1, 2. ¿Habu̱ dä za gä tinihu̱ nꞌa rä hogä ntaki mäpaya?

IMÄJINÄ ge mientra gi yꞌo ha nꞌa rä ꞌñuu, gi handi hanja di mꞌe̱xui mähetsꞌi ko yä gui. ꞌNe nse̱kitho dä mu̱di dä nja yä hue̱i, yä ngani ꞌne dä mu̱di dä ꞌuäi xa ntsꞌe̱di. Oraꞌä, nuꞌi ma gi nextꞌihi pa gi hyoni habu̱ gi ntaki, ꞌnepu̱ gi hyandi ge ha rä hyo rä ꞌñuu ja nꞌa rä luga habu̱ dä za gi ntaki. ¿Hänge ma dä rꞌaꞌäꞌi ndunthi rä johya?

² Mäpaya nuju̱ di ꞌmu̱hu̱ ha nuꞌu̱ yä pa xä ñhei, habu̱ xa ja ndunthi yä xuñha, ngeꞌä rä xiꞌmhai xa yꞌo ri tsꞌoki. Pe ja nꞌa rä luga habu̱ dä za gä ntakihu̱ de gatꞌho nuꞌu̱ yä xuñha. ¿Te mä lugäꞌä? Hyandi te mää rä Mäkä Tꞌofo: «Nuga ma gä embäbi Jeoba: “Nuꞌi go geꞌi mä ntakiꞌi ꞌne mä njuti näꞌä xa tse̱di, mä Zi Dada näꞌä xa di kamfribi”» (Salmo 91:2).

3. ¿Hanja dä za gä o̱tꞌehu̱ mä ntakihu̱ Jeoba?

³ Hää, nuju̱ dä za gä o̱tꞌe mä ntakihu̱ Jeoba, näꞌä rä Hyokäte ꞌne rä Däta Tsꞌu̱tꞌhui de gatꞌho rä Xiꞌmhai. ¿Hänge nꞌa rä däta jäpi? Näꞌä mänꞌa ja rä tsꞌe̱di  ke gatꞌho yä jäꞌi o yä tꞌo̱tꞌe. ꞌNe mäske te dä tꞌo̱tkägihu̱ o te gä thogihu̱, Jeoba pe̱ꞌtsi rä tsꞌe̱di pa dä maxkägihu̱. ¿Hanja dä za gä o̱tꞌe mä ntakihu̱ Jeoba? Po mäde de gä kamfribihu̱. ꞌNehe rä Mäkä Tꞌofo di mbitagihu̱: «Oxki ma gi hye̱hu̱ näꞌä rä mhäte xä rꞌakhu̱ Äjuä» (Judas 21, TNM). Hää, mähyoni ge nuju̱ hingä he̱gihu̱ näꞌä rä mhäte xä rꞌakägihu̱ Jeoba ꞌne gä sigi gä ꞌmu̱hu̱ getbu̱ de geꞌä. Mu̱ gä pe̱fihu̱ njabu̱, dä za gä mäñhu̱ ge Jeoba näꞌä nꞌa rä ntaki pa gekhu̱. Pe, ¿te ma dä maxkägihu̱ pa gä jahu̱ njabu̱?

4, 5. ¿Ndaꞌu̱ rꞌa de nuꞌu̱ yä regalo udi ge Äjuä di mäkägihu̱?

⁴ Pa hingä he̱gihu̱ näꞌä rä mhäte xä rꞌakhu̱ Äjuä, mähyoni gä jamädibihu̱ po näꞌä mhäte xä ꞌñudi po gekhu̱. Beni rꞌa de nuꞌu̱ yä ntꞌudi xkä pädi de rä Mäkä Tꞌofo ko rä mfatsꞌi nunä mfistꞌofo. Rä Zi Dada Jeoba xä rꞌakägihu̱ rä Xiꞌmhai pa gä ꞌmu̱hu̱, habu̱ ja ndunthi te gä tsihu̱, habu̱ ꞌmu̱i yä zuꞌue, ꞌne habu̱ ja ndunthi yä luga ꞌne yä tꞌo̱tꞌe xa mähotho. Äjuä go geꞌä bi uni rä mfeni pa bi tꞌofo rä Mäkä Tꞌofo, ꞌne ja gekua xikägihu̱ te rä thuhu ꞌne te mä mꞌu̱i pe̱ꞌtsi. ꞌNehe rä Mäkä Tꞌofo xikägihu̱  ge rä Zi Dada Jeoba, bä pe̱hni rä hmäkä Tꞌu̱ nuua ha rä Xiꞌmhai pa bi sufri ꞌne bi uni rä te po gekhu̱ (Juan 3:16). ¿Te mä jäpi dä za gä hänihu̱ po näꞌä rä te bi uni rä Hesu? Di rꞌakägihu̱ nꞌa rä humu̱i xa mähotho pa xudi ndämäni.

⁵ Pa dä za gä pe̱ꞌtsihu̱ nunä humu̱i, rä Zi Dada Jeoba xä hñutsꞌi nꞌa rä gobiernu ha mähetsꞌi. Mänꞌitꞌho, nunä gobiernu o Tsꞌu̱tꞌhui ma dä huati gatꞌho nuꞌu̱ yä sufrimiento ꞌne ma dä japi dä uädri gatꞌho rä Xiꞌmhai. ¡Hängu rä johya ma gä pe̱ꞌtsihu̱ ngeꞌä ma gä ꞌmu̱hu̱ temäꞌentho pa nzäntho! (Salmo 37:29.) Mientra dä zo̱ho̱ näꞌä rä paꞌä, rä Zi Dada Jeoba xikägihu̱ hanja dä za gä pe̱ꞌtsihu̱ nꞌa rä hogä mꞌu̱i mäpaya. Pe Jeoba xä rꞌakägihu̱ mä nꞌa rä regalo: rä sadi. Po mäde de rä sadi, nuju̱ dä za gä xipäbihu̱ gatꞌho näꞌä di nehu̱ o di mbenihu̱. Gehya rꞌa de nuꞌu̱ yä regalo udi näꞌä rä mhäte pe̱ꞌtsi rä Zi Dada Jeoba po geꞌi ꞌne po gatꞌho yä mexiꞌmhai.

6. ¿Te dä za gi pe̱fi pa gi umbäbi njamädi Jeoba po näꞌä rä mhäte xä ꞌñudi po geꞌi?

⁶ Pe nubye̱ mähyoni gi ñꞌanise̱: «¿Te dä za gä pe̱fi pa gä umbäbi njamädi rä Zi Dada Jeoba po näꞌä rä mhäte xä ꞌñudi po geki?». Ndunthi yä jäꞌi enä: «Gä mädi rä Zi Dada Jeoba». ¿Geꞌä gi mbeni ꞌnehe? Rä Hesu bi ꞌñenä ge nunä, gehnä rä mhända mänꞌa xa rä däta de gatꞌho: «Pe̱ꞌtsi te gi mädi ri Zi Dada Jeoba ko ngatꞌho ri koraso ꞌne ko ngatꞌho ri alma ꞌne ko ngatꞌho ri mfeni» (Mateo 22:37, TNM). Nuꞌi dä za gi mää ge gi pe̱ꞌtsi ndunthi yä raso pa gi mädi rä Zi Dada Jeoba. Pe, ¿ho̱nse̱ ko näꞌä gi mää dä za gi ꞌñenä ge gi mädi rä Zi Dada Jeoba ko ngatꞌho ri koraso ꞌne ko ngatꞌho ri  alma ꞌne ko ngatꞌho ri mfeni?

7. ¿Te ma dä maxkägihu̱ gä pe̱fihu̱ näꞌä rä mhäte di pe̱ꞌtsihu̱ po rä Zi Dada Jeoba? Hñutsꞌi nꞌa rä ejemplo.

⁷ Rä Mäkä Tꞌofo udi ge hingä ho̱nse̱ po näꞌä di mäñhu̱, dä za gä eñhu̱ ge di mädihu̱ rä Zi Dada Jeoba. Gä tsahu̱ nꞌa rä mhäte po geꞌä xa mähyoni, pe tobe di ja mꞌe̱di nꞌa rä tꞌo̱tꞌe. Pa gä ntiendehu̱ xä ñho ma gä hutsꞌihu̱ nꞌa rä ejemplo: imäjinä ge nuꞌi gi ne gi tsi nꞌa rä fruta, pe se̱he̱ dä tꞌaꞌi nꞌa rä ndaa, ¿ma gi johya ho̱nse̱ kongeꞌä? Hinä. Mäske gi pädi ge näꞌä rä ndaa xa mähyoni pa dä fo̱tsꞌe nꞌa rä arbol, pe nuꞌi gi nepäbi rä fruta. Njabu̱ ꞌnehe näꞌä mhäte di tsahu̱ po Jeoba, näꞌä to̱ꞌmi ge dä te ꞌne dä uni yä fruta. Rä Mäkä Tꞌofo enä: «Mu̱ di o̱ꞌtuähu̱ yä mhända Äjuä, nuꞌmu̱ xi mäjuäni di mädihu̱ꞌä, ꞌne nu yä mhända Äjuä hingi hei gä o̱tꞌehu̱» (1 Juan 5:3). Hää, näꞌä mhäte di pe̱ꞌtsihu̱ po Äjuä, ma dä nheki po näꞌä di pe̱fihu̱ (hñeti Mateo 7:16-20).

8, 9. ¿Hanja dä za gä udihu̱ ge di mädihu̱ Äjuä ꞌne ge di jamädibihu̱ po gatꞌho näꞌä xä me̱fi po gekhu̱?

⁸ Nuju̱ di udihu̱ ge di mädihu̱ Äjuä nuꞌmu̱ di pe̱fihu̱ nuꞌu̱ yä mhända ꞌne di jamäsuhu̱ nuꞌu̱ yä tsꞌofo rꞌakägihu̱. Yä mhända Äjuä hinxä ñhei gä pe̱fihu̱. Nuꞌu̱ faxkägihu̱ pa gä ꞌmu̱hu̱ xä ñho ꞌne ko rä johya (Isaías 48:17, 18). Nuꞌmu̱ di hopäbihu̱ rä Zi Dada Jeoba go dä gu̱nkägihu̱, di udihu̱ hängu di jamädibihu̱ po gatꞌho näꞌä xä me̱fi po gekhu̱. Pe hingä ndunthi nuꞌu̱ yä jäꞌi pe̱fi njabu̱. Nuju̱ hindi ne gä njahu̱ ngu rꞌa de nuꞌu̱ yä jäꞌi bi mꞌu̱i ha yä pa rä Hesu,  ngeꞌä nuꞌu̱ hinte mi ja yä njamädi. Rä Hesu bi yꞌo̱the rꞌe̱tꞌa yä jäꞌi nuꞌu̱ mi tsu̱di rä lepra, pe ho̱nse̱ nꞌatho bi mengi bi umbäbi njamädi (Lucas 17:12-17). Nuju̱ di ne gä njahu̱ ngu näꞌä rä jäꞌi bi uni njamädi, hingä ngu nuꞌu̱ gu̱to himbi jamädi.

⁹ Nuꞌmu̱, ¿ndañꞌu̱ nuꞌu̱ yä mhända Jeoba mähyoni gä o̱dehu̱? Ha nunä mfistꞌofo xtä handihu̱ rꞌa de geꞌu̱, pe ma gä handihu̱ mänꞌaki rꞌa de nuꞌu̱ yä mhända. Mu̱ gä pe̱fihu̱ nuꞌu̱ yä mhända Äjuä, geꞌä ma dä maxkägihu̱ pa hingä he̱gihu̱ näꞌä rä mhäte xä rꞌakägihu̱.

10. ¿Por hanja xa mähyoni gä tso̱ho̱ gä pädihu̱ de rä Zi Dada Jeoba? Hñutsꞌi nꞌa rä ejemplo.

¹⁰ Mähyoni gä pädihu̱ xä ñho toꞌo rä Zi Dada  Jeoba pa dä za gä kuatꞌihu̱ kongeꞌä. Nuju̱ nunka ma gä huadi gä pädihu̱ de Äjuä. Imäjinä ge nuꞌi gi yꞌo ha rä ꞌmatha ha nꞌa rä xui näꞌä xa xä tse̱ ꞌne xkä tso̱ge nꞌa rä tsibi pa gi mpaꞌti. ¿Ma gi hyopi ge näꞌä tsibi dä huetꞌi rꞌamätsꞌu̱? Hinä, nuꞌi ma gi sigi gi yꞌu̱tsꞌi yä zaa pa hindä huetꞌi, ngeꞌä gi pädi ge mu̱ gi hyopi dä huetꞌi, nuꞌi dä za gi tu ko rä tse̱. Ja ngu yä zaa hingi hopi dä huetꞌi rä tsibi, ꞌnehe näꞌä rä «mfädi de Äjuä» japi dä te näꞌä mhäte di pe̱ꞌtsihu̱ po Jeoba (Proverbios 2:1-5).

11. ¿Hanja bi matsꞌi rä Hesu nuꞌu̱ yä de̱ni ko näꞌä bi xipäbi?

¹¹ Rä Hesu mi ne ge nuꞌu̱ yä de̱ni hinxä hyopi xä tse̱tꞌi nuꞌu̱ yä mhäte po rä Zi Dada Jeoba ꞌne po rä Mäkä Tꞌofo. Mꞌe̱fa de bi nangi de rä du, rä Hesu bi xipäbi yoho de nuꞌu̱ yä de̱ni te ri bo̱ni rꞌa de nuꞌu̱ yä profesia hutsꞌi ha nuꞌu̱ yä Tꞌofo de gä Ebreo ꞌne hanja xki kumpliꞌä. ¿Bi matsꞌi nuꞌu̱ yä noya? Hää, ngeꞌä di handihu̱ ge mꞌe̱fa nuꞌu̱ yä de̱ni bi ꞌñenä: «ꞌNe xa mäjuäni ndi tsahu̱ nꞌa rä johya ha mä korasohu̱ nuꞌmu̱ mi xikägihu̱ mä ꞌñuu de rä Mäkä Tꞌofo» (Lucas 24:32).

12, 13. a) ¿Te xä thogi mäpaya ko näꞌä rä mhäte po Äjuä ꞌne po rä Mäkä Tꞌofo? b) ¿Te mähyoni gä pe̱fihu̱ pa hindä tse̱tꞌi näꞌä rä mhäte di pe̱ꞌtsihu̱ po rä Zi Dada Jeoba?

¹² Nuꞌmu̱ gä fu̱di gä pädi näꞌä xa mäjuäni udi rä Mäkä Tꞌofo, zäi ge nuꞌi ꞌnehe gä tsa ndunthi rä johya ha ri koraso ꞌne gä fu̱di gä mädi Äjuä, ja ngu xä thogi ko ndunthi yä jäꞌi. Pe nubye̱, mähyoni gi yꞌo̱tꞌe ntsꞌe̱di po gi su näꞌä rä mhäte pa dä sigi dä te ꞌne hingi ꞌme̱di. Nuju̱ hindi ne gä te̱mbäbihu̱ yä kꞌoi nuꞌu̱ yä jäꞌi de nunä xiꞌmhai. Rä Hesu bi ꞌñenä: «Ndunthi yä jäꞌi ma dä ꞌme̱di rä mhäte» (Mateo 24:12). ¿Te ma  dä maxꞌäꞌi pa hingi ꞌme̱di näꞌä rä mhäte gi pe̱ꞌtsi po rä Zi Dada Jeoba ꞌne po nuꞌu̱ yä ntꞌudi de rä Mäkä Tꞌofo?

¹³ Sigi gi pädi de rä Zi Dada Jeoba ꞌne de Ñhesukristo (Juan 17:3). Ntso̱ꞌmi ha nuꞌu̱ yä noya gi heti ha rä Mäkä Tꞌofo ꞌne ñꞌanise̱: «¿Te utkägi nuya yä noya de rä Zi Dada Jeoba? ¿Di tini mä nꞌa rä raso pa gä mädi ko ngatꞌho mä koraso, mä mfeni ꞌne mä te?» (hñeti 1 Timoteo 4:15). Mu̱ gi ntso̱ꞌmi ꞌne gi mbeni njabu̱, ri mhäte po rä Zi Dada Jeoba nunka ma dä tse̱tꞌi.

14. ¿Hanja dä za dä maxkägihu̱ rä sadi pa mänꞌa dä te mä mhätehu̱ po rä Zi Dada Jeoba?

¹⁴ Rä sadi geꞌä mä nꞌa rä mfatsꞌi di pe̱ꞌtsihu̱ pa hindä tse̱tꞌi näꞌä mä mhätehu̱ po rä Zi Dada Jeoba (1 Tesalonicenses 5:17). Ha näꞌä Rä ntheke 17 dä pädihu̱ ge rä sadi, näꞌä nꞌa rä däta regalo xä rꞌakägihu̱ Äjuä. Pa dä za gä pe̱ꞌtsihu̱ nꞌa rä hogä ntsitsꞌi ko märꞌaa, mähyoni ge nzäntho gä ñähu̱ kongeꞌu̱ ꞌne gä xipäbi te di mbenihu̱. Njabu̱ ꞌnehe, pa mänꞌa dä te näꞌä mä ntsitsꞌihu̱ ko rä Zi Dada Jeoba, mähyoni ge nzäntho gä xatuäbihu̱. Pe mähyoni ge mꞌe̱tꞌo gä ntso̱ꞌmihu̱ ꞌne gä jamäsuhu̱ nuꞌu̱ mä sadihu̱ pa hingä repetihu̱ nuꞌu̱ yä noya hyaxtho. Pe̱ꞌtsi te gä nzofohu̱ Jeoba ja ngu di ja nꞌa rä zi bätsi ko rä dada. Mähyoni gä nzofohu̱ Äjuä ko rä tꞌekꞌei, pe näꞌä to̱ꞌmi gä xipäbihu̱ näꞌä di mbenihu̱, näꞌä di tsahu̱ ꞌne näꞌä ja ha mä korasohu̱ (Salmo 62:8). Hää, pa gä xo̱kämbenihu̱ Äjuä, xa mähyoni gä ꞌuekehu̱ rä tiempo pa gä nxadihu̱ rä Mäkä Tꞌofo ꞌne gä xatuäbihu̱ ko ngatꞌho mä korasohu̱. Njabu̱, nuju̱ hingä ma gä he̱gihu̱ näꞌä rä mhäte xä rꞌakägihu̱ Äjuä.

15, 16. ¿Por hanja nꞌa rä däta nsu ꞌne ngu nꞌa rä tesoro gä uñhu̱ ntꞌo̱de rä Tsꞌu̱tꞌhui Äjuä?

¹⁵ Nuꞌmu̱ di ꞌmu̱se̱hu̱, di xo̱kämbenihu̱ Äjuä nuꞌmu̱ di xatuäbihu̱ ꞌne di nxadihu̱ rä Mäkä Tꞌofo. Pe nubye̱, pa gä xo̱kämbenihu̱ Äjuä ante yä thandi märꞌa yä jäꞌi, mähyoni gä xipäbihu̱ märꞌa de näꞌä xtä pädihu̱ de rä Mäkä Tꞌofo. Xi nuꞌi, ¿ya gi pe̱fi njabu̱? Mu̱ hää, xa nꞌa rä däta nsu näꞌä gi pe̱ꞌtsi (Efesios 3:8). Nuꞌmu̱ di utihu̱ märꞌa de näꞌä xtä pädihu̱ de rä Zi Dada Jeoba, di kumplihu̱ ko näꞌä däta mhända xä tꞌumbäbi nuꞌu̱ xa mäjuäni yä kristianu: ¡gä uñhu̱ ntꞌo̱de yä rꞌayꞌo hogä noya de rä Tsꞌu̱tꞌhui Äjuä! (hñeti Mateo 24:14, TNM; 28:19, 20, TNM.)

¹⁶ Rä apostol Pablo xa mi ho dä ungä ntꞌo̱de ꞌne mi handi nunä rä ꞌme̱fi ngu nꞌa rä tesoro (2 Corintios 4:7). Hingä ma gi tini nꞌa rä ꞌme̱fi mänꞌa xä ñho ke gi xipäbi yä jäꞌi de rä Zi Dada Jeoba ꞌne de näꞌä ma dä me̱fi. ꞌNehe di pe̱päbihu̱ näꞌä rä Hmuu mänꞌa xa rä hojäꞌi de gatꞌho, ꞌne di rꞌakägihu̱ ndunthi yä jäpi po geꞌä. Nuꞌmu̱ di uñhu̱ ntꞌo̱de, di fatsꞌihu̱ nuꞌu̱ yä jäꞌi ne dä uatꞌi ko Äjuä, ꞌne honi näꞌä rä ꞌñuu tsitsꞌi ha rä te pa nzäntho. ¡Hindä za gi tini mä nꞌa rä ꞌme̱fi näꞌä dä rꞌaꞌi xa ndunthi rä johya! ꞌNehe nuꞌmu̱ di uñhu̱ ntꞌo̱de de rä Zi Dada Jeoba ꞌne de rä Noya, faxkägihu̱ pa dä te mä jamfrihu̱ ꞌne mä mhätehu̱ po geꞌä. ꞌNe rä Zi Dada Jeoba xa di numäñho gatꞌho näꞌä di pe̱fihu̱ po gä uñhu̱ ntꞌo̱de (Hebreos 6:10). Mu̱ gä sigi gä uñhu̱ ntꞌo̱de, hingä ma gä he̱gihu̱ näꞌä rä mhäte xä rꞌakägihu̱ Äjuä (hñeti 1 Corintios 15:58, TNM).

17. ¿Por hanja mähyoni gä nxo̱nihu̱ gä mämbäbihu̱ rä Noya Äjuä?

 ¹⁷ Mähyoni gä benihu̱ ge mäpaya, pe̱ꞌtsi te gä nxo̱nihu̱ gä uñhu̱ ntꞌo̱de rä Tsꞌu̱tꞌhui Äjuä. Rä Mäkä Tꞌofo enä: «Gehnä di ꞌme̱pꞌäꞌi: ge gi mämbä rä Noya Äjuä» (2 Timoteo 4:2). ¿Por hanja mähyoni gä nxo̱nihu̱ gä mämbäbihu̱ rä Noya Äjuä mäpaya? Po nunä raso di rꞌakägihu̱ rä Mäkä Tꞌofo: «Rä däta pa rä Zi Dada Jeoba ꞌmu̱i getbu̱. ꞌMu̱i getbu̱ ꞌne xä ꞌñepu̱ ko ndunthi rä so̱ni» (Sofonías 1:14). Hää, mänꞌitꞌho ma dä zo̱ho̱ näꞌä rä pa habu̱ rä Zi Dada Jeoba ma dä huati gatꞌho nuꞌu̱ yä tsꞌo tꞌo̱tꞌe jaua ha rä xiꞌmhai. Hänge yä jäꞌi pe̱ꞌtsi te dä bädi näꞌä ma dä thogi. Mähyoni ge dende nubye̱ yä jäꞌi dä hyandi rä Zi Dada Jeoba ngu rä Däta Tsꞌu̱tꞌhui de gatꞌho rä Xiꞌmhai, ngeꞌä mꞌe̱fa ya hingä ma dä nja rä tiempo pa geꞌä. Rä fin ya ꞌmu̱i getbu̱ ꞌne «¡hingä ma dä zo̱ho̱ ndee!» (Habacuc 2:3).

18. ¿Por hanja pe̱ꞌtsi te gä xo̱kämbenihu̱ rä Zi Dada Jeoba mähye̱gi ko nuꞌu̱ xa mäjuäni yä kristianu?

¹⁸ Nuꞌmu̱ di xo̱kämbenihu̱ rä Zi Dada Jeoba ante yä thandi yä jäꞌi, näꞌä ne ge gä xo̱kämbenibihu̱ mähye̱gi ko nuꞌu̱ xa mäjuäni yä kristianu. Hänge rä Mäkä Tꞌofo xikägihu̱: «ꞌNe gä beñhu̱ hanja dä za gä nupä mfenihu̱ nꞌa ngu mänꞌaa, pa gä mädihu̱ ꞌne pa gä o̱thu̱ yä hogä ꞌme̱fi. ꞌNe hiñhaꞌmu̱ gä ꞌuegehu̱ de mä mhuntsꞌihu̱, mäske rꞌa xä nzäi hingi pa. Nuju̱, nuꞌä gä o̱thu̱, gä nzofohu̱ nꞌa ngu mänꞌaa. ꞌNe nubye̱, mänꞌa mähyoni gä o̱thu̱ njabu̱, ngeꞌä di hanthu̱ ya ꞌmu̱i getbu̱ rä pa» (Hebreos 10:24, 25). Nuꞌmu̱ di ntinihu̱ ha yä mhuntsꞌi ko nuꞌu̱ mä kuhu̱, dä za gä nsundahu̱ ꞌne gä xo̱kämbenihu̱ rä Zi Dada Jeoba. ꞌNehe di mfatsꞌihu̱ ꞌne di nupä mfenihu̱ nꞌa ngu mänꞌaa.

19. ¿Te dä za gä pe̱fihu̱ pa mänꞌa dä ze̱di näꞌä mä ntsitsꞌihu̱ ꞌne mä mhätehu̱ po nuꞌu̱ yä ku de ha yä mhuntsꞌi?

 ¹⁹ Nuꞌmu̱ di ntinihu̱ ko nuꞌu̱ toꞌo di xo̱kämbeni ꞌnehe rä Zi Dada Jeoba, di te näꞌä mä mhätehu̱ ꞌne mänꞌa di ntsitsꞌihu̱ ko nuꞌu̱ yä ku de ha rä mhuntsꞌi. Mähyoni gä handihu̱ nuꞌu̱ yä hogä mꞌu̱i pe̱ꞌtsi mä kuhu̱, ja ngu rä Zi Dada Jeoba handi mä hogä mꞌu̱ihu̱. Ogi to̱ꞌmi ge yä ku hindä me̱fi nixi nꞌa rä tsꞌoki. Beni ge gatꞌho di pe̱ꞌtsihu̱ rä tsꞌoki, ꞌne ge ri jamfri hingi te mähye̱gi ko nuꞌu̱ yä jamfri märꞌa yä ku (hñeti Colosenses 3:13). Hyoni gi ntsitsꞌi ko nuꞌu̱ toꞌo di mädi rä Zi Dada Jeoba ko ngatꞌho yä tsꞌe̱di, ꞌne ma gi hyandi hanja ri mfädi ꞌne ri mhäte po Äjuä mänꞌa ma dä te. Mu̱ gi xo̱kämbeni rä Zi Dada Jeoba ko nuꞌu̱ yä ku de ha rä mhuntsꞌi, hingä ma gi hye̱gi näꞌä rä mhäte xä rꞌakägihu̱ Äjuä. Nubye̱ ma gä handihu̱ te mä jäpi ma dä hñäni nuꞌu̱ toꞌo di xo̱kämbeni rä Zi Dada Jeoba ꞌne hingi he̱gi näꞌä rä mhäte xä rꞌakägihu̱.

20, 21. ¿Te me̱ꞌä «näꞌä xa mäjuäni rä te», ꞌne por hanja xa mähotho gä pe̱ꞌtsihu̱ nunä rä te?

²⁰ Rä Zi Dada Jeoba ma dä umbäbi rä te nuꞌu̱ yä jäꞌi yä yꞌo̱de. Pe, ¿xi te mä teꞌä? Ndunthi de gekhu̱ dä za gä mäñhu̱ ge ya di pe̱ꞌtsihu̱ rä te, ngeꞌä di joxä mä hñähu̱, di ñunihu̱ ꞌne di tsithehu̱. ꞌNe nuꞌmu̱ xa di johyahu̱, asta di eñhu̱: «Nubye̱ hää xa di ꞌmu̱i temäꞌentho». Pe ja ngu udi rä Mäkä Tꞌofo, mäpaya dä za gä mäñhu̱ ge nixi nꞌa rä jäꞌi pe̱ꞌtsi näꞌä xa mäjuäni rä te.

²¹ Rä Noya Äjuä xikägihu̱: «Mihi näꞌä xa mäjuäni  rä te» (1 Timoteo 6:19, TNM). Näꞌä rä te ma gä pe̱ꞌtsihu̱ pa xudi ndämäni, geꞌä «xa mäjuäni rä te» no̱ni rä Mäkä Tꞌofo. Nuꞌmu̱ xkä ꞌmu̱ihu̱ nsinke rä tsꞌoki, ma gä pe̱ꞌtsihu̱ nꞌa rä te xa mähotho ja ngu mi ne Äjuä dende ri mu̱di. Xti Uädri nunä Xiꞌmhai, nuju̱ ma gä pe̱ꞌtsihu̱ rä nzaki, rä johya ꞌne nꞌa rä hogä mꞌu̱i. Nuꞌmu̱ hää ma gä pe̱ꞌtsihu̱ «näꞌä xa mäjuäni rä te», nꞌa rä te pa nzäntho (1 Timoteo 6:12). ¡Nuju̱ di pe̱ꞌtsihu̱ nꞌa rä humu̱i xa mähotho pa xudi ndämäni!

22. ¿Hanja dä za gä pe̱ꞌtsihu̱ «näꞌä xa mäjuäni rä te»?

²² ¿Hanja dä za gä pe̱ꞌtsihu̱ «näꞌä xa mäjuäni rä te»? Änte de xä mängä nuya yä noya, rä apostol Pablo bi ꞌñembäbi nuꞌu̱ yä kristianu ge mähyoni «dä yꞌo̱tꞌe xä ñho ꞌne xa dä me̱fi ndunthi yä hogä ꞌme̱fi» (1 Timoteo 6:18). Mu̱ di ne gä hänihu̱ näꞌä rä te, mähyoni gä pe̱fihu̱ ha mä mꞌu̱ihu̱ nuꞌu̱ yä tsꞌofo xtä pädihu̱ ha rä Mäkä Tꞌofo. Pe, ¿ho̱nse̱ po gä pe̱fihu̱ yä hogä tꞌo̱tꞌe ma gä tähähu̱ «näꞌä xa mäjuäni rä te»? Hinä, ngeꞌä näꞌä rä mꞌu̱i di to̱ꞌmihu̱ pa xudi ndämäni ma gä hänihu̱ po «rä ñhojäꞌi» ꞌne rä nhuekäte Äjuä (Romanos 5:15). Rä Zi Dada Jeoba xa di ho dä umbäbi yä jäpi nuꞌu̱ toꞌo pe̱päbi ꞌne o̱te nzäntho. Näꞌä ne ge nuꞌi gi pe̱ꞌtsi «näꞌä xa mäjuäni rä te». Hää, nꞌa rä te pa nzäntho habu̱ ma gi ꞌmu̱i temäꞌentho ꞌne ko ndunthi rä johya. Geꞌä rä te to̱ꞌmi dä me̱ꞌtsi gatꞌho nuꞌu̱ toꞌo hingi he̱gi näꞌä rä mhäte xä rꞌakägihu̱ Äjuä.

23. ¿Por hanja xa mähyoni hingä he̱gihu̱ näꞌä rä mhäte xä rꞌakägihu̱ Äjuä?

²³ Dä hogi ge kada nꞌa de gekhu̱ gä ñꞌanise̱hu̱: «¿Di xo̱kämbeni Äjuä ja ngu di mändagihu̱ ha rä Mäkä Tꞌofo?». Mu̱ hyaxtho di o̱tꞌehu̱ ntsꞌe̱di po gä pe̱fihu̱  njabu̱, nuꞌmu̱ dä za gä mäñhu̱ ge di yꞌohu̱ ha näꞌä rä ꞌñuu xä ñho. Nuju̱ di pädihu̱ xä ñho ge rä Zi Dada Jeoba geꞌä mä ntakihu̱. Rä Zi Dada Jeoba ma dä su rä hnini de nuꞌu̱ yä xuñha ꞌne de nuꞌu̱ yä tsꞌo tꞌo̱tꞌe ja ha nuya yä gäxä pa di ꞌmu̱hu̱. ꞌNehe ma dä gu̱nkägihu̱ asta gä ku̱tꞌihu̱ ha näꞌä rꞌayꞌo xiꞌmhai xä ꞌñepu̱ mänꞌitꞌho. ¿Xkä imäjinä hängu rä johya ma gä pe̱ꞌtsihu̱ xkä ꞌmu̱hu̱ni ha rä rꞌayꞌo xiꞌmhai? ¡Hingä ma gä arrepentihu̱ de xtä huahnihu̱ gä pe̱päbihu̱ Äjuä ha nuya yä gäxä pa! Mu̱ nuꞌi gi huahni gi pe̱fi näꞌä xä ñho dende nubye̱, ma gi pe̱ꞌtsi pa nzäntho «näꞌä xa mäjuäni rä te» ja ngu mi ne rä Zi Dada Jeoba dende ri mu̱di.