Rä Adan ꞌne rä Eba bi me̱ꞌtsi yä bätsi, ꞌne njabu̱ bi xändi yä jäꞌi ha rä Xiꞌmhai. Mꞌe̱fa, rꞌa yä e̱nxe̱ bi mu̱di bi de̱ni rä Zithu ꞌne ya himbi ne bi yꞌo̱te Äjuä.

Nuꞌu̱ yä tsꞌo e̱nxe̱, bä käi de ha mähetsꞌi ꞌne bi njäꞌi pa bi za bi nthäti ko yä ꞌme̱hñä. Nuꞌu̱ yä bätsi bi me̱ꞌtsi, xa mi ja yä tsꞌe̱di ꞌne xa mi yä tsꞌomꞌu̱i.

Rä Xiꞌmhai bi ñudi ko nuꞌu̱ yä tsꞌomꞌu̱i jäꞌi. Rä Mäkä Tꞌofo mää ge xa xki ndunthi nuꞌu̱ yä tsꞌoki yä jäꞌi ha rä Xiꞌmhai, ꞌne ho̱nse̱ mi o ha yä mfeni dä yꞌo̱tꞌe rä ntsꞌomꞌu̱i.

Rä Noe mi rä hojäꞌi. Jeoba bi ꞌñembäbi rä Noe ge ma xpä hä nꞌa rä däta däyꞌe pa xä huati nuꞌu̱ yä tsꞌomꞌu̱i jäꞌi.

Äjuä ꞌnehe bi mändabi ge dä hyoki nꞌa rä arka, nꞌa rä däta kaha de gä zaa xä matho. Pa njabu̱ rä Noe, rä familia ꞌne yä zuꞌue xä za xä yu̱tꞌi ha näꞌä rä arka.

Rä Noe bi xipäbi nuꞌu̱ märꞌa yä jäꞌi ge ma xä zo̱ho̱ nꞌa rä däta däyꞌe, pe nuꞌu̱ yä jäꞌi himbi ne bi yꞌo̱de. Rꞌaa mi thenitho rä Noe, ha märꞌa xa bi nkue̱tho.

Mi uadi bi hyoki rä arka, rä Noe bi ꞌñetꞌi yä zuꞌue.