1. Xi nuꞌi, ¿xkä imäjinä tenguꞌä rä Zi Dada Jeoba?

 ORA gi ñäui rä Zi Dada Jeoba ꞌne gi xatuäbi, ¿xkä imäjinä tenguꞌä? Mäske hingi tsa gä handihu̱ tenguꞌä rä Zi Dada Jeoba, rꞌabu̱ rä Mäkä Tꞌofo enä ge näꞌä ngu nꞌa rä escudo ꞌne pe̱ꞌtsi rä tsꞌe̱di ngu rä Hyadi ꞌne rä tsibi (Sal. 84:11; Heb. 12:29). Nꞌa rä pa rä profeta Ezequiel bi hyandi ge rä Zi Dada Jeoba mi ngu nꞌa rä do xa mähotho näꞌä fädi ngu rä zafiro, mi ngu nꞌa rä bo̱jä näꞌä xa mi hue̱xki ꞌne xa mi tsꞌu̱ngänza ngu nꞌa rä jähni (Ezeq. 1:​26-28). Ora xikägihu̱ rä Mäkä Tꞌofo tenguꞌä rä Zi Dada Jeoba, rꞌabu̱ asta dä za dä jakägihu̱ gä ntsuhu̱ ora di imäjinähu̱ hängu rä tsꞌe̱di pe̱ꞌtsi.

2. ¿Por hanja rꞌabu̱ dä za dä jakägihu̱ xä ñhei gä honihu̱ rä Zi Dada Jeoba ꞌne gä kamfrihu̱ ge näꞌä di mäkägihu̱?

² Koꞌmu̱ hindi handihu̱ rä Zi Dada Jeoba, rꞌabu̱ dä za dä jakägihu̱ xä ñhei gä kamfrihu̱ ge näꞌä di mäkägihu̱. O mu̱ xtä sufrihu̱ dende ndi bätsihu̱, o mu̱ hindä pe̱ꞌtsihu̱ nꞌa rä dada näꞌä bi mäkägihu̱, zäi ge geꞌä jakägihu̱ gä mbenihu̱ ge rä Zi Dada Jeoba nunka dä za dä mäkägihu̱. Pe rä Zi Dada Jeoba handi gatꞌho näꞌä xtä thogihu̱ ꞌne di ntiende te di sentihu̱. Po geꞌä rä Zi Dada Jeoba xä rꞌakägihu̱ rä Mäkä Tꞌofo pa dä maxkägihu̱ gä handihu̱ ge näꞌä xa mäjuäni di mäkägihu̱.

3. ¿Por hanja ma gä ñähu̱ ndunthi de rä Zi Dada Jeoba ꞌne de rä mhäte?

³ Rä Zi Dada Jeoba ꞌnehe tꞌembäbi rä mhäte (1 Juan 4:​8, TNM). Nunä noya xa rä ntso̱hui ngeꞌä di nheki rä mhäte ha gatꞌho näꞌä pe̱fi. Näꞌä rä mhäte pe̱skägihu̱ xa rä dängi, xa tse̱di ꞌne di ntu̱ngi asta ko nuꞌu̱ yä jäꞌi hingi ne te dä bädi de Geꞌä (Mat. 5:​44, 45). Ha nunä ntꞌudi di nxadihu̱, ma gä ñähu̱ ndunthi de rä Zi Dada Jeoba ꞌne de rä mhäte. Mu̱ gä o̱thu̱ ntsꞌe̱di po gä pädihu̱ tenguꞌä rä mꞌu̱i rä Zi Dada Jeoba, geꞌä ma dä jakägihu̱ gä mädihu̱ ndunthi.

 RÄ ZI DADA JEOBA XA DI MÄKÄGIHU̱

4. ¿Te gi senti nubye̱ gi pädi ge rä Zi Dada Jeoba xa di mäkägihu̱? (Hyandi ꞌnehe rä foto).

⁴ Rä Zi Dada Jeoba xa di mäkägihu̱ (Sant. 5:11). Ha rä Mäkä Tꞌofo enä ge rä Zi Dada Jeoba ꞌñenä ngu nꞌa rä nänä näꞌä xa rä hojäꞌi (Is. 66:​12, 13). Imäjinä nꞌa rä nänä näꞌä the̱tsꞌi rä zi bätsi ꞌne zofo ko ndunthi rä mhäte. Ora zoni näꞌä zi bätsi o habu̱ xä ñꞌu̱, dämä ju̱tsꞌi, hoꞌti ꞌne umbäbi näꞌä japäbi mꞌe̱di. Geꞌä pe̱fi rä Zi Dada Jeoba ora di tumämu̱ihu̱. Po geꞌä nꞌa de nuꞌu̱ yä yꞌofo de rä Mäkä Tꞌofo bi ꞌñenä: «Ora nuꞌu̱ mä dumu̱i xa bi ziꞌti, Nuꞌi gä hotkägi ꞌne gä nupkägi mä mfeni» (Sal. 94:19).

5. ¿Por hanja dä za gä eñhu̱ ge rä mhäte rä Zi Dada Jeoba hingi faya?

⁵ Rä Zi Dada Jeoba nunka di fayagihu̱ (Sal. 103:8). Mäske rꞌabu̱ hingä geꞌä di pe̱fihu̱, Näꞌä nzäntho di mäkägihu̱. Mäyaꞌmu̱ yä jäꞌi de rä hnini Israel njatꞌä bi fayabi rä Zi Dada Jeoba. Pe ora nuꞌu̱ yä israelita xa mäjuäni mi arrepenti, rä Zi Dada Jeoba mi uti ge mi sigi mi mädi. Nꞌa rä pa rä Zi Dada Jeoba bi ꞌñembäbi rä hnini: «Dä numäñhoꞌi, ꞌne dä etsꞌäꞌi ri nsu, ꞌne nuga xa di mäꞌi» (Is. 43:​4, 5). Dä za gä mꞌu̱ihu̱ seguro ge rä Zi Dada Jeoba hinxä mpadi ꞌne xa di mäkägihu̱. Asta ora di kometehu̱ nꞌa rä däta pekado, Näꞌä hingi bandonägihu̱. Mu̱ gä udihu̱ ge xa mäjuäni di arrepentihu̱ ꞌne di honihu̱ rä Zi Dada Jeoba, näꞌä rä mhäte pe̱skägihu̱ hingä ma dä mpadi. Näꞌä di prometegihu̱ ge ma dä punꞌgägihu̱ mä tsꞌokihu̱ (Is. 55:7). Rä Mäkä Tꞌofo enä ge ora rä Zi Dada Jeoba di punꞌgägihu̱ mä tsꞌokihu̱, jakägihu̱ gä pe̱ꞌtsihu̱ yä pa temäꞌentho (Hech. 3:19).

6. ¿Te utkägihu̱ Zacarías 2:8 de rä Zi Dada Jeoba?

⁶ (Hñeti Zacarías 2:8). Rä Zi Dada Jeoba xa di mäkägihu̱ ꞌne di baloragihu̱ ja ngu di balora yä da. De gatꞌho mä ndoyꞌohu̱, mä dahu̱ geꞌä mänꞌa xa rä delicado. Hänge rä Zi Dada Jeoba ꞌñenä go engägihu̱: «Toꞌo u̱ñꞌäꞌihu̱ ꞌñenä go su̱ꞌti mä da». Koꞌmu̱ rä Zi Dada Jeoba xa di mäkägihu̱, ꞌnehe turämu̱i po näꞌä di sentihu̱ ꞌne xä ñhoki pa dä sugägihu̱ ꞌne dä ñängägihu̱. Ora handi ge di sufrihu̱, ꞌnehe di sufri. Hänge dä za gä xatuäbihu̱ rä Zi Dada Jeoba ꞌne gä embäbihu̱: «Sugägi ꞌne ñängägi ngu gi su ri da» (Sal. 17:8).

7. ¿Por hanja xa mähyoni gä kombensehu̱ mä mfenihu̱ ꞌne mä korasohu̱ ge rä Zi Dada Jeoba xa di mäkägihu̱?

⁷ Rä Zi Dada Jeoba ne ge nuꞌi gi mꞌu̱i kombensido ge näꞌä xa di mäꞌi. Mu̱ po nuꞌu̱ yä xuñha gi  thogi jaꞌi xä ñhei gi kamfri ge näꞌä di mäꞌi, rä Zi Dada Jeoba di komprendeꞌi por hanja gi senti njabu̱. Pe mähyoni gi yꞌo̱tꞌe ntsꞌe̱di pa gi kombense ri mfeni ꞌne ri koraso ge rä Zi Dada Jeoba xa di mäꞌi. ¿Te dä za dä maxꞌäꞌi? Pa geꞌä, ma gä handihu̱ hanja rä Zi Dada Jeoba di mädi rä Hesu, di mädi nuꞌu̱ xä huahni pa dä ma ha mähetsꞌi ꞌne hanja udi ge di mäkägihu̱ kada nꞌa de gekhu̱.

JEOBA MÄÄ HÄNGU RÄ MHÄTE SENTI

8. ¿Por hanja hinte mä duda mi pe̱ꞌtsi rä Hesu ge rä Zi Dada Jeoba xa mi mädi?

⁸ Rä Zi Dada Jeoba ko rä Tꞌu̱ xä kombibi dende o̱tꞌe yä miyontho yä je̱ya. Hänge di yoho ꞌmu̱i unido ꞌne di mädi nꞌa ngu mä nꞌaa. Otho mä nꞌa rä amista näꞌä xä dura yä miyontho yä je̱ya ja ngu näꞌä ja entre rä Zi Dada Jeoba ꞌne rä Tꞌu̱. Ha rä mfistꞌofo Mateo 17:5 rä Zi Dada Jeoba hingä ho̱nse̱ bi ꞌñenä ge xa di numäñho rä Tꞌu̱, sino bi ꞌñenä: «Gehni mä Tꞌu̱ xa di mädi ꞌne xa di numäñho». Hää, rä Zi Dada Jeoba ne gä pädihu̱ hängu di mädi ꞌne di numäñho rä Tꞌu̱ po gatꞌho näꞌä xä me̱fi (Efes. 1:7). Rä Hesu hinte mä duda mi pe̱ꞌtsi näꞌä mi senti rä Zi Dada Jeoba po geꞌä. Ndunthi yä mꞌiki rä Hesu bi mää ge rä Zi Dada Jeoba xa mi mädi (Juan 3:35; 10:17; 17:24).

9. ¿Te mä noya usa rä Mäkä Tꞌofo pa dä ꞌñudi hängu rä mhäte pe̱ꞌtsi rä Zi Dada Jeoba po kada nꞌa de nuꞌu̱ ma dä ma ha mähetsꞌi? (Romanos 5:5).

⁹ Jeoba ꞌnehe xipäbi hängu di mädi nuꞌu̱ xä huahni pa dä ma ha mähetsꞌi (hñeti Romanos 5:​5, TNM). Ha nunä testo di handihu̱ nunä noya «nhäꞌmi». Nꞌa rä diccionario enä ge nunä rä noya «nhäꞌmi» signifika ngu nꞌa rä däthe näꞌä yꞌo ꞌne xä ꞌñehe pa dä zu̱kägihu̱. ¡Njabu̱ rä ndunthi näꞌä rä mhäte senti rä Zi Dada Jeoba po nuꞌu̱ xä huahni pa dä ma ha mähetsꞌi! Nuyu̱ yä kristianu, pädi ge rä Zi Dada Jeoba xa di mädi kada nꞌa de geꞌu̱ (Jud. 1). Gatꞌho nuꞌu̱ to̱ꞌmi dä ma ha mähetsꞌi, senti näꞌä bi senti rä apostol Juan nuꞌmu̱ bi ꞌñenä: «¡Hyandihu̱ hängu di mäkägihu̱ rä Dada ꞌne asta engägihu̱ ge yä bätsigihu̱ Äjuä!» (1 Juan 3:​1, TNM). ¿Pe rä Zi Dada Jeoba di mädi ho̱nse̱ nuꞌu̱ ma dä ma ha mähetsꞌi? Hinä. Ma gä handihu̱ hanja rä Zi Dada Jeoba xä ꞌñudi ge di mädi kada nꞌa de nuꞌu̱ yä amigo pe̱päbi.

10. ¿Te mä däta prueba ja ge rä Zi Dada Jeoba xa di mäꞌi?

¹⁰ ¿Te mä prueba xä uni rä Zi Dada Jeoba pa dä ꞌñudi ge di mäkägihu̱? Rä Tꞌu̱. Nunä njutꞌi bi uni po gekhu̱ udi ge joꞌo mä nꞌa rä jäꞌi näꞌä di mäkägihu̱ ja nguꞌä (Juan 3:16; Rom. 5:8). Rä Zi Dada Jeoba bi ntrega näꞌä rä Tꞌu̱ xa mi mädi, ꞌne bi hyopäbi dä du po gekhu̱ pa njabu̱ dä za dä punꞌgägihu̱ mä pekado ꞌne dä za gä pe̱ꞌtsihu̱ nꞌa rä hogä amista Kongeꞌä (1 Juan 4:10). Mu̱ gä hudihu̱ gä ntso̱ꞌmihu̱ näꞌä rä presio bi gutꞌi rä Zi Dada Jeoba ꞌne rä Hesu po gekhu̱, mänꞌa ma gä ntiendehu̱ hängu di mäkägihu̱ kada nꞌa de gekhu̱ (Gál. 2:20). Rä Zi Dada Jeoba himbi uni näꞌä njutꞌiꞌä ho̱nse̱ pa dä kumpli nꞌa rä ley, sino bi mꞌu̱i dispuesto dä uni rä hmäkä Tꞌu̱ ngeꞌä xa di mäkägihu̱. De gatꞌho näꞌä mi pe̱ꞌtsi rä Zi Dada Jeoba, bi uni näꞌä mänꞌa xa mi ja rä muui. Hää, bä pe̱hni rä Tꞌu̱ pa bi sufri ꞌne bi du po gekhu̱.

11. ¿Te di handihu̱ ha Jeremías 31:3?

¹¹ Ja ngu ya dä handihu̱, rä Zi Dada Jeoba hingä ho̱nse̱ di senti rä mhäte po gekhu̱, sino ke di ho dä xikägihu̱ hängu di mäkägihu̱ (hñeti Jeremías 31:3). Di mbitagihu̱ gä jonihu̱ Kongeꞌä ngeꞌä xa di mäkägihu̱ (hyandi ꞌnehe te mää Deuteronomio 7:​7, 8). Ninꞌa rä jäꞌi, ninꞌa rä tꞌo̱tꞌe ma dä za dä ꞌuegägihu̱ de rä Zi Dada Jeoba ꞌne de näꞌä rä mhäte pe̱skägihu̱ (Rom. 8:​38, 39). Xi nuꞌi, ¿te gi senti ora gi pädi hängu di mäꞌi rä Zi Dada Jeoba? Nubye̱ ma gä hetihu̱ Salmo 23. Mientra gi o̱de o gi handi näꞌä mää, hyandi te bi senti David ora bi bädi ge rä Zi Dada Jeoba xa mi mädi, ꞌne yꞌe̱ntꞌi ha ri mfeni ꞌne ha ri koraso ꞌnehe näꞌä rä mhäteꞌä.

 ¿TE GI SENTI NUBYE̱ GI PÄDI HÄNGU DI MÄꞌI RÄ ZI DADA JEOBA?

12. ¿Te pede rä Salmo 23?

¹² (Hñeti Salmo 23:​1-6). Ha rä Salmo 23 di handihu̱ hanja David bi ꞌñudi ge hinte mä duda mi pe̱ꞌtsi ge rä Zi Dada Jeoba xa mi mädi ꞌne mi jamäsu. Nuua di handihu̱ ge näꞌä bi ꞌñenä ge rä Zi Dada Jeoba mi nꞌa rä Mayꞌo pa geꞌä ꞌne bi ꞌñudi te mä amista mi pe̱ꞌtsi kongeꞌä. David hinte mi tsu ngeꞌä mi pädi ge rä Zi Dada Jeoba mi gu̱hni ꞌne mi uti rä ꞌñuu. Po geꞌä David bi hñutsꞌi gatꞌho rä komfiansa ha rä Zi Dada Jeoba. David mi pädi ge rä Zi Dada Jeoba mi mädi hyaxtho ꞌne bi mädi durante rä bida. Pe ma gä handihu̱ por hanja David xa mi pe̱ꞌspäbi rä komfiansa rä Zi Dada Jeoba.

13. ¿Te mi pädi xä ñho David?

¹³ «Hinte ma dä mꞌe̱kägi». David xki hyandi hanja rä Zi Dada Jeoba mi su ꞌne nunka te xki ꞌme̱ꞌtuäbi. Mi pädi ge mi pe̱ꞌtsi nꞌa rä hogä ntsitsꞌi kongeꞌä ꞌne ge rä Zi Dada Jeoba mi numäñho. Hänge David mi pädi xä ñho ge dä thogiꞌä dä thogi, rä Zi Dada Jeoba ma xä umbäbi gatꞌho näꞌä mi japäbi mꞌe̱di. Mi pädi xä ñho ge näꞌä rä mhäte mi pe̱ꞌtsi rä Zi Dada Jeoba po geꞌä, mänꞌa xi mrä dängi ke gatꞌho nuꞌu̱ yä dumu̱i pe̱ꞌtsi. Geꞌä mi japäbi David dä johya ꞌne dä senti xä ñho (Sal. 16:11).

14. ¿Hanja udi rä Zi Dada Jeoba ge sugägihu̱?

¹⁴ Rä Zi Dada Jeoba sugägihu̱ ko ndunthi rä mhäte mänꞌa ora di thogihu̱ yä xuñha. Njabu̱ bi thogi rä zi nju Claire. a Nunä zi nju ya o̱tꞌe thogi de 20 nje̱ya pe̱päbi rä Zi Dada Jeoba ha rä ngu Betel. Nunä zi nju pede ge himi pädi te dä me̱fi nuꞌmu̱ rä familia bi thogi ndunthi yä xuñha. Rä dada bi zu̱di nꞌa rä infarto, nꞌa rä nju bi bo̱ni de rä hnini rä Zi Dada Jeoba, yä dada bi  ꞌme̱di näꞌä rä negosio mi pe̱ꞌtsi hänge bi thogi yä ñꞌäbojä ꞌne bi ꞌme̱di yä nguu. ¿Hanja bi ꞌñudi rä Zi Dada Jeoba ge mi su nuyu̱ yä ku? Rä zi nju Claire enä: «Rä Zi Dada Jeoba bi nkargo bi su mä familia ꞌne bi umbäbi näꞌä mi japäbi mꞌe̱di kada nꞌa rä pa. Gä beni hanja rä Zi Dada Jeoba xä maxkägi, geꞌä rꞌakägi rä tsꞌe̱di ora tso̱kägi yä xuñha».

15. ¿Habu̱ bä hä rä tsꞌe̱di David ora mi thogi po ndunthi yä xuñha? (Hyandi ꞌnehe rä foto).

¹⁵ «Japi dä nja mä tsꞌe̱di mänꞌaki». David mi thogi po ndunthi yä xuñha ꞌne xa mi turämu̱i (Sal. 18:​4-6). Pe bi hyandi hanja rä Zi Dada Jeoba mi su, hänge bi ꞌñenä: «Tsixkägi gä ntsaya habu̱ ja yä kꞌamä tꞌe̱i; tsixkägi gä ntsaya habu̱ ja ndunthi rä dehe». Hää, David bi hyandi hanja rä Zi Dada Jeoba bi umbäbi rä tsꞌe̱di pa bi sigi bi me̱päbi ko ndunthi rä johya (Sal. 18:​28-32).

16. Xi nuꞌi, ¿hanja xkä senti ge rä Zi Dada Jeoba xä rꞌaꞌi rä tsꞌe̱di?

¹⁶ Ora di thogihu̱ yä däta xuñha, di mbenihu̱ ngu rä profeta Jeremías ora bi ꞌñenä: «Tobe di tehu̱ po ränge näꞌä rä mhäte hingi faya ehe de rä Zi Dada Jeoba» (Lam. 3:22; Col. 1:11). Ma gä handihu̱ te bi thogi rä zi nju Rachel. Nunä zi nju xa bi zamäñꞌu̱ nuꞌmu̱ rä däme bi hyatꞌi ko mä nꞌa rä ꞌme̱hñä durante näꞌä rä tiempo bi nja rä COVID-19. ¿Te bi me̱fi rä Zi Dada Jeoba pa bi matsꞌi Rachel? Nunä zi nju enä: «Rä Zi Dada Jeoba bi ꞌñudi hängu mi mäkägi. Bi rꞌakägi ndunthi yä amigo nuꞌu̱ mi ꞌueke yä tiempo pa dä ñä kongeki, pa mi häskägi rä ñhuni, pa mi opkägi yä karta ꞌne pa mi bengägi yä testo de rä Mäkä Tꞌofo. Gatꞌho yä zi ku mi bengägi hängu mi mäkägi rä Zi Dada Jeoba ꞌne mi sugägi. Xa di umbäbi njamädi rä Zi Dada Jeoba po nunä dängä familia xä rꞌakägi ꞌne di mäkägi».

17. ¿Por hanja David bi ꞌñenä ge hinte mi tsu?

¹⁷ «Hinte di tsu ngeꞌä nuꞌi gi yꞌo kongeki». David bi me̱ꞌtsi ndunthi yä nkontra ꞌne ndunthi yä mꞌiki bi mꞌu̱i en peligro rä bida. Pe rä mhäte rä Zi Dada Jeoba geꞌä mi japäbi hinte dä zu. Mi senti hanja rä Zi Dada Jeoba mi su ꞌne mi ꞌmu̱i nzäntho kongeꞌä. Po geꞌä David bi ꞌñenä: «Dä ambäbi rä Zi Dada Jeoba te gä pe̱fi ꞌne näꞌä bi dädi mä sadi. Näꞌä bi hñägägi gatꞌho nuꞌu̱ mä ntsu ndi ñꞌoꞌme» (Sal. 34:4). David bi ñhandui ndunthi yä peligro, pe rä mhäte rä Zi Dada Jeoba mänꞌa mi tse̱di ke gatꞌho nuꞌu̱ yä nkontra ꞌne nuꞌu̱ yä tꞌo̱tꞌe mi japäbi dä ntsu.

18. Ora di thogihu̱ yä däta xuñha näꞌä jakägihu̱ gä ntsuhu̱, ¿hanja faxkägihu̱ gä pädihu̱ ge rä Zi Dada Jeoba xa di mäkägihu̱?

¹⁸ Gä pädihu̱ ge rä Zi Dada Jeoba xa di mäkägihu̱, geꞌä ma dä maxkägihu̱ ora di ñhanduihu̱  nuꞌu̱ yä tꞌo̱tꞌe jakägihu̱ gä ntsuhu̱. Nꞌa rä precursora rä thuhu Susi mää te bi senti nuꞌmu̱ rä tꞌu̱ bi ñhose̱. Nuni zi nju enä: «Ora mä däme ꞌne nuga dä handihe näꞌä bi me̱fi mä tꞌu̱he, dä sentihe ndunthi rä u̱gi ꞌne dä sentihe ge dä ꞌme̱dihe mä mfenihe. Pe näꞌä rä mhäte xä rꞌakägihe rä Zi Dada Jeoba, xä jakägihe gä handihe hanja di sugägihe ꞌne di ñängägihe». Rachel, näꞌä rä zi nju ya dä no̱nihu̱ ha rä parrafo 16 enä: «Nꞌa rä xui xa dä ntso̱ꞌmi ꞌne xa dä tumämu̱i. Ndi senti ge ya hingä ma xtä ze̱ti. Hänge xa dä nzoni ꞌne dä xatuäbi rä Zi Dada Jeoba. Dä senti hanja rä Zi Dada Jeoba bi maxkägi, ꞌñenä go bi hu̱figi ꞌne bi hotkägi ja ngu pe̱fi nꞌa rä nänä ko rä zi ꞌue̱ne. Mꞌe̱fa de dä xatuäbi rä Zi Dada Jeoba bi za dä ähä. Nunka ma gä pumfri hanja bi maxkägi rä Zi Dada Jeoba». Nꞌa rä anciano rä thuhu Tasos bi thogi goho nje̱ya ha rä fadi ngeꞌä himbi ne bi yu̱tꞌi de gä soldado nuꞌmu̱ yä autorida bi mändabi. Nuni zi ku enä: «Rä Zi Dada Jeoba bi sugägi ko ndunthi rä mhäte. Bi rꞌakägi gatꞌho näꞌä mi jakägi mꞌe̱di ꞌne geꞌä bi jakägi gä pe̱ꞌspäbi ndunthi rä komfiansa. Bi rꞌakägi de rä mäkä tsꞌe̱di ꞌne geꞌä bi jakägi gä mꞌu̱i ko rä johya mäske ndi o fadi. Kongehnä dä handi ge entremäs gä pe̱ꞌspäbihu̱ rä komfiansa rä Zi Dada Jeoba, mänꞌa ma gä sentihu̱ ge di mäkägihu̱. Hänge mäske ndi o fadi, dä desidi gä mprecursor regular».

KUATꞌI RÄ ZI DADA JEOBA NGEꞌÄ NÄꞌÄ DI MÄꞌI

19. a) ¿Te dä hogi gi xipäbi rä Zi Dada Jeoba ora gi xatuäbi? b) ¿Te mä testo de rä Mäkä Tꞌofo ñä de rä mhäte rä Zi Dada Jeoba ꞌne ndaꞌä mänꞌa gi hoge? (Hyandi rä rekuadro « Rꞌa yä testo nuꞌu̱ ma dä maxꞌäꞌi gi senti rä mhäte rä Zi Dada Jeoba»).

¹⁹ Nuꞌu̱ yä esperiensia yä ku dä handihu̱, udi ge rä Zi Dada Jeoba näꞌä turämu̱i ꞌne mäkägihu̱ kada nꞌa de gekhu̱ (2 Cor. 13:11). Hinte mä duda di pe̱ꞌtsihu̱ ge rä Zi Dada Jeoba hingi fayagihu̱ ꞌne pantꞌägihu̱ ko rä mhäte (Sal. 32:10). Mu̱ njatꞌä gi beni hanja rä Zi Dada Jeoba xä ꞌñudi rä mhäte po geꞌi, mänꞌa ma gi hyandi ngu ri amigo ꞌne mänꞌa ma gi senti getbu̱ de Geꞌä. Dä hogi gi xatuäbi ꞌne gi xipäbi hängu gi honi rä mhäte. Dä za gi xipäbi gatꞌho näꞌä jaꞌi gi turimu̱i o te mä tꞌo̱tꞌe jaꞌi gi ntsu. Ogi duda ge näꞌä di ntiende hanja gi senti ꞌne ge ꞌmu̱i dispuesto dä maxꞌäꞌi (Sal. 145:​18, 19).

20. ¿Por hanja hindi ne gä ꞌuegehu̱ de rä Zi Dada Jeoba?

²⁰ Rä mhäte rä Zi Dada Jeoba xa jakägihu̱ gä tsamäñhohu̱; ꞌñenä nꞌa rä faspi habu̱ di mpaꞌtihu̱ ora xi xä tse̱. Mäske rä Zi Dada Jeoba xa ja ndunthi rä tsꞌe̱di, ꞌnehe xa rä hojäꞌi ꞌne xa di mäkägihu̱. ¿Hänge xa di johyahu̱ gä pädihu̱ hängu di mäkägihu̱ rä Zi Dada Jeoba? Hänge ma gä sigihu̱ gä honihu̱ rä Zi Dada Jeoba pa gä pädihu̱ toꞌoꞌä ꞌne dä za gä eñhu̱ ꞌnehe: «¡Nuga xa di mädi Jeoba!» (Sal. 116:1).