Nuꞌmu̱ di hetihu̱ rä Mäkä Tꞌofo dä za gä honihu̱ mä nꞌa tu̱i rä imformäsio pa gä ntiendehu̱ xä ñho näꞌä di hetihu̱. Pe hingä ho̱nse̱ ma gä jahu̱bu̱ pa gä pe̱ꞌtsihu̱ ndunthi rä mfädi. Nuꞌmu̱, ¿te di honihu̱? Di nehu̱ gä pädihu̱ mänꞌa xä ñho tenguꞌä rä mꞌu̱i rä Zi Dada Jeoba pa njabu̱ mänꞌa gä mädihu̱. Hänge ora di hetihu̱ rä Mäkä Tꞌofo dä hogi gä ñꞌanise̱hu̱: «¿Te utkägi de rä Zi Dada Jeoba nuya yä testo di heti?».

Ora gi heti rä Mäkä Tꞌofo, dä za gi imbestiga mä nꞌa tu̱i te udi nuꞌu̱ yä testo gi heti de rä mhäte, rä mfädi, rä justisia ꞌne rä tsꞌe̱di rä Zi Dada Jeoba. Pe Näꞌä pe̱ꞌtsi märꞌa yä hogä mꞌu̱i hingä ho̱nse̱ nuya goho. ¿Ngu te mä hogä mꞌu̱iꞌu̱ ꞌne habu̱ dä za gä tinihu̱?

Ma gi tini ha rä Índice de las publicaciones Watch Tower nꞌa rä lista habu̱ hutsꞌi thogi de 50 nuꞌu̱ yä hogä mꞌu̱i pe̱ꞌtsi rä Zi Dada Jeoba. Ku̱tꞌi habu̱ enä «Jehová», ꞌnepu̱ huahni habu̱ enä «Cualidades por nombre». Ha näꞌä rä lista, hyandi te mä hogä mꞌu̱i di nthe̱e̱ ko nuꞌu̱ yä testo gi heti ꞌne hyandi näꞌä rä imformäsio ehe. Mu̱ ho̱nse̱ gi pe̱ꞌtsi rä Guía de estudio para los testigos de Jehová, ku̱tꞌi habu̱ enä «Jehová» ꞌnepu̱ habu̱ enä «Cualidades de Jehová».