱ yä bätsi Äjuä ꞌne ndañꞌu̱ yä bätsi rä tsꞌondähi, ngeꞌä nuꞌä toꞌo xi hingi o̱tꞌe xä ñho ꞌne nixi hingi mädi yä ku, nuꞌä hingo rä bätsi Äjuä. Ngetꞌho gehnä rä mhända Äjuä [...], ge gä mädihu̱ nꞌa ngu mänꞌaa. Hingä o̱thu̱ ngu bi yꞌo̱tꞌä rä Kain, nuꞌä mrä bätsi rä tsꞌondähi. Nuꞌä bi hyo rä ku» (1 Juan 3:10-12; 4:20, 21).

¹⁰ Ja ngu di hanthu̱, nuꞌu̱ xa mäjuäni yä kristianu hingi ku̱tꞌi ha yä tuhni nixi hingi häkuäbi yä te märꞌaa. Pe hingä ho̱nse̱ꞌä, nuyu̱ ꞌnehe di ꞌueke de yä tiempo, yä tsꞌe̱di ꞌne näꞌä pe̱ꞌtsi pa di mfatsꞌi ꞌne pa di nupä mfeni nꞌa ngu mänꞌaa (Hebreos 10:24, 25). Di  mfatsꞌi nuꞌmu̱ thogi yä xuñha ꞌne hingä yä hyate, hingä yä be, ꞌne mängä näꞌä mäjuäni. Di jamäsu näꞌä tsꞌofo uni rä Mäkä Tꞌofo nuꞌmu̱ enä: «Gatꞌho yä jäꞌi gä o̱ꞌtuäbihu̱ rä ñho» (Gálatas 6:10).

11. ¿Por hanja mähyoni gä kamfrihu̱ ge Äjuä di ñängägihu̱ po mäde de rä Hesu?

¹¹ Nuꞌu̱ xa mäjuäni yä kristianu kamfri ge Äjuä di ñängägihu̱ po mäde de Ñhesukristo. Rä Mäkä Tꞌofo enä ge «joꞌo mä nꞌa toꞌo dä za dä po̱ho̱gihu̱ [o ñängägihu̱], ho̱nse̱ mä zi Hmuuhu̱ rä Hesu, ngeꞌä joꞌo mä nꞌa toꞌo bä ꞌme̱hni nuua ha rä xiꞌmhai pa dä po̱ho̱gihu̱, ho̱nse̱ rä Hesu go geꞌä bä ꞌme̱hni ꞌne go geꞌä tsa dä po̱ho̱gihu̱» (Hechos 4:12). Ja ngu dä handihu̱ ha Rä ntheke 5 de nunä mfistꞌofo, rä Hesu bi uni rä te pa dä ñäni nuꞌu̱ yä jäꞌi yä yꞌo̱de (Mateo 20:28). ꞌNehe, rä Zi Dada Jeoba xä hñutsꞌi rä Hesu ngu rä ndä o rey de näꞌä rä Tsꞌu̱tꞌhui bi ja ha mähetsꞌi ꞌne go geꞌä ma dä mända ha gatꞌho rä Xiꞌmhai. Hänge rä Zi Dada Jeoba to̱ꞌmi ge nuju̱ gä o̱tehu̱ rä Hesu ꞌne gä te̱mbäbihu̱ nuꞌu̱ yä ntꞌudi bi zoogi. Ho̱nse̱ mu̱ gä pe̱fihu̱ njabu̱ ma dä za gä ꞌmu̱ihu̱ pa nzäntho. Hänge po rängeꞌä rä Mäkä Tꞌofo enä: «Näꞌä toꞌo kamfri rä Tꞌu̱, go geꞌä pe̱ꞌtsi rä te pa nzäntho, pe näꞌä toꞌo hingi ne dä gamfri rä Tꞌu̱, hiñhaꞌmu̱ dä zu̱di rä te pa nzäntho» (Juan 3:36).

12. ¿Te ri bo̱ni hingä pe̱fihu̱ nuꞌu̱ yä tsꞌo tꞌo̱tꞌe ja nuua ha rä xiꞌmhai?

¹² Nuꞌu̱ xa mäjuäni yä ꞌme̱go Äjuä, hingi pe̱fi nuꞌu̱ yä tsꞌo tꞌo̱tꞌe ja nuua ha rä xiꞌmhai. Nuꞌmu̱ rä Hesu bi mꞌai ante rä gobernador Pilato, näꞌä bi ꞌñenä: «Mä nsu de gä ndä hingo xä rꞌakä yä mexiꞌmhai» (Juan 18:36). Mäske ꞌmu̱i ha r’a nꞌañꞌo yä hnini, nuꞌu̱ xa mäjuäni yä kristianu o̱te näꞌä rä Tsꞌu̱tꞌhui Äjuä bi ja ha mähetsꞌi, ꞌne hingi ku̱tꞌi ha yä politika ꞌne nixi ha yä tuhni. Pe  nunka ꞌme̱päbi nixi häkuäbi märꞌa yä jäꞌi dä nkandidato, dä matsꞌi o dä vota po nꞌa rä partido. Mäske nuꞌu̱ xa mäjuäni yä kristianu hingi ku̱tꞌi ha yä politika, hää di kumpli ko nuꞌu̱ yä mhända uni yä gobiernu. ¿Por hanja? Ngeꞌä rä Mäkä Tꞌofo di mändabi yä kristianu ge «dä yꞌo̱te nuꞌu̱ toꞌo hä rä tsꞌu̱tꞌhui» o yä gobiernu (Romanos 13:1). Pe nuꞌmu̱ yä tsꞌu̱tꞌhui o yä gobiernu di mändabi nuꞌu̱ xa mäjuäni yä kristianu dä me̱fi nꞌa rä tꞌo̱tꞌe näꞌä di nkontraui yä mhända Äjuä, nuꞌu̱ te̱mbäbi rä kꞌoi nuꞌu̱ yä apostol rä Hesu nuꞌmu̱ bi ꞌñenä: «Nuje mänꞌa ri ꞌñepi gä o̱the Äjuä ke yä mhända yä mexiꞌmhai» (Hechos 5:29; Marcos 12:17).

13. ¿Te di mbeni de rä Tsꞌu̱tꞌhui Äjuä nuꞌu̱ xa mäjuäni yä de̱ni rä Hesu, ꞌne po rängeꞌä te pe̱fi?

¹³ Nuꞌu̱ xa mäjuäni yä kristianu, di ungä ntꞌo̱de ge ho̱nse̱ rä Tsꞌu̱tꞌhui Äjuä ma dä hñäki yä xuñha ꞌne ma dä hä nꞌa rä hogä mꞌu̱i. Rä Hesu bi mää: «Nuya yä rꞌayꞌo hogä noya de rä Tsꞌu̱tꞌhui Äjuä, ma dä ntꞌo̱de ha gatꞌho rä xiꞌmhai, pa njabu̱ yä jäꞌi de gatꞌho yä hnini dä yꞌo̱de, ꞌnepu̱ dä zo̱ho̱ rä fin» (Mateo 24:14, TNM). Nuꞌu̱ xa mäjuäni yä kristianu hingi xipi yä jäꞌi ge nuꞌu̱ yä gobiernu de rä xiꞌmhai geꞌu̱ ma dä hñäki yä xuñha. En lugar de geꞌä, nuꞌu̱ udi ge ho̱nse̱ rä Tsꞌu̱tꞌhui Äjuä ma dä hñäki gatꞌho yä xuñha ꞌne ma dä hä nꞌa rä hogä mꞌu̱i (Salmo 146:3). Rä Hesu bi ꞌñutkägihu̱ gä adihu̱ ge dä ehe rä Tsꞌu̱tꞌhui Äjuä, nuꞌmu̱ bi ꞌñenä: «Hyopi dä ehe ri tsꞌu̱tꞌhui. Hyopi dä tꞌo̱tꞌe ri bolunta ha rä xiꞌmhai ja ngu bi tꞌo̱tꞌe ha mähetsꞌi» (Mateo 6:10, TNM). Rä Mäkä Tꞌofo mää ge rä Tsꞌu̱tꞌhui Äjuä «ma dä huati gatꞌho nuya yä tsꞌu̱tꞌhui [nuꞌu̱ ja mäpaya], ꞌne ho̱nse̱ gehnä ma dä mända pa nzäntho» (Daniel 2:44; Apocalipsis [Revelación] 16:14; 19:19-21).

14. Pa geꞌi, ¿toꞌo nuꞌu̱ pe̱ꞌtsi näꞌä relijion xa mäjuäni?

 ¹⁴ Ko näꞌä ya dä handihu̱, ñꞌanise̱: «¿Te mä relijion udi ho̱nse̱ näꞌä hutsꞌi ha rä Mäkä Tꞌofo ꞌne di ungä ntꞌo̱de rä thuhu Jeoba? ¿Te mä relijion udi rä mhäte, kamfribi rä Hesu, xä ꞌuege de nuꞌu̱ yä tsꞌo tꞌo̱tꞌe jaua ha rä xiꞌmhai ꞌne di ungä ntꞌo̱de ge ho̱nse̱ rä Tsꞌu̱tꞌhui Äjuä ma dä hñäki gatꞌho yä xuñha? De gatꞌho nuꞌu̱ yä relijion ja ha rä xiꞌmhai, ¿ndaꞌä de geꞌu̱ pe̱fi gatꞌho nuya  yä tꞌo̱tꞌe?». Ho̱nse̱ yä testigo rä Jeoba pe̱fi njabu̱ (hñeti Isaías 43:10-12).

15. ¿Basta ko gä kamfrihu̱ ge ꞌmu̱i Äjuä pa gä johyabihu̱ rä koraso?

¹⁵ Pa dä numäñhogihu̱ Äjuä, hingä ho̱nse̱ mähyoni gä kamfribihu̱. Rä Mäkä Tꞌofo mää ge asta yä u̱xjua kamfri ge ꞌmu̱i Äjuä, pe nuꞌu̱ hingi pe̱päbi rä bolunta (Santiago 2:19). Po rängeꞌä, Jeoba hindi numäñhoꞌu̱. Pa gä johyabihu̱ rä koraso Äjuä, pe̱ꞌtsi te gä pe̱päbihu̱ rä bolunta ꞌne hingä ho̱nse̱ gä kamfribihu̱. ꞌNehe, pe̱ꞌtsi te gä po̱nihu̱ de nuꞌu̱ yä hyate relijion ꞌne gä ku̱tꞌihu̱ ha näꞌä relijion udi näꞌä xa mäjuäni.

16. ¿Te mähyoni gä pe̱fihu̱ pa hingä nthäntsꞌihu̱ ko nuꞌu̱ yä hyate relijion?

¹⁶ Rä apostol Pablo bi mää ge Äjuä hingi ne dä hyandi gä nthäntsꞌihu̱ ko nuꞌu̱ yä hyate relijion. Näꞌä bi yꞌofo: «ꞌUegehu̱ de nuꞌä o̱tꞌä yä tsꞌo jäꞌi pa hingi te̱mbähu̱ nu yä tsꞌo tꞌo̱tꞌe o̱tꞌeꞌu̱, enä njabu̱ mä Zi Dadahu̱; ꞌne oxki o̱thu̱ nuꞌä xä ntsꞌo, pa njabu̱ dä za gi ꞌmu̱hu̱ kongeki, ha nugi kongeꞌähu̱» (2 Corintios 6:17; Isaías 52:11). Po rängeꞌä, nuꞌu̱ xa mäjuäni yä kristianu di ꞌuege de gatꞌho nuꞌu̱ yä tꞌo̱tꞌe bi ehe de nuꞌu̱ yä hyate relijion.

17, 18. ¿Te me̱ꞌä rä «Dängä Babilonia», ꞌne por hanja xa mähyoni ge nguntꞌä gi po̱ni de geꞌä?

¹⁷ Ha rä Mäkä Tꞌofo, tꞌembäbi rä “Dängä Babilonia” gatꞌho nuꞌu̱ yä hyate relijion (Apocalipsis 17:5). * Nunä thuhu, jakägihu̱ gä benihu̱ näꞌä hnini mi ja mäyaꞌmu̱ mi rä thuhu Babilonia. Ja bä fu̱dini gatꞌho  nuꞌu̱ yä hyate relijion. ¿Hämꞌu̱? Mꞌe̱fa de bi nja näꞌä Däta däyꞌe ha yä pa rä Noe. Ndunthi de nuꞌu̱ yä ntꞌudi ꞌne yä nzäi pe̱ꞌtsi nuꞌu̱ yä hyate relijion de mäpaya, bä fu̱di ha näꞌä hnini Babilonia de mäyaꞌmu̱. Rꞌa de nuꞌu̱ yä zidada mi xo̱kämbeni yä me Babilonia xki hyoki ꞌne xki pe̱hni de gä hñuu yä idolo. Mäpaya, ndunthi de nuꞌu̱ yä hyate relijion udi ꞌnehe ge Äjuä näꞌä nꞌa rä Trinida, nuꞌmu̱ enä ge rä Dada, rä Tꞌu̱ ꞌne rä espiritu santo nꞌadä Äjuä. Pe rä Mäkä Tꞌofo udi xä ñho ge ꞌmu̱i ho̱nse̱ nꞌatho näꞌä xa mäjuäni Äjuä ꞌne rä thuhu Jeoba, ꞌne ge rä Ñhesukristo geꞌä rä Tꞌu̱ Jeoba (Juan 17:3). Yä me Babilonia ꞌnehe mi kamfri ge yä jäꞌi pe̱ꞌtsi nꞌa rä alma näꞌä sigi tetho ꞌne ge dä za dä sufri mꞌe̱fa de dä du. Mäpaya, kasi gatꞌho yä relijion, ꞌnehe udi ge di pe̱ꞌtsihu̱ nꞌa rä alma o espiritu näꞌä hingi tu ꞌne ge dä za dä sufri ha rä nidu.

¹⁸ Nuꞌu̱ yä nzäi ꞌne yä ntꞌudi mi pe̱ꞌtsi yä me Babilonia de mäyaꞌmu̱, bi ntu̱ngi po gatꞌho rä Xiꞌmhai. Po rängeꞌä, rä Mäkä Tꞌofo embäbi Dängä Babilonia gatꞌho nuꞌu̱ yä hyate relijion ja mäpaya po gatꞌho rä Xiꞌmhai. Pe Äjuä xä mää ge nse̱kitho ma dä uadi gatꞌho nuꞌu̱ yä hyate relijion. ¿Gi da ngue̱nda por hanja xa mähyoni gi po̱ni, ꞌne gi tsopu̱ gatꞌho nuꞌu̱ yä tꞌo̱tꞌe bi ehe de näꞌä Dängä Babilonia? Rä Zi Dada Jeoba ne ge nguntꞌä gi po̱ni mientra tobe ja rä tiempo (hñeti Apocalipsis 18:4, 8).

19. ¿Te ma gi tähä mu̱ gi pe̱päbi rä Zi Dada Jeoba?

¹⁹ Mu̱ gi huahni gi tsopu̱ nuꞌu̱ yä hyate relijion, zäi ge rꞌa yä jäꞌi ma dä ꞌuege de geꞌi o ya hindä ne dä nzoꞌi. Nuꞌu̱ yä mu̱di kristianu, bi zoogi ꞌne bi ꞌme̱di ndunthi yä tꞌo̱tꞌe po bi de̱ni rä Hesu, pe nuꞌu̱ bi dähä ndunthi  yä jäpi. Mu̱ nuꞌi gi huahni gi pe̱päbi rä Zi Dada Jeoba mähye̱gi ko Rä hnini, ma gi tähä ndunthi yä jäpi ꞌnehe. Ma gi pe̱ꞌtsi nꞌa rä familia po gatꞌho rä Xiꞌmhai, ꞌne yä miyontho yä jäꞌi nuꞌu̱ ma dä mäꞌi ꞌne ma dä hyantꞌäꞌi ngu rä kuꞌi. ꞌNehe ma gi pe̱ꞌtsi rä humu̱i de gi ꞌmu̱i pa nzäntho «ha näꞌä rꞌayꞌo xiꞌmhai xä ꞌñepu̱» (hñeti Marcos 10:28-30, TNM). Nuꞌu̱ yä jäꞌi di nkue̱ kongeꞌi o hingi nzoꞌi, tal vez ko rä tiempo, ꞌnehe ma dä ne dä bädi te udi rä Mäkä Tꞌofo ꞌne ma dä bo̱ni de nuꞌu̱ yä hyate relijion pa dä me̱päbi rä Zi Dada Jeoba.

20. ¿Te mä mꞌu̱i ma dä me̱ꞌtsi nuꞌu̱ pe̱fi näꞌä udi näꞌä rä relijion xa mäjuäni?

²⁰ Rä Mäkä Tꞌofo udi ge mänꞌitꞌho, Äjuä ma dä xu̱ki nunä Xiꞌmhai ꞌne ma dä hä nꞌa rä hogä mꞌu̱i habu̱ ma dä mända ho̱nse̱ rä Tsꞌu̱tꞌhui Äjuä ꞌne ma dä nja rä justisia po gatꞌho rä Xiꞌmhai (2 Pedro 3:9, 13). ¡Xa mähotho näꞌä rä mꞌu̱i ma dä me̱ꞌtsi yä jäꞌi nuua ha rä Xiꞌmhai! ꞌNe nubye̱ hää, ma dä nja ho̱nse̱ nꞌatho rä relijion ꞌne yä jäꞌi ma dä xo̱kämbeni ho̱nse̱ rä Zi Dada Jeoba. ¿Hänge dä hogi ge dende nubye̱ gi fu̱di gi pe̱fi näꞌä mähyoni pa gi ku̱tꞌi ha näꞌä relijion udi näꞌä xa mäjuäni?