1, 2. a) ¿Hanja handi rä Zi Dada Jeoba nuꞌu̱ yä yꞌo̱tꞌä tsꞌoki hingi ne dä arrepenti? b) ¿Te ne rä Zi Dada Jeoba?

 RÄ ZI DADA JEOBA hindi konsentitho yä yꞌo̱tꞌä tsꞌoki ꞌne xa di u̱tsa rä pekado (Sal. 5:​4-6). Näꞌä to̱ꞌmi gä pe̱ꞌspäbihu̱ rä tꞌekꞌei ꞌne gä jamäsuhu̱ nuꞌu̱ yä mhända xä rꞌakägihu̱ ha rä Mäkä Tꞌofo. Mäjuäni ge Näꞌä hingi to̱ꞌmi gä mperfectohu̱ ngeꞌä pädi ge xtä mꞌu̱ihu̱ ko rä tsꞌoki (Sal. 130:​3, 4). Pe rä Zi Dada Jeoba tsoogi claro ge näꞌä di rechaza ꞌne hingi numäñho nuꞌu̱ «yä jäꞌi otho yä tsa, ꞌne ne dä probecha de näꞌä rä nhuekäte» pa dä me̱fi näꞌä xä ntsꞌo (Jud. 4). Rä Mäkä Tꞌofo udi ge rä Zi Dada Jeoba ma dä «huatä gatꞌho yä tsꞌomꞌu̱i gä jäꞌi» ha rä gerra de Armagedón (2 Ped. 3:7; Apoc. 16:16).

² Ja ngu ya dä pädihu̱ ha nuꞌu̱ yä ntꞌudi bi thogi, rä Zi Dada Jeoba «hingi ne dä hyandi dä du ninꞌa rä jäꞌi, sino ke Näꞌä ne dä hyandi ge gatꞌho dä zo̱ho̱ dä arrepenti» (2 Ped. 3:​9, TNM). Yä anciano de̱mbäbi rä mꞌu̱i rä Zi Dada Jeoba ꞌne ko ndunthi rä pasensia o̱tꞌe ntsꞌe̱di po dä matsꞌi nuꞌu̱ yä yꞌo̱tꞌä tsꞌoki dä arrepenti pa dä me̱ꞌtsi mänꞌaki nꞌa rä hogä ntsitsꞌi ko rä Zi Dada Jeoba. Pe hingä gatꞌho yä yꞌo̱tꞌä tsꞌoki di asepta nunä rä mfatsꞌi (Is. 6:9). Rꞌaa hingi ne dä paatä yä mꞌu̱i ꞌne sigi yꞌo ha nꞌa rä ꞌñuu xä ntsꞌo mäske yä anciano umbäbi rä mfatsꞌi pa dä arrepenti ꞌne dä mengi mänꞌaki. ¿Te di debe dä tꞌo̱tꞌe ora thogi njabu̱?

 «YꞌE̱NIHU̱ DE ENTRE GEꞌÄHU̱ NÄꞌÄ RÄ YꞌO̱TꞌÄ TSꞌOKI»

3. a) ¿Te di mända rä Mäkä Tꞌofo dä tꞌo̱ꞌtuäbi nꞌa rä yꞌo̱tꞌä tsꞌoki näꞌä hingi ne dä arrepenti? b) ¿Por hanja dä za gä eñhu̱ ge näꞌä yꞌo̱tꞌä tsꞌoki bi huahnise̱ dä bo̱ni de rä mhuntsꞌi?

³ Mu̱ nꞌa rä kristianu xä yꞌo̱tꞌe nꞌa rä däta pekado ꞌne hingi ne dä arrepenti, yä anciano pe̱ꞌtsi te dä jamäsu näꞌä mända rä Mäkä Tꞌofo ha 1 Corintios 5:13 ora enä: «Yꞌe̱nihu̱ de entre geꞌähu̱ näꞌä rä yꞌo̱tꞌä tsꞌoki». Dä za gä handihu̱ ge näꞌä yꞌo̱tꞌä tsꞌoki go geꞌä mismo bi huanise̱ nunä desision ꞌne bi xofo näꞌä potꞌi (Gál. 6:7). ¿Por hanja? Ngeꞌä näꞌä rä yꞌo̱tꞌä tsꞌoki himbi ne bi asepta näꞌä rä mfatsꞌi njatꞌä bi ofresebi yä anciano (2 Rey. 17:​12-15). Ko gatꞌho näꞌä xä me̱fi, udi ge näꞌä yꞌo̱tꞌä tsꞌoki xä desidi hindä yꞌo̱te rä Zi Dada Jeoba (Deut. 30:​19, 20).

4. Ora di tꞌe̱ni nꞌa rä jäꞌi de rä mhuntsꞌi, ¿por hanja tꞌuni ꞌnehe nꞌa rä anunsio?

⁴ Ora di tꞌe̱ni de rä mhuntsꞌi nꞌa rä jäꞌi näꞌä hinxä arrepenti de nuꞌu̱ yä däta pekado xä yꞌo̱tꞌe, di tꞌuni nꞌa rä anunsio pa njabu̱ yä ku dä bädi ge näꞌä jäꞌiꞌä ya hingä rä testigo rä Jeoba. a ¿Pa te di tꞌuni näꞌä rä anunsio? Hingä pa drä ꞌme̱tuäbi rä tsa näꞌä rä yꞌo̱tꞌä tsꞌoki, sino ke pa njabu̱ gatꞌho yä ku de rä mhuntsꞌi dä za dä jamäsu näꞌä di mända rä Mäkä Tꞌofo ora enä ge hindi debe dä kombibi nixi dä ñuni kongeꞌä (1 Cor. 5:​9-11). ¿Por hanja xä uni rä Zi Dada Jeoba nunä rä mhända? Rä apostol Pablo bi ꞌñenä: «Nꞌa tu̱i rä levadura japi dä netsꞌi gatꞌho rä ju̱ni» (1 Cor. 5:​6, TNM). Hää, mu̱ hindä tꞌe̱ni de rä mhuntsꞌi näꞌä rä yꞌo̱tꞌä tsꞌoki hingi ne dä arrepenti, nuꞌu̱ märꞌa yä ku dä za dä mbeni ge mu̱ ma drä konsenti nuꞌu̱ yä yꞌo̱tꞌä tsꞌoki, hindi bale rä penä dä yꞌo̱tꞌe ntsꞌe̱di po dä mꞌu̱i ja ngu di mända rä Zi Dada Jeoba (Prov. 13:20; 1 Cor. 15:33).

5. ¿Hanja di debe gä handihu̱ nuꞌu̱ ya hingä yä testigo rä Jeoba ꞌne por hanja?

⁵ ¿Hanja di debe gä handihu̱ nꞌa rä jäꞌi näꞌä ya hingä rä testigo rä Jeoba? Mäske hindi kombibihu̱ nixi di ñunihu̱ kongeꞌä, hindi handihu̱ ngu nꞌa rä zi de̱ti näꞌä ya bi mꞌe̱di pa nzäntho. Sino ke di handihu̱ ge nꞌa rä pa, näꞌä zi de̱ti ma dä mengi mänꞌaki ha rä taxo. Hindi debe gä pumfrihu̱ ge näꞌä jäꞌiꞌä bi me̱päbi rä Zi Dada Jeoba nꞌa rä tiempo, pe koꞌmu̱ bi ꞌuengi de rä ꞌñuu, nubye̱ ꞌmu̱i en peligro (Ezeq. 18:31). Pe mentä tobe jadä rä tiempo ꞌne rä Zi Dada Jeoba ꞌmu̱i dispuesto dä umbäbi rä nhuekäte, nuju̱ debe gä handihu̱ näꞌä jäꞌiꞌä ge nꞌa rä pa hää ma dä za dä mengi. Hänge, ¿te dä za dä me̱fi yä anciano pa dä matsꞌi nuꞌu̱ ya xä tꞌe̱ni de rä mhuntsꞌi?

TE PE̱FI YÄ ANCIANO PA FATSꞌI NUꞌU̱ XÄ TꞌE̱NI DE RÄ MHUNTSꞌI

6. ¿Te pe̱fi yä anciano pa dä umbäbi rä mfatsꞌi nuꞌu̱ xä tꞌe̱ni de rä mhuntsꞌi?

⁶ ¿Te pe̱fi yä anciano ora nꞌa rä jäꞌi di tꞌe̱ni de rä mhuntsꞌi? ¿Di bandonä ꞌne ya nunka ma dä umbäbi rä mfatsꞌi pa dä mengi ko rä Zi Dada Jeoba? Hinä. Ora rä comité de ancianos xipäbi näꞌä jäꞌi ge ma dä tꞌe̱ni de rä mhuntsꞌi, ꞌnehe ma dä xipäbi te di debe dä me̱fi pa njabu̱ dä za dä mengi mänꞌaki ko rä Zi Dada Jeoba. Pe hingä ho̱nse̱ꞌä, ꞌnehe ma dä xipäbi ge dä hohmä dä muntsꞌi mänꞌaki kongeꞌä xti thogi rꞌa yä zänä. Mu̱ näꞌä yꞌo̱tꞌä tsꞌoki dä asepta, xti zo̱ho̱ näꞌä rä paꞌä yä anciano ko ndunthi rä mhäte ma dä mbitabi dä arrepenti ꞌne dä mengi mänꞌaki ko rä Zi Dada Jeoba. Pe, ¿xiꞌmu̱ tobe hingi ne dä arrepenti näꞌä yꞌo̱tꞌä tsꞌoki? Mäske njabu̱, yä anciano hingä ma dä hyopäbi dä thogi ndunthi rä tiempo pa dä muntsꞌi mänꞌaki kongeꞌä.

7. ¿Hanja udi yä anciano näꞌä rä nhuekäte udi rä Zi Dada Jeoba ko nuꞌu̱ xä bo̱ni de rä mhuntsꞌi? (Jeremías 3:12).

⁷ Yä anciano ꞌnehe debe dä ꞌñudi näꞌä rä  nhuekäte udi rä Zi Dada Jeoba ora di atiende nuꞌu̱ di tꞌe̱ni de rä mhuntsꞌi. Por ejemplo, mäyaꞌmu̱ nuꞌmu̱ yä israelita mi pe̱fi yä tsꞌo tꞌo̱tꞌe, rä Zi Dada Jeoba himi pontꞌätho yä yꞌe̱ ꞌne mi to̱ꞌmi ge nuꞌu̱ dä pengi, sino ke mi uni näꞌä rä mu̱di paso ꞌne mi trata dä matsꞌi mäske nuꞌu̱ himi udi ge mi arrepenti. Ja ngu dä handihu̱ ha Rä ntꞌudi pa gä nxadihu̱ 32, pa bi ꞌñudi rä Zi Dada Jeoba hängu di huegägihu̱ ꞌne ꞌmu̱i dispuesto dä punꞌgägihu̱, bi hñutsꞌi de gä ejemplo rä profeta Oseas. Mäske näꞌä rä ꞌme̱hñä bi hyatꞌi ko märꞌa yä ñꞌo̱ho̱ ꞌne himi arrepenti, Jeoba bi mändabi rä profeta Oseas dä ma duä honi rä ꞌme̱hñä pa dä mengi kongeꞌä (Os. 3:1; Mal. 3:7). Ja ngu rä Zi Dada Jeoba, yä anciano ne ko ngatꞌho yä koraso ge nuꞌu̱ xä bo̱ni de rä mhuntsꞌi dä arrepenti ꞌne dä mengi mänꞌaki. Po geꞌä hingi pontꞌätho yä yꞌe̱ ꞌne pa bi honi nuꞌu̱ xä bo̱ni de rä mhuntsꞌi pa dä umbäbi rä mfatsꞌi (hñeti Jeremías 3:12).

8. Ko näꞌä rä ejemplo bi hñutsꞌi rä Hesu, ¿te dä za gä handihu̱ de rä Zi Dada Jeoba? (Lucas 15:7).

⁸ ꞌNehe ya dä handihu̱ näꞌä rä ejemplo bi hñutsꞌi rä Hesu nuꞌmu̱ bi mede hanja nꞌa bäsjäꞌi bi bo̱ni de rä nguu rä dada. ¿Gi beni te bi senti rä dada nuꞌmu̱ nꞌa rä pa bi hyandi ge xä mani rä tꞌu̱? Rä Mäkä Tꞌofo enä ge näꞌä rä dadaꞌä bi nextꞌihi bi ma bä tsu̱di pa «bi hyu̱fi ꞌne bi zu̱ꞌtsi» mäske näꞌä tꞌu̱ꞌä tobe hixki yꞌapäbi rä mpumbäte (Luc. 15:20). Geꞌä ꞌnehe senti yä anciano po nuꞌu̱ yä zi de̱ti xä mꞌe̱di. Nuyu̱ o̱tꞌe ntsꞌe̱di po dä ma duä honi nuꞌu̱ xä bo̱ni de rä mhuntsꞌi pa dä matsꞌi dä mengi (Luc. 15:​22-24, 32). Ora nꞌa rä yꞌo̱tꞌä tsꞌoki di arrepenti ꞌne pengi ko rä Zi Dada Jeoba, ¡xa ja ndunthi rä johya ha mähetsꞌi ꞌne ha rä Xiꞌmhai! (Hñeti Lucas 15:7).

9. ¿Te mä imbitasio umbäbi rä Zi Dada Jeoba nuꞌu̱ xä yꞌo̱tꞌe nꞌa rä däta pekado?

⁹ Gatꞌho näꞌä ya dä handihu̱ asta nubye̱, tsoogi claro ge rä Zi Dada Jeoba hindi konsenti ha rä hnini nꞌa rä yꞌo̱tꞌä tsꞌoki näꞌä hindi arrepenti. Al mismo tiempo, utkägihu̱ ge rä Zi Dada Jeoba hindi bandonä pa nzäntho näꞌä jäꞌi xä bo̱ni de rä hnini, sino ke näꞌä ꞌmu̱i dispuesto dä matsꞌi pa dä mengi. Ha Oseas 14:4 di handihu̱ hanja nuu rä Zi Dada Jeoba nuꞌu̱ di arrepenti. Ha nunä testo enä: «Mäske nuꞌu̱ bi zogäbu̱, nuga ma gä pumbäbi. Po mä boluntase̱ ma gä mädiꞌu̱, ngeꞌä ya bi thogi mä kue̱». Po geꞌä xa mähyoni ge yä anciano nzäntho dä mꞌu̱i al tanto pa dä hyandi mu̱ nuꞌu̱ yä jäꞌi xä bo̱ni de rä hnini rä Zi Dada Jeoba, udi nꞌa rä seña ge ꞌmu̱i arrepentido. Pe ꞌnehe xa mähyoni ge nuꞌu̱ xä bo̱ni de rä hnini rä Zi Dada Jeoba hindä hyopi dä thogi ndunthi rä tiempo ꞌne nguntꞌä dä uni nuꞌu̱ yä paso di ja mꞌe̱di pa dä mengi ko rä Zi Dada Jeoba.

10, 11. ¿Te mä mfatsꞌi umbäbi yä anciano nuꞌu̱ yä zi jäꞌi ya o̱tꞌe ndunthi rä tiempo de xä bo̱ni de rä mhuntsꞌi?

¹⁰ Pe, ¿xi nuꞌu̱ yä jäꞌi ya o̱tꞌe ndunthi rä tiempo de bi tꞌe̱ni de rä mhuntsꞌi? Tal vez nuꞌu̱ yä jäꞌi asta ya bi pumfri te mä däta pekado bi yꞌo̱tꞌe ꞌne por hanja bi tꞌe̱ni de rä mhuntsꞌi. Pe hindi mporta te di mbeniꞌu̱, yä anciano ma dä yꞌo̱tꞌe ntsꞌe̱di po dä ma dä zo̱ni nuyu̱ yä zi jäꞌi. Xti ñä kongeꞌu̱, yä anciano dä za dä ofrese dä xatuäbi mähye̱gi rä Zi Dada Jeoba ꞌne ko ndunthi rä mhäte ma dä animäbi dä mengi ha rä mhuntsꞌi. Mu̱ ya o̱tꞌe ndunthi yä je̱ya de bi bo̱ni näꞌä rä jäꞌi de rä hnini rä Zi Dada Jeoba, zäi ge rä mhäte ꞌne rä jamfri ya xä käni ꞌne di japäbi mꞌe̱di toꞌo dä matsꞌi pa dä rekupera rä amista ko rä Zi Dada Jeoba. Hänge mu̱ näꞌä jäꞌi hää ne dä mengi, yä anciano dä za dä huahni nꞌa rä ku o nꞌa rä nju pa dä umbäbi näꞌä jäꞌi nꞌa rä ntꞌudi de rä Mäkä Tꞌofo mäske tobe hinxä mengi ha rä mhuntsꞌi. Ho̱nse̱ yä anciano ri ꞌñepäbi dä huahni toꞌo ma dä uni nunä rä mfatsꞌi.

¹¹ Yä anciano ꞌnehe ne dä ꞌñudi rä nhuekäte  ja ngu udi rä Zi Dada Jeoba. Po geꞌä, xa o̱tꞌe ntsꞌe̱di po dä hyoni ꞌne dä matsꞌi nuꞌu̱ yä zi jäꞌi xä bo̱ni de rä hnini rä Zi Dada Jeoba. Ora yä anciano tini nuꞌu̱ yä zi jäꞌiꞌu̱, xipäbi ge rä Zi Dada Jeoba mää ge rä goxthi xogi pa ora go dä neꞌu̱ dä mengi. Mu̱ näꞌä rä jäꞌi nguntꞌä dä arrepenti ꞌne dä zopu̱ nuꞌu̱ yä pekado o̱tꞌe, dä za nguntꞌä drä asepta mänꞌaki ngu nꞌa rä testigo rä Jeoba (2 Cor. 2:​6-8).

12. a) ¿Te mähyoni dä hyandi xä ñho yä anciano? b) ¿Por hanja nuju̱ hindi debe gä mäñhu̱ ge nꞌa rä jäꞌi nunka ma dä hñäni rä mpumbäte rä Zi Dada Jeoba? (Hyandi ꞌnehe rä nota).

¹² Rꞌabu̱, yä anciano xa mähyoni dä hyandi mꞌe̱tꞌo mu̱ ya bi zo̱ho̱ rä ora de drä asepta mänꞌaki ngu nꞌa rä testigo rä Jeoba nꞌa rä jäꞌi näꞌä xä bo̱ni de rä mhuntsꞌi o tobe hinä. Por ejemplo, mu̱ näꞌä jäꞌi bi tꞌe̱ni ngeꞌä bi biola nꞌa rä  bätsi, bi fädi ngu nꞌa rä apóstata ngeꞌä mi xani nuꞌu̱ yä ntꞌudi di nkontraui ko rä Mäkä Tꞌofo, o mu̱ bi planea hanja dä hye̱pu̱ näꞌä jäꞌi toꞌo xki nthätui. Ora thogi njabu̱, yä anciano mähyoni xa dä hyandi mu̱ näꞌä jäꞌiꞌä xa mähyoni ꞌmu̱i arrepentido o hinä (Mal. 2:14; 2 Tim. 3:6). Yä anciano pe̱ꞌtsi rä responsabilida de dä su rä mhuntsꞌi. Pe ꞌnehe mähyoni gä benihu̱ ge rä Zi Dada Jeoba ꞌmu̱i dispuesto dä asepta gatꞌho nuꞌu̱ di arrepenti ꞌne tsopu̱ yä pekado. Hänge mäske yä anciano mähyoni dä hyandi xä ñho mu̱ nꞌa rä yꞌo̱tꞌä tsꞌoki xa mäjuäni di arrepenti o hinä, hindi debe dä mbeni ge nꞌa rä yꞌo̱tꞌä tsꞌoki nunka ma dä hñäni rä mpumbäte rä Zi Dada Jeoba (1 Ped. 2:10). b

TE DÄ ZA DÄ ME̱FI RÄ MHUNTSꞌI

13. a) ¿Hanja mähyoni gä tratahu̱ nꞌa rä kristianu näꞌä bri korreji o bri censura? b) ¿Hanja di debe gä tratahu̱ nꞌa rä jäꞌi näꞌä bi tꞌe̱ni de rä mhuntsꞌi?

¹³ Ja ngu dä handihu̱ ha Rä ntꞌudi pa gä nxadihu̱ 34, rꞌabu̱ yä anciano mähyoni dä uni nꞌa rä anunsio ha rä mhuntsꞌi habu̱ ma dä mää toꞌo näꞌä rä ku bri korreji o bri censura. Ora tꞌuni nunä anunsio, signifika ge hää dä za gä sigihu̱ gä ntsitsꞌihu̱ ko näꞌä kuꞌä. ¿Por hanja? Ngeꞌä ora tꞌenä ge bri korreji o bri censura, signifika ge näꞌä kuꞌä ꞌmu̱i arrepentido ꞌne ya xä zopu̱ näꞌä rä pekado mi o̱tꞌe (1 Tim. 5:20). Koꞌmu̱ näꞌä ku bi arrepenti de yä pekado, himbri ju̱ki de rä mhuntsꞌi ꞌne nubye̱ ja mꞌe̱di ge yä ku dä animäbi pa dä sigi dä me̱fi näꞌä di ho rä Zi Dada Jeoba (Heb. 10:​24, 25). Pe ora nꞌa rä jäꞌi hää dri tꞌe̱ni de rä mhuntsꞌi ꞌne ya hingä rä testigo rä Jeoba, hinxä ñho gä kombibihu̱ nixi gä ñunihu̱ kongeꞌä (1 Cor. 5:11).

14. ¿Te debe dä desidi kada nꞌa rä kristianu mu̱ ha rä Ngu de gä Mhuntsꞌi dä ntini nꞌa rä jäꞌi näꞌä ya hingä rä testigo rä Jeoba? (Hyandi ꞌnehe rä kꞌoi).

¹⁴ Ora di tꞌe̱ni nꞌa rä jäꞌi de rä mhuntsꞌi, ¿signifika ge ya hingä ma gä zofohu̱ ninꞌa zi tu̱ki? Hinä. ꞌMu̱i claro ge hingä ma gä kombibihu̱ nixi ma gä ñunihu̱ kongeꞌä, pe mu̱ näꞌä jäꞌiꞌä mi nꞌa de mä familiahu̱ o nꞌa mä amigohu̱ —mu̱ mä konsiensia hokägihu̱— kada nꞌa de gekhu̱ ma gä desidihu̱ mu̱ gä mbitabihu̱ ha nꞌa rä mhuntsꞌi o hinä. ¿Hanja ma gä tratahu̱ näꞌä jäꞌi xti tso̱ni ha rä Ngu de gä Mhuntsꞌi? Mä mꞌe̱tꞌo ndi pädihu̱ ge himi debe gä ze̱njuahu̱ näꞌä jäꞌiꞌä. Pe  nubye̱, kada nꞌa rä kristianu ma dä usa rä konsiensia pa dä desidi mu̱ di senti xä ñho dä ze̱njua näꞌä jäꞌiꞌä ꞌne dä umbäbi nꞌa rä hogä ꞌñehe o hinä. Pe hindi signifika ge ma gä kombibihu̱ o gä mplatikahu̱ ndunthi kongeꞌä.

15. Ja ngu di handihu̱ ha 2 Juan 9-11, ¿toꞌo hindi debe nisikiera gä ze̱njuahu̱? (Hyandi ꞌnehe rä recuadro « ¿Te mi pe̱fi nuꞌu̱ yä yꞌo̱tꞌä tsꞌoki bi no̱ni rä apostol Juan ꞌne te mi pe̱fi näꞌä rä yꞌo̱tꞌä tsꞌoki bi no̱ni rä apostol Pablo?»).

¹⁵ Tal vez nubye̱ di enähu̱: «Pe, ¿hingi mängä rä Mäkä Tꞌofo ge toꞌo di ze̱njua nuyu̱ yä jäꞌi, ja rä ue̱nda ge rä komplise?» (hñeti 2 Juan 9-11, TNM). Ha nuꞌu̱ märꞌa yä testo de 2 Juan, udi ge nuꞌu̱ xani nuꞌu̱ yä ntꞌudi hingä mäjuäni de Äjuä —fädi ngu yä apóstata—, ꞌne nuꞌu̱ o̱tꞌe yä däta pekado ꞌne uti märꞌa dä me̱fi njabu̱ ꞌnehe, geꞌu̱ hindi debe nisikiera gä ze̱njuahu̱ (Apoc. 2:20). Mu̱ yä anciano dä hyandi ge nꞌa rä jäꞌi näꞌä bi tꞌe̱ni de rä mhuntsꞌi, sigi xani nuꞌu̱ yä ntꞌudi di nkontraui ko näꞌä udi rä Mäkä Tꞌofo, o sigi o̱tꞌe yä däta pekado ꞌne uti märꞌaa dä me̱fi njabu̱ ꞌnehe, nuꞌmu̱ yä anciano nisikiera ma dä zo̱ni näꞌä jäꞌiꞌä. Di pädihu̱ ge rä Zi Dada Jeoba tobe umbäbi rä oportunida dä paati yä mꞌu̱i nuyu̱ yä jäꞌi. Pe mentä hindä me̱fi njabu̱, nuju̱ hindi debe gä ze̱njuahu̱ nixi gä mbitabihu̱ ha yä mhuntsꞌi.

HANJA DÄ ZA GÄ UDIHU̱ RÄ NHUEKÄTE JA NGU UDI RÄ ZI DADA JEOBA

16, 17. a) ¿Te di mbitabi rä Zi Dada Jeoba dä me̱fi nuꞌu̱ xä yꞌo̱tꞌe yä däta pekado? (Ezequiel 18:32). b) ¿Te dä za dä me̱fi yä anciano pa dä mfaxhui rä Zi Dada Jeoba dä matsꞌi nuꞌu̱ xä yꞌo̱tꞌe nꞌa rä däta pekado?

¹⁶ ¿Te xtä pädihu̱ ha nunä revista? ¡Ge rä Zi Dada Jeoba hingi ne dä hyandi ninꞌa rä jäꞌi dä du! (Hñeti Ezequiel 18:32). Jeoba ne dä hyandi ge nuꞌu̱ yä yꞌo̱tꞌä tsꞌoki dä arrepenti, dä paati yä mꞌu̱i ꞌne dä mengi kongeꞌä (2 Cor. 5:20). Po geꞌä, rä Zi Dada Jeoba hinxä zabi ꞌne di bäntebi nuꞌu̱ xä yꞌo̱tꞌe nꞌa rä däta pekado ge dä arrepenti ꞌne dä mengi Kongeꞌä. Xi nꞌa rä däta nsu näꞌä pe̱ꞌtsi yä anciano de dä mfaxhui rä Zi Dada Jeoba pa dä matsꞌi dä arrepenti nuꞌu̱ xä yꞌo̱tꞌe nꞌa rä däta pekado (Rom. 2:4; 1 Cor. 3:9).

¹⁷ Xa mähotho gä pädihu̱ ge ha mähetsꞌi xa bi ja ndunthi rä johya ora nꞌa rä yꞌo̱tꞌä tsꞌoki di arrepenti. Mä Zi Dadahu̱ Jeoba, xa di johya ora handi ge nuꞌu̱ yä zi de̱ti xä mꞌe̱di, pengi mänꞌaki ha rä mhuntsꞌi. Mähyoni gä beñhu̱ ꞌne hingä pumfrihu̱ hängu rä nhuekäte ꞌne rä ñhojäꞌi udi rä Zi Dada Jeoba. Mu̱ gä pe̱fihu̱ njabu̱, näꞌä rä mhäte di sentihu̱ po Geꞌä, ma dä sigi dä ze̱di ꞌne dä te ngu thogi kada nꞌa rä pa (Luc. 1:78).