1, 2. a) ¿Por hanja nꞌa rä däta nsu gä xatuäbihu̱ Äjuä? b) ¿Por hanja mähyoni gä pädihu̱ te udi rä Mäkä Tꞌofo de rä sadi?

MU̱ GÄ ntso̱ꞌmihu̱ de gatꞌho nuꞌu̱ yä tso̱o̱ bi ja ha mähetsꞌi, ma gä dahu̱ ngue̱nda ge rä Xiꞌmhai geꞌä rä planeta mänꞌa xa rä zi tꞌu̱ki. ꞌNe pa rä Zi Dada Jeoba, «näꞌä toꞌo bi hyoki mähetsꞌi ꞌne rä xiꞌmhai», gatꞌho yä dähni ꞌñenä nꞌa zi gota rä dehe mbo ha nꞌa rä bote (Salmo 115:15; Isaías 40:15). Rä Mäkä Tꞌofo enä: «Jeoba ꞌmu̱i getbu̱ de nuꞌu̱ toꞌo bäntebi, de gatꞌho nuꞌu̱ di bäntebi ja ngu di hoꞌä. Umbäbi näꞌä ne nuꞌu̱ toꞌo pe̱ꞌspäbi nꞌa rä hogä ntsu; Näꞌä o̱tsꞌe nuꞌu̱ zoni adi rä mfatsꞌi» (Salmo 145:18, 19). ¿Hänge xa mähotho nuya yä noya? Näꞌä rä Hyokäte mänꞌa xa ja rä tsꞌe̱di de gatꞌho rä Xiꞌmhai, ꞌmu̱i getbu̱ de gekhu̱ “nuꞌmu̱ di nzofohu̱ ko ngatꞌho mä korasohu̱”. ¡Xa nꞌa rä däta nsu gä kuatꞌihu̱ Äjuä po mäde de rä sadi!

² Mu̱ di nehu̱ ge rä Zi Dada Jeoba dä yꞌo̱de mä sadihu̱, mähyoni gä xatuäbihu̱ ja ngu di hoꞌä. Pe, ¿hanja dä za gä jahu̱ mu̱ hindi pädihu̱ te udi rä Mäkä Tꞌofo de rä sadi? Mähyoni gä pädihu̱, ngeꞌä po mäde de rä sadi nuju̱ dä za gä kuatꞌihu̱ ko rä Zi Dada Jeoba.

3. Mää te mä däta raso di pe̱ꞌtsihu̱ pa gä xatuäbihu̱ Jeoba.

³ Mähyoni gä pe̱fihu̱ njabu̱ po nunä däta raso: rä Zi Dada Jeoba geꞌä di mbitagihu̱ gä xatuäbihu̱. Rä Noya Äjuä enä: «Ote gi turimu̱ihu̱. Näꞌä gi yꞌo̱thu̱, pa gatꞌho yä tꞌo̱tꞌe xatuäbihu̱ ꞌne bäntebihu̱. Umbäbihu̱ njamädi mientra gi japäbihu̱ dä bädi Äjuä näꞌä gi ne gi yꞌaphu̱; ꞌne näꞌä rä tsaya uni ꞌne täpäbi gatꞌho yä mfeni, geꞌä ma dä su ri korasohu̱ ꞌne ri mfenihu̱ po mäde de Ñhesukristo» (Filipenses 4:6, 7, TNM). ¡Hängu di jamädibihu̱ näꞌä rä Däta Tsꞌu̱tꞌhui de gatꞌho rä Xiꞌmhai, ngeꞌä di mbitagihu̱ gä xatuäbihu̱!

4. ¿Por hanja gä xatuäbihu̱ rä Zi Dada Jeoba di japi dä te mä ntsitsꞌihu̱ kongeꞌä?

⁴ Ja mä nꞌa rä raso pa gä xatuäbihu̱ rä Zi Dada Jeoba: mä ntsitsꞌihu̱ kongeꞌä mänꞌa ma dä te. Ja ngu rꞌa yä hogä amigo, hingi ñä ho̱nse̱ nuꞌmu̱ te di japäbi mꞌe̱di. Nuꞌu̱ nzäntho tuyämu̱i nꞌa ngu mänꞌaa ꞌne mää näꞌä di mbeni, yä dumu̱i ꞌne yä johya. Njabu̱ thogi ko näꞌä rä ntsitsꞌi di pe̱ꞌtsihu̱ ko rä Zi Dada Jeoba. Ko rä mfatsꞌi nunä mfistꞌofo, nuꞌi ya xkä pädi te udi rä Mäkä Tꞌofo de rä Zi Dada Jeoba, te nguꞌä rä mꞌu̱i, ꞌne näꞌä ma dä me̱fi pa xudi ndämäni. ꞌNehe ya xkä pädi ge Äjuä xa mäjuäni ꞌmu̱i. Pe, mänꞌa ma dä te ri ntsitsꞌi kongeꞌä mu̱ nuꞌi gi xipäbi näꞌä gi mbeni, näꞌä gi tsa ꞌne gatꞌho näꞌä ja ha ri koraso. Hää, geꞌä ma dä maxꞌäꞌi gi kuatꞌi kongeꞌä (Santiago 4:8).

5. ¿Hanja di pädihu̱ ge rä Zi Dada Jeoba hingi o̱de gatꞌho yä sadi?

⁵ ¿O̱de rä Zi Dada Jeoba gatꞌho yä sadi? Hyandi te bi xipäbi nuꞌu̱ yä tsꞌo yꞌo̱de gä israelita bi mꞌu̱i ha yä pa  rä profeta Isaías: «Mäske gi jahu̱ xa ndunthi yä sadi, nuga hindi o̱de; ri yꞌe̱hu̱ xä ñutsꞌi ko yä ji» (Isaías 1:15). Hänge mu̱ nuju̱ hindi ꞌmu̱ihu̱ ja ngu di mända Äjuä, nuꞌmu̱ näꞌä hingä ma dä yꞌo̱de mä sadihu̱. Po rängeꞌä, pa dä yꞌo̱de mä sadihu̱ mähyoni gä kumplihu̱ ko näꞌä adi. Ma gä handihu̱ hñuu de gehya.

6. Mu̱ di nehu̱ ge Äjuä dä yꞌo̱de mä sadihu̱, ¿te mähyoni gä pe̱ꞌtsihu̱ ꞌne hanja ma gä udihu̱?

⁶ Nꞌaa, xa mähyoni gä pe̱ꞌtsihu̱ rä jamfri (hñeti Marcos 11:24). Rä apostol Pablo bi yꞌofo: «ꞌNehe, mu̱ hindi pe̱ꞌtsihu̱ rä jamfri, Äjuä hindä za dä numäñhogihu̱. Ngeꞌä toꞌo honi Äjuä pe̱ꞌtsi te dä gamfri ge näꞌä ꞌmu̱i, ꞌne ge umbäbi nꞌa rä thähä nuꞌu̱ toꞌo honiꞌä ko ngatꞌho yä koraso» (Hebreos 11:6, TNM). Pe näꞌä rä jamfri xa mäjuäni, hingä ho̱nse̱ ri bo̱ni gä pädihu̱ ge ꞌmu̱i Äjuä ꞌne ge o̱de ꞌne thädi mä sadihu̱. Rä jamfri di nheki ko näꞌä di pe̱fihu̱. Nuju̱ ma gä udihu̱ rä jamfri po mäde de näꞌä rä mꞌu̱i di pe̱ꞌtsihu̱ (Santiago 2:26).

7. a) ¿Por hanja mähyoni gä nzofohu̱ rä Zi Dada Jeoba ko rä tꞌekꞌei? b) ¿Hanja di udihu̱ ge hindi ñꞌetsꞌihu̱ ꞌne ge di xatuäbihu̱ Äjuä ko ngatꞌho mä korasohu̱?

 ⁷ Yoho, mähyoni gä xatuäbihu̱ rä Zi Dada Jeoba ko ngatꞌho mä korasohu̱ ꞌne hingä ñꞌetsꞌihu̱. ¿Ja nꞌa raso pa gä ñꞌetsꞌihu̱ nuꞌmu̱ di ñähu̱ ko Äjuä? Hinä. Ja ngu nuꞌmu̱ nꞌa rä jäꞌi ñäui nꞌa rä ndä o nꞌa presidente, ¿hänge di nzofo ko ndunthi rä tꞌekꞌei ngeꞌä pädi ge nuꞌu̱ ja yä nsu? Hänge nuꞌmu̱ di nzofohu̱ rä Zi Dada Jeoba mänꞌa xa mähyoni gä jahu̱ ko ndunthi rä tꞌekꞌei (Salmo 138:6). Ngeꞌä näꞌä geꞌä rä «Zi Dada Näꞌä pe̱ꞌtsi Gatꞌho rä tse̱di» (Génesis 17:1). Nuꞌmu̱ di xatuäbihu̱ Äjuä, ri ꞌñehe gä nzofohu̱ ko rä tꞌekꞌei pa gä udihu̱ ge näꞌä xa ja rä nsu ꞌne ge nuju̱ hinte rä me̱kägihu̱. Mähyoni hingä ñꞌetsꞌihu̱ ꞌne gä xatuäbihu̱ Äjuä ko ngatꞌho mä korasohu̱ ꞌne hingä repetihu̱, nixi hingä hetihu̱ ha nꞌa rä he̱ꞌmi nuꞌu̱ yä noya di xipäbihu̱ ha mä sadihu̱ (Mateo 6:7, 8).

8. ¿Hanja dä za gä udihu̱ ko näꞌä di pe̱hu̱ ge di nehu̱ ge Jeoba dä yꞌo̱de mä sadihu̱?

⁸ Hñuu, mähyoni gä o̱tꞌehu̱ gatꞌho näꞌä dä za, po gä pe̱fihu̱ ja ngu di adihu̱ ha mä sadihu̱. Ngu nuꞌmu̱ di embäbihu̱ Jeoba «rꞌakhe te gä tsihe», nuju̱ pe̱ꞌtsi te gä o̱thu̱ ntsꞌe̱di po gä tinihu̱ nꞌa rä ꞌme̱fi näꞌä dä za gä jahu̱ (Mateo 6:11; 2 Tesalonicenses 3:10). ꞌNehe, mu̱ di apäbihu̱ rä mfatsꞌi pa hingä tagihu̱ ha nꞌa rä tsꞌoki, pe̱ꞌtsi te gä ꞌuegehu̱ de nuꞌu̱ yä tentasio dä za dä jakägihu̱ gä tagihu̱ ha näꞌä rä tsꞌokiꞌä (Colosenses 3:5). Ya dä pädihu̱ hñuu de nuꞌu̱ yä tꞌo̱tꞌe mähyoni gä pe̱fihu̱ pa njabu̱ Jeoba dä yꞌo̱de mä sadihu̱. Pe tobe ja rꞌa yä ntꞌani de rä sadi nuꞌu̱ mähyoni gä pädihu̱ yä mpengi.

9. ¿Toꞌo ri ꞌñehe gä xatuäbihu̱, ꞌne po mäde de toꞌo?

⁹ ¿Toꞌo ri ꞌñehe gä xatuäbihu̱? Rä Hesu bi ꞌñuti yä  de̱ni dä xadi njaua: «Mä Zi Dadaꞌihe gi ꞌmu̱i mähetsꞌi» (Mateo 6:9). Po rängeꞌä, mähyoni gä xatuäbihu̱ ho̱nse̱ rä Zi Dada Jeoba. Pe näꞌä ne ge nuju̱ gä pädihu̱ näꞌä rä nsu pe̱ꞌtsi Ñhesukristo, näꞌä rä rꞌa Tꞌu̱. Ja ngu dä handihu̱ ha Rä ntheke 5 de nunä mfistꞌofo, Jeoba bä pe̱hni rä Hesu nuua ha rä Xiꞌmhai pa bi uni rä te ꞌne njabu̱ bi ñängägihu̱ de rä tsꞌoki ꞌne rä du (Juan 3:16; Romanos 5:12). ꞌNehe bi hñutsꞌi de gä Däta Majhä ꞌne de gä Nzaya (Juan 5:22; Hebreos 6:20). Hänge po rängeꞌä, rä Mäkä Tꞌofo xikägihu̱ ge gä xatuäbihu̱ Äjuä po mäde de Ñhesukristo. Näꞌä bi ꞌñenä: «Nuga go gekägi drä ꞌñuu, ꞌne drä mäjuäni, ꞌne drä te. Hinto dä za dä ehe ko mä Dada, ho̱nse̱ po mäde de geki» (Juan 14:6, TNM). Pa dä tꞌo̱de mä sadihu̱, mähyoni gä xatuäbihu̱ ho̱nse̱ rä Zi Dada Jeoba po mäde de rä Tꞌu̱.

10. ¿Te mä tꞌo̱tꞌe mänꞌa xa mähyoni nuꞌmu̱ di xatuäbihu̱ Jeoba?

¹⁰ ¿Hanja gä jahu̱ mä yꞌe̱hu̱ o mä ndoyꞌohu̱ nuꞌmu̱ di xatuäbihu̱ Äjuä? Rä Zi Dada Jeoba hingi xikägihu̱ ndunthi de geꞌä. Pe rä Mäkä Tꞌofo udi ge nuju̱ dä za gä huahnihu̱ mu̱ di ne gä hudihu̱, gä ntsꞌoꞌmihu̱, gä ndandiñähmuhu̱ o gä ꞌmaihu̱ ora ma gä xatuäbihu̱ Jeoba (1 Crónicas 17:16; Nehemías 8:6; Daniel 6:10; Marcos 11:25, TNM). Pe, ¿gi pädi? Mänꞌa xa mähyoni gi xatuäbi Jeoba ko ngatꞌho ri koraso, hingä näꞌä hanja ma gi ja ri yꞌe̱ o ri ndoyꞌo ho̱nse̱ pa dä hyantꞌäꞌi yä jäꞌi. Hindi mporta habu̱ di yꞌohu̱, nuju̱ dä za gä xatuäbihu̱ Äjuä, ngu nuꞌmu̱ di pe̱fihu̱ mä mändadohu̱ o nuꞌmu̱ di thogihu̱ nꞌa rä xuñha näꞌä hingä ndi to̱ꞌmihu̱. Rä Zi Dada Jeoba dä za dä yꞌo̱de asta nuꞌu̱ yä sadi di jahu̱ ha mä mfenihu̱ (Nehemías 2:1-6).

11. ¿Te mä tꞌo̱tꞌe dä za gä apäbihu̱ Äjuä ha mä sadihu̱?

¹¹ ¿Te dä za gä xipäbi Äjuä ha mä sadihu̱? Rä Mäkä  Tꞌofo enä: «ꞌNe nuju̱ dyä gamfrihu̱ dä za gä aphu̱ Äjuä näꞌä gä ne gä aphu̱, ꞌne nuꞌmu̱ geꞌä rä pahaꞌä [o bolunta], nuꞌmu̱ dä yꞌo̱de mä ntꞌadihu̱» (1 Juan 5:14). Po geꞌä, dä za gä adihu̱ ha mä sadihu̱ gatꞌho nuꞌu̱ yä tꞌo̱tꞌe hindi nkontraui rä bolunta Äjuä. ¿Xä ñho gä xipäbihu̱ de nuꞌu̱ yä dumu̱i di pe̱ꞌtsihu̱? ¡Hää! Nuꞌmu̱ di xatuäbihu̱ Äjuä, ꞌñenä di ñähu̱ ko nꞌa mä amigohu̱. Dä za gä xipäbihu̱ näꞌä ja ha mä korasohu̱ o gatꞌho näꞌä di mbenihu̱ (Salmo 62:8). ꞌNehe, dä hogi gä apäbihu̱ ge dä maxkägihu̱ ko rä mäkä tsꞌe̱di pa gä pe̱fihu̱ näꞌä xä ñho (Lucas 11:13). Mähyoni gä apäbihu̱ ge dä gu̱nkägihu̱ pa gä huahnihu̱ xä ñho näꞌä ma gä pe̱hu̱ ꞌne ge dä maxkägihu̱ pa gä ze̱tihu̱ yä xuñha (Santiago 1:5). Nuꞌmu̱ di o̱tꞌehu̱ nꞌa rä tsꞌoki, dä za gä apäbihu̱ Äjuä ge dä punꞌgägihu̱ po mäde de näꞌä rä te bi uni rä Hesu (Efesios 1:3, 7). Pe hingä ma gä xatuäbihu̱ Äjuä ho̱nse̱ po nuju̱. ꞌNehe, mähyoni gä adihu̱ po märꞌa yä zi jäꞌi, po mä familiahu̱ ꞌne po mä kuhu̱ (Hechos 12:5; Colosenses 4:12).

12. ¿Hanja ma dä ꞌñudi nuꞌu̱ mä sadihu̱ ge pa gekhu̱ mänꞌa xa mähyoni nuꞌu̱ yä tꞌo̱tꞌe di nsunda rä Zi Dada Jeoba?

¹² Nuꞌu̱ yä tꞌo̱tꞌe di nsunda rä Zi Dada Jeoba, geꞌu̱ mänꞌa xa mähyoni gä adihu̱ mꞌe̱tꞌo ha mä sadihu̱. Nuju̱ di pe̱ꞌtsihu̱ ndunthi yä raso pa gä nsundahu̱ ko ngatꞌho mä korasohu̱ ꞌne gä umbäbihu̱ njamädi ngeꞌä xa rä hojäꞌi kongekhu̱ (1 Crónicas 29:10-13). Rä Hesu bi ꞌñudi te mä tꞌo̱tꞌe ri ꞌñehe gä adihu̱ ha mä sadihu̱. Rä Hesu bi yꞌadi drä nsunda ꞌne dä ꞌme̱ꞌspäbi rä tꞌekꞌei rä mäkä thuhu Äjuä (hñeti Mateo 6:9-13, TNM). ꞌNepu̱, bi yꞌadi dä ehe rä Tsꞌu̱tꞌhui Äjuä, ꞌne ge dä tꞌo̱tꞌe rä bolunta nuua ha rä Xiꞌmhai ja ngu bi tꞌo̱tꞌe ha mähetsꞌi. Ha nunä sadi, di handihu̱ ge rä Hesu mꞌe̱tꞌo bi yꞌadi  nuꞌu̱ yä tꞌo̱tꞌe di nsunda rä Zi Dada Jeoba, ꞌnepu̱ ja bi yꞌadi märꞌa yä tꞌo̱tꞌe. Mu̱ nuju̱ ꞌnehe mꞌe̱tꞌo di adihu̱ ha mä sadihu̱ nuꞌu̱ yä tꞌo̱tꞌe di nsunda Äjuä, ma gä udihu̱ ge hindi honihu̱ mä ñhose̱hu̱.

13. ¿Hängu di debe dä dura mä sadihu̱?

¹³ ¿Hängu di debe dä dura mä sadihu̱? Rä Mäkä Tꞌofo hingi xikägihu̱ hängu ri ꞌñehe dä dura nuꞌu̱ yä sadi di jase̱hu̱ o ko märꞌaa. Ja ngu nuꞌu̱ yä sadi di jahu̱ änte de gä ñunihu̱, hindi dura ndunthi. Pe nuꞌmu̱ di xatuäbihu̱ Äjuä pa di xipäbihu̱ näꞌä ja ha mä korasohu̱, mänꞌa xa di dura (1 Samuel 1:12, 15). Rä Hesu bi kondenä nuꞌu̱ yä nda ñꞌetsꞌi gä fariseo ngeꞌä xa mi ho dä ja yä sadi nuꞌu̱ xa mi dura pa xä hyandi yä jäꞌi (Lucas 20:46, 47). Pe, pa rä Zi Dada Jeoba hinte mi ja yä muui. Pa Jeoba, mänꞌa xa mähyoni gä xatuäbihu̱ ko ngatꞌho mä korasohu̱. Po rängeꞌä, hingä mähye̱gi näꞌä tiempo ma dä dura mä sadihu̱, ngeꞌä kada nꞌa rä pa, rꞌa nꞌañꞌo näꞌä di thogihu̱ ꞌne näꞌä jakhu̱ mꞌe̱di.

14. ¿Te ne dä mää rä Mäkä Tꞌofo nuꞌmu̱ xikägihu̱ «yꞌapäbi Äjuä nzäntho» o «mä pa rä xui apäbi Äjuä», ꞌne por hanja nꞌa rä däta jäpi?

¹⁴ ¿Hängu mꞌiki ri ꞌñehe gä xatuäbihu̱ Äjuä? Rä Mäkä Tꞌofo xikägihu̱: «Yꞌapäbi Äjuä nzäntho», «ogi tsayahu̱ gi yꞌaphu̱ Äjuä», «mä pa rä xui apäbi Äjuä» (Lucas 18:1; Romanos 12:12; 1 Timoteo 5:5). Nuya yä noya hingi ne dä mää ge ma gä xatuäbihu̱ Äjuä de gä pa ꞌne de gä xui nsinke gä tsayahu̱. Näꞌä xikägihu̱, ge mähyoni gä xatuäbihu̱ rä Zi Dada Jeoba pa gä umbäbihu̱ njamädi ngeꞌä rä hojäꞌi. ꞌNehe pa gä apäbihu̱ ge dä gu̱nkägihu̱, dä hubgä mä mu̱ihu̱ ꞌne dä rꞌakägihu̱ näꞌä rä tsꞌe̱di di jakägihu̱ mꞌe̱di. Xa nꞌa rä däta jäpi ngeꞌä rä Zi Dada Jeoba, he̱gägihu̱ gä xatuäbihu̱ nzäntho ꞌne ora go gä nehu̱. Mu̱ di handihu̱ ko ndunthi rä muui näꞌä rä nsu  di pe̱ꞌtsihu̱ de gä ñähu̱ ko mä Zi Dadahu̱ Jeoba, nuꞌmu̱ ma gä probechahu̱ pa njatꞌä gä xatuäbihu̱.

15. ¿Por hanja pe̱ꞌtsi te gä eñhu̱ «geꞌä dä njabu̱» xti uadi nꞌa rä sadi?

¹⁵ ¿Por hanja pe̱ꞌtsi te gä eñhu̱ «amén» nuꞌmu̱ di huadi mä sadihu̱? Nunä noya ri bo̱ni «xa mäjuäni» o «geꞌä dä njabu̱». Rä Mäkä Tꞌofo no̱ni rꞌa yä ejemplo nuꞌu̱ udi ge xä ñho gä eñhu̱ «amén» o «geꞌä dä njabu̱» ha nuꞌu̱ yä sadi di jase̱hu̱ o ko märꞌaa (1 Crónicas 16:36; Salmo 41:13). Nuꞌmu̱ di eñhu̱ «geꞌä dä njabu̱» o «amen» mꞌe̱fa de gä xatuäbihu̱ Äjuä, di udihu̱ ge näꞌä dä mäñhu̱ bi bo̱ni dende ha mä korasohu̱. Pe mu̱ di eñhu̱ «geꞌä dä njabu̱» o «amen» ora xti uadi nꞌa rä ku de dä ja nꞌa rä sadi po gekhu̱, di udihu̱ ge di ꞌmu̱hu̱ de acuerdo ko näꞌä bi yꞌadi ha näꞌä sadiꞌä (1 Corintios 14:16, TNM).

16. ¿Te mähyoni gä kamfrihu̱ nuꞌmu̱ di xatuäbihu̱ Äjuä?

¹⁶ ¿Xa mäjuäni thädi Jeoba mä sadihu̱? ¡Hää! Ja ndunthi yä raso pa gä kamfrihu̱ ge Jeoba, näꞌä rä «Yꞌo̱de de yä sadi», thädi yä sadi de nuꞌu̱ yä miyontho yä jäꞌi xatuäbi ko ngatꞌho yä koraso (Salmo 65:2). ꞌNe Jeoba thädi mä sadihu̱ de rꞌa nꞌañꞌo yä forma o manera.

17. ¿Por hanja dä za gä mäñhu̱ ge Jeoba di usa yä e̱nxe̱ ꞌne yä ꞌme̱go pa thädi yä sadi yä jäꞌi?

¹⁷ Rꞌabu̱, rä Zi Dada Jeoba di usa yä e̱nxe̱ ꞌne yä ꞌme̱go pa thädi yä sadi yä jäꞌi (Hebreos 1:13, 14). Ndunthi yä jäꞌi xä xatuäbi Äjuä pa dä matsꞌi dä ntiende rä Mäkä Tꞌofo, ꞌne hingä ndunthi rä tiempo xä thogi nuꞌmu̱ nꞌa rä testigo rä Jeoba xä zo̱ni ha yä nguu pa dä matsꞌi. Nuꞌu̱ yä thogi, udi ge yä e̱nxe̱ geꞌu̱ di gu̱tꞌi rä ꞌñuu ha näꞌä ꞌme̱fi de dä tꞌungä ntꞌo̱de de rä Tsꞌu̱tꞌhui Äjuä (Apocalipsis [Revelación] 14:6). ꞌNehe, nuꞌmu̱ di thogihu̱ yä xuñha ꞌne di honihu̱ rä mfatsꞌi rä Zi Dada Jeoba, näꞌä  faxkägihu̱ po mäde de nꞌa rä kristianu (Proverbios 12:25; Santiago 2:16).

18. ¿Hanja di usa Jeoba rä mäkä tsꞌe̱di ꞌne rä Mäkä Tꞌofo pa thädi nuꞌu̱ yä sadi o̱tꞌe yä ꞌme̱go?

¹⁸ ꞌNehe, rä Zi Dada Jeoba di usa rä espiritu santo o rä mäkä tsꞌe̱di ꞌne rä Mäkä Tꞌofo pa thädi nuꞌu̱ yä sadi o̱tꞌe yä ꞌme̱go. Ngu nuꞌmu̱ di thogihu̱ yä xuñha ꞌne di apäbihu̱ rä mfatsꞌi pa gä ze̱tihu̱, näꞌä dä za dä gu̱nkägihu̱ ꞌne dä maxkägihu̱ po mäde de rä mäkä tsꞌe̱di  (2 Corintios 4:7). ꞌNe nuꞌmu̱ di xatuäbihu̱ pa dä maxkägi gä huahnihu̱ gä pe̱fihu̱ näꞌä xä ñho, ndunthi yä mꞌiki thädi po mäde de rä Mäkä Tꞌofo. Zäi ge rꞌabu̱ dä za gä tiñhu̱ rꞌa yä testo nuꞌmu̱ di nxadihu̱ rä Mäkä Tꞌofo, o nuꞌmu̱ di hetihu̱ nuꞌu̱ yä he̱ꞌmi di rꞌakägihu̱ rä hnini Äjuä ja ngu nunä mfistꞌofo. ꞌNehe nuꞌmu̱ di ntinihu̱ ha yä mhuntsꞌi, dä za dä fengägihu̱ rꞌa yä testo nuꞌu̱ dä za dä maxkägihu̱, o nuꞌmu̱ nꞌa rä ansiano di rꞌakägihu̱ nꞌa rä tsꞌofo, ngeꞌä turämu̱i po gekhu̱ (Gálatas 6:1).

19. ¿Te mähyoni gä benihu̱ mu̱ rꞌabu̱ di hanthu̱ ge Äjuä ngu hingi thädi mä sadihu̱?

¹⁹ Rꞌabu̱, ꞌñenä ge Jeoba hingi thädi nguntꞌä mä sadihu̱. Pe hingä po rängeꞌä ma gä mbenihu̱ ge hingi tsa dä dädi. Pe̱ꞌtsi te gä beñhu̱ ge Jeoba thädi yä sadi ja ngu rä boluntaꞌä, ꞌne ora go dä hyandi ge di ja mꞌe̱di dä dädi. Näꞌä pädi mänꞌa xä ñho ke gekhu̱ te di jakhu̱ mꞌe̱di, ꞌne ma dä rꞌakhu̱ näꞌä di hoñhu̱. Ndunthi yä mꞌiki, rä Zi Dada Jeoba he̱gi ge gä sigi gä “aphu̱” ꞌne gä sigi gä “hoñhu̱” ja ngu nuꞌmu̱ di zu̱ntꞌihu̱ o di tokahu̱ nꞌa rä goxthi (Lucas 11:5-10). Mu̱ gä jahu̱ njabu̱, ma gä udihu̱ hängu rä jamfri di pe̱ꞌspäbihu̱ ꞌne hängu di nehu̱ näꞌä di adihu̱. Rꞌabu̱, hindi dahu̱ ngue̱nda hanja Jeoba thädi mä sadihu̱. Ja ngu nuꞌmu̱ di pe̱ꞌtsihu̱ nꞌa rä xuñha, zäi ge hixtä dahu̱ ngue̱nda ge Jeoba ya  xä rꞌakhu̱ rä tsꞌe̱di pa gä ze̱tihu̱ mäske hinxä hñäki näꞌä xuñhaꞌä (hñeti Filipenses 4:13, TNM).

20. ¿Por hanja di ne gä probechahu̱ näꞌä däta nsu di pe̱ꞌtsihu̱ de gä xatuäbihu̱ Jeoba?

²⁰ ¡Xa di jamädibihu̱ ndunthi näꞌä rä Hyokäte de mähetsꞌi ꞌne rä Xiꞌmhai, ngeꞌä ꞌmu̱i getbu̱ de gatꞌho nuꞌu̱ toꞌo di xatuäbi ja ngu neꞌä! (Hñeti Salmo 145:18.) ¿Hänge di ne gä probechahu̱ nunä däta nsu di pe̱ꞌtsihu̱ de gä xatuäbihu̱ rä Zi Dada Jeoba? Mu̱ gä jahu̱ njabu̱, ma gä pe̱ꞌtsihu̱ ndunthi rä johya de gä handihu̱ hanja di te mä ntsitsꞌihu̱ ko Jeoba, näꞌä rä Zi Dada o̱de yä sadi.