1. Ora nꞌa rä kristianu o̱tꞌe nꞌa rä däta pekado, ¿te di trata dä me̱fi rä Zi Dada Jeoba?

 HA RÄ ntꞌudi pa gä nxadihu̱ 33 dä handihu̱ hanja rä apostol Pablo bi yꞌofo nꞌa rä karta pa nuꞌu̱ yä kristianu mi ꞌmu̱i ha Corinto. Ha nunä karta bi sipäbi te mi debe dä me̱fi nuꞌu̱ yä kristianu ko nꞌa rä ku näꞌä mi o̱tꞌe yä däta pekado. Koꞌmu̱ himi arrepenti, pe̱ꞌtsi te bri ju̱ki de rä mhuntsꞌi. Pe rä Mäkä Tꞌofo udi ge rä Zi Dada Jeoba trata dä matsꞌi nꞌa rä yꞌo̱tꞌä tsꞌoki pa dä arrepenti (Rom. 2:​4, TNM). ¿Hanja di usa rä Zi Dada Jeoba yä anciano pa dä trata dä matsꞌi nꞌa rä yꞌo̱tꞌä tsꞌoki dä arrepenti?

2, 3. ¿Te di debe gä pe̱fihu̱ mu̱ gä pädihu̱ ge nꞌa rä ku xä yꞌo̱tꞌe nꞌa rä däta pekado ꞌne por hanja?

² ¿Te di debe gä pe̱fihu̱ mu̱ gä pädihu̱ ge nꞌa rä kristianu xä yꞌo̱tꞌe nꞌa rä däta pekado? Pa dä za yä anciano dä umbäbi rä mfatsꞌi näꞌä yꞌo̱tꞌä tsꞌoki, mähyoni dä bädi de näꞌä asunto. Po geꞌä, dä hogi gä animäbihu̱ näꞌä yꞌo̱tꞌä tsꞌoki dä xipäbi yä anciano näꞌä xä me̱fi ꞌne dä yꞌapäbi rä mfatsꞌi (Is. 1:18; Hech. 20:28; 1 Ped. 5:2).

³ Pe, ¿xiꞌmu̱ di handihu̱ ge näꞌä kuꞌä hingi ne dä yꞌapäbi rä mfatsꞌi yä anciano? Koꞌmu̱ nuju̱ hää di nehu̱ dä tꞌumbäbi rä mfatsꞌi, hänge dä hogi go gä xipäbihu̱ yä anciano. ¿Por hanja? Ngeꞌä nuju̱ di mädihu̱ mä kuhu̱ ꞌne hindi ne gä ꞌme̱dihu̱. Pe mu̱ hindä paati rä mꞌu̱i, ma dä tsꞌoni näꞌä rä amista pe̱ꞌtsi ko rä Zi Dada Jeoba ꞌne ma dä tsꞌombäbi rä thuhu rä mhuntsꞌi. Hänge mäske dä jakägihu̱ xä ñhei, mähyoni gä ju̱hu̱ rä balo ꞌne gä xipäbihu̱ yä anciano näꞌä pe̱fi näꞌä kuꞌä. ¿Por hanja? Po näꞌä rä mhäte di pe̱ꞌspäbihu̱ rä Zi Dada Jeoba ꞌne näꞌä rä ku (Sal. 27:14).

 ¿TE MÄ MFATSꞌI UMBÄBI YÄ ANCIANO NUꞌU̱ YÄ KU O̱TꞌE NꞌA RÄ DÄTA PEKADO?

4. ¿Te ne dä logra yä anciano ora di muntsꞌi ko näꞌä rä ku xä yꞌo̱tꞌe nꞌa rä däta pekado?

⁴ Ora nꞌa rä kristianu o̱tꞌe nꞌa rä däta pekado, yä anciano de rä mhuntsꞌi mähyoni dä huahni hñuu yä anciano nuꞌu̱ pe̱ꞌtsi ndunthi rä esperiensia pa dä forma nꞌa rä comité a ꞌne dä ñäui näꞌä kuꞌä. Pe nuyu̱ yä anciano mähyoni dä beni ꞌne dä rekonose ge mäske ma dä yꞌo̱tꞌe ntsꞌe̱di po dä matsꞌi näꞌä kuꞌä pa dä arrepenti, hindä za dä obligabi dä paati rä mꞌu̱i (Deut. 30:19). Yä anciano di ntiende ge hingä gatꞌho yä yꞌo̱tꞌä tsꞌoki di jamäsu nuꞌu̱ yä konseho ja ngu bi me̱fi rä rey David (2 Sam. 12:13). Rꞌa yä yꞌo̱tꞌä tsꞌoki de plano hingi ne dä jamäsu nuꞌu̱ yä konseho bi ehe de rä Zi Dada Jeoba (Gén. 4:​6-8). Mäske yä anciano pädi ge dä za dä thogi njabu̱, nuyu̱ tobe o̱tꞌe ntsꞌe̱di po dä umbäbi rä mfatsꞌi näꞌä yꞌo̱tꞌä tsꞌoki pa xämhä dä arrepenti. ¿Te o̱tꞌe ngue̱nda nuꞌu̱ hñuu yä anciano forma näꞌä comité ora di muntsꞌi pa dä ñäui näꞌä rä ku?

5. ¿Te mä konseho debe dä yꞌo̱tꞌe ngue̱nda yä anciano ora di muntsꞌi pa dä ñäui näꞌä yꞌo̱tꞌä tsꞌoki? (2 Timoteo 2:​24-26; hyandi ꞌnehe rä kꞌoi).

⁵ Yä anciano pädi xä ñho ge näꞌä zi de̱ti xä mꞌe̱di, tobe ja ndunthi rä muui pa rä Zi Dada Jeoba (Luc. 15:​4, 6). Hänge ora yä anciano di muntsꞌi pa dä ñäui näꞌä rä yꞌo̱tꞌä tsꞌoki, hingi tsu̱i sino ke di trata ko ndunthi rä mhäte ꞌne rä ñhojäꞌi (hñeti 2 Timoteo 2:​24-26, TNM). Kada ñäui yä anciano näꞌä kuꞌä, di trata ko ndunthi rä tꞌekꞌei, rä ñhojäꞌi, rä pasensia, ꞌne huahni nuꞌu̱ yä noya dä za dä tso̱mbäbi ha rä koraso.

6. ¿Te pe̱fi rä comité de ancianos änte de dä muntsꞌi ko nꞌa rä yꞌo̱tꞌä tsꞌoki? (Romanos 2:4).

⁶ Yä anciano ꞌueke rä tiempo pa dä yꞌe̱ntꞌi ha yä mfeni ꞌne ha yä koraso näꞌä rä gia uni rä Zi Dada Jeoba de näꞌä rä asunto. Yä anciano di jamäsu näꞌä bi mängä rä apostol Pablo nuꞌmu̱ bi ꞌñenä: «Po rä nhuekäte Äjuä, näꞌä di trata dä maxꞌäꞌi pa gi arrepenti» (hñeti Romanos 2:​4, TNM). Hänge yä anciano o̱tꞌe ntsꞌe̱di po dä trata ko ndunthi rä ñhojäꞌi näꞌä yꞌo̱tꞌä tsꞌoki ja ngu di trata rä Zi Dada Jeoba. Nuyu̱ yä anciano beni ge nuyu̱ xä thutsꞌi de gä mayꞌo, hänge di jamäsu nuꞌu̱ yä tsꞌofo bi uni rä Kristo ꞌne de̱mbäbi rä ejemplo (Is. 11:​3, 4; Mat. 18:​18-20). Änte de dä ñäui näꞌä yꞌo̱tꞌä tsꞌoki, rä comité de ancianos mꞌe̱tꞌo di muntsꞌi pa xatuäbi rä Zi Dada Jeoba ꞌne apäbi rä gia pa dä za dä matsꞌi näꞌä kuꞌä dä arrepenti de yä pekado. ꞌNepu̱, honi näꞌä rä gia uni rä Mäkä Tꞌofo ꞌne nuꞌu̱ märꞌa yä he̱ꞌmi xä rꞌakägihu̱ rä hnini rä Zi Dada Jeoba de hanja di debe drä trata nuya yä asunto. ꞌNehe apäbi rä mfatsꞌi rä Zi Dada Jeoba pa dä za dä ntiende xä ñho te di senti ꞌne te di mbeni näꞌä kuꞌä ꞌne hanja dä za dä umbäbi rä mfatsꞌi. Yä anciano di mplatika entre geꞌu̱  pa handi xä ñho te mä mfeni o te mä tꞌo̱tꞌe bi zitsꞌi näꞌä kuꞌä pa bi yꞌo̱tꞌe näꞌä däta pekado (Prov. 20:5).

7, 8. ¿Hanja udi yä anciano ge de̱mbäbi rä ejemplo rä Zi Dada Jeoba ora trata dä matsꞌi nꞌa rä yꞌo̱tꞌä tsꞌoki?

⁷ Yä anciano udi näꞌä rä pasensia udi rä Zi Dada Jeoba. Nuyu̱ yä ku e̱ntꞌi ha yä mfeni hängu rä pasensia bi me̱ꞌspäbi rä Zi Dada Jeoba nuꞌu̱ yä yꞌo̱tꞌä tsꞌoki de mäyaꞌmu̱. Por ejemplo, ko ndunthi rä pasensia rä Zi Dada Jeoba bi trata bi matsꞌi Caín pa xä korreji nuꞌu̱ yä mfeni ꞌne njabu̱ xä numäñho mänꞌaki. Pe ꞌnehe bi xipäbi te ma xä thogi mu̱ hinxä paati näꞌä rä mfeni ꞌne näꞌä rä mꞌu̱i (Gén. 4:​6, 7). Mä nꞌa rä pa, rä Zi Dada Jeoba bi me̱hni rä profeta Natán pa bi ma bä nuu rä rey David ꞌne bi matsꞌi pa bi rekonose ꞌne bi arrepenti po näꞌä rä pekado xki yꞌo̱tꞌe (2 Sam. 12:​1-7). ꞌNehe, ora rä hnini Israel mi ꞌuengi de rä ꞌñuu rä Zi Dada Jeoba, näꞌä njatꞌä mi pe̱mpäbi yä profeta pa mi umbäbi rä mfatsꞌi (Jer. 7:​24, 25). Mäske nuꞌu̱ yä yꞌo̱tꞌä tsꞌoki mi sigi mi o̱tꞌe yä pekado ꞌne himi arrepenti, rä Zi Dada Jeoba bi uni näꞌä rä mu̱di paso ꞌne bi bäntebi ge dä arrepenti de nuꞌu̱ yä pekado.

⁸ ¿Te pe̱fi yä anciano pa dä de̱mbäbi rä ejemplo rä Zi Dada Jeoba ora trata dä matsꞌi nꞌa rä yꞌo̱tꞌä tsꞌoki? Ja ngu udi 2 Timoteo 4:​2, yä anciano trata ko ndunthi rä pasensia nuꞌu̱ yä kristianu xä yꞌo̱tꞌe nꞌa rä däta pekado. ꞌNehe nzäntho o̱tꞌe ntsꞌe̱di po dä dominä yä mfeni ꞌne hindä nkue̱ pa njabu̱ dä matsꞌi näꞌä rä yꞌotꞌä tsꞌoki dä arrepenti ꞌne dä me̱fi näꞌä xä ñho. ¿Te ma dä thogi mu̱ yä anciano hindä bädi dä dominä yä kue̱? Näꞌä rä yꞌo̱tꞌä tsꞌoki, zäi ge hingä ma dä ne dä jamäsu näꞌä rä konseho bi ehe de rä Zi Dada Jeoba nixi ma dä ne dä arrepenti.

9, 10. ¿Te dä za dä me̱fi yä anciano pa dä matsꞌi näꞌä rä yꞌo̱tꞌä tsꞌoki dä rekonose ꞌne dä arrepenti de nuꞌu̱ yä pekado?

⁹ Yä anciano trata dä imbestiga te bi japäbi näꞌä kristianu dä yꞌo̱tꞌe näꞌä däta pekado. Por ejemplo, ¿rä mhäte po rä Zi Dada Jeoba bi käni ngeꞌä ya hingi nxadi rä Mäkä Tꞌofo nixi po̱ni dä predika? ¿Ya kasi hingi xatuäbi rä Zi Dada Jeoba? ¿Ha rä mfeni xä ku̱ꞌti yä tsꞌo mfeni? ¿Pe̱ꞌtsi yä tsꞌo ntsitsꞌi o yä tsꞌo dibersio? ¿Di ntiende näꞌä yꞌo̱tꞌä tsꞌoki hanja ko näꞌä xä me̱fi xä perjudika näꞌä rä amista pe̱ꞌtsi ko rä Zi Dada Jeoba?

¹⁰ Yä anciano ma dä yꞌo̱ꞌtuäbi rꞌa yä ntꞌani näꞌä yꞌo̱tꞌä tsꞌoki pa dä bädi te bi zitsꞌi bi me̱fi näꞌä rä däta pekado. Pe hingä ma dä yꞌo̱ꞌtuäbi nuꞌu̱ yä ntꞌani hingä mähyoni. Ora yä anciano di trata ko ndunthi rä ñhojäꞌi näꞌä rä yꞌo̱tꞌä tsꞌoki, geꞌä ma dä matsꞌi pa dä hyandi ꞌne dä rekonose te bi japäbi bi tsꞌoni näꞌä rä amista pe̱ꞌtsi ko rä Zi Dada Jeoba (Prov. 20:5). ꞌNepu̱, dä za dä usa nꞌa rä hogä ejemplo pa dä matsꞌi näꞌä rä yꞌo̱tꞌä tsꞌoki dä arrepenti de nuꞌu̱ yä pekado ja ngu rä profeta Natán bi matsꞌi rä rey David. Rꞌabu̱ dende näꞌä rä mu̱di mhuntsꞌi di ja yä anciano, näꞌä yꞌo̱tꞌä tsꞌoki di rekonose ꞌne di arrepenti de näꞌä xä me̱fi.

11. ¿Hanja bi trata rä Hesu nuꞌu̱ yä yꞌo̱tꞌä tsꞌoki?

¹¹ Yä anciano o̱tꞌe ntsꞌe̱di po dä de̱mbäbi rä ejemplo rä Hesu. Por ejemplo, nꞌa rä pa rä Hesu bi ꞌñembäbi Saulo de Tarso: «Saulo, Saulo, ¿hanja gi hongägi pa gi yꞌo̱tkä rä ntsꞌomꞌu̱i?». Nunä ntꞌani bi yꞌo̱tꞌe rä Hesu, bi matsꞌi Saulo pa bi hyandi ge hixmä ñho näꞌä mi pe̱fi (Hech. 9:​3-6). ꞌNe ha rä mfistꞌofo Apocalipsis rä Hesu bi no̱ni nꞌa rä ꞌme̱hñä rä thuhu Jezabel ꞌne bi ꞌñenä: «Dä umbäbi rä tiempo pa dä arrepenti» (Apoc. 2:​20, 21, TNM).

12, 13. ¿Te dä za dä me̱fi yä anciano pa dä umbäbi rä tiempo näꞌä yꞌo̱tꞌä tsꞌoki dä arrepenti? (Hyandi ꞌnehe yä kꞌoi).

¹² Ja ngu rä Hesu, yä anciano hingä mäntꞌä handi näꞌä kuꞌä ngu nꞌa rä yꞌo̱tꞌä tsꞌoki näꞌä hingi ne dä arrepenti. Rꞌa yä yꞌo̱tꞌä tsꞌoki mäntꞌä di arrepenti ora yä anciano di muntsꞌi kongeꞌä. Pe märꞌaa, japäbi mꞌe̱di mä nꞌa tu̱i rä tiempo ꞌne rä mfatsꞌi pa dä zo̱ho̱ dä arrepenti. Hänge rꞌabu̱ yä anciano ma dä hyandi ge mähyoni dä muntsꞌi märꞌa yä mꞌiki ko näꞌä rä kuꞌä. Tal vez mꞌe̱fa de näꞌä rä mu̱di mhuntsꞌi ma dä me̱ꞌtsi yä anciano  kongeꞌä, näꞌä kuꞌä ma dä hñudi dä ntso̱ꞌmi näꞌä bi sipäbi, ꞌne tal vez asta ma dä xatuäbi rä Zi Dada Jeoba ꞌne ma dä yꞌapäbi rä mpumbäte (Sal. 32:5; 38:18). Rꞌabu̱ ha näꞌä mä nꞌa rä mhuntsꞌi ma dä me̱ꞌtsi yä anciano kongeꞌä, tal vez ma dä paati rä mfeni ꞌne ma dä mꞌu̱i arrepentido.

¹³ Pa dä matsꞌi näꞌä rä yꞌo̱tꞌä tsꞌoki dä arrepenti, yä anciano mähyoni xa dä yꞌo̱tꞌe ntsꞌe̱di po dä ꞌñudi rä ñhojäꞌi ꞌne dä ntiende te thogi näꞌä kuꞌä. ꞌNehe, yä anciano xatuäbi rä Zi Dada Jeoba pa dä jäpi gatꞌho näꞌä pe̱fi pa dä matsꞌi näꞌä yꞌo̱tꞌä tsꞌoki dä paati rä mfeni ꞌne dä arrepenti (2 Tim. 2:​25, 26).

14. Ora nꞌa rä yꞌo̱tꞌä tsꞌoki di arrepenti, ¿toꞌo ri ꞌñepäbi dä tꞌespäbi rä nsu ꞌne por hanja?

¹⁴ ¡Uni xa ndunthi rä johya ora nꞌa rä yꞌo̱tꞌä tsꞌoki di arrepenti! (Luc. 15:​7, 10). Pe, ¿toꞌo ri ꞌñepäbi dä tꞌespäbi rä nsu po geꞌä? ¿Yä anciano? Mähyoni gä benihu̱ ge rä apostol Pablo bi ꞌñenä ge Äjuä go geꞌä umbäbi rä oportunida de dä arrepenti nuꞌu̱ yä yꞌo̱tꞌä tsꞌoki (2 Tim. 2:​25, TNM). Hänge mu̱ nꞌa rä yꞌo̱tꞌä tsꞌoki bi paatä rä mfeni ꞌne rä mꞌu̱i, ri ꞌñepäbi dä tꞌespäbi rä nsu rä Zi Dada Jeoba hingä nꞌa rä mexiꞌmhai. Hää, rä Zi Dada Jeoba go geꞌä bi matsꞌi näꞌä yꞌo̱tꞌä tsꞌoki pa bi arrepenti ꞌne bi juäni rä ꞌñuu. ꞌNepu̱ rä apostol Pablo bi mää te mä benefisio pe̱ꞌtsi näꞌä rä yꞌo̱tꞌä tsꞌoki ora di arrepenti de nuꞌu̱ yä pekado: ora di arrepenti nꞌa rä yꞌo̱tꞌä tsꞌoki pe̱ꞌtsi rä oportunida de dä bädi mänꞌa xä ñho de rä Noya Äjuä, häni rä mfädi mänꞌaki ꞌne geꞌä fatsꞌi pa dä kꞌotꞌi de yä yꞌe̱ rä Zithu (2 Tim. 2:26).

15. Mu̱ nꞌa rä yꞌo̱tꞌä tsꞌoki ya bi arrepenti, ¿te mähyoni dä sigi dä me̱fi yä anciano?

¹⁵ Mu̱ nꞌa rä yꞌo̱tꞌä tsꞌoki ya bi arrepenti, yä anciano tobe ma dä sigi dä zo̱ni näꞌä kuꞌä pa dä nupäbi rä mfeni, dä japäbi dä ze̱di rä jamfri, ma dä umbäbi rä mfatsꞌi pa dä ze̱ti yä tentasio ꞌne pa dä ñꞌo mänjuäntho ha rä ꞌñuu rä Zi Dada Jeoba (Heb. 12:​12, 13). Yä anciano hingä ma dä xipi märꞌaa näꞌä bi me̱fi näꞌä kuꞌä. Pe, ¿te di ja mꞌe̱di dä bädi yä ku de rä mhuntsꞌi? Ma gä handihu̱.

«KORREJI NUꞌU̱ YÄ YꞌO̱TꞌÄ TSꞌOKI NDELANTE DE NUꞌU̱ TOꞌO HANDI»

16. ¿Te bi ne bi mää rä apostol Pablo nuꞌmu̱ bi ꞌñembäbi Timoteo «korreji nuꞌu̱ yä yꞌo̱tꞌä tsꞌoki ndelante de nuꞌu̱ toꞌo handi»? (1 Timoteo 5:20).

¹⁶ (Hñeti 1 Timoteo 5:​20, TNM). Timoteo ꞌnehe mrä anciano, hänge rä apostol Pablo bi ꞌñembäbi ge dä korreji nuꞌu̱ yä yꞌo̱tꞌä tsꞌoki  «ndelante de nuꞌu̱ toꞌo handi». ¿Te di signifika ora enä «ndelante de nuꞌu̱ toꞌo handi»? Hindi signifika ge ma dä sipäbi gatꞌho yä ku de rä mhuntsꞌi. Pe mu̱ rꞌa yä ku de rä mhuntsꞌi bi bädi te bi thogi ko näꞌä ku bi yꞌo̱tꞌe yä tsꞌoki, tal vez yä anciano ma dä hyandi ge mähyoni dä xipäbi nuꞌu̱ yä ku ge ya bi atiende nunä asunto ꞌne ge ya bri korreji näꞌä rä yꞌo̱tꞌä tsꞌoki.

17. Mu̱ nꞌa rä ku o nꞌa rä nju bi yꞌo̱tꞌe nꞌa rä däta pekado ꞌne pädi ndunthi yä ku de rä mhuntsꞌi o tal vez ma dä zo̱ho̱ dä bädi mꞌe̱fa, ¿te mä anunsio ma dä uni yä anciano ꞌne pa te?

¹⁷ Rꞌabu̱, näꞌä rä pekado bi yꞌo̱tꞌe nꞌa rä ku ya bi bädi ndunthi yä ku de rä mhuntsꞌi o ko rä tiempo ma dä zo̱ho̱ dä bädi. Hänge ora rä 1 Timoteo 5:20 enä «korreji nuꞌu̱ yä yꞌo̱tꞌä tsꞌoki ndelante de nuꞌu̱ toꞌo handi», nuꞌmu̱ yä anciano ma dä uni nꞌa rä anunsio habu̱ ma dä mää ge näꞌä ku o näꞌä nju, bri korreji ꞌne bi tꞌumbäbi rä tsꞌofo. Njabu̱ yä anciano ma dä ꞌñudi ge jamäsu näꞌä rä konseho bi uni rä apostol Pablo nuꞌmu̱ bi ꞌñenä: «Korreji nuꞌu̱ yä yꞌo̱tꞌä tsꞌoki ndelante de nuꞌu̱ toꞌo handi». ¿Por hanja mähyoni dä me̱fi njabu̱ yä anciano? Rä apostol Pablo bi sigi bi ꞌñenä: «Pa njabu̱ märꞌaa dä nsu». Hää, nunä anunsio ma dä tꞌuni pa njabu̱ märꞌa yä ku dä su näꞌä rä ntsitsꞌi pe̱ꞌtsi ko rä Zi Dada Jeoba ꞌne njabu̱ hindä dagi ha nꞌa rä däta pekado.

18. ¿Te pe̱fi yä anciano mu̱ nꞌa rä bäsjäꞌi o̱tꞌe nꞌa rä däta pekado ꞌne pe̱ꞌtsi menu de 18 nje̱ya? (Hyandi ꞌnehe rä kꞌoi).

¹⁸ ¿Te mähyoni dä me̱fi yä anciano mu̱ näꞌä yꞌo̱tꞌä tsꞌoki pe̱ꞌtsi menu de 18 nje̱ya ꞌne ya xä nxixtehe? Nuꞌmu̱ yoho yä anciano ma dä muntsꞌi ko näꞌä bäsjäꞌi mähye̱gi ko yä dada mu̱ nuyu̱ yä Testigo. b Ora ya dä muntsꞌi kongeꞌu̱, yä anciano ma dä trata dä bädi te ya xä me̱fi nuꞌu̱ yä dada pa dä matsꞌi rä bätsi dä paati rä mꞌu̱i ꞌne dä arrepenti.  Mu̱ nuꞌu̱ yä anciano dä bädi ge näꞌä bäsjäꞌi hää di jamäsu näꞌä rä konseho häni de yä dada, nuꞌmu̱ nuꞌu̱ yä anciano dä za dä desidi ge hingi ja mꞌe̱di ge rä comité de ancianos dä muntsꞌi kongeꞌu̱. ¿Por hanja hinä? Ngeꞌä rä Zi Dada Jeoba go xä umbäbi näꞌä rä responsabilida yä dada pa ko rä mhäte dä korreji ꞌne dä matsꞌi yä bätsi (Deut. 6:​6, 7; Prov. 6:20; 22:6; Efes. 6:​2-4). Mꞌe̱fa, yä anciano de vez en cuando ma dä ñäui nuꞌu̱ yä dada pa dä bädi mu̱ näꞌä bäsjäꞌi sigi tꞌumbäbi näꞌä rä mfatsꞌi di japäbi mꞌe̱di. Pe, ¿te mähyoni dä me̱fi yä anciano mu̱ näꞌä bäsjäꞌi ya xä nxixtehe ꞌne hingi ne dä arrepenti de nuꞌu̱ yä pekado? Ora thogi njabu̱, nuꞌmu̱ rä comité de ancianos ma dä muntsꞌi ko näꞌä bäsjäꞌi ꞌne nuꞌu̱ yä dada yä Testigo.

«[JEOBA] XI JA NDUNTHI RÄ NHUEKÄTE ꞌNE JA NDUNTHI RÄ MHÄTE»

19. ¿Te pe̱fi yä anciano pa udi ge di de̱mbäbi rä mꞌu̱i rä Zi Dada Jeoba ora nꞌa rä ku o̱tꞌe nꞌa rä däta pekado?

¹⁹ Nuꞌu̱ yä ku xä thahni pa dä forma rä comité de ancianos, o̱tꞌe ntsꞌe̱di po dä su yä mhuntsꞌi pa njabu̱ dä mꞌu̱i xä ntꞌaxi. ¿Por hanja? Ngeꞌä geꞌä rä responsabilida xä umbäbi rä Zi Dada Jeoba nuyu̱ yä ku (1 Cor. 5:7). Pe yä anciano xa o̱tꞌe ntsꞌe̱di po dä matsꞌi nuꞌu̱ yä kristianu o̱tꞌe yä däta pekado dä arrepenti ꞌne dä paati yä mꞌu̱i. Po geꞌä ora di trata nuya yä asunto, yä anciano e̱ntꞌi ha yä mfeni ge näꞌä yꞌo̱tꞌä tsꞌoki hää ma dä paati rä mꞌu̱i. Njabu̱ de̱mbäbi rä mꞌu̱i rä Zi Dada Jeoba ngeꞌä näꞌä «xi ja ndunthi rä nhuekäte ꞌne ja ndunthi rä mhäte» (Sant. 5:11). Nuꞌmu̱ rä apostol Juan ya mrä zi däta jäꞌi, näꞌä bi yꞌofo nuya yä noya mähotho ꞌne bi ꞌñenä: «Mä zi bätsiꞌihu̱, di opꞌäꞌihu̱ nuya yä noya pa hingi yꞌo̱thu̱ nꞌa rä tsꞌoki. Pe mu̱ nꞌa de gekhu̱ gä o̱thu̱ nꞌa rä tsꞌoki, mä zi Hmuuhu̱ rä Ñhesukristo dä ñängägihu̱ ha rä thandi Äjuä rä Dada, ngeꞌä nuꞌä hinte mä tsꞌoki tu» (1 Juan 2:1).

20. ¿Te ma gä pädihu̱ ha näꞌä rä ntꞌudi xä ꞌñepu̱?

²⁰ Rꞌabu̱, rꞌa yä kristianu nuꞌu̱ xä yꞌo̱tꞌe nꞌa rä däta pekado hingi ne dä arrepenti mäske tꞌumbäbi rä mfatsꞌi. Mu̱ thogi njabu̱, mähyoni ge näꞌä kristianu drä ju̱ki de rä mhuntsꞌi. Ha näꞌä ntꞌudi xä ꞌñepu̱ ma gä pädihu̱ te pe̱fi yä anciano ora thogi njabu̱.