1. ¿Te to̱ꞌmi rä Zi Dada Jeoba de kada nꞌa rä kristianu?

 ¡HÄNGU rä johya umbäbi nꞌa rä dada ꞌne nꞌa rä nänä ora mꞌu̱i nꞌa rä zi bätsi! Pe mäske nuya yä dada senti nꞌa rä dängä mhäte po rä zi ꞌue̱ne, mu̱ dä hyandi ge hindi te ngu ri thogi yä pa ꞌne yä zänä, zäi ge xa ma dä duyämu̱i. Njabu̱ ꞌnehe rä Zi Dada Jeoba, näꞌä xa di johya ora nꞌa rä jäꞌi fu̱di pädi de geꞌä. Pe rä Zi Dada Jeoba to̱ꞌmi ge näꞌä jäꞌiꞌä dä te rä jamfri ꞌne näꞌä rä ntsitsꞌi pe̱ꞌtsi kongeꞌä. Hää, rä Zi Dada Jeoba to̱ꞌmi ge näꞌä kristianu dä te ngu nꞌa rä däta jäꞌi ꞌne hindä gohitho ngu nꞌa rä zi ꞌue̱ne (1 Cor. 14:​20, 3:1).

2. ¿Te mä ntꞌani ma gä thädihu̱?

² Ha nunä ntꞌudi di nxadihu̱, ma gä thädihu̱ nuya yä ntꞌani: ¿Te di signifika ora rä Mäkä Tꞌofo enä «däta jäꞌi»? ¿Te di debe dä me̱fi nꞌa rä kristianu pa dä ñätsꞌi rä jamfri? ¿Por hanja xa mähyoni ge nꞌa rä kristianu hindä hye̱gi de dä nxadi rä Mäkä Tꞌofo? ¿Por hanja nzäntho debe gä nsuhu̱?

¿TE DI SIGNIFIKA ORA RÄ MÄKÄ TꞌOFO ENÄ «DÄTA JÄꞌI»?

3. ¿Te di signifika ora rä Mäkä Tꞌofo enä «däta jäꞌi»?

³ Ora rä Mäkä Tꞌofo enä «däta jäꞌi», hindi signifika nꞌa rä jäꞌi näꞌä ya ja rä je̱ya. Rä noya «däta jäꞌi» ha rä idioma griego ꞌnehe dä za dä signifika nꞌa rä jäꞌi näꞌä xa tse̱di rä jamfri ꞌne pe̱ꞌtsi nꞌa rä hogä ntsitsꞌi ko rä Zi Dada Jeoba (1 Cor. 2:​6, TNM). Hänge nuju̱ di pe̱päbihu̱ rä Zi Dada Jeoba, di udihu̱ ge dyä däta jäꞌihu̱ ora di he̱gihu̱ de gä portahu̱ ngu yä tꞌu̱kä bätsi ꞌne di pe̱ꞌtsihu̱ nꞌa rä hogä ntsitsꞌi ko rä Zi Dada Jeoba. Pe mähyoni gä benihu̱ ge mäske nꞌa rä kristianu ya pe̱ꞌtsi nꞌa rä hogä ntsitsꞌi ko rä Zi Dada Jeoba, di debe dä sigi dä yꞌo̱tꞌe ntsꞌe̱di po dä tede näꞌä rä komfiansa pe̱ꞌspäbi (1 Tim. 4:15). Hindi mporta hängu nje̱ya pe̱ꞌtsi nꞌa rä kristianu, ¿hanja di nheki mu̱ xä ñätsꞌi rä jamfri o hinä?

4. ¿Hanja di nheki nꞌa rä kristianu näꞌä xä ñätsꞌi rä jamfri?

⁴ Nꞌa rä kristianu näꞌä xä ñätsꞌi rä jamfri, pe̱fi näꞌä di mända rä  Zi Dada Jeoba hingä ho̱nse̱ näꞌä di kombienebi. Mäjuäni ge gatꞌho yä kristianu yä imperfecto ꞌne rꞌabu̱ hingä geꞌä pe̱fi. Pe hää udi ge hyaxtho o̱tꞌe ntsꞌe̱di po dä mbeni ꞌne dä mꞌu̱i ja ngu di mända rä Zi Dada Jeoba (Efes. 4:​22-24). Nꞌa rä kristianu näꞌä xä ñätsꞌi rä jamfri, hingi to̱ꞌmi ge mꞌe̱tꞌo dä tꞌumbäbi nꞌa rä lista de te di debe dä me̱fi o hanja di debe dä porta. Sino ke näꞌä kristianuꞌä o̱tꞌe ngue̱nda yä mhända rä Zi Dada Jeoba ꞌne nuꞌu̱ yä tsꞌofo uni pa njabu̱ di tomä yä hogä desision (1 Cor. 9:​26, 27).

5. ¿Te pe̱fi nꞌa rä kristianu näꞌä tobe hinxä ñätsꞌi rä jamfri? (Efesios 4:​14, 15).

⁵ Pe nꞌa rä kristianu näꞌä tobe hinxä ñätsꞌi rä jamfri, pe̱fi nuꞌu̱ yä tꞌo̱tꞌe hutsꞌi en peligro näꞌä rä ntsitsꞌi pe̱ꞌtsi ko rä Zi Dada Jeoba. Por ejemplo, kamfri gatꞌho nuꞌu̱ yä notisia o̱de, di ho dä yꞌo̱de ꞌne kamfribi nuꞌu̱ yä jäꞌi hingi udi näꞌä mäjuäni de rä Mäkä Tꞌofo, o di ho dä yꞌo̱de te mää nuꞌu̱ pede yä nkꞌuamba de rä Zi Dada Jeoba ꞌne de rä hnini (hñeti Efesios 4:​14, 15). a Nuꞌu̱ yä kristianu tobe hinxä ñätsꞌi yä jamfri, yä embidioso, di ho dä hyoni yä xuñha, mäntꞌä di ofende o mäntꞌä tagi ha yä tentasio (1 Cor. 3:3).

6. ¿Te thogi änte de dä ñätsꞌi rä jamfri nꞌa rä kristianu? Mää nꞌa rä ejemplo. (Hyandi ꞌnehe yä foto).

⁶ Ja ngu ya dä handihu̱, rä Mäkä Tꞌofo udi ge tsitsꞌi rä tiempo pa njabu̱ nꞌa rä kristianu dä zo̱ho̱ dä ñätsꞌi rä jamfri. Hää, ꞌñenä nꞌa rä bätsi näꞌä rꞌamätsꞌu̱ di te asta xa di ndäta jäꞌi. Pe mientra bätsi, nuꞌu̱ yä dada go geꞌu̱ su ꞌne fatsꞌi. Por ejemplo, nꞌa rä nänä zäi ge nzäntho fatsꞌi rä zi tꞌu̱kä nxutsi dä rꞌani nꞌa rä calle. Zäi ge mipäbi rä yꞌe̱, pe ꞌnehe uti ge änte de dä rꞌani mähyoni dä hyandi xä ñho mu̱ hinxä ꞌñepu̱ yä bo̱jä. Ko rä tiempo —ngu ri te näꞌä zi nxutsi— näꞌä nänä ma dä hyopi dä rꞌanise̱, pe ma dä sigi dä bembäbi te di debe dä me̱fi. Näꞌä nänä pädi ge xti nja rä je̱ya näꞌä nxutsi, ma dä za dä rꞌanise̱ nꞌa rä calle ꞌne ma dä bädise̱ dä hyandi ꞌne dä ꞌuege de yä peligro. Njabu̱ thogi ꞌnehe ko nꞌa rä kristianu. Nuꞌu̱ yä kristianu hinxä ñätsꞌi yä jamfri, tobe japäbi mꞌe̱di rä mfatsꞌi pa dä hyandi ꞌne dä ꞌuege de yä peligro ꞌne pa dä huahni yä hogä desision. Pe nuꞌu̱ yä kristianu ya xä ñätsꞌi yä jamfri, o̱tꞌe ngue̱nda te di mända rä Zi Dada Jeoba ꞌne te mä konseho uni de nꞌa rä asunto, ꞌne geꞌä fatsꞌi pa di huahni yä hogä desision.

7. Nꞌa rä kristianu näꞌä ya xä ñätsꞌi rä jamfri, ¿signifika ge ya hingi honi rä mfatsꞌi?

⁷ Mähyoni gä benihu̱ ge nꞌa rä kristianu näꞌä ya xä ñätsꞌi rä jamfri, hindi signifika ge ya hingi  honi rä mfatsꞌi. Ma gä handihu̱ hanja hingä mähye̱gi nꞌa rä kristianu näꞌä xä ñätsꞌi rä jamfri ꞌne näꞌä hinä. Nꞌa rä kristianu näꞌä hinxä ñätsꞌi rä jamfri, nzäntho to̱ꞌmi ge märꞌaa dä xipäbi te di debe dä me̱fi o te mä desision di debe dä huahni. Pe nꞌa rä kristianu näꞌä ya xä ñätsꞌi rä jamfri, o̱tꞌe ngue̱nda näꞌä rä mfädi ꞌne nuꞌu̱ yä konseho bi ehe de nuꞌu̱ yä ku pe̱ꞌtsi ndunthi rä esperiensia. Pe ꞌnehe pädi ge go rä responsabilida dä huahni te di debe dä me̱fi. Hää, pädi xä ñho ge «kada nꞌaa ma dä ndudese̱ rä responsabilida» ante rä Zi Dada Jeoba (Gál. 6:​5, TNM).

8. ¿Por hanja hingä mähye̱gi yä mꞌu̱i gatꞌho nuꞌu̱ yä kristianu xä ñätsꞌi yä jamfri?

⁸ Gatꞌho yä däta jäꞌi hingä mähye̱gi yä hmi nixi yä mꞌai. Njabu̱ ꞌnehe nuꞌu̱ yä kristianu xä ñätsꞌi yä jamfri. Kada nꞌaa, rꞌa nꞌañꞌo rä mꞌu̱i pe̱ꞌtsi. Rꞌaa mänꞌa di nheki hängu rä mfädi pe̱ꞌtsi. Märꞌaa mänꞌa di nheki hängu rä balo pe̱ꞌtsi. Märꞌaa mänꞌa di nheki hanja di ho dä uni de näꞌä pe̱ꞌtsi pa dä matsꞌi märꞌaa. ꞌNe rꞌaa mänꞌa pädi dä yꞌo̱tsꞌe ꞌne dä komprendebi märꞌa yä ku. Hänge mähyoni gä benihu̱ ge rꞌabu̱ ma gä handihu̱ ge yoho yä kristianu nuꞌu̱ xä ñätsꞌi yä jamfri, hingä mähye̱gi rä solusio umbäbi nꞌa rä asunto. ¿Por hanja hinä? Mäjuäni ge o̱tꞌe ngue̱nda nuꞌu̱ yä konseho uni rä Mäkä Tꞌofo, pe jabu̱ rꞌa yä asunto habu̱ rä Zi Dada Jeoba hopäbi ge kada nꞌa rä kristianu dä usa rä konsiensia pa dä tomä nꞌa rä desision. Hänge nꞌa rä kristianu näꞌä xä ñätsꞌi rä jamfri, hindi kritikabi rä desision mä nꞌa rä ku. Sino ke kada nꞌaa, o̱tꞌe ntsꞌe̱di po dä nja nꞌa rä hogä ntsitsꞌi ha rä mhuntsꞌi (Rom. 14:10; 1 Cor. 1:10).

¿TE DI DEBE DÄ ME̱FI NꞌA RÄ KRISTIANU PA DÄ ÑÄTSꞌI RÄ JAMFRI?

9. ¿Di ñätsꞌise̱ rä jamfri nꞌa rä kristianu? Mää por hanja.

⁹ Ngu thogi yä pa ꞌne yä je̱ya, nꞌa rä zi ꞌue̱ne, ko rä tiempo di te, di mbäsjäꞌi ꞌne di ndäta jäꞌi. Pe nꞌa rä kristianu, hindi tese̱ nixi di ñätsꞌise̱ rä jamfri. Por ejemplo, ma gä handihu̱ te bi thogi ko nuꞌu̱ yä kristianu mi ꞌmu̱i ha Corinto. Nuyu̱ mꞌe̱tꞌo bi tꞌuti de rä Noya Äjuä, ko rä tiempo bi nxixtehe, bi hñäni rä espiritu santo rä Zi Dada Jeoba ꞌne bi bädi ndunthi de rä apostol Pablo (Hech. 18:​8-11). Pe ngu mi thogi yä pa ꞌne yä je̱ya, ndunthi de nuyu̱ yä kristianu tobe hixki ñätsꞌi yä jamfri (1 Cor. 3:2). ¿Te di debe gä pe̱fihu̱ pa hingä thogihu̱ njabu̱?

10. ¿Te di debe gä pe̱fihu̱ pa gä japäbihu̱ dä ñätsꞌi mä jamfrihu̱? (Judas 20).

¹⁰ ¿Te mähyoni gä pe̱fihu̱ pa njabu̱ gä japäbihu̱ dä ñätsꞌi mä jamfrihu̱? Mꞌe̱tꞌo mähyoni gä udihu̱ ge di nehu̱ dä ñätsꞌi mä jamfrihu̱. Rꞌa yä kristianu di porta ngu yä bätsi ꞌne hinte pe̱fi po dä japäbi dä ñätsꞌi yä jamfri (Prov. 1:22). Hindi nehu̱ gä njahu̱ ngu nuꞌu̱ mäske ya yä däta jäꞌi, hingi pädi hanja dä ndude nꞌa rä responsabilida ꞌne to̱ꞌmi ge yä dada o märꞌaa dä sigi dä matsꞌi. Hinä, nuju̱ di ne gä utihu̱ rä Zi Dada Jeoba ge dyä responsablehu̱ ꞌne ge di o̱thu̱ tsꞌe̱di po gä tedehu̱ näꞌä rä ntsitsꞌi di pe̱ꞌtsihu̱ kongeꞌä (hñeti Judas 20). Mu̱ nuꞌi tobe gi o̱tꞌe ntsꞌe̱di po gi japäbi dä te ꞌne dä ñätsꞌi ri jamfri, xatuäbi rä Zi Dada Jeoba ꞌne yꞌapäbi dä rꞌaꞌi “tanto rä ganä ngu rä tsꞌe̱di pa gi pe̱fi näꞌä di hoꞌä” (Filip. 2:​13, TNM).

11. ¿Te mä mfatsꞌi rꞌakägihu̱ rä Zi Dada Jeoba pa gä japäbihu̱ dä ñätsꞌi mä jamfrihu̱? (Efesios 4:​11-13).

¹¹ Rä Zi Dada Jeoba ne gi pädi ge ꞌmu̱i pa dä maxꞌäꞌi mu̱ tobe hinxä ñätsꞌi ri jamfri. Pa geꞌä, xä uni ndunthi yä mfatsꞌi. Näꞌä xä hñutsꞌi rꞌa yä ku ngu yä mayꞌo ꞌne yä xahnäte ha rä mhuntsꞌi nuꞌu̱ ꞌmu̱i dispuesto dä rꞌakägihu̱ rä mfatsꞌi pa gä japäbihu̱ dä ñätsꞌi mä jamfrihu̱, ꞌne pa gä de̱mbäbihu̱ yä paso rä Kristo (hñeti Efesios 4:​11-13, TNM). ꞌNehe rꞌakägihu̱ rä espiritu santo pa dä maxkägihu̱ gä pe̱ꞌtsihu̱ rä mfeni rä Kristo (1 Cor. 2:​14-16). Pe hingä ho̱nse̱ꞌä, rä Zi Dada Jeoba ꞌnehe bi mända dä tꞌofo rä mfistꞌofo Mateo, Marcos, Lucas ꞌne Juan, pa dä maxkägihu̱ gä pädihu̱ xä ñho näꞌä bi me̱fi rä Hesu nuꞌmu̱ bi mꞌu̱kua ha rä Xiꞌmhai. Mu̱ gä o̱thu̱ ntsꞌe̱di po gä mbenihu̱, gä ñähu̱ ꞌne gä ꞌmu̱ihu̱ ja ngu bi mꞌu̱i rä Kristo, ma gä udihu̱ ge xä ñätsꞌi mä jamfrihu̱.

 ¿POR HANJA XA MÄHYONI GE NꞌA RÄ KRISTIANU HINDÄ HYE̱GI DE DÄ NXADI RÄ MÄKÄ TꞌOFO?

12. ¿Te mähyoni dä bädi gatꞌho nuꞌu̱ ne dä de̱ni rä Kristo?

¹² Pa gä japäbihu̱ dä ñätsꞌi mä jamfrihu̱, hingä kombasta gä pädihu̱ de rä Kristo, de hanja to̱ꞌmi rä Zi Dada Jeoba gä arrepentihu̱, de näꞌä rä komfiansa di debe gä pe̱ꞌspäbihu̱, de rä xixtehe, ꞌne de hanja Äjuä di promete dä gu̱tsꞌi nuꞌu̱ xä du (Heb. 6:​1, 2). Mäjuäni ge gatꞌho yä kristianu di debe dä bädi nuya yä ntꞌudi. Hänge gehya nuya yä ntꞌudi bi ꞌñuti rä apostol Pedro nuꞌu̱ yä jäꞌi xki ntini ha rä Pentecostés (Hech. 2:​32-35, 38). ꞌNehe, rä apostol Pablo bi ꞌñudi ge toꞌo hingi kamfri ge rä Zi Dada Jeoba ma dä gu̱tsꞌi nuꞌu̱ xä du, ꞌñenä go di rechaza gatꞌho näꞌä bi ꞌñudi rä Kristo (1 Cor. 15:​12-14). Pe, ¿gi pädi? Rä Zi Dada Jeoba benꞌgägihu̱ ge hindi debe gä komformähu̱ ko ho̱nse̱ nuya yä ntꞌudiya.

13. ¿Te mähyoni gä pe̱fihu̱ pa njabu̱ gä benefisiahu̱ de näꞌä rä ñhuni mää Hebreos 5:14? (Hyandi ꞌnehe yä foto).

¹³ Pe ja mä nꞌa rä ñhuni pa nuꞌu̱ toꞌo ne dä japäbi dä ñätsꞌi yä jamfri. Nunä ñhuni hingä ho̱nse̱ di ñꞌoui nuꞌu̱ yä mhända rä Zi Dada Jeoba. Sino ke ꞌnehe nuꞌu̱ märꞌa yä noya ꞌne yä thogi hutsꞌi ha rä Mäkä Tꞌofo ꞌne faxkägihu̱ pa gä pädihu̱ te di mbeni ꞌne te di senti rä Zi Dada Jeoba. Pa dä za gä benefisiahu̱, mähyoni gä ꞌuekehu̱ rä tiempo pa gä nxadihu̱ rä Mäkä Tꞌofo, gä hudihu̱ gä ntso̱ꞌmihu̱ de näꞌä utkägihu̱ ꞌne gä o̱thu̱ ntsꞌe̱di po gä pe̱fihu̱ ha mä mꞌu̱ihu̱ näꞌä dä pädihu̱. Mu̱ gä pe̱fihu̱ njabu̱, geꞌä ma dä maxkägihu̱ gä pädihu̱ hanja gä huahnihu̱ yä hogä desision nuꞌu̱ di ho rä Zi Dada Jeoba (hñeti Hebreos 5:​14, TNM). b

14. ¿Hanja bi matsꞌi rä apostol Pablo nuꞌu̱ yä kristianu mi ꞌmu̱i ha Corinto pa xä hyandi ge mi debe dä japäbi dä ñätsꞌi yä jamfri?

¹⁴ Nuꞌu̱ yä kristianu tobe hinxä ñätsꞌi yä jamfri, xa di japäbi xä ñhei dä huahni nꞌa rä hogä desision. Koꞌmu̱ senti ge ha rä Mäkä Tꞌofo hingi ehe nꞌa rä tsꞌofo o nꞌa rä mhända de näꞌä rä asunto di ñhandui, mbeni ge dä za dä me̱fi näꞌä go dä ne. Rꞌaa di mbeni ge ora otho nꞌa rä mhända claro, asta adi dä thutsꞌi nꞌa rä ley mäske hindi ja mꞌe̱di. Por ejemplo, po̱de nuꞌu̱ yä kristianu mi ꞌmu̱i ha Corinto, bi yꞌapäbi rä apostol Pablo ge dä hñutsꞌi nꞌa rä mhända habu̱ dri mää mu̱ mi tsa toꞌo dä zi näꞌä rä ñhuni xki tꞌumbäbi de gä ofrenda yä idolo. Pe rä apostol Pablo himbi xipäbi te mi debe dä me̱fi kada nꞌa de geꞌu̱. Sino ke bi esplikabi  hanja kada nꞌa rä kristianu, pe̱ꞌtsi rä derecho dä me̱fi näꞌä xipäbi rä konsiensia. Pe ꞌnehe bi bembäbi rꞌa yä noya nuꞌu̱ hutsꞌi ha rä Mäkä Tꞌofo pa xä huahnise̱ nꞌa rä desision näꞌä hingä ma xä u̱mbäbi yä konsiensia nixi yä konsiensia märꞌaa (1 Cor. 8:​4, 7-9). Ja ngu di handihu̱, rä apostol Pablo bi matsꞌi nuꞌu̱ yä kristianu dä hyandi ge mi debe dä huahnise̱ yä desision. Pa geꞌä, mi debe dä usa yä mfeni pa dä bädi dä hyandi ndaꞌä xä ñho ꞌne ndaꞌä hinä, ꞌne hindä do̱ꞌmi ge märꞌaa dä xipäbi te mi debe dä me̱fi.

15. ¿Te mä mfatsꞌi bi umbäbi rä apostol Pablo nuꞌu̱ yä kristianu mi ꞌmu̱i ha Jerusalén ꞌne por hanja?

¹⁵ ꞌNehe dä za gä pädihu̱ ndunthi de näꞌä rä karta bi yꞌofo rä apostol Pablo pa nuꞌu̱ yä kristianu mi ꞌmu̱i ha Jerusalén. Rꞌa de nuyu̱ yä kristianu, ya himi o̱tꞌe ntsꞌe̱di po dä japäbi dä ñätsꞌi yä jamfri ꞌne dä te näꞌä rä ntsitsꞌi mi pe̱ꞌtsi ko rä Zi Dada Jeoba. Hänge rä apostol Pablo bi ꞌñembäbi: «Xkä yopa njahu̱ ngu yä bätsi nuꞌu̱ tsꞌu̱tho, otho yä tsꞌe̱di» (Heb. 5:12). Nuyu̱ yä kristianu himi jamäsu nixi mi asepta nuꞌu̱ yä mpadi xki uni rä Zi Dada Jeoba ha yä mhuntsꞌi (Prov. 4:18). Por ejemplo, ndunthi yä kristianu nuꞌu̱ mä mꞌe̱tꞌo myä judío, mi sigi mi mää ge mi debe drä ꞌme̱fi nuꞌu̱ yä mhända mi hutsꞌi ha rä Ley Moisés, mäske ya mi o̱tꞌe 30 yä je̱ya de xki mhää ge ya himi ja mꞌe̱di toꞌo dä me̱fi nuya yä ley, ngeꞌä ya xki ntrega rä bida rä Kristo (Rom. 10:4; Tito 1:10). Koꞌmu̱ ya xki thogi 30 yä je̱ya ꞌne nuyu̱ yä kristianu hixki asepta nuya yä mpadi, hänge rä apostol Pablo bi yꞌopäbi nꞌa rä karta pa bi umbäbi näꞌä rä mfatsꞌi mi japäbi mꞌe̱di. Näꞌä bi xipäbi rä apostol Pablo ha nunä karta, bi matsꞌi nuꞌu̱ yä kristianu pa bi ntiende, ge nubye̱ mänꞌa xmä ñho näꞌä rä modo hanja mi adi rä Zi Dada Jeoba drä so̱kämbenibi. ꞌNehe bi matsꞌi pa njabu̱ bi me̱ꞌtsi rä balo ꞌne himbi ntsu de bi sigi bi predika, mäske yä judío xa mi nkue̱ ꞌne mi u̱tsa (Heb. 10:​19-23).

¿POR HANJA NZÄNTHO DEBE GÄ NSUHU̱?

16. Mu̱ ya dä japäbihu̱ bi ñätsꞌi mä jamfrihu̱, ¿te di debe gä pe̱fihu̱ ꞌne por hanja?

¹⁶ Mu̱ ya dä japäbihu̱ bi ñätsꞌi mä jamfrihu̱, mähyoni gä sigi gä nsuhu̱, pa njabu̱ hingä tagihu̱ nixi gä pengihu̱ gä portahu̱ ngu yä tꞌu̱kä bätsi (1 Cor. 10:12). Pa geꞌä xa mähyoni ge njatꞌä gä handise̱hu̱ te di pe̱fihu̱, pa njabu̱ gä dahu̱ ngue̱nda mu̱ di jamäsuhu̱ o di deskuidahu̱ näꞌä rä ntsitsꞌi di pe̱ꞌtsihu̱ ko rä Zi Dada Jeoba (2 Cor. 13:5).

17. ¿Te utkägihu̱ näꞌä rä karta bi yꞌofo rä apostol Pablo pa nuꞌu̱ yä kristianu mi ꞌmu̱i ha Colosas?

¹⁷ Ha näꞌä rä karta bi yꞌofo rä apostol Pablo pa näꞌä rä mhuntsꞌi mi ja ha Colosas, bi bembäbi  nuꞌu̱ yä kristianu ge xa mähyoni xä japäbi xä ñätsꞌi yä jamfri ꞌne xä nsu, pa njabu̱ hinxä dagi ꞌne hinto xä hyatꞌi ko nuꞌu̱ yä ntꞌudi mi ja ha näꞌä rä tiempoꞌä (Col. 2:​6-10). Epafras —nꞌa rä kristianu näꞌä mi konose xä ñho nuꞌu̱ yä ku mi ꞌmu̱i ha Colosas— nzäntho mi xatuäbi rä Zi Dada Jeoba pa njabu̱ nuyu̱ yä ku, xä me̱fi näꞌä xä ñho (Col. 4:12). ¿Te dä za gä pädihu̱? Ge tanto rä apostol Pablo ngu Epafras, mi pädi xä ñho ge mäske nꞌa rä kristianu ya xä ñätsꞌi rä jamfri, mähyoni dä sigi dä yꞌo̱tꞌe ntsꞌe̱di ꞌne dä hyombäbi rä mfatsꞌi rä Zi Dada Jeoba. Hää, rä apostol Pablo ꞌne Epafras mi ne ge nuyu̱ yä kristianu mi ꞌmu̱i ha Colosas, xä sigi xä su näꞌä rä ntsitsꞌi mi pe̱ꞌtsi ko rä Zi Dada Jeoba mäske mi ñhandui ndunthi yä xuñha.

18. Mäske nꞌa rä kristianu ya xä ñätsꞌi rä jamfri, ¿te dä za dä thogi kongeꞌä? (Hyandi ꞌnehe rä foto).

¹⁸ Rä apostol Pablo bi mää ge mäske nꞌa rä kristianu ya pe̱ꞌtsi ndunthi rä esperiensia ꞌne ya xä ñätsꞌi rä jamfri, dä za dä ꞌme̱di näꞌä rä ntsitsꞌi pe̱ꞌtsi ko rä Zi Dada Jeoba. Hää, mu̱ nꞌa rä kristianu hindä nsu, rꞌamätsꞌu̱u̱ dä za dä me̱fi näꞌä hinxä ñho, dä za dä japäbi dä megi rä koraso ꞌne asta ya hingä ma dä hyandi ge di ja mꞌe̱di dä arrepenti ꞌne dä hyombäbi rä mpumbäte rä Zi Dada Jeoba. Pe lo bueno ge nuꞌu̱ yä kristianu mi ꞌmu̱i ha Jerusalén, tobe hixki megi yä koraso ꞌne bi zo̱päbi a tiempo nuꞌu̱ yä konseho bi yꞌopäbi rä apostol Pablo (Heb. 6:​4-9). ¿Te thogi mäpaya ko nuꞌu̱ xä hye̱gi de dä ntini ha yä mhuntsꞌi o nuꞌu̱ xrä espulsa? Mu̱ mꞌe̱fa di arrepenti, udi ge hinxä megi yä koraso. Pe hää mähyoni dä asepta näꞌä rä mfatsꞌi uni rä Zi Dada Jeoba pa dä za dä mengi mänꞌaki ha rä hnini (Ezeq. 34:​15, 16). Mu̱ nꞌa rä ku o nꞌa rä nju ya bi mengi ha rä hnini rä Zi Dada Jeoba, rꞌabu̱ yä anciano dä za dä yꞌapäbi nuꞌu̱ pe̱ꞌtsi rä esperiensia, pa dä matsꞌi dä ze̱di rä amista ko rä Zi Dada Jeoba.

19. ¿Te debe gä o̱thu̱ ntsꞌe̱di po gä lograhu̱?

¹⁹ Nuꞌi dä za gi japäbi dä ñätsꞌi ri jamfri ꞌne gi pe̱ꞌtsi nꞌa rä hogä ntsitsꞌi ko rä Zi Dada Jeoba. Pa geꞌä, sigi gi nxadi rä Mäkä Tꞌofo ꞌne ogi komformä ko näꞌä gä pädi mä mꞌe̱tꞌo. Njabu̱, ngu ri thogi yä pa, mänꞌa ma gi mbeni ja ngu di mbeni rä Zi Dada Jeoba. Pe mu̱ nuꞌi ya xä ñätsꞌi ri jamfri, sigi gi su näꞌä rä ntsitsꞌi gi pe̱ꞌtsi ko rä Zi Dada Jeoba.